Waarom party weer gebore word

“AS IEMAND nie weer gebore word nie, kan hy die koninkryk van God nie sien nie” (Johannes 3:3). Daardie woorde het baie mense al aangegryp en dronkgeslaan sedert Jesus Christus dit meer as 1 900 jaar gelede geuiter het.

As ons werklik wil verstaan wat Jesus oor die wedergeboorte gesê het, moet ons eerstens hierdie vrae beantwoord: Wat is God se voorneme met die mens? Wat gebeur by die dood met die siel? Wat moet God se Koninkryk bewerkstellig?

God se voorneme met die mens

Die eerste man, Adam, is as ’n volmaakte menseseun van God geskep (Lukas 3:38). Dit was nooit Jehovah God se voorneme dat Adam moes sterf nie. Adam en sy vrou, Eva, het die vooruitsig gehad om ’n sondelose mensegesin voort te bring wat vir ewig sou leef en ’n paradysaarde sou vul (Genesis 1:28). Die dood was nie ’n deel van God se oorspronklike voorneme met die man en vrou nie. Dit het slegs op die mensetoneel verskyn weens die opstand teen die Goddelike wet.—Genesis 2:15-17; 3:17-19.

Hierdie opstand het groot sedelike geskille laat ontstaan, soos byvoorbeeld die geskil of God se soewereiniteit geregverdig is en of die mens die vermoë het om aan sy wette getrou te bly. Tyd sou nodig wees om hierdie geskille te besleg. Maar Jehovah God se voorneme met die mens het nie verander nie en hy kan nie misluk wat sy voorneme betref nie. Sy vaste voorneme is om die aarde met ’n volmaakte mensegeslag te vul wat ewige lewe in ’n Paradys sal geniet (Psalm 37:29; 104:5; Jesaja 45:18; Lukas 23:43, NW). Ons moet hierdie grondwaarheid in gedagte hou wanneer ons kyk na wat Jesus oor die wedergeboorte gesê het.

Wat gebeur by die dood met die siel?

Griekse filosowe, wat onbewus was van wat God se heilige gees aan Bybelskrywers geopenbaar het, kon nie die betekenis van die lewe vind nie. Hulle kon nie glo dat die mens net ’n paar jaar moes lewe, dikwels in ellendige toestande, en dan ophou lewe nie. Hieroor was hulle reg. Maar hulle gevolgtrekking oor die mens se vooruitsigte na die dood was verkeerd. Hulle het tot die gevolgtrekking gekom dat die mens na die dood in die een of ander vorm bly voortbestaan, dat daar in elkeen ’n onsterflike siel is.

Jode en verklaarde Christene is deur sulke denke beïnvloed. Die boek Heaven—A History sê: “Elke keer wanneer Jode van die diaspora en Griekse intellektuele ontmoet het, het die idee van ’n onsterflike siel ter sprake gekom.” Die boek sê verder: “Griekse leerstellings oor die siel het ’n blywende indruk op Joodse opvattings en uiteindelik op dié van Christene gemaak. . . . Deur ’n unieke samestelling te skep van Platoniese filosofie en Bybelse tradisie het Filo [’n eerste-eeuse Joodse filosoof van Alexandrië] die weg vir latere Christendenkers gebaan.”

Wat het Filo geglo? Dieselfde boek sê voorts: “Hy het geglo dat die dood die siel in sy oorspronklike, voorgeboortelike toestand herstel. Aangesien die siel aan die geestelike wêreld behoort, is lewe in die liggaam net ’n kort, dikwels ongelukkige, gebeurtenis.” Maar Adam se “voorgeboortelike toestand” was ’n toestand van nie-bestaan. Volgens die Bybelverslag was dit nooit God se voorneme dat daar na die dood ’n outomatiese oorplasing na die een of ander ryk sal wees nie, asof die aarde maar net ’n voorbereidingsterrein vir ’n hoër of ’n laer bestaan is.

Die opvatting dat die mensesiel onsterflik is, kom nie voor in God se geesgeïnspireerde Woord, die Bybel, nie. Die woorde “onsterflike siel” kom nie eers een keer daarin voor nie. Dit sê dat Adam as ’n siel geskep is, nie met ’n siel nie. Genesis 2:7 sê: “Die HERE God het die mens geformeer uit die stof van die aarde en in sy neus die asem van die lewe geblaas. So het dan die mens ’n lewende siel geword.” Die mens het nooit die vooruitsig gehad om óf ewige lewe in die hemel te geniet óf vir ewig in die helse vuur gefolter te word nie. Die Bybel toon dat die siel, of mens, wat sterf nie ’n bewustelike bestaan voer nie (Psalm 146:3, 4; Prediker 9:5, 10; Esegiël 18:4). Gevolglik is die idees wat filosowe al oor die siel gehad het onskriftuurlik. Ons moet waak teen misleidende idees wat ons begrip van wat Jesus oor die wedergeboorte gesê het, kan vertroebel.

Weer gebore om as konings te heers

Jesus het vir Nikodemus gesê dat diegene wat ‘weer gebore word in die koninkryk van God ingaan’ (Johannes 3:3-5). Wat is daardie Koninkryk? Jehovah God het vroeg in die mens se geskiedenis in simboliese taal gesê dat dit sy voorneme is om ’n spesiale “saad”—’n toekomstige heerser—te gebruik om die kop van die oorspronklike Slang, Satan die Duiwel, te vermorsel (Genesis 3:15; Openbaring 12:9). Hierdie “saad” is in toenemende mate in die Skrif geïdentifiseer as Jesus Christus, wat saam met medeheersers in ’n unieke weergawe van God se soewereiniteit, die Messiaanse Koninkryk, heers (Psalm 2:8, 9; Jesaja 9:5, 6; Daniël 2:44; 7:13, 14). Dit is die Koninkryk van die hemele, ’n regering in die hemel wat Jehovah se soewereiniteit sal regverdig en die mensdom van slawerny aan sonde en die dood sal bevry.—Mattheüs 6:9, 10.

Jesus se medeheersers bestaan uit 144 000 wat uit die mensdom gekoop word (Openbaring 5:9, 10; 14:1-4). God het party van Adam se onvolmaakte nakomelinge gekies om hierdie “heiliges van die Allerhoogste” te word wat saam met Christus in die Messiaanse Koninkryk heers (Daniël 7:27; 1 Korinthiërs 6:2; Openbaring 3:21; 20:6). Hierdie manne en vroue stel geloof in Jesus Christus wat gesê het dat hulle “weer gebore” sou word (Johannes 3:5-7). Hoe en waarom vind hierdie geboorte plaas?

Hierdie individue is in water gedoop as Christus se volgelinge. God het hulle sondes vergewe op grond van Jesus se losprysoffer, hy het hulle regverdig verklaar en het hulle as geestelike seuns aangeneem (Romeine 3:23-26; 5:12-21; Kolossense 1:13, 14). Die apostel Paulus sê vir sulke mense: “Julle het ontvang die Gees van aanneming tot kinders, deur wie ons roep: Abba, Vader! Die Gees self getuig saam met ons gees dat ons kinders van God is; en as ons kinders is, dan ook erfgename, erfgename van God en mede-erfgename van Christus, as ons naamlik saam met Hom ly, sodat ons ook saam met Hom verheerlik kan word.”—Romeine 8:15-17.

As volgelinge van Christus het hulle ’n nuwe geboorte, of ’n nuwe begin, in die lewe gehad. Dit het daartoe gelei dat hulle die oortuiging het dat hulle ’n aandeel in Jesus se hemelse erfenis sal hê (Lukas 12:32; 22:28-30; 1 Petrus 1:23). Die apostel Petrus het die hergeboorte só beskryf: “[God] wat na sy grote barmhartigheid ons die wedergeboorte geskenk het tot ’n lewende hoop deur die opstanding van Jesus Christus uit die dode, sodat ons ’n onverganklike en onbesmette en onverwelklike erfenis kan verkry, wat in die hemele bewaar is vir ons” (1 Petrus 1:3, 4). Hierdie nuwe lewe in die hemel is vir sulke individue moontlik gemaak omdat God hulle opwek soos hy vir Jesus opgewek het.—1 Korinthiërs 15:42-49.

Wat van die aarde?

Dit beteken nie dat alle gehoorsame mense uiteindelik weer gebore sal word om van die aarde af hemel toe te gaan nie. Só ’n verkeerde idee is soortgelyk aan die idees wat filosowe soos Filo voorgestaan het, wat gedink het dat “lewe in die liggaam net ’n kort, dikwels ongelukkige, gebeurtenis [is]”. Maar daar was niks verkeerd met Jehovah God se oorspronklike aardse skepping nie.—Genesis 1:31; Deuteronomium 32:4.

Die mens se lewe moes nooit kort en vol lyding gewees het nie. Jesus Christus en diegene wat weer gebore word om as konings en priesters saam met hom in die hemel te dien, sal ’n einde maak aan al die skadelike gevolge van Satan se opstand (Efesiërs 1:8-10). Deur middel van hulle as die beloofde ‘saad van Abraham’ “sal al die nasies van die aarde geseën word” (Galasiërs 3:29, NW; Genesis 22:18). Vir die gehoorsame mensdom sal dit die lewe op ’n paradysaarde beteken, baie anders as vandag se bestaan wat so kort en vol lyding is.—Psalm 37:11, 29; Openbaring 21:1-4.

Wie sal bevoordeel word?

Onder diegene wat sal voordeel trek uit God se voorsiening waardeur hy die mensdom gaan seën, is diegene wat opgewek gaan word en geloof in Jesus se losprysoffer beoefen (Johannes 5:28, 29; Handelinge 24:15). Die meeste van hulle het nooit van God en Christus geleer nie en kon gevolglik nie geloof in Jesus toon nie. Onder diegene wat opgewek sal word, sal ook getroue mense soos Johannes die Doper wees, wat gesterf het voordat Jesus se dood die weg vir ’n hemelse lewe gebaan het (Mattheüs 11:11). Buiten hulle het ‘’n groot menigte uit alle nasies hulle klere gewas en dit wit gemaak in die bloed van die Lam’, Jesus Christus. Hulle reageer gunstig op die Koninkrykspredikingswerk wat nou onder die leiding van Jesus se wedergebore “broeders” gedoen word en hulle sal God se oorlog van Armageddon oorleef om op ’n skoongemaakte aarde te lewe (Openbaring 7:9-14; 16:14-16; Mattheüs 24:14; 25:31-46). Miljoene sal gevolglik onder God se Koninkryksreëling gered word, hoewel hulle nie wedergebore is om saam met Christus in die hemele te heers nie.—1 Johannes 2:1, 2.

Sal jy onder diegene wees wat die lewe op ’n paradysaarde sal ontvang? Jy kán as jy geloof beoefen in Jesus Christus se offerande en met die ware Christengemeente begin omgaan. Dit is nie deur filosofieë besmet nie, maar het “’n pilaar en grondslag van die waarheid” gebly. (1 Timotheüs 3:15; vergelyk Johannes 4:24; 8:31, 32.) Dan kan jy uitsien na ’n wonderlike toekoms wanneer wedergebore seuns van God in die hemel heers en al God se aardse kinders tot volmaaktheid op ’n paradysaarde herstel is. Gryp dus die geleentheid aan sodat jy die lewe in daardie nuwe wêreld van ewige seëninge kan geniet.—Romeine 8:19-21; 2 Petrus 3:13.

[Prent op bladsy 6]

Adam het nooit die alternatief gehad om óf ’n hemelse lewe te geniet óf vir ewig in die helse vuur gefolter te word nie