Koninkryksverkondigers berig
’n Vrou wat reeds 25 jaar ’n non is, leer uiteindelik die waarheid
DIE Bybel het voorspel dat “’n groot menigte” uit al die nasies na Jehovah se geestelike tempel sou kom en daar sou aanbid (Openbaring 7:9). Dit gebeur vandag, en ons is verheug om te sien dat baie mense, met behulp van God se waarheid, die boeie van die Christendom op dié manier verbreek. Die volgende ondervindings lig dit toe.
◻ ’n Vrou in Rome, Italië, skryf: “Van kleins af was dit my grootste begeerte om ’n non te word, aangesien ek vurig begeer het om God met my hele hart te dien. Ek kon my begeerte op 8 Desember 1960 op die ouderdom van 32 vervul, toe ek my eerste geloftes van gehoorsaamheid, armoede en kuisheid afgelê het. My toewysing was om dag en nag ongeveer 30 kinders wat wees was of wie se ouers in die gevangenis was, op te pas. Ek het bevrediging uit my werk geput.
“My geloof is na tien jaar se diens geskok toe daar onmin in die inrigting ontstaan het. Ek het gewonder waarom God sulke onmin en ongerymdhede in sy huis sou toelaat, aangesien hy ons rig.”
Die non het ’n suster gehad wat in Frankryk gewoon het en een van Jehovah se Getuies was. Sy het deur middel van briewe vir die non getuig en vir haar die New World Translation of the Holy Scriptures gestuur. Die non sê: “Na 23 jaar was dit die eerste keer wat ek met God se Woord in aanraking gekom het.” Sy het toe ’n Bybelstudie met Jehovah se Getuies aanvaar. Sy sê: “Terwyl ek met die studie gevorder het, het ek Jehovah God se vereistes sowel as sy wonderlike eienskappe leer ken. Ek het baie sleg gevoel toe ek geleer het dat hy die gebruik van beelde afkeur, aangesien die inrigting vol beelde van elke grootte en soort was. Ek het besef dat as ek Jehovah wou behaag ek nie daar kon bly nie. Na 25 jaar van toegewyde diens as ’n non het ek uiteindelik die waarheid gevind. Ek het dus tot groot ontsteltenis van my owerstes op 1 Oktober 1985 my bedanking ingedien.
“My liefdevolle broers en susters het my geestelik sowel as materieel gehelp. Uit dankbaarheid vir Jehovah en sy organisasie is ek op 30 Augustus 1986 gedoop, en het ek die ware reis na die ewige lewe aangepak.”
Jehovah seën ’n tiener se begeerte om God te dien
◻ Toe ’n onderwyseres in Brasilië wat een van Jehovah se Getuies is vraestelle nagesien het, het sy gesien dat ’n veertienjarige leerling geskryf het oor haar begeerte om God beter te leer ken. Sy het ’n Bybelstudie met die leerling begin, maar namate die meisie gevorder het, het haar Katolieke gesin die studie verbied en haar lektuur vernietig. Die jong leerling het die Bybel tydens skoolpouses begin studeer, maar sy is betrap. Die studie is dus deur briewe voortgesit. Die gesin het egter gou haar briewe ontdek en hulle verbrand. Haar pa het haar begin dwing om die Mis by te woon. Sy het saamgegaan maar ’n nommer van Die Wagtoring wat sy tussen die bladsye van die kerkboekie versteek het, saamgeneem om gedurende die diens te lees. Dit het ses maande lank so aangehou, totdat sy eendag uit die huis gesluip het om na die Koninkryksaal te gaan. Gedurende die vergadering het haar pa in die deur verskyn en vir die broers gesê dat hulle vir sy dogter moet sê dat hy haar gaan slaan wanneer sy huis toe kom. Die broers se pogings om met hom te redeneer het nie gehelp nie.
Die volgende dag, gelukkig en met ’n breë glimlag op haar gesig, het sy die broers gaan sien. Sy het hulle die baie kneusplekke op haar liggaam gewys waar haar pa haar pas geslaan het. Waarom was sy dan gelukkig? Nadat haar pa van die Koninkryksaal weg is, het hy etlike mense op die dorp, die burgemeester inkluis, gevra wat die voordele en nadele daarvan is as sy dogter een van Jehovah se Getuies is. Die burgemeester het gesê dat die Getuies goeie mense is wat vertrou kan word. Hy het bygevoeg dat hulle uitstekende sedelike standaarde het en dat dit baie goed sal wees om ’n kind met hierdie standaarde te hê, wat soveel hoër is as dié van die jeug in die algemeen.
Die meisie het ten spyte hiervan haar slae gekry. Maar die pa het vir haar gesê dat hy haar slaan omdat sy die huis sonder toestemming verlaat het. En hy het gesê dat hy haar weer sou slaan as sy ooit sou ophou om die Bybel te bestudeer of die vergaderinge van Jehovah se Getuies by te woon! Die dogter is nou ’n ywerige verkondiger, en party in haar gesin toon belangstelling in die waarheid.
Jehovah seën waarlik jongmense wat opreg begeer om hom te dien, soos hierdie ondervinding toon.—Psalm 148:12, 13.