Wat die Christendom in Afrika gesaai het
IN 1867 het Charles Lavigerie, ’n Franse Katoliek, as die pas aangestelde aartsbiskop van Algiers na Afrika gekom. “God het Frankryk gekies”, het hy gesê, “om Algerië die bakermat van ’n groot en Christelike nasie te maak.”
Lavigerie se droom het verder as Algerië gestrek. Trouens, hy het sendelinge deur die woestyn gestuur met die doel om “Sentraal- en Noord-Afrika tot die gemeenskaplike lewe van die Christendom te verenig”.
Intussen was Protestantse sendelinge reeds in die westelike, suidelike en oostelike dele van die vasteland bedrywig. Hulle het talle ontberings gely, soos herhaalde malaria-aanvalle, met die gepaardgaande kouekoors, sweetperiodes en ylhoofdigheid. Omdat hulle vinnig deur tropiese siektes verswak is, het talle kort na hulle aankoms gesterf. Maar ander het aanhou kom. “Enigeen wat in Afrika rondreis”, het Adlai Stevenson gesê, “word voortdurend aan die sendelinge se dapperheid herinner. . . . Hulle het geveg teen geelkoors, disenterie, parasiete en . . . ek het . . . hulle grafstene gesien—deur die hele Afrika heen.”
Vrugte van die sendingwerk
Toe sendelinge in Afrika ingegaan het, het hulle gevind dat die meeste stamme ongeletterd was. “Van die sowat agthonderd [Afrika-]tale”, verduidelik Ram Desai in sy boek Christianity in Africa as Seen by Africans, “het slegs vier voor die koms van die sendelinge ’n geskrewe vorm gehad.” Die sendelinge het dus ’n skryfvorm vir hierdie ongeskrewe tale ontwerp. Toe het hulle leerboeke gedruk en die mense begin leer lees. Vir daardie doel het hulle skole oor die hele Afrika gebou.
Die sendelinge het ook hospitale gebou. “Daar is geen ander instansie wat hulle humanitêre werk kan ewenaar nie”, erken Ram Desai. Benewens mediese sorg het die Afrikane die materiële ware van Europa begeer. Sommige sendelinge het handelsposte opgerig, aangesien hulle geglo het dat dit bekeerlinge sou trek. Die Basel-sending van Switserland het byvoorbeeld ’n handelsmaatskappy in Ghana gestig. Hulle het ontdek dat kakaobome goed daar aard, en vandag is Ghana die wêreld se derdegrootste vervaardiger van kakao.
’n Vername prestasie van die Christendom se sendelinge is die feit dat hulle die Bybel vertaal het. Maar die verspreiding van die Bybel se boodskap bring nog ’n ernstige verantwoordelikheid mee. Die Christenapostel Paulus het dit getoon deur te vra: “Jy . . . , wat ’n ander leer, leer jy jouself nie? Jy wat preek dat ’n mens nie mag steel nie, steel jy?” Die Bybel waarsku dat diegene wat die Christelike godsdiens verkondig self die goeie beginsels moet naleef wat in God se Woord uiteengesit is.—Romeine 2:21, 24.
Wat van die Christendom se sendingwerk in Afrika? Het dit die God van die Bybel geëer, of het dit die Christelike leer verkeerd voorgestel?