Binnekort geen siekte of dood nie!

NIEMAND geniet dit om siek te wees nie, en mense wil ook nie doodgaan nie. ’n Professor in die mediese sosiologie sê: “Dit lyk asof die soeke na ’n langer lewe deur die geskiedenis heen en in die meeste gemeenskappe amper universeel was. Dit hou verband met die fundamentele strewe na selfbehoud . . . Ponce de Leon is die beroemdste van baie manne wat hulle lewe lank na ’n langer lewe gesoek het. Die mediese wetenskap is grotendeels daaraan toegewy om die lewe in stand te hou deur teen siekte en die dood te veg.”

Wanneer die dood ons vriende en familielede tref, ontstel dit ons innerlike só dat ons die skok amper spontaan probeer versag. Die boek Funeral Customs the World Over sê: “Daar is geen groep, hoe primitief of hoe beskaafd hulle ook al is, wat, as dit van hulleself afhang en in hulle vermoë is, nie seremonieel van die liggame van hulle lede ontslae raak nie. . . . Dit bevredig diep universele begeertes. Dit lyk ‘reg’ om dit uit te voer, en as dit nie uitgevoer word nie, veral vir diegene wat noue bande het as gevolg van familie, gevoel, gesamentlike leefwyse, gemeenskaplike ondervinding of ander bande, lyk dit ‘verkeerd’, ’n onnatuurlike pligsversuim, iets waarvoor daar om verskoning gevra moet word of waaroor ’n mens skaam moet wees. . . . [Die mens] is ’n wese wat sy dooies met seremonie begrawe.”

Die oorsprong van siekte en die dood

Die idee dat siekte en die dood eendag verwyder sal word, is derhalwe baie aantreklik, maar is daar ’n grondslag vir so ’n oortuiging? Daar is inderdaad, en dit is redelik, betroubaar en onfeilbaar. Dit is die geïnspireerde Woord van ons Skepper—die Heilige Bybel.

Daardie boek sit die oorsprong van die mens se ellende duidelik uiteen. Dit vertel vir ons dat die eerste mens, Adam, deur God geskape is en in ’n paradystuintuiste geplaas is, wat êrens in die Midde-Ooste geleë was. Adam is volmaak geskape; siekte en die dood was vir hom onbekend. Net so ’n volmaakte vrou het spoedig by hom aangesluit, en saam het hulle die vooruitsig op ewige lewe op aarde gehad.—Genesis 2:15-17, 21-24.

Hierdie idilliese toestand het nie lank geduur nie. Waarom nie? Omdat Adam selfsugtig ’n lewensweg onafhanklik van God gekies het. Die gevolg was harde werk, pyn, siekte en uiteindelik die dood (Genesis 3:17-19). Sy nageslag het die ongelukkige soort lewe geërf wat Adam gekies het. Romeine 5:12 verduidelik: ‘Deur een mens het die sonde in die wêreld ingekom en deur sonde die dood, en so het die dood tot alle mense deurgedring.’ Romeine 8:22 voeg by: “Ons weet dat die hele skepping tesame sug en tesame in barensnood is tot nou toe.”

Op die aarde of in die hemel?

Die Bybel verseker ons nietemin dat God die gehoorsame mensdom binnekort tot die gelukkige toestand sal herstel wat Adam en Eva verloor het. Openbaring 21:3, 4 sê: “God self sal by hulle wees as hulle God. En God sal al die trane van hulle oë afvee, en daar sal geen dood meer wees nie; ook droefheid en geween en moeite sal daar nie meer wees nie, want die eerste dinge het verbygegaan.” ’n Profeet van die ou tyd het ook die tyd voorspel wanneer “geen inwoner sal sê: Ek is siek nie.”—Jesaja 33:24.

Kan jy jou ’n wêreld sonder hospitale, lykshuise en grafte voorstel? Kan jy jou voorstel hoe dit moet wees om vir ewig te lewe, vry van selfs die bedreiging van lyding en die dood? Ja, God se beloftes raak emosies diep binne-in ons almal. Maar hoe kan ons seker wees dat hierdie wonderlike vooruitsig bedoel is vir ons planeet die Aarde—nie vir die hemel nie? Let op die konteks van die voorgenoemde Bybelteks. Die eerste verse van Openbaring hoofstuk 21 praat van “’n nuwe hemel en ’n nuwe aarde”. Daar word duidelik verklaar dat God by die mens sal wees en dat hulle sy volk sal wees. Die belofte in die boek Jesaja dat niemand siek sal wees nie, word gevolg deur ’n verwysing na “die mense wat in die land woon”, en wie se “sonde vergewe” is (NW).

Hierdie bemoedigende beloftes verwys dus na lewe op die aarde! En hulle is in harmonie met Jesus se gebed aan sy Vader: “Laat u wil geskied, soos in die hemel net so op die aarde.”—Mattheüs 6:10.

Waarom binnekort?

Jehovah se Getuies het al miljoene gehelp om te besef dat hierdie beloftes in die nabye toekoms vervul gaan word. Op grond waarvan is hulle egter so seker hiervan? Op grond van oorweldigende bewys dat ons in “die laaste dae” van die huidige stelsel, of reëling, van dinge op aarde lewe (2 Timotheüs 3:1-5). Jesus se dissipels het vir ’n teken gevra oor wanneer die einde van die stelsel van dinge sou wees. In antwoord hierop het Jesus die verslegting van wêreldtoestande wat sedert die begin van die Eerste Wêreldoorlog in 1914 plaasgevind het breedvoerig bespreek.a Toe het hy bygevoeg: “So weet julle ook, wanneer julle al hierdie dinge sien, dat dit naby is, voor die deur. Voorwaar Ek sê vir julle, hierdie geslag sal sekerlik nie verbygaan voordat al hierdie dinge gebeur het nie.” Party van die geslag wat 1914 beleef het, sal dus lewe om die einde van die huidige wêreldstelsel te sien.—Mattheüs 24:33, 34.

Dan sal Jehovah God sy Seun, Christus Jesus, opdrag gee om uit te gaan en alle oorsake van lyding en ellende van hierdie pragtige planeet Aarde te verwyder. Die Bybel praat van die vernietiging van goddeloosheid as “die oorlog van daardie groot dag van die almagtige God” by Armageddon.—Openbaring 16:14, 16.

’n Groot aantal godvresende mense sal hierdie ontsagwekkende gebeurtenis oorleef en sal leef om te sien hoe die vreedsame heerskappy van Christus Jesus begin (Openbaring 7:9, 14; 20:4). Hoewel sy heerskappy vanuit die hemel sal wees, sal die voordele daarvan deur almal geniet word wat op die aarde leef—beide die oorlewendes van die oorlog van Armageddon en die miljoene der miljoene wat daarná uit die dood opgewek gaan word. Die belofte sal dan ’n werklikheid word: “Hy [Christus] moet as koning heers totdat die Vader al sy vyande aan Hom onderwerp het. Die laaste vyand wat vernietig word, is die dood.”—1 Korinthiërs 15:25, 26, NAV.

Ons kan dus met vertroue uitroep: “Binnekort sal daar geen siekte of dood wees nie!” Dit is nie ’n droombeeld nie, en dit is ook nie wensdenkery nie. Dit is die gewisse belofte van Jehovah God, “wat nie kan lieg nie”. Sal jy jou vertroue in hierdie belofte stel? Dit kan jou vir ewig tot voordeel strek!—Titus 1:2.

[Voetnoot]

[Prent op bladsy 7]

Siekte en die dood sal binnekort deur sprankelende gesondheid en ewige lewe vervang word