Vrae van lesers

Moet ’n Christen, as hy siek of op reis is en dus nie by die Gedenkmaalviering kan wees nie, dit ’n maand later vier?

In eertydse Israel is die Pasga jaarliks gehou op die 14de van die eerste maand, naamlik Nisan (of Abib). Maar ons vind ’n spesiale voorsiening in Numeri 9:10, 11: “Spreek met die kinders van Israel en sê: As iemand van julle of van julle geslagte deur ’n lyk onrein word of op ’n ver reis is, moet hy tog die pasga vir die HERE hou. In die tweede maand, [naamlik Ijjar, of Sif] op die veertiende dag, teen die aand, moet hulle dit hou; met ongesuurde brode en bitter kruie moet hulle dit eet.”

Let op dat dit nie twee alternatiewe datums (14 Nisan of 14 Sif) vir die Paasfees gegee het nie, en dit het nie enige Israeliet of huisgesin vrygestaan om na gelang van wat vir hulle die gerieflikste was ’n keuse te maak nie. Die voorsiening van ’n Pasgamaal in die tweede maand was beperk. Dit was ’n uitsondering vir ’n Israeliet wat op 14 Nisan seremonieel onrein was of baie ver was van waar die viering gewoonlik gehou is.

Die enigste opgetekende geval waar dit algemeen gebruik is, was toe getroue koning Hiskia die viering van die fees van die ongesuurde brode weer ingestel het. Daar was nie tyd om vir die eerste maand gereed te maak nie (die priesters was nie gereed nie en die mense was nie bymekaar nie), daarom is dit op die 14de dag van die tweede maand gehou.—2 Kronieke 29:17; 30:1-5.

Buiten sulke uitsonderlike omstandighede het die Jode die Pasga gehou op die datum wat God bepaal het (Exodus 12:17-20, 41, 42; Levitikus 23:5). Jesus en sy dissipels het dit gevier soos die Wet vereis het en nie hierdie datum ligtelik beskou nie. Lukas skryf: “Die dag van die ongesuurde brode het gekom waarop die pasga geslag moes word. Toe stuur [Jesus] Petrus en Johannes en sê: Gaan berei die pasga vir ons, dat ons dit kan eet.”—Lukas 22:7, 8.

By daardie geleentheid het Jesus die jaarlikse herdenking ingestel wat Christene as die Heer se Aandmaal ken. Dit kan nie oorbeklemtoon word hoe belangrik dit is dat Christene dit bywoon nie. Vir Jehovah se Getuies is dit die belangrikste gebeurtenis van die jaar. Jesus se woorde toon waarom; hy het gesê: “Doen dit tot my gedagtenis” (Lukas 22:19). Elke Getuie van Jehovah moet dus maande vooruit beplan om die datum van die herdenking vry van enige ander afsprake te hou. Die Heer se Aandmaal sal op 6 April 1993 na sononder gevier word.

In seldsame gevalle kan onvoorsiene omstandighede, soos siekte of reisprobleme, verhinder dat ’n Christen dit bywoon soos wat hy of sy beplan het. Wat moet in so ’n situasie gedoen word?

Gedurende die viering word ongesuurde brood en rooi wyn omgestuur, en diegene wat met God se heilige gees gesalf is en vir lewe in die hemel uitverkies is, gebruik daarvan (Mattheüs 26:26-29; Lukas 22:28-30). As iemand wat elke jaar daarvan gebruik het hierdie jaar bedlêend is, tuis of in ’n hospitaal, sal ouere manne van die plaaslike gemeente reël dat een van hulle van die brood en wyn na die sieke neem, gepaste Bybeltekste oor die onderwerp bespreek en die embleme bedien. As ’n gesalfde Christen weg is van sy tuisgemeente moet hy reëlings tref om ’n gemeente te besoek in die gebied waar hy op daardie datum sal wees.

Met die oog hierop sal dit net onder baie uitsonderlike omstandighede wees dat ’n gesalfde Christen die Heer se Aandmaal 30 dae later (een maanmaand) sal moet vier in ooreenstemming met die opdrag in Numeri 9:10, 11 en die voorbeeld in 2 Kronieke 30:1-3, 15.

Diegene wat aan Jesus se “ander skape” behoort, met die hoop om vir ewig op ’n paradysaarde te lewe, word nie beveel om van die brood en wyn te gebruik nie (Johannes 10:16). Dit is belangrik om die jaarlikse viering by te woon, maar hulle gebruik nie die embleme nie. As een van hulle siek of op reis is en dus nie daardie aand by ’n gemeente is nie, kan hy of sy die toepaslike tekste (onder andere die verslag toe Jesus die herdenking ingestel het) privaat lees en Jehovah se seën op die wêreldwye geleentheid bid. Maar in hierdie geval is dit nie nodig om enige addisionele reëlings te tref vir ’n vergadering of ’n spesiale Bybelbespreking ’n maand later nie.