Spreek die suiwer taal en lewe vir ewig!
“Soek die HERE, . . . soek geregtigheid, soek ootmoedigheid—miskien sal julle verborge bly op die dag van die toorn van die HERE.”—SEFANJA 2:3.
1. (a) Watter metodes gebruik studente om ’n vreemde taal te leer? (b) Waarom moet ons die suiwer taal praat?
STUDENTE kan ’n nuwe taal leer deur die grammatikametode of die ‘gesproke taal’-metode te gebruik. Met die grammatikametode gebruik hulle gewoonlik handboeke en leer hulle grammatikareëls. Met die ‘gesproke taal’-metode boots hulle die klanke en woordpatrone wat hulle onderwyser spreek na. Albei metodes word gebruik wanneer ’n mens die “suiwer taal” leer. En dit is uiters noodsaaklik dat ons hierdie taal praat as ons hoop om ‘verborge te bly op die dag van die toorn van die HERE’.—Sefanja 2:1-3; 3:8, 9.
2. Hoe kan ons die dinge leer wat as die grammatikareëls vir die suiwer taal bestempel kan word?
2 Die vernaamste handboek wat gebruik word om die suiwer taal te leer, is die Bybel. ’n Ywerige studie daarvan en van Bybelse publikasies leer jou die dinge wat as die grammatikareëls van die suiwer taal bestempel kan word. ’n Tuisbybelstudie wat deur een van Jehovah se Getuies gehou word, is ’n goeie begin. Vir diegene wat reeds aan God toegewy is, is gereelde en ywerige studie van die Skrif noodsaaklik. Maar is daar besonder doeltreffende maniere om die suiwer taal te leer? En wat is die voordele daarvan as jy dit praat?
Hoe om die suiwer taal te leer
3. Wat is een manier waarop die suiwer taal geleer kan word?
3 Een manier om die suiwer taal te leer, is om waarhede wat jy leer te assosieer met gedagtes wat jy reeds ken, net soos ’n taalstudent mettertyd grammatikareëls met mekaar in verband sal bring. Ter toeligting: Vroeër het jy dalk geweet dat Jesus Christus God se Seun is, maar jy het nie veel van sy pligte geweet nie. Sedertdien het ’n studie van die Bybel jou moontlik geleer dat Christus nou as ’n hemelse Koning regeer en dat die gehoorsame mensdom gedurende sy Duisendjarige Heerskappy tot volmaaktheid opgehef sal word (Openbaring 20:5, 6). Ja, jy kry ’n beter begrip van die suiwer taal wanneer jy nuwe gedagtes assosieer met dié wat jy reeds ken.
4. (a) Wat is ’n ander manier waarop die ‘grammatikareëls’ van die suiwer taal geleer kan word, en watter Bybelverslag word gebruik om dit toe te lig? (b) Wat het gebeur toe Gideon en sy driehonderd man tot aksie oorgegaan het? (c) Watter les leer ons uit die verhaal van Gideon?
4 Nog ’n manier om die ‘grammatikareëls’ van die suiwer taal te leer, is om gebeure wat in die Bybel opgeteken is te visualiseer. Ter toeligting: Probeer om die verslag wat in Rigters 7:15-23 opgeteken is, te ‘sien en te hoor’. Kyk! Israelitiese rigter Gideon het sy manskappe in drie groepe van honderd man elk ingedeel. Onder die sluier van die nag klim hulle suutjies teen die berg Gilboa af en omsingel die laer van die slapende Midianiete. Is hierdie driehonderd man goed gewapen? Militêr gesproke, nee. Trouens, hoogmoedige militariste sal hulle minagtend uitlag! Elke man het net ’n ramshoring, ’n groot waterkruik en ’n fakkel binne-in die kruik. Maar luister! Op ’n afgesproke teken blaas die honderd man wat saam met Gideon is op hulle ramshorings en slaan hulle hul waterkruike stukkend. Die tweehonderd ander Israeliete doen dieselfde. Terwyl hulle almal vlammende fakkels omhoog lig, hoor jy hulle skreeu: ‘Die swaard van Jehovah en van Gideon!’ Watter vrees pak die Midianiete tog beet! Hulle strompel uit hulle tente met slaapgevulde oë wat wawyd oopgesper is van skrik wanneer hulle die lekkende vlamme sien wat skaduagtige figure sigbaar maak en bygelowige vrese verwek. Wanneer die Midianiete begin vlug, hou Gideon se manskappe aan om op hulle ramshorings te blaas, en God laat die vyande hulle swaarde teen mekaar rig. Wat ’n kragtige les in die suiwer taal! God kan sy knegte sonder ’n menslike krygsmag verlos. Boonop ‘sal Jehovah sy volk ter wille van sy grote Naam nie verwerp nie’.—1 Samuel 12:22.
5. Hoe kan Christelike vergaderinge ons help om ons spraak te verbeter?
5 Wanneer studente ’n vreemde taal deur die ‘gesproke taal’-metode leer, probeer hulle die klanke en woordpatrone van die onderrigter korrek herhaal. Watter goeie geleenthede is daar tog om die suiwer taal by Christelike vergaderinge te praat! Daar hoor ons hoe ander hulle in daardie taal van skriftuurlike waarheid uitdruk, en ons het dalk die voorreg om self kommentaar te lewer. Is ons bang dat ons dalk iets verkeerds sal sê? Dit moet nie vir ons die belangrikste oorweging wees nie, want ’n fout wat liefdevol reggestel word deur die ouere man wat ’n vergadering lei, soos die weeklikse studie van Die Wagtoring, kan ons spraak verbeter. Woon dus die Christelike vergaderinge gereeld by en neem daaraan deel.—Hebreërs 10:24, 25.
Onsuiwerhede wat insypel
6. Waarom is daar so ’n kontras tussen Jehovah se Getuies en die godsdiensorganisasies van die Christendom?
6 Diegene wat Jehovah se voorneme bekend maak en sy hemelse Koninkryk verkondig, praat die suiwer taal as sy Getuies. Hulle maak sy naam bekend en dien hom “skouer aan skouer”, of eenparig (Sefanja 3:9, NW). Hoewel die godsdienste van die Christendom die Bybel het, praat hulle nie die suiwer taal nie en roep hulle nie God se naam in geloof aan nie (Joël 2:32). Hulle het geen harmoniese boodskap wat op die Skrif gegrond is nie. Waarom nie? Omdat hulle godsdienstradisies, wêreldse filosofieë en politieke lojaliteit beskou as belangriker as God se Woord. Hulle doelstellings, verwagtinge en metodes is van hierdie bose wêreld.
7. Op watter verskille tussen Jehovah se Getuies en valse godsdiens dui 1 Johannes 4:4-6?
7 Die Christendom—trouens, die hele wêreldryk van valse godsdiens—praat nie dieselfde taal as Jehovah se Getuies nie. Dit is interessant dat Johannes aan diegene wat die suiwer taal praat, geskryf het: “Julle spruit uit God voort, . . . en julle het daardie persone oorwin, omdat hy wat in eendrag met julle is, groter is as hy wat in eendrag met die wêreld is. Hulle spruit uit die wêreld voort; daarom praat hulle wat uit die wêreld voortkom, en die wêreld luister na hulle. Ons spruit uit God voort. Diegene wat kennis van God verwerf, luister na ons; diegene wat nie uit God voortspruit nie, luister nie na ons nie” (1 Johannes 4:4-6, NW). Jehovah se knegte het valse leraars oorwin, omdat God, wat in eendrag met sy volk is, “groter is as [die Duiwel,] wat in eendrag met die wêreld”, of die onregverdige mensegemeenskap, is. Aangesien afvalliges ‘uit die wêreld voortspruit’ en die goddelose gees daarvan openbaar, “praat hulle wat uit die wêreld voortkom, en die wêreld luister na hulle”. Maar skaapgeaarde mense luister na diegene wat uit God voortspruit, omdat hulle besef dat Jehovah se volk die suiwer taal van Bybelwaarheid praat wat deur God se organisasie voorsien word.
8. Wat is die identiteit van die mens van wetteloosheid?
8 ’n Groot afvalligheid is voorspel, en ’n ‘verborgenheid van wetteloosheid’ was reeds in die eerste eeu G.J. aan die werk. Mettertyd het manne wat die verantwoordelikheid aanvaar het om in die gemeente te onderrig—of dit vir hulleself toegeëien het—baie valse leerstellings geleer. Hulle taal was allesbehalwe suiwer. Gevolglik het ’n saamgestelde “mens van wetteloosheid” ontstaan, die geestelikes van die Christendom, wat aan valse godsdienstradisies, wêreldse filosofieë en onskriftuurlike leringe vasgeklou het.—2 Thessalonicense 2:3, 7, NW.
Suiwer taal word wêreldwyd gehoor
9. Watter godsdiensontwikkelings was daar gedurende die 19de eeu?
9 Net ’n klein minderheid van godvresende mense ‘stry kragtig vir die geloof wat eenmaal aan die heiliges oorgelewer is’ (Judas 3). Waar kon sulke gelowiges gevind word? Valse godsdiens het die menigtes eeue lank in geestelike duisternis gehou, maar God het die paar wat sy goedkeuring weggedra het, geken (2 Timotheüs 2:19). En toe, te midde van die kommersiële, industriële en maatskaplike veranderinge van die 19de eeu, het daar stemme opgegaan wat opvallend anders was as die algemene babel van godsdiensverwarring. Klein groepies het die tekens van die tye probeer lees en die tweede koms van Jesus probeer voorspel, maar nie almal het die suiwer taal gepraat nie.
10. Watter groep wat oor die “tweede koms” gepraat het, is deur God gekies om die suiwer taal te praat, en waarom is dit duidelik dat die hand van Jehovah met hulle was?
10 In 1879 het dit egter duidelik geword watter stem wat oor die “tweede koms” gepraat het deur Jehovah gekies is om die suiwer taal as sy Getuies te praat. Teen daardie tyd het ’n klein Bybelstudiegroepie wat deur Charles Taze Russell gelei is in Pittsburgh, Pennsilvanië, VSA, vergader. Hulle was oortuig daarvan dat Jesus se onsigbare teenwoordigheid met sy tweede koms sou begin, dat ’n tyd van wêreldnood voorgelê het en dat dit deur die Duisendjarige Heerskappy van Christus gevolg sou word, wat die Paradys op aarde sou herstel en die ewige lewe vir gehoorsame mense sou beteken. In Julie 1879 het hierdie Bybelstudente begin om die tydskrif wat nou wêreldwyd as Die Wagtoring bekend staan te druk. Net 6 000 eksemplare van sy eerste nommer is versprei. Maar ‘die hand van Jehovah’ was met daardie Getuies, want hierdie tydskrif word nou in 111 tale uitgegee met ’n gemiddelde oplaag van meer as 15 000 000 vir elke nommer.—Vergelyk Handelinge 11:19-21.
11, 12. Wat is party skriftuurlike waarhede wat diegene wat die suiwer taal praat, verstaan?
11 Die suiwer taal het dwarsdeur die wêreld bekend geword deur middel van die Bybel en die publikasies van Jehovah se Getuies, en veral deur hierdie ywerige Christene se verkondiging van die goeie nuus. En watter wonderlike voordele geniet diegene wat dit praat tog nie! Pleks dat hulle in die geheimsinnige taal van die Drie-eenheidsleer sê: ‘God is God, Christus is God en die Heilige Gees is God’, stem hulle saam met die Bybelse standpunt dat Jehovah die Allerhoogste is, dat Jesus Christus as ’n mindere Sy Seun is en dat die heilige gees God se verstommende werkende krag is (Genesis 1:2, NW; Psalm 83:18, NW; Mattheüs 3:16, 17). Mense wat die suiwer taal praat, weet dat die mens nie uit ’n laer lewensvorm geëvolueer het nie, maar dat hy deur ’n liefdevolle God geskep is (Genesis 1:27; 2:7). Hulle besef dat die siel by die dood ophou bestaan—’n feit wat vrees vir die dooies uit die weg ruim (Prediker 9:5, 10; Esegiël 18:4). Hulle verstaan dat die hel die mensdom se gemeenskaplike graf is, en nie ’n plek van lyding in ’n vuur wat deur ’n duiwelse god geskep is nie (Job 14:13). Hulle weet ook dat die opstanding die godgegewe hoop vir die dooies is.—Johannes 5:28, 29; 11:25; Handelinge 24:15.
12 Diegene wat die suiwer taal praat, toon respek vir bloed en lewe (Genesis 9:3, 4; Handelinge 15:28, 29). Hulle besef dat Christus se aardse lewe die losprys is wat vir gehoorsame mense betaal is (Mattheüs 20:28; 1 Johannes 2:1, 2). Hulle bid ook nooit tot “heiliges” nie, want hulle weet dat hulle gebede deur Jesus Christus tot Jehovah God gerig moet word (Johannes 14:6, 13, 14). Aangesien God se Woord afgodediens veroordeel, gebruik hulle nie beelde in hulle aanbidding nie (Exodus 20:4-6; 1 Korinthiërs 10:14). En hulle vermy die gevare van demonisme omdat hulle spiritisme, wat ook in die Bybel veroordeel word, verwerp.—Deuteronomium 18:10-12; Galasiërs 5:19-21.
13. Waarom is diegene wat die suiwer taal praat nie onseker nie?
13 Jehovah se knegte, wat die suiwer taal praat, is nie onseker oor waar hulle hulle in die tydstroom bevind nie. Jehovah het hulle geleer dat hulle nou in “die tyd van die einde” lewe en dat Jesus as ’n glorieryke, onsigbare gees teenwoordig is (Daniël 12:4; Mattheüs 24:3-14; 2 Timotheüs 3:1-5; 1 Petrus 3:18). Christus staan, met magtige hemelse leërs agter hom, gereed om in die stryd te tree om God se oordeel aan hierdie stelsel van dinge te voltrek (Daniël 2:44; Openbaring 16:14, 16; 18:1-8; 19:11-21). Ja, en diegene wat die suiwer taal praat, verkondig die goeie nuus dat God se Koninkryk onder Christus binnekort ryk seëninge oor die hele gehoorsame mensdom op ’n paradysaarde gaan bring (Jesaja 9:5, 6; Daniël 7:13, 14; Mattheüs 6:9, 10; 24:14; Lukas 23:43, NW). Al hierdie dinge, en ons het maar net aan die oppervlak geraak! Die suiwer taal is beslis die rykste, kosbaarste taal op aarde!
14. Watter ander voordele geniet diegene wat die suiwer taal praat?
14 Diegene wat die suiwer taal praat, geniet onder andere voordele soos “die vrede van God” wat harte en sinne bewaar (Filippense 4:6, 7). Hulle gehoorsaam die Bybel se wette, wat goeie gesondheid bevorder en geluk meebring, asook tevredenheid omdat ons Jehovah behaag (1 Korinthiërs 6:9, 10). Ja, en sprekers van die suiwer taal het die hoop op die ewige lewe in God se beloofde nuwe wêreld.—2 Petrus 3:13.
Gebruik dit of verloor dit
15. Hoe sal ’n goeie begrip van die suiwer taal jou tot voordeel strek?
15 As jy die suiwer taal in die nuwe wêreld gaan praat, moet jy dit so goed ken dat dit die taal word waarin jy dink. Wanneer iemand ’n taal leer, dink hy eers in sy moedertaal en sit dan sy gedagtes in die nuwe taal oor. Maar wanneer hy meer bedrewe in die nuwe taal raak, begin hy om daarin te dink sonder dat hy die vertaalproses nodig het. Jy kan ook deur ywerige studie so ’n goeie begrip van die suiwer taal opdoen sodat jy sal weet hoe om Bybelwette en -beginsels toe te pas om probleme op te los en op “die pad van die lewe” te bly.—Psalm 16:11.
16. Wat kan gebeur as jy die suiwer taal nie gereeld gebruik nie?
16 Jy moet die suiwer taal gereeld gebruik, anders sal jy die vermoë om dit goed te praat verloor. Ter toeligting: Party van ons het jare gelede ’n vreemde taal geleer. Ons onthou dalk nog sommige woorde in daardie taal, maar het waarskynlik verleer om dit te praat omdat ons dit nie gereeld gebruik het nie. Dieselfde kan met die suiwer taal gebeur. As ons dit nie gereeld gebruik nie, kan ons verleer om dit te praat, en dit sal geestelik tragiese gevolge hê. Laat ons dit dus gereeld by vergaderinge en in die Christelike bediening praat. Hierdie bedrywighede, tesame met persoonlike studie, sal ons in staat stel om dinge korrek te sê in die suiwer taal. En hoe belangrik is dit tog!
17. Watter voorbeeld is daar dat spraak lewensreddend of dodelik kan wees?
17 Spraak kan lewensreddend of dodelik wees. Dit is bewys toe daar konflik tussen die Israelitiese stam van Efraim en rigter Jefta van Gilead was. Die Gileadiete het die wagwoord “Sjibbolet”, wat met ’n “sj”-klank begin, gebruik om Efraimiete wat oor die Jordaanrivier probeer vlug het te identifiseer. Die Efraimiete het hulleself voor die Gileaditiese wagte by die Jordaan-driwwe verraai deur “Sibbolet” te sê, pleks van “Sjibbolet”, omdat hulle die eerste klank van die woord verkeerd uitgespreek het. Gevolglik is 42 000 Efraimiete doodgemaak! (Rigters 12:5, 6). Wat die Christendom se geestelikes leer, klink eweneens vir diegene wat Bybelwaarheid nie goed ken nie dalk baie soos die suiwer taal. Maar op die dag van Jehovah se toorn kan dit jou jou lewe kos as jy op ’n manier praat wat eie is aan valse godsdiens.
Ons sal eensgesind bly
18, 19. Wat beteken Sefanja 3:1-5?
18 Waar dit van ontroue Jerusalem van die ou tyd en sy hedendaagse teenbeeld, die Christendom, praat, sê Sefanja 3:1-5: “Wee die opstandige en die besoedelde, die verdrukkende stad. Dit luister na geen stem nie, dit neem geen tugtiging aan nie; op die HERE vertrou dit nie, tot sy God kom dit nie nader nie. Sy vorste binne-in hom is brullende leeus; sy regters is aandwolwe wat niks vir die môre oorlaat nie. Sy profete is ligsinnig, trouelose manne, sy priesters verontreinig wat heilig is, hulle verkrag die wet. Die HERE is regverdig binne-in hom, Hy doen geen onreg nie; elke môre laat Hy sy reg aan die lig kom, dit ontbreek nooit nie; maar die kwaaddoener ken geen skaamte nie.” Wat beteken hierdie woorde?
19 Eertydse Jerusalem sowel as die hedendaagse Christendom het teen Jehovah in opstand gekom en hulle met valse aanbidding besoedel. Die oortreding van hulle leiers het tot verdrukking gelei. Ondanks God se herhaalde waarskuwings het hulle nie geluister en tot hom genader nie. Hulle vorste was soos roofsugtige leeus, wat regverdigheid verwaand veronagsaam het. Hulle regters het geregtigheid soos aandwolwe aan flarde geskeur. Hulle priesters het ‘verontreinig wat heilig is en die wet van God verkrag’. Jehovah gaan dus binnekort ‘nasies versamel, koninkryke vergader om sy grimmigheid oor hulle uit te stort, al die gloed van sy toorn’.—Sefanja 3:8.
20. (a) Wat moet gedoen word om die dag van Jehovah se toorn te oorlewe? (b) Hoe kan jy verwag om ewige seëninge van God te kry?
20 Die dag van Jehovah se toorn kom vinnig nader. As jy tot in God se nuwe wêreld behoue wil bly, moet jy die suiwer taal sonder versuim leer en praat. Jy kan slegs op hierdie manier beskerm word teen ’n geestelike ramp nou en teen die wêreldramp wat ophande is. Jehovah se Getuies verkondig nou die komende dag van God se toorn en die bemoedigende boodskap van sy Koninkryk. Watter vreugde smaak hulle tog om oor die heerlikheid van sy koningskap te praat! (Psalm 145:10-13). Sluit jou by hulle aan, en jy kan verwag om die ewige lewe te geniet en ander seëninge van die Skepper van die suiwer taal, die Soewereine Heer Jehovah, te ontvang.
Hoe sal jy antwoord?
◻ Wat is sommige maniere waarop ’n mens die suiwer taal kan leer?
◻ Waarom is dit nuttig om die suiwer taal te praat?
◻ Wat kan gebeur as jy die suiwer taal nie gereeld gebruik nie?
◻ Hoe kan ’n mens die dag van Jehovah se toorn oorleef en ewige seëninge geniet?
[Prent op bladsy 16]
Gideon en sy manskappe blaas op hulle horings en lig hulle fakkels omhoog
[Prent op bladsy 18]
Sedert 1879 het dit duidelik geword dat Charles Taze Russell en sy metgeselle deur God gebruik is om die suiwer taal te bevorder
[Prente op bladsy 20]
Praat jy die suiwer taal saam met Jehovah se Getuies?