Vrae van lesers

◼ Watter Bybelskrywer was ’n “generaal” soos gemeld word in die boek Die Bybel—God se woord of die mens s’n?a

Daardie nuttige boek oor God se Woord sê op bladsy 10: “Die Bybel is ook uniek weens die bewering wat baie van sy skrywers maak. Sowat 40 individue, waaronder konings, herders, vissers, staatsamptenare, priesters, ten minste een generaal en ’n geneesheer, het die verskillende dele van die Bybel op skrif gestel. Maar die skrywers het herhaaldelik dieselfde bewering gemaak: dat hulle nie hulle eie gedagtes neergeskryf het nie, maar God s’n.”

Party het gevra watter Bybelskrywers met daardie verskillende beroepe of aktiwiteite geïdentifiseer word. Beskou asseblief die volgende in hierdie verband:

Konings: ’n Aantal Bybelskrywers was konings. ’n Mens dink moontlik eerste aan Dawid en Salomo (Psalm 3:1; Spreuke 1:1; Prediker 1:1). Die lied in Jesaja 38:10-20 is egter deur Hiskia geskryf (Vers 9). Talle geleerdes meen dat hy ook Psalm 119 geskryf het, moontlik voordat hy koning geword het. En Hiskia het deel daaraan gehad om Spreuke hoofstukke 25–29 saam te stel (Spreuke 25:1). Die laaste hoofstuk van Spreuke is deur “Lemuël die koning” geskryf. Party identifiseer hom met koning Hiskia, terwyl ander dink dat Lemuël koning Salomo was.—Spreuke 31:1.

Herders: Dawid en die profeet Amos was albei herders (1 Samuel 16:11-13; 17:15, 28, 34; Amos 1:1). Amos het die Bybelboek geskryf wat sy naam dra, en Dawid het talle psalms geskryf. Die bekende Psalm 23 weerspieël ongetwyfeld Dawid se vertroudheid met herderswerk.

Vissers: Van Jesus se apostels wat vissers was, is Johannes en Petrus later geïnspireer om boeke van die Bybel te skryf (Mattheüs 4:18-22). Onder goddelike inspirasie het Johannes ’n Evangelieverslag geskryf, asook drie briewe en die boek Openbaring. Petrus het twee geïnspireerde briewe geskryf.

Staatsamptenare: Beide Daniël en Nehemia was staatsamptenare van vreemde regerings wat oor God se volk geheers het (Nehemia 1:1, 11; 2:1, 2; Daniël 1:19; 2:49; 6:1-3). Twee Bybelboeke dra die name van hierdie manne.

Priesters: Twee van God se profete wat gebruik is om Bybelboeke te skryf, was priesters. Hulle was Jeremia en Esegiël (Jeremia 1:1; Esegiël 1:1-3). Daarbenewens was Esra ’n Aäronitiese priester wat “’n vaardige afskrywer van die wet van Moses” was. Hy “het sy hart daarop gerig om die wet van die HERE te ondersoek en te betrag, en om Israel die insettinge en verordeninge te leer”.—Esra 7:1-6, 10, 11.

’n Generaal: Josua se rol as leier van die leër toe die Israeliete in die Beloofde Land ingetrek en teen talle vyandige nasies geveg het, laat hom kwalifiseer vir die titel van generaal (Josua 1:1-3; 11:5, 6). Hy het die voorreg gehad om die boek Josua te skryf. Dan sal party Bybellesers Dawid ook miskien beskou as ’n man wat ’n generaal was voordat hy koning geword het.—1 Samuel 19:8; 23:1-5.

Geneesheer: Laastens noem Kolossense 4:14 ‘die geliefde geneesheer Lukas’. Lukas het die Evangelie geskryf wat sy naam dra en klaarblyklik ook die Handelinge van die apostels.

[Voetnoot]