Word verenig deur die suiwer taal
“Dan sal ek volke tot ’n suiwer taal laat oorgaan, sodat hulle almal die naam van Jehovah aanroep, ten einde hom skouer aan skouer te dien.”—SEFANJA 3:9, NW.
1. Het mense Jehovah God al ooit gehoor praat?
JEHOVAH God se taal is suiwer. Maar het mense hom al ooit hoor praat? Ja, beslis! Dit het gebeur toe sy Seun, Jesus Christus, 19 eeue gelede op die aarde was. Toe Jesus byvoorbeeld gedoop is, het mense God hoor sê: “Dit is my geliefde Seun in wie Ek ’n welbehae het” (Mattheüs 3:13-17). Dit was ’n verklaring van suiwer waarheid wat Jesus en Johannes die Doper in ’n menslike taal gehoor het.
2. Wat beteken dit wanneer die apostel Paulus van “die tale van . . . engele” praat?
2 Jare later het die Christenapostel Paulus van “die tale van mense en engele” gepraat (1 Korinthiërs 13:1). Waarop dui dit? Wel, dit toon dat nie net mense nie, maar ook geespersone die vermoë van taal en spraak het! God en die engele kommunikeer natuurlik nie met mekaar deur middel van stemklanke en ’n taal wat ons kan hoor en verstaan nie. Waarom nie? Want ’n atmosfeer soos dié waardeur die aarde omring word, is nodig om vokale klankgolwe wat deur mense gehoor en verstaan kan word te gelei.
3. Hoe het menslike taal ontstaan?
3 Hoe het menslike taal ontstaan? Party sê dat ons voorouers met moeite deur ’n gegrom en ’n gesteun met mekaar gekommunikeer het. Die boek Evolution (Life Nature Library) sê: “’n Aapmens van ongeveer eenmiljoen jaar gelede . . . het moontlik ’n paar spraakklanke bemeester.” Maar die beroemde woordeboekmaker Ludwig Koehler het gesê: “Menslike spraak is ’n geheim; dit is ’n goddelike gawe, ’n wonderwerk.” Ja, menslike spraak is ’n goddelike gawe, want God het die eerste mens, Adam, ’n taal gegee. Dit was blykbaar die taal wat mettertyd Hebreeus genoem is. Daardie taal is gepraat deur die Israelitiese nakomelinge van “Abram, die Hebreër”, ’n getroue aartsvader wie se voorvader Sem ’n seun van die arkbouer Noag was (Genesis 11:10-26; 14:13; 17:3-6). Met die oog op God se profetiese seën op Sem is dit redelik om aan te neem dat sy taal nie geraak is deur iets wat Jehovah God 43 eeue gelede op wonderdadige wyse gedoen het nie.—Genesis 9:26.
4. Wie was Nimrod, en hoe is hy deur Satan die Duiwel gebruik?
4 Destyds ‘het die hele aarde dieselfde taal gehad en een en dieselfde woorde’ (Genesis 11:1). Die man Nimrod, wat “’n geweldige jagter in verset teen Jehovah” was, het in daardie dae gelewe (Genesis 10:8, 9, NW). Die mensdom se onsigbare aartsvyand, Satan, het Nimrod by uitstek gebruik om die aardse deel van die Duiwel se organisasie op te rig. Nimrod wou vir homself naam maak, en daardie verwaande gesindheid het ook begin posvat onder sy volgelinge, wat ’n spesiale bouprojek in die land Sinear aangepak het. Volgens Genesis hoofstuk 11, vers 4, het hulle gesê: “Kom, laat ons vir ons ’n stad bou en ’n toring waarvan die spits tot aan die hemel reik; en laat ons vir ons ’n naam maak, sodat ons nie oor die hele aarde verstrooid raak nie.” Daardie onderneming, wat in verset teen God se bevel was om ‘die aarde te vul’, het geëindig toe Jehovah die opstandelinge se taal verwar het. “So”, sê die Bybelverslag, “het die HERE hulle dan daarvandaan oor die hele aarde verstrooi; en hulle het opgehou om die stad te bou” (Genesis 9:1; 11:2-9). Daardie stad is Babel, of Babilon genoem (wat “Verwarring” beteken), “want daar het Jehovah die spraak van die hele aarde verwar”.—Byington.
5. (a) Wat is gekeer toe God die taal van die mense verwar het? (b) Wat kan ons aflei aangaande die taal van Noag en Sem?
5 Daardie wonderwerk—die verwarring van die een menslike taal—het daartoe gelei dat die aarde gevul is soos God Noag beveel het, en dit het enige planne gefnuik wat Satan dalk gehad het om mense wat teen die Soewereine Heer van die hemel en aarde in opstand gekom het sover te kry om in onreine aanbidding van hom, Satan, te verenig. Die beoefening van valse godsdiens in enige vorm het die mense weliswaar slagoffers van die Duiwel gemaak, en hulle het die demone gedien toe hulle gode en godinne gemaak en in hul verskillende tale vir hulle name gegee en hulle aanbid het (1 Korinthiërs 10:20). Maar die enigste ware God se optrede by Babel het gekeer dat een verenigde, valse godsdiens gestig word waardeur die Duiwel die aanbidding ontvang wat hy blykbaar begeer het. Regverdige Noag en sy seun Sem het natuurlik nooit by daardie debakel in die land Sinear betrokke geraak nie. Daarom is dit ’n redelike gevolgtrekking dat hulle taal die taal gebly het wat die getroue Abram (of Abraham) gepraat het—die taal waarin God met die man Adam in die tuin van Eden gepraat het.
6. Hoe het Jehovah op Pinksterdag 33 G.J. getoon dat hy mense die vermoë kan gee om in tale te praat?
6 Jehovah, wat die mensdom se oorspronklike taal verwar het, kan mense ook die vermoë gee om in tale te praat. En dit is presies wat hy op Pinksterdag in die jaar 33 van ons Gewone Jaartelling gedoen het! Volgens Handelinge 2:1-11 het ongeveer 120 volgelinge van Jesus Christus in ’n bokamer in Jerusalem vergader (Handelinge 1:13, 15). Skielik was daar ’n geluid uit die hemel “soos van ’n geweldige rukwind”. “Tonge . . . soos van vuur” het sigbaar geword en is verdeel. Daarop is die dissipels ‘vervul met die Heilige Gees en het hulle begin spreek in ander tale, soos die Gees aan hulle gegee het om uit te spreek’. In daardie goddelik gegewe tale het hulle gepraat “oor die groot dade van God”. En wat ’n wonderwerk was dit tog toe Jode en proseliete van verskillende tale uit verafgeleë plekke, soos Mesopotamië, Egipte, Libië en Rome, die lewegewende boodskap verstaan het!
’n Godgegewe taal vandag!
7. Watter vooruitsigte sal daar wees as slegs een taal wêreldwyd gepraat en verstaan word?
7 Aangesien God mense op wonderdadige wyse verskillende tale kan laat praat, sal dit dan nie wonderlik wees as hy dit moontlik maak dat daar net een taal oor die hele wêreld gepraat en verstaan word nie? Dit sal groter begrip onder mense bevorder. Soos The World Book Encyclopedia dit stel: “As alle volke dieselfde taal gepraat het, sou kulturele en ekonomiese bande baie hegter gewees het, en sou welwillendheid tussen lande toeneem.” Wel, daar is deur die jare heen minstens 600 wêreldtale voorgestel. Esperanto is die mees geslaagde hiervan, want sowat 10 000 000 mense het dit geleer sedert dit in 1887 geskep is. Tog was mensepogings om die mensdom met behulp van ’n wêreldtaal te verenig nooit geslaag nie. Trouens, al hoe meer probleme veroorsaak verdeeldheid in hierdie wêreld terwyl ‘goddelose mense van kwaad tot erger voortgaan’.—2 Timotheüs 3:13.
8. Wat sal nog bestaan selfs as ’n wêreldtaal in vandag se wêreld aanvaar word, en waarom?
8 Op godsdiensgebied is daar groot verwarring. Maar moet ons dit nie te wagte wees, aangesien die Bybelboek Openbaring die wêreldryk van valse godsdiens “Babilon die Grote” noem nie? (Openbaring 18:2, NW). Ja, want “Babilon” beteken “Verwarring”. Selfs as ’n kunsmatige taal of die een of ander natuurlike taal, soos Engels, Frans, Duits of Russies as wêreldtaal in vandag se wêreld aanvaar word, sal onenigheid steeds in godsdiens en op ander gebiede heers. Waarom? Want “die hele wêreld [lê] in die mag van die Bose”, Satan die Duiwel (1 Johannes 5:19). Hy is die verpersoonliking van selfsug, en hy smag hebsugtig daarna om deur die hele mensdom aanbid te word, net soos hy dit in die dae van Nimrod en die Toring van Babel begeer het. ’n Wêreldtaal wat deur sondige mense gepraat word, kan Satan selfs die geleentheid gee om verenigde Duiwelaanbidding in te stel! Maar Jehovah sal dit nooit toelaat nie; trouens, hy sal binnekort ’n einde aan alle valse, Duiwelgeïnspireerde godsdiens bring.
9. Hoe word mense van alle nasies en rasse nou verenig?
9 Maar ’n verbasende feit is dat goeie mense uit alle nasies en rasse wel nóú verenig word. Dit geskied op God se voorwaardes en ter wille van sy aanbidding. God maak dit vandag vir mense moontlik om die enigste suiwer taal op aarde te leer en te praat. En dit is werklik ’n wêreldtaal. Trouens, vandag leer Jehovah God baie mense uit alle nasies op die aarde hierdie suiwer taal. Dit is ter vervulling van God se profetiese belofte deur sy profeet en getuie Sefanja: “Dan sal ek volke tot ’n suiwer taal [letterlik, “’n rein lip”] laat oorgaan, sodat hulle almal die naam van Jehovah aanroep, ten einde hom skouer aan skouer te dien” (Sefanja 3:9, NW). Wat is hierdie suiwer taal?
Wat die suiwer taal is
10. Wat is die suiwer taal?
10 Die suiwer taal is die waarheid van God wat in sy eie Woord, die Heilige Skrif, aangetref word. Dit is veral die waarheid oor God se Koninkryk, wat vrede en ander seëninge vir die mens sal bring. Die suiwer taal skakel godsdiensdwaling en valse aanbidding uit. Dit verenig almal wat dit praat in die suiwer, rein, heilsame aanbidding van die lewende en ware God, Jehovah. Vandag verhinder sowat 3 000 tale begrip, en honderde valse godsdienste verwar die mensdom. Hoe bly is ons tog dat God volke na hierdie wonderlike suiwer taal laat oorgaan!
11. Wat het die suiwer taal vir mense van alle nasies en rasse gedoen?
11 Ja, die suiwer taal word deur mense uit alle nasies en rasse bemeester. As die enigste geestelik suiwer taal op aarde is dit ’n groot verenigende krag. Dit stel almal wat dit praat in staat om “die naam van Jehovah [aan te roep], ten einde hom skouer aan skouer”, of letterlik “met een skouer”, te dien. Hulle dien God dus “eenparig”, “met eenstemmigheid en een verenigde skouer” (The New English Bible; The Amplified Bible). Die vertaling deur Steven T. Byington lui: “Dan sal ek [Jehovah God] die lippe van al die volke reinig, sodat hulle almal Jehovah se naam kan aanroep en in sy diens kan saamwerk.” Sulke wêreldwye, veeltalige samewerking in God se diens bestaan net onder Jehovah se Getuies. Vandag verkondig meer as viermiljoen van hierdie Koninkryksverkondigers in 212 lande die goeie nuus in baie tale van die mensdom. Nogtans is die Getuies “eensgesind” in wat hulle sê en is hulle “verenig . . . in dieselfde gesindheid en in dieselfde mening” (1 Korinthiërs 1:10). Dit is so omdat alle Getuies van Jehovah, ongeag waar hulle op aarde is, die een suiwer taal tot lof en eer van hulle hemelse Vader praat.
Leer die suiwer taal nou!
12, 13. (a) Waarom moet jy daarin belangstel om die suiwer taal te praat? (b) Waarom is die woorde in Sefanja 3:8, 9 vandag so betekenisvol?
12 Waarom moet jy daarin belangstel om die suiwer taal te praat? Vereers hang jou lewe daarvan af dat jy dit leer en praat. Net voor God beloof het om “volke tot ’n suiwer taal [te] laat oorgaan”, het hy gewaarsku: “Daarom, verwag My, spreek die HERE, op die dag wat Ek My gereed maak vir die buit; want dit is my strafoordeel om nasies te versamel, koninkryke te vergader om my grimmigheid oor hulle uit te stort, al die gloed van my toorn. Want die ganse aarde sal deur die vuur van my ywer verteer word!”—Sefanja 3:8.
13 Daardie woorde van die Soewereine Heer Jehovah is sowat 26 eeue gelede vir die eerste keer geuiter in Juda, waarvan Jerusalem die hoofstad was. Maar daardie verklaring was veral vir ons dag bedoel, want Jerusalem het die Christendom voorafgeskadu. En ons tyd, sedert God se hemelse Koninkryk in 1914 opgerig is, is Jehovah se dag om nasies te versamel en koninkryke te vergader. Hy het hulle almal deur middel van ’n groot getuieniswerk onder sy aandag byeengebring. En dit het hulle teen sy voorneme in opstand laat kom. Maar Jehovah God stel mense uit al hierdie nasies genadiglik in staat om die suiwer taal eensgesind te praat. Daarmee kan almal wat in sy beloofde nuwe wêreld wil lewe hom eendragtig dien voor al die nasies verteer word deur die vurige uiting van goddelike gramskap tydens “die oorlog van daardie groot dag van die almagtige God”, wat algemeen Armageddon genoem word (Openbaring 16:14, 16; 2 Petrus 3:13). Gelukkig sal diegene wat die suiwer taal praat en Jehovah se naam in geloof as verenigde ware aanbidders aanroep goddelike beskerming gedurende die gloed van daardie wêreldramp geniet. God sal hulle veilig in die nuwe wêreld inbring, waar net die suiwer taal uiteindelik op die hele mensdom se lippe sal wees.
14. Hoe het God deur Sefanja getoon dat onmiddellike optrede nodig is as ons die einde van hierdie stelsel van dinge wil oorleef?
14 By monde van sy profeet Sefanja stel Jehovah dit duidelik dat diegene wat die einde van die huidige goddelose stelsel van dinge wil oorleef onmiddellik moet optree. Volgens Sefanja 2:1-3 sê God: “Kom tot julleself, ja, kom tot inkeer, o nasie wat nie skaam word nie! Voordat die besluit baar—soos kaf gaan die dag verby—voordat daar oor julle kom die toorngloed van die HERE, voordat oor julle kom die dag van die toorn van die HERE. Soek die HERE, o alle ootmoediges van die land, wat sy ordening onderhou; soek geregtigheid, soek ootmoedigheid—miskien sal julle verborge bly op die dag van die toorn van die HERE.”
15. (a) Wat was die eerste vervulling van Sefanja 2:1-3? (b) Wie het God se voltrekking van oordeel aan Juda oorlewe, en watter parallel sal daar in ons dag van hierdie oorlewing wees?
15 Daardie woorde het hulle eerste vervulling op eertydse Juda en Jerusalem gehad. Die sondige mense van Juda het nie gunstig op God se beroep gereageer nie, soos getoon word deur die feit dat hy in die jaar 607 v.G.J. die Babiloniërs gebruik het om oordeel aan hulle te voltrek. Net soos Juda die ‘nasie was wat nie skaam geword het’ voor God nie, het die Christendom ook ’n skaamtelose “nasie” voor Jehovah geword. Maar party Judeërs en ander, waaronder Jehovah se getroue profeet Jeremia, het behoue gebly omdat hulle op God se woord ag geslaan het. Ander oorlewendes was ’n Ethiopiër genaamd Ebed-Meleg en nakomelinge van Jonadab (Jeremia 35:18, 19; 39:11, 12, 16-18). Vandag sal “’n groot menigte” van Jesus se “ander skape” wat uit alle nasies versamel is eweneens deur Armageddon en tot in God se nuwe wêreld behoue bly (Openbaring 7:9; Johannes 10:14-16). Net diegene wat die suiwer taal leer en praat, sal vreugdevolle oorlewendes wees.
16. Wat moet ’n mens doen as jy “op die dag van die toorn van die HERE” verborge wil bly?
16 Net soos dit Jehovah se besluit was dat Juda en Jerusalem uitgewis moet word, moet die Christendom ook vergaan. Die vernietiging van alle valse godsdiens is beslis naby, en diegene wat behoue wil bly, moet onmiddellik optree. Hulle moet dit doen ‘voordat die dag verbygegaan het soos kaf’ wat gou deur die wind weggewaai word, soos wanneer graan by ’n dorsvloer die lug in gegooi word. As ons God se gramskap wil vryspring, moet ons die suiwer taal praat en op God se waarskuwing reageer voor die dag van Jehovah se toorn oor ons kom. In Sefanja se dag en vandag soek ootmoediges Jehovah God, asook geregtigheid en ootmoedigheid. Om Jehovah te soek, beteken om hom met ons hele hart, siel, verstand en krag lief te hê (Markus 12:29, 30). “Miskien sal [diegene wat dit doen] verborge bly op die dag van die toorn van die HERE.” Maar waarom sê die profesie “miskien”? Omdat redding afhang van getrouheid en volharding (Mattheüs 24:13). Diegene wat aan God se regverdige standaarde voldoen en die suiwer taal aanhou praat, sal verberg word op die dag van Jehovah se toorn.
17. Watter vrae moet ons nog bespreek?
17 Aangesien die dag van Jehovah se toorn naby is en redding daarvan afhang dat ons die suiwer taal leer en gebruik, is dit nou die tyd om dit ywerig te leer en te praat. Maar hoe kan ’n mens die suiwer taal leer? En hoe kan jy daarby baat vind as jy dit praat?
Hoe sal jy antwoord?
◻ Hoe het menslike spraak ontstaan?
◻ Wat is die suiwer taal?
◻ Waarom is die woorde in Sefanja 3:8, 9 vandag so betekenisvol?
◻ Wat moet ons doen om “op die dag van die toorn van die HERE” verborge te bly?
[Prent op bladsy 10]
God het by Babel die mensdom verdeel deur hulle taal te verwar