Eer Jehovah—Waarom en hoe?
“Die wat My eer, sal Ek eer; maar die wat My verag, sal veragtelik wees.”—1 SAMUEL 2:30.
1. Aan wie word die wêreldberoemde Nobelpryse toegeken, en hoe beskou baie mense hierdie toekennings?
ELKE jaar bekroon vier Skandinawiese instansies diegene wat ‘in die voorafgaande jaar die grootste weldade aan die mensdom bewys het’ met Nobelpryse. Die pryse word vir prestasies op ses gebiede toegeken. Baie mense beskou ’n Nobelprys as die grootste eer wat enige mens kan ontvang.
2. Wie word deur diegene wat Nobelpryse toeken oor die hoof gesien, en waarom verdien Hy in die besonder eer?
2 Terwyl daar niks mee verkeerd is om eer te bewys aan verdienstelike mense nie, is die vraag of diegene wat hierdie eer bewys ooit daaraan dink om die mensdom se grootste Weldoener te vereer? Daardie Weldoener is die een wat die mensdom op tallose maniere bevoordeel het sedert hy die eerste man en vrou sowat 6 000 jaar gelede geskep het. Die feit dat mense dikwels nalaat om hom te eer, herinner ons dalk aan die woorde van Elihu, die vriend van Job uit die ou tyd, wat gesê het: “Maar niemand sê nie: Waar is God, my Maker, wat lofsange gee in die nag” (Job 35:10). Ons groot Weldoener hou aan om “goed te doen, van die hemel vir ons reën en vrugbare tye te gee en ons harte met voedsel en vrolikheid te vervul” (Handelinge 14:16, 17; Mattheüs 5:45). Jehovah is werklik die Gewer van “elke goeie gif en elke volmaakte gawe”.—Jakobus 1:17.
Wat dit beteken om eer te gee
3. Wat is die vernaamste Hebreeuse en Griekse woorde wat met “eer” vertaal word, en wat beteken hulle?
3 Die vernaamste Hebreeuse woord vir eer, ka·vohdhʹ, beteken letterlik “swaarte”. Iemand wat geëer word, word dus beskou as gewigtig, indrukwekkend of as iemand wat iets beteken. Dit is betekenisvol dat hierdie Hebreeuse woord, ka·vohdhʹ, ook dikwels in die Skrif as “heerlikheid” vertaal word, wat verder toon hoe indrukwekkend of belangrik die geëerde persoon gereken word. ’n Ander Hebreeuse woord, jeqarʹ, wat in die Skrif as “eer” vertaal word, word ook met “kosbaar” en “kosbare dinge” vertaal. In die Hebreeuse Geskrifte word die woord eer derhalwe met heerlikheid en kosbaarheid gekoppel. Die Griekse woord wat in die Bybel met “eer” vertaal word, is ti·meʹ, en dit het ook die sin van agting, waarde en kosbaarheid.
4, 5. (a) Wat beteken dit om iemand eer te bewys? (b) Watter situasie wat in Ester 6:1-9 opgeteken is, lig toe wat dit behels om iemand eer te bewys?
4 ’n Mens eer dus iemand anders deur daardie persoon diepe respek en agting te betoon. Beskou ter toeligting die situasie wat in die Bybel met betrekking tot die getroue Jood Mordegai beskryf word. Mordegai het een maal ’n komplot teen die lewe van koning Ahasveros van eertydse Persië blootgelê. Later, een nag toe die koning nie kon slaap nie, is Mordegai se optrede onder die koning se aandag gebring. Daarom het hy sy dienaars gevra: “Watter eer en verhoging het Mordegai daarvoor te beurt geval?” Hulle het geantwoord: “Met hom het niks gebeur nie.” Hoe ontnugterend tog! Mordegai het die koning se lewe gered, en tog het die koning nie waardering daarvoor betoon nie.—Ester 6:1-3.
5 Gevolglik het Ahasveros op ’n gepaste tyd sy eerste minister, Haman, gevra wat die beste manier sou wees waarop die koning eer kan bewys aan iemand wat hom behaag het. Haman het dadelik in sy hart gedink: “Aan wie sal die koning eer wil bewys meer as aan my?” Daarom het Haman gesê dat die persoon met “’n koninklike kleed” geklee moes word en dat hy op “’n perd [moes ry] waar die koning op gery het”. Hy het afgesluit: “Hulle moet hom laat ry op die perd oor die stadsplein en voor hom uitroep: So word gedoen aan die man aan wie die koning eer wil bewys” (Ester 6:4-9). Iemand wat so geëer is, sou deur al die mense hooggeag word.
Waarom Jehovah eer verdien
6. (a) Wie verdien meer eer as enigiemand anders? (b) Waarom is die woord “groots” ’n goeie beskrywing van Jehovah?
6 Deur die geskiedenis heen is daar aan mense eer bewys, dikwels onverdiend (Handelinge 12:21-23). Maar wie verdien meer eer as enigiemand anders? Jehovah God natuurlik! Hy verdien ons eer omdat hy beslis groots is. Hy word dikwels “groots” genoem. Hy is die Grootse, die Grootse Maker, die Grootse Skepper, die Grootse Koning, die Grootse Onderrigter, die Grootse Meester (Psalm 48:2, NW; Prediker 12:1, NW; Jesaja 30:20, NW; 42:5, NW; 54:5, NW; Hosea 12:14, NW). Die een wat groots is, is majestueus, waardig, verhewe, edel, luisterryk en ontsagwekkend. Jehovah is weergaloos, hy is sonder gelyke, hy is allesoortreffend. Hy getuig self van daardie feit en sê: “By wie wil julle My vergelyk en My net so maak en My gelykstel, dat ons eenders kan wees?”—Jesaja 46:5.
7. Op ten minste hoeveel gebiede is Jehovah God uniek, en waarom kan daar gesê word dat hy onvergelyklik is wat gesag betref?
7 Jehovah God is beslis op ten minste sewe gebiede onvergelyklik, wat ons spesifieke redes gee om hom te eer. In die eerste plek verdien Jehovah God die grootste eer omdat hy weergaloos in gesag is. Die Heer Jehovah is die Universele Soewerein—hy is oppermagtig. Hy is ons Regter, Wetgewer en Koning. Almal in die hemel en op aarde moet aan Hom verantwoording doen; en tog hoef hy aan niemand verantwoording te doen nie. Hy word tereg beskryf as ‘groot, magtig en gedug’.—Deuteronomium 10:17; Jesaja 33:22, NW; Daniël 4:35.
8. Waarom kan daar gesê word dat Jehovah weergaloos is (a) wat sy posisie betref? (b) wat sy ewige bestaan betref?
8 In die tweede plek verdien Jehovah God die grootste eer omdat hy weergaloos is wat sy posisie betref. Hy is “die Hoë en Verhewene”, die Allerhoogste. Hy toring ondenkbaar ver bo al sy aardse skepsele uit! (Jesaja 40:15; 57:15; Psalm 83:19). In die derde plek moet Jehovah God bo alle ander geëer word omdat hy sonder gelyke is wat sy ewige bestaan betref. Net hy het nooit ’n begin gehad nie omdat hy van ewigheid tot ewigheid is.—Psalm 90:2; 1 Timotheüs 1:17, NW.
9. Op watter manier is Jehovah onvergelyklik (a) wat sy heerlikheid betref? (b) wat sy basiese eienskappe betref?
9 In die vierde plek verdien Jehovah God die grootste eer weens die grootsheid van sy persoonlike heerlikheid. Hy is “die Vader van die hemelse ligte”. Sy liggaam is so skitterend dat geen mens hom kan sien en bly lewe nie. Hy is waarlik ontsagwekkend (Jakobus 1:17, NW; Exodus 33:22; Psalm 24:10). In die vyfde plek is ons Jehovah God die grootste eer verskuldig weens sy wonderlike eienskappe. Hy is almagtig, met eindelose mag; hy is alwetend, met eindelose wysheid; hy is absoluut volmaak in geregtigheid; en hy is die verpersoonliking van liefde.—Job 37:23; Spreuke 3:19; Daniël 4:37; 1 Johannes 4:8.
10. Op watter manier is Jehovah sonder gelyke (a) weens sy skeppingswerke en besittings? (b) weens sy naam en reputasie?
10 In die sesde plek verdien Jehovah God die grootste moontlike eer weens sy groot skeppingswerke. As die Skepper van alle dinge in die hemel en op aarde is hy terselfdertyd die Groot Eienaar van alle dinge. Ons lees in Psalm 89:12: “Aan U behoort die hemel, aan U ook die aarde.” In die sewende plek verdien Jehovah onse God ons eer meer as enigiemand anders omdat hy weergaloos is, sonder gelyke wat sy naam en reputasie betref. Net hy dra die naam Jehovah, wat beteken “Hy laat word”.—Sien Genesis 2:4, voetnoot in NW-naslaanuitgawe.
Hoe om Jehovah te eer
11. (a) Wat is ’n paar maniere waarop ons Jehovah kan eer? (b) Hoe kan ons toon dat ons Jehovah werklik eer deur op hom te vertrou?
11 Hoe kan ons Jehovah eer as ons aan al sy eienskappe dink? Soos ons sal sien, kan ons hom eer deur hom te vrees en hom eerbied te bewys, deur hom te gehoorsaam, deur hom in al ons weë te ken, deur offerandes te bring, deur hom na te volg en smekinge tot hom te rig. Ons kan hom ook eer deur geloof in hom te beoefen en op hom te vertrou ongeag wat gebeur. “Vertrou op die HERE met jou hele hart”, word ons gemaan. Daarom eer ons Jehovah God deur sy woord te vertrou. Hy sê byvoorbeeld: “Wees nie bevrees nie, want Ek is met jou; kyk nie angstig rond nie, want Ek is jou God. Ek versterk jou, ook help Ek jou” (Spreuke 3:5; Jesaja 41:10). As ons hom nie ten volle vertrou nie, doen ons hom oneer aan.
12. Watter rol speel gehoorsaamheid en vrees wat eer aan Jehovah betref?
12 ’n Manier waarop ons Jehovah God eer wat nou verwant is hieraan is deur hom te gehoorsaam. En godvrugtige vrees, ja, vrees om God te mishaag, is noodsaaklik vir gehoorsaamheid. Jehovah se woorde aan Abraham nadat Abraham Isak gehoorsaam probeer offer het, toon die verhouding tussen vrees en gehoorsaamheid. “Nou weet Ek dat jy God vrees”, het Jehovah gesê (Genesis 22:12). Toe die apostel Paulus bespreek het wat kinders aan hulle ouers verskuldig is, het hy ook getoon dat gehoorsaamheid en eer hand aan hand gaan (Efesiërs 6:1-3). Ons eer Jehovah dus deur sy gebooie te gehoorsaam, en hulle is nie swaar nie. As ons ongehoorsaam is aan Jehovah God, doen ons hom ongetwyfeld oneer aan.—1 Johannes 5:3.
13. Watter gesindheid sal ons met betrekking tot ons bedrywighede en planne hê as ons God eer?
13 Daarbenewens kan ons Jehovah God die verskuldigde eer gee deur ag te slaan op die raad in Spreuke 3:6: “Ken Hom in al jou weë, dan sal Hý jou paaie gelykmaak.” Die dissipel Jakobus gee ons goeie raad in hierdie verband. Pleks van selfversekerd van dag tot dag te gaan en op ons eie vermoëns te vertrou, moet ons sê: “As die Here wil en ons lewe, dan sal ons dit of dat doen” (Jakobus 4:15). Jare gelede het die Internasionale Bybelstudente die gewoonte gehad om die afkorting D.V., wat staan vir Deo volente, of “as die Here wil”, by alle verklarings oor die toekoms te voeg.
14. (a) Watter gesindheid moet ons ten opsigte van ons pogings hê as ons God wil eer? (b) Watter gesindheid word getoon met betrekking tot die publikasie van die Wagtoringgenootskap se lektuur?
14 Ons eer Jehovah God ook deur ’n nederige gesindheid aan die dag te lê, en aan God die eer te gee vir al die welslae wat ons geniet. Die apostel Paulus het tereg aangaande sy bediening gesê: “Ek het geplant, Apollos het natgemaak, maar God het laat groei. So is dan hy wat plant of hy wat natmaak niks nie, maar God wat laat groei” (1 Korinthiërs 3:6, 7). Paulus was werklik besorg daaroor om God die verskuldigde eer te gee, en dit nie vir homself of enige ander mens toe te eien nie. Daarom identifiseer die publikasies van die Wagtoringgenootskap vandag ook nie wie hulle skryf nie, en skrywers vermy dit om ander te laat weet wat hulle bygedra het. Sodoende word die aandag op die inligting, wat bedoel is om Jehovah te eer, gevestig en nie op enige mens nie.
15. Watter ondervinding lig toe dat party mense dit moeilik vind om die beskeidenheid van Jehovah se Getuies te verstaan?
15 Hierdie beleid om die aandag op Jehovah te vestig, en hom sodoende te eer, verbaas party mense. ’n Paar jaar gelede, terwyl die Getuies besig was om ’n klankstelsel vir ’n openbare toespraak in New York se Central Park op te stel, het hulle een van die bandopnames met Kingdom Melodies gespeel om die stelsel te toets. ’n Deftig geklede paartjie het een van die Getuies gevra wat die musiek was. Hy het gedink dat hulle Getuies was en het geantwoord: “Dit is Kingdom Melodies nr. 4.” “Ja, maar wie het daardie musiek gekomponeer?” het hulle gevra. Die Getuie het gesê: “O, die komponis is anoniem.” Die paartjie het daarop geantwoord: “Mense wat sulke musiek komponeer, doen dit nie anoniem nie.” Die Getuie het geantwoord: “Maar Jehovah se Getuies doen dit.” Ja, hulle doen dit sodat alle eer aan Jehovah God gegee kan word!
16. Op watter verskillende maniere kan ons ons stem gebruik om Jehovah God te eer?
16 ’n Ander manier waarop ons Jehovah kan eer, is deur ons lippe te gebruik om van hom te getuig. As ons werklik besorg is daaroor om hom te eer, sal ons die goeie nuus van die Koninkryk pligsgetrou versprei. Ons kan dit doen deur van huis tot huis te gaan en gebruik te maak van watter ander maniere ook al vir ons moontlik is, en deur nie geleenthede om informeel te getuig oor die hoof te sien nie (Johannes 4:6-26; Handelinge 5:42; 20:20). Daarbenewens het ons geleenthede om ons God met ons stem by ons gemeentelike vergaderinge te eer, deur antwoorde te gee sowel as om ons Koninkryksliedere hartlik saam te sing (Hebreërs 2:12; 10:24, 25). In ons daaglikse gesprekke kan ons Jehovah God ook met ons lippe eer. Ons kan die gesprek met ’n bietjie inspanning in ’n opbouende geestelike rigting stuur, en dit sal tot gevolg hê dat ons Jehovah God eer.—Psalm 145:2.
17. (a) Hoe hou regte gedrag verband met die eer wat ons Jehovah gee? (b) Wat is die gevolge van verkeerde gedrag?
17 Al is dit goed om Jehovah God met ons lippe te eer, moet ons hom ook deur ons gedrag eer. Jesus het diegene veroordeel wat God met hulle lippe geëer het terwyl hulle harte ver van Hom af was (Markus 7:6). Verkeerde gedrag sal Jehovah God beslis oneer aandoen. In Romeine 2:23, 24 lees ons byvoorbeeld: “Jy wat jou op die wet beroem, onteer jy God deur die oortreding van die wet? Want, soos geskrywe is, die Naam van God word om julle ontwil onder die heidene gelaster.” In onlangse jare is daar jaarliks derduisende mense uit die gemeentes van Jehovah se volk gesit. Daar is waarskynlik selfs meer wat hulle aan oneervolle gedrag skuldig gemaak het, maar wat nie uitgesit is nie omdat hulle ’n waarlik berouvolle gesindheid aan die dag gelê het. Al hierdie mense het Jehovah met hulle lippe geëer, maar hulle het dit nie met hulle gedrag gedoen nie.
18. (a) Waaroor moet sekere persone wat groot voorregte het besorg wees as hulle Jehovah die verskuldigde eer wil betoon? (b) Hoe lig die situasie met party priesters in Maleagi se dag toe waarom hulle daaroor besorg moet wees?
18 Diegene wat in verskillende aspekte van die voltydse diens deelneem—hetsy dit in Bethel, as reisende opsieners, sendelinge of pioniers—het ’n groot voordeel met betrekking tot hulle geleenthede om tot die verering van Jehovah by te dra. Hulle het die verpligting om hulle bes te doen, ongeag die taak wat aan hulle toegewys word, en om ‘in die minste sowel as in die grote getrou te wees’ (Lukas 16:10). In sommige opsigte is hulle eerbare posisie toegelig, hoewel nie voorafgeskadu nie, deur die priesters en die Leviete in eertydse Israel. Maar weens die nalatigheid van party priesters in Maleagi se dag het Jehovah vir hulle gesê: “As Ek dan ’n Vader is, waar is my eer? En as Ek ’n Heer is, waar is die vrees vir My?” (Maleagi 1:6). Daardie priesters het God se naam verag deur blinde, lam en siek diere as offerandes te bring. As diegene met spesiale diensvoorregte nie hulle uiterste bes doen nie, kan veral hulle die bestraffing verdien wat Jehovah God oor daardie priesters uitgespreek het. Hulle sal te kort skiet wat hulle verering van God betref.
19. (a) Wat is ’n verdere manier om Jehovah te eer, soos in Spreuke 3:9 opgeteken is? (b) Wat is ’n ander belangrike manier om Jehovah te eer?
19 ’n Ander manier waarop ons Jehovah God kan eer, is deur geldelik by te dra tot die wêreldwye predikingswerk wat hy gemagtig het. “Vereer die HERE uit jou goed en uit die eerstelinge van al jou inkomste”, word ons aangespoor (Spreuke 3:9). Die voorreg om sulke bydraes te maak, is ’n geleentheid om Jehovah God te eer wat niemand oor die hoof moet sien nie. Ons kan Jehovah God ook in ons gebede eer, deur hom te loof en te dank (1 Kronieke 29:10-13). Trouens, omdat ons in nederigheid en met diepe eerbied na God kom, is die blote feit dat ons in gebed tot hom nader ’n eerbewys aan hom.
20. (a) Wie word oor die algemeen deur wêreldse mense geëer, en hoe? (b) As ons watter gebod navolg, sal ons Jehovah verder eer?
20 Vandag eer baie mense, veral jongmense, diegene wat hulle bewonder deur hulle na te doen—deur soos hulle te praat of op te tree. Dikwels is die mense wat hulle nadoen sporthelde of sterre in die vermaaklikheidswêreld. Daarteenoor moet ons as Christene Jehovah God eer deur hom te probeer nadoen. Die apostel Paulus het ons aangespoor om dit te doen toe hy geskryf het: “Wees dan navolgers van God soos geliefde kinders; en wandel in liefde” (Efesiërs 5:1, 2). Ja, ons eer Jehovah deur daarna te streef om hom na te volg.
21. (a) Wat sal ons toerus om heerlikheid en eer aan Jehovah te gee? (b) Wat is die belonings wat Jehovah aan diegene gee wat hom eer?
21 Daar is werklik baie maniere waarop ons heerlikheid en eer aan God kan en moet gee. Laat ons nooit vergeet dat ons hom beter sal kan vereer as ons gereeld deur sy Woord gevoed word en ons hom altyd beter leer ken nie. Wat is die beloning as ons dit doen? “Die wat My eer”, sê Jehovah, “sal Ek eer” (1 Samuel 2:30). Jehovah sal sy aanbidders uiteindelik eer deur hulle die ewige lewe in geluk te gee, hetsy in die hemel as medeheersers met sy Seun, Jesus Christus, of op die Paradysaarde.
Onthou jy?
◻ Wie word oor die algemeen deur mense vereer, en wie laat hulle meestal na om te eer?
◻ Wat beteken dit om iemand te eer, en wat is maniere waarop dit gedoen kan word?
◻ Wat is party van die basiese redes waarom Jehovah God eer verdien?
◻ Wat is van die maniere waarop ons Jehovah kan eer?
◻ Op watter maniere beloon Jehovah diegene wat hom eer?