Koninkryksverkondigers berig

Jehovah se Getuies getuig informeel met goeie resultate

BAIE mense het Bybelwaarheid vir die eerste keer leer ken toe een van Jehovah se Getuies informeel vir hulle getuig het. Die Getuies volg hierin die voorbeeld van Jesus Christus wat informeel vir ’n Samaritaanse vrou by ’n put getuig het toe sy kom water skep het (Johannes, hoofstuk 4). In Oos-Afrika het een van Jehovah se Getuies informeel vir ’n Katolieke non getuig. Die Wagtoringgenootskap se takkantoor vertel wat die resultaat was:

◻ Die Getuie het vroeg een oggend op pad dorp toe ’n Katolieke non ontmoet. Sy het van die geleentheid gebruik gemaak en die non gevra: “Waarheen is jy hierdie tyd van die dag op pad?” Die antwoord was: “Ek gaan om tot my God te bid.” Sy het die non toe gevra: “Ken jy die naam van jou God?” “Is sy naam nie God nie?” het die non gevra. Die Getuie het aangebied om daardie middag na haar huis toe te kom om God se naam te bespreek. Na die gesprek het die non na haar kerk toe gegaan en een van die priesters gevra of hy weet wat die woord “Jehovah” beteken. Die antwoord was: “Dit is God se naam.” Die non was baie verbaas om te hoor dat die priester dit geweet het maar dit nooit vir haar geleer het nie.

Die Getuie het die vrou nege agtereenvolgende dae besoek en haar die waarheid geleer oor die Drie-eenheid, die siel, die helse vuur en die hoop vir die dode. Die vrou het alles ingeneem en die Getuie toe gevra om haar tyd te gee om na te dink oor al hierdie nuwe dinge wat sy geleer het. Na twee weke het sy weer met die Getuie in aanraking gekom en gevra dat verdere besprekings gehou moet word. Teen hierdie tyd het die non besluit om die kerk te verlaat en het reeds haar beelde, bidsnoere en kruis vernietig. Die priester het haar probeer ompraat om terug te kom, maar sy was vasbeslote om die waarheid na te streef. Sy is later gedoop en het baie maande lank gereeld as ’n gewone hulppionier gedien ten spyte van haar swak gesondheid en gevorderde leeftyd.

Aangesien haar huis groot is, het sy aangebied dat die gemeente dit as ’n Koninkryksaal gebruik. Die broers het die ou dak vervang, die binnemure uitgebreek en ’n groot deel van die gebou in ’n aantreklike vergaderplek verander. Hierdie voormalige Katolieke non woon in ’n kamer agter die saal. Sy is baie bly dat sy hierdie bydrae tot Jehovah se aanbidding kon maak.

◻ Nog ’n ondervinding wat die wysheid van informele getuieniswerk toon, kom uit Kampala, Uganda. ’n Getuie-sendeling het op pad na ’n staatskantoor informeel met diegene gesels wat saam met hom in die hyser was. Een man, mnr. L​——​——, het ’n begeerte getoon om die lektuur te aanvaar wat aangebied is, maar kon dit nie op daardie oomblik neem nie. Hy het dus vir die sendeling sy naam en die adres van sy kantoor gegee. Die sendeling het later soontoe gegaan en na mnr. L​——​——​ gevra. Hy is laat roep, maar tot die sendeling se verbasing het ’n ander man verskyn. Daar was twee mans met dieselfde naam wat in daardie kantoor gewerk het. ’n Kort getuienis is aan die tweede mnr. L​——​——​ gegee, en hy het buitengewone belangstelling getoon. Waar die eerste mnr. L​——​——​ belangstelling verloor het, is ’n Bybelstudie met die tweede mnr. L​——​——​ begin. Hy is nou ’n gedoopte Getuie, en sy vrou en seun streef daarna om gedoop te word.

Jesus Christus is die Goeie Herder en ken die skaapgeaardes wat die regte hartstoestand het. Hierdie ondervindinge toon dat hy sy volgelinge na sulke persone lei. Informele getuieniswerk kan produktief wees!—Johannes 10:14.