Nuwe skeppingswerke word voortgebring!
DIE wyse koning Salomo het eenkeer gesê: “Daar is glad niks nuuts onder die son nie” (Prediker 1:9). Dit is waar wat die fisiese wêreld betref waarin ons leef, maar wat van die uitgestrekte ryk van Jehovah se geestelike skepping? In daardie ryk het iemand wat groter as Salomo is, wat trouens die grootste mens was wat nog geleef het, ’n uitstaande nuwe skeppingswerk geword. Hoe het dit gebeur?
In die jaar 29 van ons Gewone Jaartelling het die volmaakte mens, Jesus, na Johannes gekom om in die Jordaanrivier gedoop te word. “Nadat Jesus gedoop was, het Hy dadelik uit die water opgeklim, en meteens gaan die hemele vir Hom oop, en Hy sien die Gees van God soos ’n duif neerdaal en op Hom kom. En daar kom ’n stem uit die hemele wat sê: Dit is my geliefde Seun in wie Ek ’n welbehae het” (Mattheüs 3:16, 17). Die mens Christus Jesus was gevolglik die eerste van ’n nuwe skepping wat gesalf is om God se wil te doen. Later het Jesus, op grond van sy offerdood, die Middelaar geword van ’n nuwe verbond tussen God en ’n uitverkore groep mense. Elkeen van hulle het “’n nuwe skepping” geword wat deur God se gees verwek is tot ’n hemelse hoop, met die vooruitsig om saam met Jesus in sy hemelse Koninkryk te regeer.—2 Korinthiërs 5:17, NW; 1 Timotheüs 2:5, 6; Hebreërs 9:15.
Deur die eeue heen is hierdie gesalfde, geesverwekte Christene as die ware Christengemeente in eendrag met Christus versamel, wat op sigself ’n nuwe skepping is. God het hulle met ’n doel uit hierdie wêreld verkies, soos die apostel Petrus sê: “Julle is ’n uitverkore geslag, ’n koninklike priesterdom, ’n heilige volk, ’n volk as eiendom verkry, om te verkondig die deugde van Hom wat julle uit die duisternis geroep het tot sy wonderbare lig” (1 Petrus 2:9). Soos Christus Jesus, God se eerste nuwe skepping, is dit hierdie nuwe skepping wat daarop gevolg het se vernaamste verantwoordelikheid om die goeie nuus te verkondig (Lukas 4:18, 19). Die lede daarvan, wat uiteindelik altesaam 144 000 sal wees, moet hulle elkeen “met die nuwe mens [“persoonlikheid”, NW] . . . beklee wat na God geskape is in ware geregtigheid en heiligheid” (Efesiërs 4:24; Openbaring 14:1, 3). Dit vereis dat hulle “die vrug van die Gees” aankweek, wat in Galasiërs 5:22, 23 uiteengesit word, en dat hulle getrou na hulle bediening omsien.—1 Korinthiërs 4:2; 9:16.
Wat van hierdie nuwe skepping in hedendaagse tye? Soos die Bybel se tydrooster toon, is die woorde van Openbaring 11:15 in die jaar 1914 vervul: “Die koninkryke van die wêreld het die eiendom van onse Here [Jehovah] geword en van sy Christus, en Hy sal as Koning heers tot in alle ewigheid.” Die eerste daad van Christus as die pas gekroonde Koning was om Satan en sy demoniese engele uit die hemel na die omgewing van die aarde neer te werp. Dit het ‘weë vir die bewoners van die aarde’ beteken, in die vorm van die eerste wêreldoorlog en die ellendes wat daarmee gepaardgegaan het.—Openbaring 12:9, 12, 17.
Dit was ook ’n teken vir die oorblywende lede van die nuwe skepping op die aarde dat hulle deel moet hê aan die vervulling van Jesus se profesie: “Hierdie evangelie van die [opgerigte] koninkryk sal verkondig word in die hele wêreld tot ’n getuienis vir al die nasies; en dan sal die einde kom.” Wat is daardie “einde”? Jesus verduidelik: “Dan sal daar groot verdrukking wees soos daar van die begin van die wêreld af tot nou toe nie gewees het en ook nooit sal wees nie. En as daardie dae nie verkort was nie, sou geen vlees gered word nie; maar ter wille van die uitverkorenes sal daardie dae verkort word.”—Mattheüs 24:3-14, 21, 22.
Jehovah se gees het daardie gesalfdes van sy nuwe skepping aangespoor om bedrywig te word in die omvattendste predikingskampanje wat ooit op hierdie aarde sal plaasvind. Die getal van hierdie ywerige Koninkryksverkondigers het toegeneem van ’n paar duisend in 1919 tot ongeveer 50 000 teen die middel-dertigerjare. Soos dit voorspel is, ‘het hulle stem oor die hele aarde uitgegaan en hulle woorde tot by die eindes van die wêreld’.—Romeine 10:18.
Sal die oorblywende lede van die nuwe skepping die enigstes wees wat vir redding ingesamel word? Nee, omdat dit voorspel is dat God se engele die winde van die groot verdrukking sal terughou tot die voltooiing van die insameling van nie net hierdie geestelike Israeliete met ’n hemelse bestemming nie, maar ook van ander, “’n groot menigte wat niemand kon tel nie, uit alle nasies en stamme en volke en tale”. Wat sal hulle bestemming wees? Wel, hulle sal veilig “uit die groot verdrukking” kom om die ewige lewe op ’n paradysaarde te geniet!—Openbaring 7:1-4, 9, 14.
Gelukkig het hierdie groot menigte, wat uit ongeveer 229 lande ingesamel is, tot byna 4 500 000 bedrywige Getuies toegeneem. Hulle getalle neem steeds toe, soos getoon word deur die feit dat 11 431 171 verlede jaar die Herdenking van Jesus se dood op 17 April bygewoon het. Uit al hierdie miljoene het net 8 683, wat sê dat hulle die oorblywende lede van die nuwe skepping op die aarde is, van die embleme tydens die Gedenkmaal gebruik. Diegene in hierdie klein groepie sou nooit op hulle eie die uitgebreide predikingswerk van vandag kon doen nie. Die miljoene wat die groot menigte uitmaak, werk nou skouer aan skouer saam met hulle om die werk af te handel (Sefanja 3:9). Boonop doen goed opgeleide lede van die groot menigte nou administratiewe en ander verantwoordelike werk tesame met die gesalfde Bestuursliggaam van geestelike Israel, net soos die nie-Israelitiese Netinim saam met die priesters gewerk het om Jerusalem se mure te herstel.—Nehemia 3:22-26, vgl. NW.
“Nuwe hemele en ’n nuwe aarde” word geskep
Met watter vreugde gaan hierdie insameling tog gepaard! Dit is net soos Jehovah gesê het dit sou wees: “Kyk, Ek skep nuwe hemele en ’n nuwe aarde, en aan die vorige dinge sal nie gedink word en hulle sal in die hart nie opkom nie. Maar wees julle bly en juig vir ewig oor wat Ek skep; want kyk, Ek skep Jerusalem om te juig, en sy mense om bly te wees. En Ek sal juig oor Jerusalem en bly wees oor my volk; en daarin sal nie meer gehoor word die stem van geween of die stem van geskreeu nie” (Jesaja 65:17-19). Die nuwe hemele van Jehovah se skepping sal uiteindelik bestaan uit Christus Jesus en die 144 000 opgewekte lede van die nuwe skepping wat oor die afgelope 19 eeue uit die mensdom vrygekoop is. Dit is soveel glorieryker as enige aardse regering wat in letterlike Jerusalem geregeer het, selfs dié van Salomo se dag. Dit sluit die Nuwe Jerusalem, ’n hemelse stad, in wat in al haar sprankelende skoonheid in Openbaring hoofstuk 21 beskryf word.
Die Nuwe Jerusalem is die geestelike bruid van Christus, sy 144 000 gesalfde volgelinge, wat ná hulle dood en geestelike opstanding by hulle Bruidegom in die hemel aansluit. Openbaring 21:1-4 sê dat hulle “neerdaal van God uit die hemel”, dit wil sê, hulle word deur hom gebruik om vir die mensdom hier op die aarde seëninge te bring. Só word die profesie vervul: “Kyk, die tabernakel van God is by die mense, en Hy sal by hulle woon, en hulle sal sy volk wees; en God self sal by hulle wees as hulle God. En God sal al die trane van hulle oë afvee, en daar sal geen dood meer wees nie; ook droefheid en geween en moeite sal daar nie meer wees nie, want die eerste dinge het verbygegaan.”
Hoe dankbaar kan ons tog wees dat God daardie nuwe hemele geskep het! Hierdie regeringsreëling van God sal, in teenstelling met die kortstondige, verdorwe heerskappye wat die mensdom al so lank teister, permanent wees. Die nuwe skepping en hulle geestelike nageslag, die groot menigte, verheug hulle oor wat God verder beloof: “Want soos die nuwe hemel en die nuwe aarde wat Ek maak, voor my aangesig sal bestaan, spreek die HERE, so sal julle nageslag en julle naam bestendig wees.”—Jesaja 66:22.
“Die nuwe aarde” begin met hierdie nageslag van die gesalfde lede van die nuwe skepping. Dit is die nuwe, godvresende gemeenskap van mense op die aarde. Die haat, misdaad, geweld, korrupsie en onsedelikheid wat vandag in die mensegemeenskap voorkom, beklemtoon beslis die behoefte aan ’n heeltemal ander en nuwe aardse gemeenskap, wat onder die leiding van die welwillende nuwe hemele staan. Dit is Jehovah se voorneme. Net soos hy nuwe hemele geskep het, skep hy ook die nuwe aarde deur die groot menigte te versamel as die kern van ’n vreedsame nuwewêreld-gemeenskap. Hierdie gemeenskap alleen sal lewend “uit die groot verdrukking” kom.—Openbaring 7:14.
Wat kan ons ná die groot verdrukking verwag? Toe Jesus met sy apostels gepraat het, wat die eerstes was van diegene wat die nuwe hemele uitmaak wat oor die nuwe aarde sal regeer, het hy beloof: “Voorwaar Ek sê vir julle dat julle wat My gevolg het, in die wedergeboorte [“herskepping”, NW] wanneer die Seun van die mens op sy heerlike troon gaan sit, julle ook op twaalf trone sal sit” (Mattheüs 19:28). Al 144 000 lede van hierdie Nuwe Jerusalem sal saam met Jesus die mensdom oordeel. Liefde sal dan selfsugtigheid en haat vervang as die grondslag waarop die mensegemeenskap gebou word. Stam-, rasse- en nasionalistiese probleme sal uitgeroei word. Geliefdes sal mettertyd deur die opstanding teruggebring word. Miljarde getroue mense sal een groot, verenigde gesin word, wat verhef is tot die ewige lewe op ’n aarde wat in ’n paradys verander is.
Dit sal veel meer as ’n Utopia of ’n Shangri-la wees. Dit sal ’n permanente skepping wees—want “ons verwag volgens sy belofte nuwe hemele en ’n nuwe aarde waarin geregtigheid woon”! (2 Petrus 3:13). Dit is ongetwyfeld ’n wonderlike vooruitsig, ’n fantastiese belofte deur die een wat gesê het: “Kyk, Ek maak alles nuut” en wat dié geloofversterkende stelling bygevoeg het: “Hierdie woorde is waaragtig en betroubaar.”—Openbaring 21:5.