Vrae van lesers

◼ Waarom word 29 G.J. as ’n spiljaartal in Bybelgeskiedenis beskou, pleks van 14 G.J., die begin van die regering van keiser Tiberius, waarvan daar in Lukas 3:1 melding gemaak word?

Daar word nie in die Bybel melding gemaak van die begin van Tiberuis se regering nie, maar wel van ’n gebeurtenis wat in die laaste gedeelte van sy 15de jaar plaasgevind het. Dit stel Bybelstudente in staat om vas te stel dat die gebeurtenis in 29 G.J. plaasgevind het, wat uit ’n Bybelse oogpunt as ’n spiljaartal beskou kan word.

Die regering van die tweede keiser van Rome, keiser Tiberius, word algemeen in die geskiedenis aanvaar. The New Encyclopædia Britannica sê: “In 14 n.C., op 19 Augustus, het Augustus [die eerste keiser] gesterf. Tiberius was nou oppermagtig en het die Senaat tot sy eie voordeel gemanipuleer, en het hulle ongeveer ’n maand lank nie toegelaat om hom tot keiser te benoem nie, maar op 17 September het hy tot die vorstedom toegetree.”a

Hierdie vasgestelde datum vir die begin van Tiberius se regering strook met wat die Bybel sê, want Lukas 3:1-3 sê oor die bediening van Johannes die Doper: “In die vyftiende jaar van die regering van keiser Tiberius, toe Pontius Pilatus goewerneur was van Judea . . . het die woord van God gekom tot Johannes, die seun van Sagaria, in die woestyn. En hy het gekom in die hele omtrek van die Jordaan en die doop van bekering tot vergifnis van sondes verkondig.”

Johannes het nie begin preek en mense begin doop toe Tiberius keiser geword het nie, maar wel “in die vyftiende jaar van die regering van keiser Tiberius”. Daardie 15de jaar het gestrek van die herfs van 28 G.J. tot die herfs van 29 G.J. Maar die feit dat ons dit weet, stel ons nie in staat om met sekerheid vas te stel wanneer gedurende daardie jaar Johannes se bediening begin het of wanneer verwante gebeurtenisse plaasgevind het nie.

Maar die Bybel gee ons belangrike aanvullende inligting. Daniël se profesie van die “sewentig weke” het byvoorbeeld aangedui dat die Messias in 29 G.J. sou verskyn. Dit het ook aangedui dat Jesus se bediening drie en ’n half jaar sou duur (Daniël 9:24-27). Voeg hierby hierdie Bybelse besonderhede: Jesus is ses maande na Johannes gebore; toe Jesus gedoop is, “was [hy] omtrent dertig jaar oud”; en Jesus het in die lente van 33 G.J. (Pasgatyd) gesterf, toe hy 33 1/2 jaar oud was.—Lukas 1:24-38; 3:23; 22:14-16, 54.b

Met sulke duidelike Bybelse inligting, tesame met die datering van Tiberius se regering volgens sekulêre bronne, kan Bybelstudente vasstel dat Johannes se bediening in die lente van 29 G.J. begin het en dat Johannes Jesus ses maande later, in die herfs van 29 G.J., gedoop het. Dit is derhalwe nie 14 G.J. nie, maar 29 G.J., wat uit die Bybel se oogpunt as die spiljaartal beskou word.

[Voetnote]