Gesondheid en geluk—Hoe kan jy dit vind?
DIE mens besef al lank dat daar ’n nou verband tussen gesondheid en geluk bestaan. Hippokrates, wat as “die vader van geneeskunde” beskou word, het gesê: “’n Verstandige mens moet besef dat gesondheid die grootste seëning is wat die mens geniet.” Duitse filosoof Arthur Schopenhauer het gesê: “Die twee vyande van die mens se geluk is pyn en verveeldheid.”
In die boek Anatomy of an Illness as Perceived by the Patient het Norman Cousins vertel hoe hy lag gebruik het in sy stryd teen ’n siekte wat potensieel lewensgevaarlik was. Hy het sy herstel gedeeltelik toegeskryf aan sy hartlike gelag terwyl hy na komedierolprente gekyk het. Hoogaangeskrewe dokters het die moontlikheid begin ondersoek dat sekere chemikalieë, wat endorfiene genoem word en deur die liggaam vrygestel word wanneer ons lag, ons tot voordeel strek. Ons kan dus ag gee op die wysheid van die geïnspireerde spreuk: “’n Vrolike hart bevorder die genesing.”—Spreuke 17:22.
Maar vreemd genoeg het navorsers gevind dat goeie gesondheid nie noodwendig ’n waarborg vir geluk is nie, omdat talle gesonde mense ongelukkig is. Navorsing, wat gebaseer is op meer as 100 000 mense se antwoorde op ’n vraelys en tydens onderhoude, het daartoe aanleiding gegee dat Jonathan Freedman tot die onverwagte slotsom gekom het dat meer as 50 persent van die mense wat ongelukkig met hulle lewe was basies gesond was.
Gesondheid en geluk—kortliks opgesom
Waar kan ons dan na die ontwykende kombinasie van gesondheid en geluk soek? Confucius het eeue gelede ’n interessante opvatting gehuldig: “’n Goeie regering word verkry wanneer diegene wat naby is gelukkig gemaak word, en diegene wat ver is daardeur aangetrek word.” Nader aan ons tyd het staatsman Thomas Jefferson gesê dat ’n regering se enigste oogmerk is “om die hoogste moontlike graad van geluk te verseker vir die groot massa wat onder daardie regering verenig is”.
Trouens, nadere ondersoek toon dat daar inderdaad een fundamentele sleutel tot die mensdom se soeke na gesondheid en geluk is—’n regering.
Deur die eeue heen het die mens hulle tot ’n regering gewend vir hulle geluk. Die Verenigde State se Onafhanklikheidsverklaring bevat byvoorbeeld hierdie beroemde woorde: “Ons neem hierdie waarhede as vanselfsprekend aan: Alle mense is gelyk geskape en deur hul Skepper toebedeel met sekere onvervreembare Regte, waarby ingesluit is Lewe, Vryheid en die strewe na Geluk.” Let op dat die regering wat daar in die vooruitsig gestel is, net die reg om geluk na te streef aan sy onderdane beloof het. Wat gesondheid betref, is dit prysenswaardig dat baie regerings programme aangemoedig het om die gesondheid van hulle burgers te verbeter. Nogtans het goeie gesondheid die meeste mense oor die algemeen ontwyk.
Maar wat van ’n regering wat beloof om selfs meer te voorsien? Sê nou dit beloof nie net die reg om na geluk te strewe nie maar geluk self? En sê nou dit beloof nie net gesondheidsversekering nie maar goeie gesondheid self? Sou jy nie bly wees oor die feit dat die fundamentele sleutel tot die mensdom se soeke na gesondheid en geluk in hierdie regering opgesluit lê nie?
Daar is baie wat vandag moontlik dink dat dit ’n onrealistiese droom is, maar so ’n regering word in werklikheid voorspel en taamlik breedvoerig beskryf. Ons kan die betroubare informasie in die Heilige Bybel vind, en die regering is God se Messiaanse Koninkryk.
Die Koninkryk, of regering, van God
Die Bybel praat dikwels van “die koninkryk van God”. Wat is dit presies? Webster’s New World Dictionary of the American Language definieer “koninkryk” as “’n regering of ’n land onder leiding van ’n koning of koningin”. Eenvoudig gestel, God se Koninkryk is ’n regering, ’n koninklike regering onder leiding van God se gesalfde Seun en Koning, Jesus Christus. Presies hoe belangrik is hierdie regering ten opsigte van God se voorneme? Kom ons laat Jesus se woorde die antwoord verskaf: “Soek eers die koninkryk van God . . . Hierdie evangelie van die koninkryk sal verkondig word in die hele wêreld . . . Ek moet . . . die evangelie van die koninkryk van God bring, want daarvoor is Ek gestuur. . . . Die koninkryk van God [word] verkondig, en elkeen probeer so hard as hy kan om daar in te kom.”—Mattheüs 6:33; 24:14; Lukas 4:43; 16:16, NAV.
Die woord “koninkryk” word meer as honderd keer in die Evangelieverslae van Jesus se lewe gebruik, soms baie uitdruklik in verband met gesondheid en geluk. Let op Mattheüs 9:35: “Jesus het by al die stede en dorpe rondgegaan en in hulle sinagoges geleer en die evangelie van die koninkryk verkondig en elke siekte en elke kwaal onder die volk genees.” Hoewel Jesus sy lering oor die Koninkryk met goeie gesondheid in verband gebring het, moet ons daarop let dat sy genesing van siektes ondergeskik was aan sy prediking en lering. Hy het as “Die Leermeester”, nie “Die Heler” nie, bekend gestaan (Mattheüs 26:18, NAV; Markus 14:14, NAV; Johannes 1:38, NAV). Hy het hom nie hoofsaaklik daarop toegelê om mense te genees of die siekes te versorg nie. Die Koninkryk was vir hom altyd van die grootste belang. Deur mense gesond te maak het hy sy groot medelye getoon en bewys dat hy goddelike ondersteuning gehad het.
Jesus se genesings het ook as ’n voorskou gedien van hoe hy die mensdom se gesondheid gaan herstel wanneer God se Koninkryk volle beheer oor die aarde uitoefen. Dit word bevestig deur die visioen wat in Openbaring 22:1, 2 beskryf word: “Hy het my getoon ’n suiwer rivier van die water van die lewe, helder soos kristal, wat uitstroom uit die troon van God en van die Lam. In die middel van sy straat en weerskante van die rivier was die boom van die lewe wat twaalf maal vrugte dra en elke maand sy vrugte gee, en die blare van die boom is tot genesing van die nasies.”
Maar waar sal ons dit kan geniet? Dit lyk dalk te goed om te verwag dat so ’n wonderlike genesing op die aarde kan plaasvind. Onthou egter Jesus se woorde wat jy moontlik self al in gebed geuiter het: “Laat u koninkryk kom; laat u wil geskied, soos in die hemel net so ook op die aarde.”—Mattheüs 6:10.
Ons ware, ons betroubare, hoop op toekomstige gesondheid en geluk lê dus in God se Messiaanse Koninkryk. Daar is egter nog ’n vraag wat beantwoord moet word.
Kan ons nóú gesondheid en geluk geniet?
As ons Bybelbeginsels toepas, kan ons selfs nóú ’n groter mate van gesondheid en toenemende geluk geniet. Soos al dikwels deur die bladsye van hierdie tydskrif getoon is, word diegene wat die Bybel in hulle daaglikse lewe toepas teen die gesondheidsprobleme beskerm wat die gevolg van geslagsonsedelikheid, rook, drank- en dwelmmisbruik is. Hulle geniet ook die voordele van ’n kalmer lewe en beter verhoudinge met gesinslede en ander.
Ons het egter reeds gesien dat goeie gesondheid nie noodwendig tot blywende geluk lei nie. Wat sal dit van jou verg om gelukkiger te kan wees?
In die navorsing wat vroeër gemeld is, het Jonathan Freedman daardie vraag deeglik bestudeer. Hy het faktore soos “Liefde en Seks”, “Jeug en Ouderdom”, “Inkomste en Opleiding”, selfs “Stad en Platteland”, ondersoek. Jy sal dit dalk interessant vind om te weet dat hy vasgestel het dat hierdie faktore nie ’n groot uitwerking op ’n mens se basiese geluk het nie. Hy het byvoorbeeld gevalle genoem van mense wat baie materiële besittings gehad het, maar steeds ongelukkig was, en hy het tot hierdie slotsom gekom: “Ons het verbasend genoeg gesien dat nie inkomste óf opleiding blykbaar ’n groot rol in geluk speel nie.”
Sy slotsom beaam die woorde van ’n verstandige skrywer van die Bybel, die apostel Paulus, wat gesê het: “Ek het geleer om vergenoeg te wees met die omstandighede waarin ek is” (Filippense 4:11). Dink ook terug aan Jesus se woorde: “Pas op en wees op julle hoede vir die hebsug, want iemand se lewe bestaan nie uit die oorvloed van sy besittings nie.”—Lukas 12:15.
Trouens, professor Freedman het hierdie afleiding gemaak: “Ons vind keer op keer dat ongelukkige mense wat blykbaar alles het wat hulle begeer, kommentaar lewer oor die feit dat hulle lewe sinloos en koersloos is.” Hy het bygevoeg: “Ek voel huiwerig om ’n ophef hiervan te maak, maar dit lyk tog asof geestelike waardes ’n mens se gevoelens omtrent die werklikheid ten goede beïnvloed, terwyl ’n gebrek aan geestelike waardes alle ander dinge in sekere mate bederf of afbreuk daaraan doen.”
Ons sien in ons dag bewys van hoe waar hierdie opmerkings is. Kyk om jou rond. Sien jy nie dat omtrent alle mense—party met min besittings, party met baie—geluk najaag maar nie veel daarvan geniet nie? Party het weliswaar moed opgegee en leef in stille wanhoop, maar baie leef asof hulle in die trapmeule loop, omdat die dinge wat hulle najaag die heeltyd net-net buite hulle bereik bly. Party trou om geluk te verkry, terwyl hulle buurman om dieselfde rede skei. Ander put hulleself fisies of emosioneel uit in hulle werk, terwyl ander hulle werk opgee om lang en moontlik duur vakansies te geniet. Almal het dieselfde ontwykende oogmerk, om gesond en gelukkig te wees. Vind hulle dit? Het jy dit gevind?
Jou gesondheid, jou geluk
Feit is dat jy nou ’n groot mate van gesondheid en geluk kan geniet. Hoe so?
Dit is beslis verstandig om op gebalanseerde wyse na jou gesondheid om te sien, soos om die Bybel se praktiese raad toe te pas. Dit sal ook help as jy realisties is. Dit beteken dat ons moet besef dat ons onvolmaakte liggame moontlik siek kan word, maar dat ons nie daardeur verpletter moet word wanneer dit gebeur nie. Dit sal dalk verdere inspanning verg om ’n optimistiese lewensbeskouing te handhaaf terwyl ons die belofte van volmaakte gesondheid in die komende nuwe wêreld altyd voor ons hou.
As jy wil uitvind of jy nou reeds ’n redelike mate van geluk het, kan jy jou hierdie vrae afvra: 1. Is ek werklik in beheer van my eie lewe? 2. Leef ek in vrede met myself en diegene om my? 3. Is ek oor die algemeen tevrede met wat ek in my lewe tot stand gebring het as ek dit in die lig van die Bybel opweeg? 4. Geniet ek en my gesin ons diens aan God?
Die keuse is grotendeels joune. Baie van ons is moontlik redelik gesond, en ons kan ook gelukkig wees. Maar ons moet geestelike doelwitte hê en ons dan daarop toelê om hulle te bereik. Onthou Jesus se woorde: “Waar julle skat is, daar sal julle hart ook wees” (Mattheüs 6:21). En ons het ’n Bybelse rede om uit te sien na selfs groter gesondheid en geluk onder die volmaakte heerskappy van die Messiaanse Koninkryk. Dan sal ons volkome gesondheid en geluk kan geniet.
[Prent op bladsy 7]
Dit is vir gelukkige mense ’n vreugde om hulle hoop op volmaakte gesondheid aan ander te vertel