’n Suiwer taal vir alle nasies
“Dan sal ek volke tot ’n suiwer taal laat oorgaan, sodat hulle almal die naam van Jehovah aanroep, ten einde hom skouer aan skouer te dien.”—SEFANJA 3:9, “NW”.
1, 2. (a) Wat doen Jehovah, ter vervulling van Sefanja 3:9, in ons dag? (b) Watter vrae moet ons beantwoord om te verstaan hoe die profesie van Sefanja ons raak?
JEHOVAH GOD doen in ons dag ’n werk wat waarlik wonderlik is. Hy verenig mense uit alle nasies. Soos hy lank gelede in sy Heilige Woord voorspel het, doen hy dit deur hulle ’n nuwe taal te leer.—Sefanja 3:9, NW.
2 Wat is daardie taal? Waarom is dit nodig? Wat vereis dit van ons persoonlik om dit te leer?
Die gawe van spraak
3. (a) Watter wonderlike gawe is aan Adam gegee? (b) Watter taal het Adam gepraat?
3 Die vermoë om deur middel van spraak te kommunikeer, is ’n goddelike gawe wat die mensdom van al die diere onderskei. Die eerste mens, Adam, is geskep met ’n verstand wat tot intelligente denke in staat was. Hy is toegerus met stembande, ’n tong en lippe wat gebruik kon word om mee te praat, asook ’n woordeskat en die vermoë om nuwe woorde te skep. Adam kon verstaan wanneer Jehovah met hom gepraat het, en Adam kon op sy beurt sy gedagtes in woorde uitdruk (Genesis 1:28-30; 2:16, 17, 19-23). Die taal wat aan Adam gegee is, was blykbaar die taal wat later as Hebreeus bekend geword het. Blykbaar het die hele mensdom vir ten minste die eerste 1 757 jaar van mensebestaan daardie een taal gepraat.—Genesis 11:1.
4. Hoe het gebeure in die dae van Nimrod die mens se taal beïnvloed?
4 Toe, in die dae van Nimrod, het Jehovah goddelose mense se pogings in die wiele gery deur die taal te verwar van almal wat toegelaat het dat hulle betrek word by die bou van die Toring van Babel (Genesis 11:3-9). Blykbaar het Jehovah hulle vorige gemeenskaplike taal heeltemal uit hulle geheue uitgewis en toe nuwe tale in hulle verstand ingeplant. Dit het nie net nuwe woordeskatte nie, maar ook nuwe grammatikas en nuwe denkpatrone behels. Uit die tale wat Jehovah in Babel voortgebring het, het ander geleidelik ontwikkel totdat daar vandag, volgens taalakademies, sowat drieduisend tale oor die hele aarde gepraat word.
5. Hoe kan ons vasstel wat dit behels om ‘tot ’n suiwer taal oor te gaan’?
5 Sal dit vereis dat mense wat al hierdie tale praat hulle volkstaal laat vaar en die oorspronklike taal leer wat God vir Adam gegee het wanneer ‘hulle tot ’n suiwer taal oorgaan’? Die omstandighede waarin die profesie gegee is, help om daardie vraag te beantwoord.
Die nodigheid van ’n suiwer taal
6-8. (a) Watter godsdienssituasie het in Juda ontwikkel voordat die profesie in Sefanja 3:9 gegee is? (b) Watter gesindheid het in die nasies rondom Juda geheers?
6 Manasse, en toe Amon, wat altare vir Baäl gebou het, van waarsêery gebruik gemaak en spiritisme bevorder het, het kort tevore oor die koninkryk van Juda geheers (2 Konings 21:1-6; 2 Kronieke 33:21-23). Gevolglik het Jehovah sy profeet Sefanja gedurende die heerskappy van Amon se seun en opvolger, Josia, opdrag gegee om te waarsku dat goddelike oordeel aan die land voltrek gaan word.—Sefanja 1:1, 2.
7 Hoewel die Judeërs uit hulle eie geskiedenis en uit die geïnspireerde Skrif geweet het dat Jehovah die ware God is, het hulle aan die onsedelike rites van Baälaanbidding deelgeneem. Hulle het hulle voor die son en die maan en die sterrebeelde neergebuig, wat ’n direkte skending van God se wet was (Deuteronomium 4:19; 2 Konings 23:5). Daarbenewens het hulle aan ’n vorm van geloofsvermenging deelgeneem en opgetree asof alle godsdienste dieselfde is deur geswore ede aan Jehovah sowel as in die naam van die valse god Milkom te doen. Hulle het die gesindheid gehad dat ‘Jehovah geen goed en geen kwaad doen nie’ (Sefanja 1:4-6, 12). Wat die nasies rondom Juda betref, hulle was almal bekend daarvoor dat hulle Jehovah en sy volk teëgestaan het, en goddelike geregtigheid sou ook aan hulle voltrek word.—Sefanja 2:4-15.
8 Dit is teen so ’n agtergrond van gebeure dat Jehovah voorspel het: “Ek [sal] volke tot ’n suiwer taal laat oorgaan, sodat hulle almal die naam van Jehovah aanroep, ten einde hom skouer aan skouer te dien” (Sefanja 3:9, NW). Wat is daardie suiwer taal dus?
9. (a) Waarom is die suiwer taal nie Hebreeus of bloot die geskrewe Woord van God nie? (b) Wat is daardie suiwer taal, en hoe raak dit die lewe van diegene wat dit praat?
9 Is dit Hebreeus? Nee; die mense van Juda het reeds Hebreeus gepraat, maar die dinge wat hulle gesê en gedoen het, was uiteraard nie suiwer en opreg in Jehovah se oë nie. En die suiwer taal is nie bloot die geskrewe Woord van God nie. Hulle het dit ook gehad. Maar wat hulle nodig gehad het, was ’n behoorlike begrip van die waarheid aangaande God en sy voornemens, en net Jehovah kon dit deur middel van sy gees voorsien. Wanneer hulle daardie suiwer taal leer praat het, sou hulle gedagtes, hulle spraak en hulle gedrag weerspieël dat hulle Jehovah as die enigste ware God erken (Sefanja 2:3). Hulle sou hulle vertroue in hom stel en sy soewereiniteit ten volle ondersteun. Dit is vandag vir ons van spesiale belang. Waarom?
Diegene aan wie die suiwer taal gegee word
10. Gedurende watter tydperk sal die profesie van Sefanja 3:9 vervul word?
10 Sefanja 3:9 dui op die vervulling van die profesie tydens ’n spesifieke tydperk en sê: “Want dan sal ek volke tot ’n suiwer taal laat oorgaan” (NW). Wanneer is dit? Vers 8 antwoord dat dit gedurende die tyd is wat Jehovah ‘nasies versamel’, voordat hy ‘sy grimmigheid oor hulle uitstort’, dat hy die ootmoediges van die aarde tot ’n suiwer taal laat oorgaan.
11. (a) Watter twee vervullings het Sefanja 3:9 voor hedendaagse tye ondergaan? (b) Hoe is die vervulling daarvan vandag anders?
11 Gedurende die dae van koning Josia, voordat Jehovah die Babiloniese leërs toegelaat het om oordeel te voltrek, het baie mense valse aanbidding laat vaar en Jehovah eerder gedien (2 Kronieke 34:3-33). In die eerste eeu G.J., voordat Jerusalem deur die Romeine vernietig is, het duisende mense insgelyks die waarheid omtrent God en sy voorneme geleer en hulle in sy diens verenig. In daardie tyd is die taal van waarheid grootliks verryk deur die dinge wat Jesus Christus ter vervulling van Jehovah se voorneme gedoen het. Maar dit is in óns dag dat Sefanja se profesie op wêreldskaal vervul word. Alle nasies word nou versamel vir die oorlog van die groot dag van die almagtige God met Armageddon (Openbaring 16:14, 16). Daardie versameling van nasies is al sedert die oprigting van die Koninkryk in 1914 aan die gang. En dit is gedurende hierdie selfde tydperk dat Jehovah volke wêreldwyd tot ’n suiwer taal laat oorgaan ter vervulling van hierdie profesie. Dit is lewensbelangrik om daardie taal te leer, want die oorlewendes van die komende groot verdrukking sal mense wees wat daardie suiwer taal waarlik hulle taal gemaak het.—Joël 2:32.
12. (a) Watter verband is daar tussen die visioen wat in Jesaja 6 opgeteken is en die profesie aangaande ’n suiwer taal? (b) Waarom het die gesalfde oorblyfsel hulp nodig gehad as hulle wou aanhou om Jehovah op aanvaarbare wyse te dien?
12 In ooreenstemming hiermee het Jehovah kort na die Eerste Wêreldoorlog sy gesalfde knegte se oë van begrip begin open om die wonderlike visioen te verstaan wat in Jesaja hoofstuk 6 opgeteken is (Verse 1-4). Hierdie visioen beklemtoon die belangrikheid van rein lippe sodat ons Jehovah op aanvaarbare wyse kan dien. Dit toon dat Jehovah in die oortreffende sin heilig is. Sy knegte moet ook daardie eienskap weerspieël (1 Petrus 1:15, 16). Maar die gesalfde oorblyfsel het in hierdie opsig hulp nodig gehad. Gedurende die Eerste Wêreldoorlog het hulle in ’n mate toegelaat dat hulle besmet word met betrokkenheid by wêreldaangeleenthede. “Die vrees van die HERE is rein”, of suiwer, maar hulle het toegelaat dat vrees vir mense en menseorganisasies hulle lippe aantas sodat hulle grotendeels geswyg het wat die verkondiging van God se Woord betref (Psalm 19:10). As gevolg van kontak met die Christendom was die oorblyfsel steeds besoedel met sommige van sy tradisies en gebruike.
13, 14. (a) Hoe het die oorblyfsel die regte gesindheid geopenbaar, en hoe het Jehovah ten behoewe van hulle opgetree? (b) In watter opsig het Jehovah die oorblyfsel ’n suiwer taal gegee?
13 Omdat die oorblyfsel besef het wat hulle situasie was, het hulle, soos die profeet Jesaja, gesê: “Wee my, ek is verlore! Want ek is ’n man onrein van lippe en woon onder ’n volk wat onrein van lippe is; want my oë het die Koning, die HERE van die leërskare, gesien!” (Jesaja 6:5). Hulle het besef dat hulle toestand onaanvaarbaar was. Hulle het nie ruggraatloos in ’n verkeerde weg volhard of hardkoppig geweier om Jehovah se teregwysing te aanvaar nie. Hulle het hul nie by die geestelikes geskaar toe dié blote lippehulde aan God se Koninkryk gebring en toe die Volkebond ondersteun het asof dit daardie Koninkryk was nie.
14 Weens die berouvolle gesindheid van daardie nederige oorblyfsel het Jehovah in sy onverdiende goedheid hulle lippe gereinig. Jesaja 6:6, 7 deel ons mee: “Maar een van die serafs het na my toe gevlieg met ’n gloeiende kool in sy hand, wat hy met ’n tang van die altaar af geneem het, en my mond daarmee aangeraak en gesê: Kyk, dit het jou lippe aangeraak, en jou skuld is weg en jou sonde versoen.” Dit was die reinigingsboodskap uit God se Woord wat die tradisies en leringe van mense asof deur vuur vernietig het. Dit het hulle hart van mensevrees gesuiwer en dit gevul met ’n verterende ywer om hulle lippe te gebruik om Jehovah te eer. Dus het Jehovah sy belofte vervul om “volke tot ’n suiwer taal [letterlik, ’n rein lip] [te] laat oorgaan, sodat hulle almal die naam van Jehovah aanroep”.—Sefanja 3:9, NW.
15. Hoe was die reaksie van die oorblyfsel in harmonie met die rede waarom Jehovah hulle die suiwer taal gegee het?
15 Toe die hedendaagse Jesaja-klas dus die stem van Jehovah begin hoor het wat, soos opgeteken in Jesaja 6:8, vra: “Wie sal Ek stuur? En wie sal vir ons gaan?” het hulle met blydskap geantwoord: “Hier is ek, stuur my.” Dit was nie vir hulle almal maklik om aan die openbare bediening te begin deelneem nie, maar hulle wou deur God gebruik word as ’n volk vir sy naam. Sy gees het hulle versterk. Hulle getalle het toegeneem.
16. (a) Watter onverwagte resultate het die predikingswerk van die oorblyfsel opgelewer? (b) Hoe toon die groot menigte dat hulle nou ook die suiwer taal praat?
16 Mettertyd het dit duidelik geword dat hulle prediking onverwagte resultate opgelewer het. Jehovah het deur hulle ’n ander groep gehelp om die suiwer taal te leer (Jesaja 55:5). Hierdie groep het nie die hoop op hemelse lewe gehad nie, maar hulle het dit as ’n voorreg beskou om metgeselle van die oorblyfsel van Koninkrykserfgename te wees en om skouer aan skouer saam met hulle as verkondigers van God se Koninkryk te dien. Hulle het geleidelik uit “alle nasies en stamme en volke en tale” gekom, en hulle maak nou “’n groot menigte” uit wat in die miljoene tel. Die spraak wat uit hulle monde voortkom, is nie die soort spraak wat hulle met enige van die verdelende elemente van die wêreld sal vereenselwig nie. Hulle vestig nie hul hoop op enige mens of enige menseorganisasie nie. Inteendeel, “hulle het met ’n groot stem geroep en gesê: Heil aan onse God wat op die troon sit, en aan die Lam!”—Openbaring 7:9, 10.
Wat dit van ons vereis om die taal te leer
17. Waarom is dit belangrik dat ons die suiwer taal goed leer en ons vermoë om dit te gebruik, verbeter?
17 Ongeag hoe lank ons al aan Jehovah se organisasie verbonde is, ons kan nog baie doen om ons kennis van die suiwer taal en ons vermoë om dit goed te gebruik, te verbeter. Dit is belangrik dat ons ons inspan om dit te doen. Waarom? Omdat dit ’n aanduiding is van ons liefde vir die waarheid.
18, 19. (a) Waarom is dit belangrik dat ons uit die staanspoor ’n sterk liefde vir die waarheid aankweek? (b) Waarom is dit belangrik om daardie liefde altyd te voed?
18 Sulke liefde help uit die staanspoor om iemand se hart en verstand ontvanklik te maak sodat hy tekste wat onder sy aandag gebring word, kan verstaan; dit beweeg hom om tot Jehovah te nader en om Sy organisasie te waardeer. Dus is liefde vir die waarheid ’n sleutel om jou van die boeie van valse godsdiens te bevry. Sommige mense sê dat hulle in die Bybel se boodskap belangstel, maar hulle laat vaar nooit werklik al die aanhangsels van valse godsdiens en sy permissiewe leefwyse nie. Waarom nie? Soos 2 Thessalonicense 2:10 verduidelik, neem hulle nie ‘die liefde tot die waarheid aan om gered te word nie’. Hoe noodsaaklik is dit tog dat ons daardie liefde het!
19 Wanneer ons die waarheid aanneem, is dit belangrik vir ons geestelike groei dat ons daardie liefde voed. Hou in gedagte dat Jehovah die waarheid as ’n “taal” beskryf. Wanneer iemand ’n nuwe taal leer, moet hy hom ywerig inspan om sy woordeskat uit te brei, woorde korrek uit te spreek, die besonderhede van die grammatika te leer, en so meer. Liefde vir die nuwe taal en vir die mense wat dit praat, sal hom help om aan te hou vorder. Binne ’n paar maande sal hy die taal dalk al kan praat, maar dit verg jare van pligsgetroue inspanning voordat hy dit soos ’n boorling kan praat. Dieselfde soort inspanning is nodig as ons die suiwer taal wil bemeester.
20. (a) Wat maak die suiwer taal werklik suiwer? (b) Waarteen moet elkeen van ons waak?
20 Dit is veral opmerklik dat die taal wat God sy knegte gee suiwer genoem word. Dit word so genoem, nie op grond van grammatikale konstruksie nie, maar omdat dit getuig van sedelike en geestelike reinheid. In hierdie taal word geen leuens, bedrog, of ’n bedrieglike tong, toegelaat nie. Diegene wat hierdie taal spreek, moet altyd die waarheid praat (Sefanja 3:13; Efesiërs 4:25). Hulle spraak moet eweneens Jehovah se hoë standaarde ten opsigte van geslagsedelikheid weerspieël (Efesiërs 5:3, 4). Die Skrif maak ons ook daarvan bewus dat alles wat verband hou met Babilon die Grote, die wêreldryk van valse godsdiens, onrein is (Openbaring 18:2-4). Die uitbeeldings van sy gode word “drekgode” genoem (Jeremia 50:2). Dit is derhalwe gepas dat diegene wat die suiwer taal leer van die fisiese aanhangsels van valse aanbidding ontslae moet raak, sy leerstellinge moet verwerp, sy feesvieringe moet staak en ook uitdrukkings uit hulle spraak moet verwyder wat sy verkeerde denke weerspieël. Daarbenewens word ons in Openbaring 16:13-16 gewaarsku dat die propaganda waarmee die nasies teen God se Koninkryk versamel word ook onrein is, omdat dit deur demone geïnspireer word (vgl. NW). Ons moet dus daarteen waak dat geeneen van hierdie onrein dinge ons spraak besmet nie.
21. Wat behels die suiwer taal benewens woorde wat gespreek word?
21 Wat ons leer, word ’n taal genoem, en dit is gepas, maar dit beteken nie diegene wat dit praat, leer bloot hoe om uitdrukkings te gebruik wat algemeen onder Jehovah se volk is nie. Stemtoon, gesigsuitdrukking en gebare is ook belangrik. Dit dra boodskappe oor wat woorde alleen nie oordra nie. Dit weerspieël telkemaal wat ons ware innerlike is. Dit kan toon of ons jaloesie, twis en woedebuie, wat alles werke van die sondige vlees is, uitgeroei het. Wanneer God se gees onverhinderd op ons lewe inwerk, word die vrug daarvan duidelik in die manier waarop ons met ander kommunikeer.—Galasiërs 5:19-22, vgl. NW; Efesiërs 4:31, 32.
22. Hoe raak dit ons besluite as ons die suiwer taal goed leer ken?
22 Enigiemand wat ’n nuwe taal geleer het, weet dat hy ’n ware mylpaal bereik het wanneer hy agterkom dat hy in die nuwe taal dink, pleks van gedagtes uit sy geboortetaal te vertaal. Wanneer ons dus die waarheid bestudeer, ’n ernstige poging aanwend om dit in ons lewe toe te pas en gereeld met ander daaroor praat, vind ons mettertyd dat ons gedurig aan die waarheid dink. Ons vergelyk nie gedurig die oue met die nuwe nie en sukkel nie om te besluit wat ons moet doen nie. Selfs wat klein dingetjies betref, kom Bybelbeginsels by ons op om die leiding te voorsien wat ons nodig het.—Spreuke 4:1-12.
23. Wat toon dat al Jehovah se Getuies oor die hele aarde die suiwer taal praat, ongeag wat hulle geboortetaal is?
23 Die mensdom gebruik weliswaar duisende tale, maar die suiwer taal kan in al hierdie tale uitgedruk word. Oor die hele wêreld maak Jehovah se Getuies eensgesind goed gebruik van die suiwer taal en dien hulle skouer aan skouer terwyl hulle in die openbaar getuig tot eer van Jehovah, ons liefdevolle God.
Hersieningsvrae
◻ Wat sluit die gawe van spraak in?
◻ Wat is die suiwer taal?
◻ Wie beleef die vervulling van Sefanja 3:9?
◻ Hoe kan ons toon dat ons die suiwer taal werklik liefhet?
[Prent op bladsy 23]
Diegene wat die suiwer taal ken, leer dit aan ander
[Prent op bladsy 25]
Jehovah se Getuies oor die hele aarde praat die suiwer taal, ongeag wat hulle geboortetaal is