Die kruis—Simbool van die Christelike godsdiens?

EEUE lank het menigtes die kruis as ’n simbool van die Christelike godsdiens aanvaar. Maar is dit werklik? Baie wat dit opreg geglo het, was verbaas om uit te vind dat die kruis nie net deur die Christendom gebruik word nie. Inteendeel, dit word algemeen deur nie-Christelike godsdienste reg oor die wêreld gebruik.

Terwyl Hernán Cortés en sy “Christen”-leër byvoorbeeld in die vroeë 1500’s voorberei het om die Asteekse Ryk aan te val, het hulle baniere gedra wat gelui het: “Laat ons die teken van die Heilige Kruis in ware geloof volg, want onder hierdie teken sal ons seëvier.” Hulle moes seker verbaas gewees het toe hulle uitvind dat hulle heidense vyande ’n kruis aanbid het wat nie baie verskil het van hulle s’n nie. Die boek Great Religions of the World sê: “Cortés en sy volgelinge het teruggedeins van die menseoffers van die Asteke en van wat na sataniese bespottings van die Christelike godsdiens gelyk het: . . . hulle het kruisagtige simbole van wind- en reëngode vereer.”

In ’n artikel in die koerant La Nación het skrywer José Alberto Furque gesê dat daar in die tweede helfte van die 18de eeu “’n vurige en opwindende debat onder antropoloë en argeoloë oor die oorsprong en betekenis van die kruisvormige tekens” begin het wat hulle oor groot dele van Sentraal- en Suid-Amerika gevind het. Party was blykbaar so ywerig om die status van die kruis as ’n unieke “Christelike” simbool te beskerm dat hulle die teorie voorgestaan het dat die Amerikas op die een of ander manier die evangelie ontvang het voordat Columbus sy beroemde reis onderneem het! Hierdie verregaande idee moes verwerp word omdat dit ongegrond was.

Mettertyd het verdere ontdekkings op hierdie gebied alle debatte daaroor stopgesit. José Alberto Furque sê: “In ’n werkstuk wat in 1893 deur die Smithsonian-instituut gepubliseer is, is daar bewys dat die kruis reeds vereer is . . . lank voor die eerste Europeërs na Noord-Amerika gekom het, wat die teorie onderskryf . . . dat so ’n simbool in alle gemeenskappe voorgekom het as ’n deel van die kultiese aanbidding van die kragte waardeur lewe ontstaan.”

Die Bybel toon dat Jesus nie tereggestel is op ’n konvensionele kruis nie, maar eerder op ’n eenvoudige paal, of stau·rosʹ. Hierdie Griekse woord, wat in Mattheüs 27:40 voorkom, beteken basies ’n eenvoudige regop balk of paal, soortgelyk aan dié wat in boufondamente gebruik word. Die kruis het gevolglik nooit die ware Christelike godsdiens verteenwoordig nie. Jesus Christus het die eintlike simbool, of “teken”, van die ware Christelike godsdiens geïdentifiseer, toe hy vir sy dissipels gesê het: “Hieraan sal almal weet dat julle my dissipels is, as julle liefde onder mekaar het.”—Johannes 13:35.