Julle moet almal eer
“Julle moet almal eer, . . . God vrees, die koning eer.”—1 PETRUS 2:17.
1. (a) Wie benewens God en Christus word gepas geëer? (b) Volgens 1 Petrus 2:17, op watter gebiede moet eer aan mense betoon word?
ONS het gesien dat ons verplig is om Jehovah God en Jesus Christus te eer. Dit is die regte, verstandige en liefdevolle ding om te doen. Maar God se Woord toon ook dat ons ander mense moet eer. “Julle moet almal eer”, word ons gemaan (1 Petrus 2:17). Aangesien hierdie vers afsluit met die gebod dat ons ‘die koning moet eer’, is die implikasie dat eer aan diegene gegee moet word wat dit weens hulle posisie verdien. Maar wie moet ons dan eer? Daar is dalk meer mense wat eer verdien as wat party dink. Ons kan sê dat daar vier gebiede is waarop ons eer aan ander moet betoon.
Eer politieke heersers
2. Hoe weet ons dat “die koning” wat in 1 Petrus 2:17 genoem word enige mensekoning of politieke heerser is?
2 Die eerste van hierdie gebiede hou verband met die sekulêre regerings. Ons moet politieke heersers eer. Waarom sê ons dat Petrus politieke heersers in gedagte gehad het toe hy ons gemaan het om ‘die koning te eer’? Omdat hy oor die situasie buite die Christengemeente gepraat het. Hy het net voor dit gesê: “Wees dan onderdanig aan elke menslike verordening ter wille van die Here—of dit die koning is as opperheer, of die goewerneurs as sy gesante.” Let ook daarop dat Petrus God teenoor “die koning” stel en sê: “Julle moet . . . God vrees, die koning eer” (1 Petrus 2:13, 14). “Die koning” aan wie Petrus dus sê ons eer moet bewys, verwys na mensekonings of politieke heersers.
3. Wie is “die hoër owerhede”, en wat kom hulle toe?
3 Die apostel Paulus beveel eweneens: “Laat elke mens hom onderwerp aan die magte wat oor hom gestel is [“hoër owerhede”, NW].” Hierdie “hoër owerhede” is nie Jehovah God of Jesus Christus nie, maar is politieke heersers, regeringsamptenare. Paulus sê verder met hulle in gedagte: “Betaal dan aan almal wat aan hulle verskuldig is: . . . eer aan die wat eer toekom.” Ja, sulke persone wat deur God toegelaat word om politieke heerskappy uit te oefen, is geregtig op eer.—Romeine 13:1, 7.
4. (a) Hoe kan eer aan politieke heersers betoon word? (b) Watter voorbeeld het die apostel Paulus gestel om heersers te eer?
4 Hoe betoon ons eer aan politieke heersers? Een manier is deur hulle met diepe agting te behandel. (Vergelyk 1 Petrus 3:15, NW.) En weens hulle posisie kom sodanige agting hulle toe al is hulle goddeloos. Romeinse geskiedskrywer Tacitus het goewerneur Felix beskryf as ’n man wat “gemeen het dat hy enige bose daad kan verrig en ongestraf bly”. Maar Paulus het sy verdediging voor Felix op ’n eerbiedige manier ingelei. Paulus het eweneens vir koning Herodus Agrippa II gesê: “Ek ag my gelukkig, koning Agrippa, dat ek my voor u vandag gaan verdedig”, al het Paulus geweet dat Agrippa in bloedskande geleef het. Op soortgelyke wyse het Paulus eer betoon aan goewerneur Festus en hom “hoogedele Festus” genoem, al was hy ’n aanbidder van afgode.—Handelinge 24:10; 26:2, 3, 24, 25.
5. Op watter verdere manier word eer aan regeringsowerhede betoon, en hoe stel Jehovah se Getuies ’n goeie voorbeeld hierin?
5 Die apostel Paulus wys op nog ’n manier waarop ons eer aan regeringsamptenare kan betoon toe hy geskryf het oor hoe ons aan regeringsowerhede moet betaal wat hulle verskuldig is. Hy het gesê dat ons “belasting aan die wat belasting, tol aan die wat tol . . . toekom”, moet betaal (Romeine 13:7). Jehovah se Getuies gee aan almal wat hulle toekom, ongeag die land in die wêreld waar hulle woon. In Italië het die koerant La Stampa gesê: “Hulle is die lojaalste burgers wat ’n mens kan begeer: hulle ontduik nie belastings of ongerieflike wette tot hulle eie voordeel nie.” En The Post van Palm Beach, Florida, VSA, het van Jehovah se Getuies gesê: “Hulle betaal hulle belasting. Hulle is van die eerlikste burgers in die republiek.”
Bewys eer aan werkgewers
6. Aan wie anders sê die apostels Paulus en Petrus moet eer betoon word?
6 ’n Tweede gebied waar eer verskuldig is, is by ons werkplek. Die apostels Paulus en Petrus beklemtoon hoe belangrik dit is dat Christene diegene eer wat in ’n werkverhouding oor hulle geplaas word. Paulus het geskryf: “Almal wat diensknegte is onder ’n juk, moet hulle eie here alle eer waardig ag, sodat die Naam van God en die leer nie belaster mag word nie. En die wat gelowige here het, moet hulle nie verag omdat hulle broeders is nie, maar moet hulle des te meer dien.” En Petrus het gesê: “Diensknegte, wees julle here onderdanig met alle vrees, nie alleen aan die wat goed en vriendelik is nie, maar ook aan die wat verkeerd is.”—1 Timotheüs 6:1, 2; 1 Petrus 2:18; Efesiërs 6:5; Kolossense 3:22, 23.
7. (a) Hoe moet die Bybel se raad aan “diensknegte” wat eer aan hulle “here” moet betoon vandag gepas toegepas word? (b) Wat moet Christenwerknemers wat Christenwerkgewers het noulettend toepas?
7 Slawerny is natuurlik vandag nie meer algemeen nie. Maar die beginsels waardeur Christene in ’n slaaf-eienaarverhouding gelei is, is van toepassing op ’n werknemer-werkgewerverhouding. Christenwerknemers het dus die verantwoordelikheid om selfs eer te betoon aan werkgewers wat moeilik is om tevrede te stel. En sê nou die werkgewer is boonop ’n medegelowige? Pleks van spesiale behandeling of voorkeur te verwag as gevolg van daardie verhouding, moet die werknemer sy Christenwerkgewer des te meer dien, en nooit op enige manier van hom misbruik maak nie.
Eer in die gesin
8, 9. (a) Wie moet deur kinders geëer word? (b) Waarom moet kinders hierdie eer betoon, en hoe kan hulle dit doen?
8 ’n Derde gebied waarop eer verskuldig is, is in die gesin. Kinders is byvoorbeeld verplig om hulle ouers te eer. Dit was nie net ’n vereiste van die Wet wat aan Moses gegee is nie, maar is ook ’n verpligting vir Christene. Die apostel Paulus het geskryf: “Kinders, julle moet jul ouers gehoorsaam wees in die Here, want dit is reg. Eer jou vader en jou moeder.”—Efesiërs 6:1, 2; Exodus 20:12.
9 Waarom moet kinders hulle ouers eer? Hulle moet hul eer weens hulle ouers se godgegewe gesag en ook weens wat hulle ouers gedoen het, omdat hulle vir hul geboorte verantwoordelik was en hulle van kleins af gevoed en gekoester het. Hoe moet kinders hulle ouers eer? Hulle moet dit veral doen deur gehoorsaam en onderdanig aan hulle ouers te wees (Spreuke 23:22, 25, 26; Kolossense 3:20). Om sulke eer te bewys, vereis dalk dat volwasse kinders, op materiële sowel as geestelike gebied, bykomende ondersteuning aan hulle bejaarde ouers of grootouers gee. Dit moet verstandig met ander verantwoordelikhede gebalanseer word, soos die versorging van jou eie kinders en ’n daadwerklike deelname aan Christelike omgang en die veldbediening.—Efesiërs 5:15-17; 1 Timotheüs 5:8; 1 Johannes 3:17.
10. Aan wie is vrouens verplig om eer te betoon, en op watter maniere kan hulle dit doen?
10 Maar kinders is nie die enigstes in die gesin wat verplig is om ander eer te bewys nie. Vrouens moet hulle mans eer. Die apostel Paulus het ook gesê “die vrou moet die man eerbiedig” (Efesiërs 5:33; 1 Petrus 3:1, 2). As hulle hul mans “eerbiedig”, beteken dit beslis dat hulle hul sal eer. Sara het haar man, Abraham, geëer toe sy hom “heer” genoem het (1 Petrus 3:6). Vrouens, volg Sara na. Bewys eer aan julle mans deur hulle besluite te aanvaar en te werk om die besluite suksesvol te maak. As julle alles in julle vermoë doen om julle mans hulle las te help dra, en nie nog tot die las bydra nie, betoon julle eer aan hulle.
11. Watter verpligting het mans wat eerbetoning betref, en waarom?
11 Wat van mans? Hulle word in God se Woord gemaan: “Net so moet julle, manne, verstandig met [julle vrouens] saamlewe en aan die vroulike geslag, as die swakkere, eer bewys, omdat julle ook mede-erfgename van die genade van die lewe is—sodat julle gebede nie verhinder mag word nie” (1 Petrus 3:7). Dit behoort elke man beslis te laat dink. Dit is asof ’n vrou ’n etiket aan haar het wat sê: “Kosbaar. Delikaat. Hanteer versigtig! Bewys eer!” Laat mans dus onthou dat tensy hulle hul vrouens eer bewys deur die gepaste besorgdheid oor hulle te hê, hulle hul verhouding met Jehovah God kan skaad, want hulle gebede sal verhinder word. Dit is waarlik wedersyds voordelig as gesinslede mekaar eer bewys.
In die gemeente
12. (a) Wie het die verantwoordelikheid om in die gemeente eer te betoon? (b) Hoe het Jesus getoon dat dit gepas is om eer te ontvang?
12 Daar is ook die verantwoordelikheid wat almal het om in die Christengemeente aan mekaar eer te betoon. Ons word gemaan: “Die een moet die ander voorgaan in eerbetoning” (Romeine 12:10). Jesus het in een van sy gelykenisse getoon dat dit gepas is om eer te aanvaar. Hy het gesê dat ons die agterste plek moet inneem wanneer ons na ’n fees genooi word, want dan sal ons gasheer ons vra om ’n hoër sitplek in te neem, en ons sal voor al die ander gaste eer hê (Lukas 14:10). Aangesien ons almal daarvan hou as daar eer aan ons bewys word, behoort ons dus nie empatie te hê en mekaar te eer nie? Hoe kan ons dit doen?
13. Wat is party maniere waarop ons eer aan ander in die gemeente kan bewys?
13 Betuigings van waardering vir ’n taak wat goed gedoen is, kom daarop neer dat ons eer bewys. Ons kan mekaar dus eer deur iemand wat in die gemeente ’n toespraak gehou of ’n antwoord gegee het te prys. Daarbenewens kan ons mekaar eer deur ons met ootmoed teenoor ons Christenbroers en -susters te beklee, en deur hulle met diepe agting te behandel (1 Petrus 5:5). Ons toon sodoende dat ons hulle as eerbare medeknegte van Jehovah God waardeer.
14. (a) Hoe kan die broers in die gemeente op ’n gepaste manier eer aan susters bewys? (b) Wat toon dat die gee van geskenke een manier is waarop eer betoon kan word?
14 Die apostel Paulus het die jong Timotheüs gemaan om ouer Christensusters as moeders en die jongeres as vleeslike susters te behandel, “in alle reinheid”. Ja, wanneer broers versigtig is om hulle nie vryhede te veroorloof met susters nie, soos deur te familiêr met hulle te raak, bewys hulle eer aan hulle. Paulus het verder geskryf: “Eer die weduwees wat waarlik weduwees is.” Een manier waarop ’n behoeftige weduwee geëer moet word, is deur materiële ondersteuning. Maar om dit waardig te wees, moet sy ‘getuienis hê van goeie werke’ (1 Timotheüs 5:2-10). In verband met materiële gawes het Lukas oor die mense op die eiland Malta geskryf: “Hulle het ons ook baie eerbewyse betoon, en toe ons sou afvaar, ons van die nodige voorsien” (Handelinge 28:10). Ons kan dus eer aan ander mense betoon deur materiële gawes aan hulle te voorsien.
15. (a) Teenoor wie het ons ’n spesiale verantwoordelikheid om eer te betoon? (b) Wat is een manier waarop ons eer kan betoon aan diegene wat die leiding neem?
15 In sy brief aan Timotheüs sê Paulus voorts: “Laat die [ouere manne] wat goed regeer, dubbele eer waardig geag word, veral die wat arbei in woord en leer” (1 Timotheüs 5:17). Op watter maniere kan ons ouere manne, of opsieners, eer? Paulus het gesê: “Wees my navolgers, soos ek dit ook van Christus is” (1 Korinthiërs 11:1). Wanneer ons ag slaan op Paulus se woorde om hom na te volg, bewys ons hom eer. Dit is van toepassing op diegene wat vandag die leiding onder ons neem. In die mate wat ons hulle navolg, deur hulle voorbeeld te volg, sal ons hulle eer bewys.
16. Wat is bykomende maniere waarop eer aan diegene wat die leiding neem, betoon kan word?
16 ’n Ander manier waarop ons aan opsieners eer betoon, is deur ag te slaan op die vermaning: “Wees gehoorsaam aan julle voorgangers [“diegene wat onder julle die leiding neem”, NW] en onderdanig, want hulle waak vir julle siele as diegene wat rekenskap moet gee” (Hebreërs 13:17). Op dieselfde manier waarop kinders hulle ouers eer deur hulle te gehoorsaam, eer ons diegene wat onder ons die leiding neem deur aan hulle gehoorsaam en onderdanig te wees. En, soos Paulus en sy metgeselle deur daardie vriendelike bewoners van Malta met materiële geskenke geëer is, is baie reisende verteenwoordigers van die Genootskap keer op keer op ’n soortgelyke manier geëer. Hulle moet natuurlik nooit sulke geskenke vra of skimp dat hulle gewaardeer sal word of dat hulle nodig is nie.
17. Watter verpligting het diegene wat die leiding neem met betrekking tot eerbetoning?
17 Daarteenoor het almal wat in die teokratiese organisasie die verantwoordelikheid het om die leiding te neem—hetsy in die plaaslike gemeente, in ’n kring of streek as ’n reisende opsiener, in een van die takke van die Wagtoringgenootskap of in die gesin—die verantwoordelikheid om diegene oor wie hulle toesig hou eer te bewys. Dit vereis dat hulle empatie sowel as meegevoel moet hê. Hulle moet te alle tye genaakbaar en sagmoedig en nederig van hart en verstand wees, soos Jesus Christus gesê het hy was.—Mattheüs 11:29, 30.
Werk daaraan om mekaar te eer
18. (a) Wat kan ons verhinder om eer te betoon aan diegene wat dit toekom? (b) Waarom is daar geen regverdiging vir ’n negatiewe en kritiese gesindheid nie?
18 Ons moet almal hard daaraan werk om mekaar te eer, want daar is ’n kragtige hindernis daarteen. Daardie hindernis, of struikelblok, is ons onvolmaakte hart. “Die versinsels van die mens se hart is sleg van sy jeug af”, sê die Bybel (Genesis 8:21). Een van die menslike neigings wat ons kan verhinder om ander die gepaste eer te betoon, is as ons ’n negatiewe, kritiese gesindheid het. Ons is almal swak, onvolmaakte mense wat Jehovah se barmhartigheid en onverdiende goedheid nodig het (Romeine 3:23, 24). Laat ons ons waardering hiervoor toon en versigtig wees dat ons nie oor ons broers se swakhede tob of slegte beweegredes aan ons broers toeskryf nie.
19. Wat sal ons help om ’n negatiewe gesindheid teen te werk?
19 Die teenmiddel teen so ’n negatiewe neiging is liefde en selfbeheersing. Ons moet ’n simpatieke, lojale, positiewe gesindheid teenoor ons broers hê en op hulle goeie eienskappe let. As daar iets is wat ons nie verstaan nie, moet ons altyd bereid wees om ons broers die voordeel van die twyfel te gee, en laat ons ag slaan op Petrus se raad: “Bo alles moet julle mekaar vurig liefhê, want die liefde sal ’n menigte sondes bedek” (1 Petrus 4:8). Ons moet daardie soort liefde hê as ons aan ons broers die eer wil bewys wat hulle toekom.
20, 21. (a) Wat is nog ’n neiging wat ons waarskynlik sal verhinder om mekaar eer te betoon? (b) Wat sal ons help om hierdie neiging te bekamp?
20 ’n Ander eienskap wat ons waarskynlik sal verhinder om ander die gepaste eer te betoon, is die neiging om liggeraak, of onnodig gevoelig, te wees. Gevoeligheid het sy plek. Kunstenaars moet as deel van hulle beroep gevoelig wees vir klanke of kleure. Maar dit is ’n soort selfsug wat ons van ons vrede kan beroof en ons verhoed om aan ander eer te betoon as ons onnodig gevoelig, of liggeraak, is in ons verhoudings met ander.
21 Die woorde in Prediker 7:9 gee ons goeie raad in hierdie verband: “Wees nie haastig in jou gees om jou te vererg nie, want ergernis rus in die boesem van die dwase.” Dit verraai dus ’n gebrek aan wysheid en gesonde verstand, sowel as ’n gebrek aan liefde, as ’n mens onnodig gevoelig is of maklik te na gekom word. Ons moet daarteen waak dat ons gevalle neigings, soos om negatief, te krities of onnodig gevoelig te wees, ons verhinder om eer te betoon aan almal wat dit toekom.
22. Hoe kan ons verpligting om eer te betoon opgesom word?
22 Ons het werklik baie redes gesien waarom ons eer aan ander moet betoon. En, soos ons gesien het, is daar werklik baie maniere waarop ons sulke eer kan betoon. Ons moet te alle tye daarteen waak dat die een of ander selfsugtige gesindheid nie met ons eerbetoning inmeng nie. Ons moet in die besonder daarop let om eer te betoon aan diegene in ons gesin, mans en vrouens teenoor mekaar en kinders teenoor hulle ouers. En in die gemeente het ons die verpligting om eer aan mede-aanbidders te betoon en, in die besonder, aan diegene wat hard werk onder ons om die leiding te neem. Dit is op al hierdie gebiede tot ons voordeel om die gepaste eer aan diegene wat hierbo genoem word te bewys, want, soos Jesus gesê het: “Dit is saliger om te gee as om te ontvang.”—Handelinge 20:35.
Hoe sou jy antwoord?
◻ Waarom en hoe moet ons regeringsowerhede eer?
◻ Watter Bybelse raad kan op die werknemer-werkgewerverhouding toegepas word?
◻ Hoe moet eer in die gesin betoon word?
◻ Watter spesiale eer kan in die gemeente betoon word, en waarom?
◻ Hoe kan menslike swakhede wat veroorsaak dat ons ander nie eer nie, oorkom word?