Koninkryksverkondigers berig

Bybelwaarhede bevry ’n non in Bolivia

BAIE opregtes van hart vlug uit valse godsdiens, leer Bybelwaarhede en begin Jehovah, die ware God, aanbid. Meer as 7 600 het dit al in Bolivia gedoen, ’n non inkluis.

M—— het die eerste keer met een van Jehovah se Getuies in aanraking gekom toe sy maar nege was. Sy het die deur oopgemaak toe die Getuie hulle huis besoek het, en daar het sy vir die eerste keer God se naam, Jehovah, gehoor. Dit het haar jare lank bygebly.

Aangesien sy die enigste dogter in die gesin was, is daar besluit dat sy ’n non moes word. “Hoe gelukkig was ek tog dat ek in God se diens sou wees—ten minste, dit is wat ek gedink het”, sê M——. Maar haar vreugde het in ontnugtering verander toe sy die onregverdigheid en partydigheid in die klooster gesien het. Sy sê: “Ek sal moontlik nooit die neerslagtigheid vergeet wat ek van tyd tot tyd ondervind het en daardie liggaamlike en geestelike afranselings wat so pynlik was nie, wat daartoe gelei het dat ek God begin beskou het nie as die Een van liefde nie, maar as die Een wat sonder medelye straf.”

Sy sê verder: “Teen die tyd dat ek ’n non geword het, het ek nog nie die naam Jehovah in die Bybel gekry nie. Ek het net ‘Jahweh’ gekry, en dit het my verwar. Ek het selfs eendag na daardie mense gaan soek wat oor Jehovah praat, maar ek het hulle nie gevind nie.

“Na verloop van tyd het ek eendag toe ek op pad was na my ouers se huis toe ’n teken ‘Koninkryksaal van Jehovah se Getuies’ gesien. Ek wou vir hulle sê dat hulle valse profete is, maar daar was niemand in die saal nie. Ek het die Sondag teruggegaan. Hulle was besig met ’n vergadering, en ’n hele paar het verbaas gelyk om ’n non in haar volle uitrusting daar te sien. Ná die vergadering het ek probeer om gou weg te kom. Maar een van die Getuies het my gegroet en ek het haar derhalwe gevra: ‘Waarom laster julle die Heilige Een deur daardie naam te dra?’ My vraag het tot ’n Bybelbespreking gelei, en ek het reëlings getref dat sy my by my ouers se huis besoek. My ouers het haar weggejaag. Maar ons het mekaar twee maande later weer raakgeloop, en sy het my na haar huis toe genooi vir ’n Bybelstudie. Ek was baie beïndruk deur die inligting wat sy my gewys het, wat bewys het dat Christene God se naam moet gebruik. Daardie bewyse het my die nodige krag gegee om al die nuttelose dinge te verwerp wat ek as non geleer is.

“Ek onthou baie dinge oor my lewe in die klooster. Ek het byvoorbeeld eenkeer nie genoeg kos gekry nie. Ek het dus aan my ouers geskryf om vir my kos te stuur, min wetende dat briewe in die klooster gesensor word. Tydens die volgende maaltyd is daar ’n groot klomp brood en konfyt voor my neergesit, en ek is gedwing om alles te eet. Nou het ek weer te veel kos gehad. Ek het dit vir my vriende gesê, en een van hulle het voorgestel dat ek die brood verkrummel en dit op die vloer strooi. Toe ek dit gedoen het, het ’n non my onmiddellik gegryp en my op die grond neergegooi en my streng beveel om die hele vloer skoon te lek. Dit was ’n groot vertrek. Terwyl ek gedoen het wat sy my beveel het, het ek baie hoor giggel en lag—hoegenaamd geen genade is betoon nie.

“Ek kan nou sien hoe wonderlik dit is om van al daardie dinge bevry te wees. Soos ’n mens kan verwag, het hierdie bevryding opofferinge geverg. Vir eers het my pa my die huis verbied. Ek het nogtans die voorreg gehad om ander jong nonne die waarheid te help leer voor ek die klooster verlaat het. Ek is verheug om te kan sê dat ’n paar van ons ons lewe aan Jehovah God toegewy het!

“Nadat ek die klooster verlaat het, was dit vir my pa moeilik om te verstaan waarom ek betalende maar tydrowende werkgeleenthede van die hand gewys het. Maar ek wou meer tyd vir God se diens hê. Ek dien nou as ’n gewone pionier en geniet ’n eenvoudige en tog baie lonende lewe. En tot my groot vreugde het my ma en my broers hulle by my in Jehovah se diens aangesluit.”

Bybelwaarhede bevry ’n mens inderdaad van hierdie wêreld se valse godsdiensstelsel, en dit bring blywende vreugde en geluk.—Johannes 8:32.