Gesondheid en geluk—Kan jy dit geniet?

SO LANK AS wat daar al onvolmaakte mans en vroue is, hunker hulle na gesondheid en geluk. Hoewel dit seker twee van die belangrikste menslike begeertes is, het hulle die mens nog altyd ontwyk.

Mense het al baie oor hierdie soeke gepeins en baie raad daaroor gegee. Dr. Dennis Jaffe het gesê: “Vandag lê die sleutel tot blywende gesondheid en genesing dikwels in jou eie gedrag opgesluit.” Abraham Lincoln het eenkeer opgemerk: “Mense is maar so gelukkig soos hulle besluit om te wees.” Stem jy saam? Hoe sterk is jou begeerte na geluk? Hoe nou is die verband tussen geluk en goeie gesondheid?

Mense het al oral na geluk gesoek, en oënskynlik eindelose leidrade gevolg. Hulle het die filosofie, sielkunde en metafisika nagespeur. In hulle soeke na geluk het sommige die wetenskap, kuns en musiek ondersoek. Tog bestaan daar min twyfel oor die feit dat ’n groot deel van ware geluk met goeie gesondheid verband hou. “As jy jou gesondheid het, het jy omtrent alles”, het ’n gewilde televisie-advertensie gesê.

In hulle soeke langs hierdie weg het baie mense ’n verskeidenheid gesondheidsteorieë, ortodoks sowel as onortodoks, ondersoek. Amper elke openbare biblioteek toon watter eindelose moontlikhede van diëte en behandelings daar bestaan. “Van die oudheid af is daar talle boeke oor gesondheid geskryf”, het die bekende hartspesialis dr. Paul Dudley White gesê. “Een van die bestes is Regiment of Helthe wat omtrent duisend jaar gelede geskryf is.”

Ten spyte van dit alles was die soeke na gesondheid en geluk vir die meeste mense teleurstellend. Verbaas dit jou, aangesien ons beskawing veronderstel is om so ver gevorderd te wees? Dit is duidelik dat die wetenskap nie ’n einde aan siekte, ouderdom en die dood gemaak het nie.

Maar sal dit jou nog verder verbaas om te weet dat ons steeds geen maatstaf vir geluk het nie en geen goeie definisie het van wat dit is nie? Pierre Teilhard de Chardin het in ’n lesing wat “Gedagtes oor geluk” bespreek het tot hierdie slotsom gekom: “Dit is al eeue lank die onderwerp van eindelose boeke, navorsing, individuele en gesamentlike eksperimente, een na die ander; en ongelukkig kon daar glad nie eenstemmigheid bereik word nie. Gevolglik is die enigste praktiese slotsom waartoe baie van ons ná hierdie hele bespreking kan kom, die feit dat dit nutteloos is om die soeke voort te sit.”

Is dit hoe jy oor geluk voel? Vra jou ’n paar persoonlike maar eerlike vrae af. Is jy nóú waarlik gelukkig? Of kan ware geluk net in die hemel gevind word? Is daar enige werklike vooruitsig dat ons gesondheid en geluk kan geniet, en dat ons dit selfs hier op aarde kan geniet?