Koninkryksverkondigers berig
Die goeie nuus word verkondig “tot aan die uiterste van die aarde”
“HIERDIE evangelie van die koninkryk sal verkondig word in die hele wêreld tot ’n getuienis vir al die nasies; en dan sal die einde kom.” Dit het Jesus ’n rukkie voor sy dood aan sy dissipels gesê. Kort na sy opstanding het hy ook gesê: “Julle sal my getuies wees in Jerusalem sowel as in die hele Judea en Samaria en tot aan die uiterste van die aarde” (Mattheüs 24:14; Handelinge 1:8). Vandag word hierdie profesieë in meer as 200 lande, onder andere die Suid-Amerikaanse land Peru, vervul.
Oor die 32 000 Getuies verkondig die goeie nuus in daardie pragtige land, en hulle gebied sluit beslis die uiterste dele van die aarde in: die hoë Andes, wat op plekke tussen 4 000 en 4 500 meter hoog is, en ook die warm Amasonewoud, waar mense slegs met rivierbote bereik kan word. Die takkantoor in Peru berig:
◻ “Ons het agt spesiale pioniers aangewys om met twee rivierbootjies wat lanchas genoem word in die woudgebied te werk. Hierdie bootjies het ’n dieptegang van slegs [0,3 meter], wat dit moontlik gemaak het om talle nuwe gebiede langs die kleiner riviere met die goeie nuus te bereik. Die broers wat hierdie bootjies gebruik, het reeds honderdduisende tydskrifte, boeke en Bybels oral in die Peruviaanse Amasonevallei versprei. As ’n regstreekse uitvloeisel hiervan is vier nuwe gemeentes gestig en vyf afgesonderde groepe georganiseer wat velddiens rapporteer en vergaderinge hou. Ons hoop dat hierdie groepe binnekort gemeentes sal word.”
◻ Een wouddorp het ontwikkel om ’n pompstasie vir die Trans-Andes-oliepyplyn, wat olie van die woudgebied oor die hoë Andes tot by die weskus vervoer. Vanweë die teenwoordigheid van die oliepyplynwerkers het hierdie dorp sowat 20 kroeë gehad en het dit berug geword as ’n plek van dronkenskap en losbandigheid. Maar nadat die spesiale pioniers ’n deeglike getuienis daar gelewer het, het baie aan die Koninkryksboodskap gehoor gegee, en nou is daar nog net vier kroeë in die dorp! Gedurende ’n onlangse besoek van die kringopsiener het 189 mense na die openbare toespraak gekom. Daar is nou ’n groep van 7 verkondigers in die dorp, en meer as 45 mense woon alle vergaderinge by. Met Jehovah se seën behoort die groep binnekort ’n gemeente te word.
◻ In een van die 221 gemeentes in Peru se hoofstad, Lima, vertel ’n 29-jarige man hoe hy die waarheid gekry het. Nadat hy die skool op 13-jarige ouderdom verlaat het, het hy by ’n bende woestaards aangesluit en ’n lewe begin lei wat uit bakleiery, dwelmgebruik en onsedelikheid bestaan het. Na twee jaar krygsplig het hy geestesprobleme begin ondervind. Toe, in 1983, het ’n nederige, beskeie suster hom in haar bediening van huis tot huis ontmoet. Vir die eerste keer het hy gehoor van die nuwe wêreld van liefde en vrede. ’n Bybelstudie is met hom begin en met die liefdevolle hulp van die gemeente en Jehovah se krag was hy in staat om sy lewe te verander. In 1986 is hy gedoop en dien nou as ’n bedieningskneg in die gemeente.
Jesus se woorde dat die Koninkryk verkondig sal word “tot aan die uiterste van die aarde” word beslis in Peru vervul met wonderlike resultate, tot die seën van baie in die land wat honger en dors na die waarheid.