Die soeke na geluk

’N PAAR jaar gelede is mense in Duitsland, Frankryk, Groot-Brittanje en die Verenigde State gevra: “Wat is nodig om gelukkig te wees?” Van dié met wie ’n onderhoud gevoer is, het 89 persent gesê dat goeie gesondheid nodig is; 79 persent het ’n bevredigende huwelik of saamblyverhouding gemeld; 62 persent het die vreugdes van ouerskap genoem en 51 persent het gedink dat ’n suksesvolle loopbaan nodig is vir geluk. En al word die meeste mense gewoonlik geleer dat geld nie geluk waarborg nie, was 47 persent van dié wat gevra is, oortuig dat dit wel geluk waarborg. Wat toon die feite?

Eerstens, kyk na die veronderstelde verband tussen geld en geluk. ’n Opname onder die honderd rykste mense in die Verenigde State het getoon dat hulle glad nie gelukkiger is as mense oor die algemeen nie. Wat meer is, hoewel baie in die Verenigde State in die afgelope drie dekades hulle materiële besittings feitlik verdubbel het, is hulle volgens geestesgesondheidsdeskundiges glad nie gelukkiger as vroeër nie. Trouens, ’n verslag sê: “Oor dieselfde tydperk het depressiesyfers die hoogte ingeskiet. Tienerselfmoord het verdriedubbel. Egskeidingsyfers het verdubbel.” In ongeveer 50 verskillende lande het navorsers wat die verband tussen geld en geluk bestudeer het, tot die slotsom gekom dat geld nie geluk kan koop nie.

Tweedens, hoe belangrik is faktore soos goeie gesondheid, ’n bevredigende huwelik en ’n suksesvolle loopbaan as ’n mens gelukkig wil wees? Wel, as hierdie faktore onontbeerlik is vir geluk, wat dan van die miljoene mense wat nie goeie gesondheid geniet nie en almal wat nie ’n bevredigende huwelik het nie? Wat van getroude pare sonder kinders en al die mans en vroue wat nie ’n suksesvolle loopbaan het nie? Is al hierdie mense tot ’n ongelukkige lewe gedoem? En sal die veronderstelde geluk van diegene wat nou goeie gesondheid en ’n bevredigende huwelik geniet, verdwyn as hulle situasie verander?

Soek ons op die regte plekke?

Almal wil gelukkig wees. Dit is nie verbasend nie, want die mens se Skepper word as “die gelukkige God” beskryf, en die mens is na God se beeld gemaak (1 Timoteus 1:​11; Genesis 1:​26, 27). Dit is dus net natuurlik dat mense na geluk soek. Baie vind egter dat dit net so moeilik is om aan geluk vas te hou as aan sandkorrels​—⁠albei glip maklik deur jou vingers.

Maar kan dit wees dat party te hard probeer om geluk te vind? Die maatskaplike filosoof Eric Hoffer het so gedink. Hy het gesê: “Die soeke na geluk is een van die vernaamste bronne van ongelukkigheid.” Dit is beslis die geval as ons op die verkeerde plekke na geluk soek. Dit sal ons ongetwyfeld teleurstel en frustreer. Om ryk te probeer word; na roem of erkenning te streef; politieke, maatskaplike of ekonomiese doelwitte na te streef of bloot vir jouself en jou onmiddellike bevrediging te leef, bring nie geluk nie. ’n Mens kan verstaan waarom party die ironiese beskouing van ’n skrywer aangeneem het wat gesê het: “As ons maar net wil ophou om gelukkig te probeer wees, sal ons ’n redelik genotvolle lewe kan lei”!

Dit is betekenisvol dat die meningsopname wat aan die begin van hierdie artikel gemeld is, ook getoon het dat 4 uit 10 mense gemeen het dat dit geluk meebring as ’n mens goed doen en ander help. En 1 uit elke 4 het beklemtoon dat geloof en godsdiensoortuiging baie tot ’n mens se geluk kan bydra. Dit is duidelik dat ons deegliker ondersoek moet instel na wat nodig is om waarlik gelukkig te wees. Die volgende artikel sal ons help om dit te doen.

[Prente op bladsy 3]

Baie dink dat geld, ’n bevredigende gesinslewe of ’n suksesvolle loopbaan die sleutel tot geluk is. Stem jy saam?