Koninkryksverkondigers berig

Hulle het in Katmandoe tot oortuiging gekom

’N KUNSTENARES het haar soeke na die waarheid in 1980 in Bretagne, Frankryk, begin. Sy het met lede van die Pinksterkerke besprekings gehad en Oosterse godsdienste bestudeer—sonder bevrediging. Toe het sy ’n paar keer met een van Jehovah se Getuies gesels, maar spoedig opgehou. Sy het ’n ander kunstenaar ontmoet, by hom gaan werk en by hom ingetrek.

Die ongetroude paartjie het kort hierna besluit om Nepal te besoek. Hulle was baie beïndruk deur die prag en vrede van daardie land, maar was teleurgesteld oor die kastestelsel wat volgens hulle, as Westerlinge, onregverdig was.

Toe hulle na Frankryk terugkeer, het die vrou aan haar vriend gesê dat hulle die Bybel saam moet bestudeer, en hy het tot haar verbasing ingestem. Hulle het die Getuie met wie sy twee jaar tevore besprekings gehad het, opgesoek. Hulle het aanvanklik net die Bybel gebruik, maar het uiteindelik ingestem om die boek Die waarheid wat lei tot die ewige lewe en later die boek Jy kan vir ewig in die Paradys op aarde lewe te gebruik. Hulle het binne ’n jaar opgehou om dwelms te gebruik.

Nadat hulle Nepal weer twee maande lank besoek het, het die paartjie na Frankryk teruggekeer en hulle studie voortgesit. Hulle het rook opgegee, opgehou om na kroeë en nagklubs te gaan en die vergaderinge van Jehovah se Getuies begin bywoon. Maar toe hulle klaar was met die Paradys op aarde-boek het hulle besluit om op te hou studeer.

Hulle is weer Nepal toe waar hulle in ’n huisie aan die voet van die Himalajagebergtes gewoon het. Eendag het ’n bejaarde man, geklee in ’n pak en met ’n das aan, aan hulle deur geklop. Die vrou was alleen by die huis en sy het gedink dat hy ’n kunshandelaar was wat na hulle skilderye kom kyk het. Tot haar verbasing was hy ’n Getuie wat hulle kom opsoek het namens die persoon wat in Frankryk met hulle gestudeer het. Haar vriend het kort daarna huis toe gekom en ’n bespreking van twee uur het gevolg.

Die paartjie het ’n paar dae later ’n vergadering van Jehovah se Getuies in Katmandoe bygewoon en was baie beïndruk deur die sindelike voorkoms van dié wat die vergadering bygewoon het. Hulle het dieselfde broederlike liefde en blydskap gesien wat hulle by die vergaderinge in Frankryk gesien het. Hulle het ook die eenheid opgemerk onder die Nepalese wat daar teenwoordig was, hoewel hulle tot verskillende kastes behoort het. Hulle was nou oortuig dat dit Jehovah se organisasie móét wees.

’n Maand later is hulle terug Frankryk toe, en hulle het dadelik hulle Bybelstudie en vergaderingbywoning hervat. Hulle is getroud, het aan die getuieniswerk begin deelneem en is eindelik gedoop. Die man is nou ’n bedieningskneg en sy vrou neem gereeld aan die hulppionierdiens deel. Diegene wat die regte hartstoestand het, sal beslis deur Jehovah se gees gehelp word om vordering te maak en sy aanbidders te word.—Openbaring 7:15-17.

[Venster/Kaart op bladsy 9]

NEPAL

Bevolking - 17 712 221

Verkondigerhoogtepunt vir 1990 - 63

Verhouding, 1 verkondiger vir elke - 281 146

Gemiddelde pionierverkondigers - 10

Aantal gemeentes - 1

Gemiddelde Bybelstudies - 107

Gedenkmaalopkoms - 220

[Kaart]

(Sien publikasie vir oorspronklike teksuitleg)

NEPAL

INDIË

[Prent op bladsy 9]

Marktoneel in Katmandoe, Nepal