Is ware beskerming moontlik?

DIE essayis Ralph Waldo Emerson het eenkeer geskryf: “Oppervlakkige mense glo in geluk . . . Sterk mense glo aan oorsaak en gevolg.” Ja, iemand wat op die mag van amulette en gelukbringers vertrou, gee die beheer van sy lewe oor aan onsigbare magte. Hy gooi logika en rede oorboord en onderwerp hom aan irrasionele, bygelowige vrese.

Die Bybel kan ’n mens egter van sulke vrese bevry. Dit toon dat amulette en gelukbringers geen mag besit nie. Hoe so? Wel, volgens The New Encyclopædia Britannica “word daar geglo dat amulette mag kry van hulle verbintenis met [onder andere] natuurkragte”. Hierdie kragte kan ‘die geeste van die dooies’ of ‘die mag van geluk’ wees. Maar die Bybel toon duidelik dat die dooies ‘glad niks weet nie’ (Prediker 9:5). Daar bestaan dus nie geeste van die dooies wat die lewendes kan help of hulle skade kan berokken nie; daar is ook geen onsigbare mag, soos geluk, wat ten behoewe van jou kan werk nie.

In Bybeltye het God sy oordeel uitgespreek oor diegene wat hom verlaat het, diegene wat sy heilige berg vergeet het, diegene “wat ’n tafel dek vir die geluksgod en die mengsel inskink vir die godin van die noodlot”. Daardie voorstanders van geluk het nie beskerming verkry nie, maar sou vernietig word. “Ek sal julle bestem vir die swaard”, het Jehovah God gesê.—Jesaja 65:11, 12.

Deur die towerkunste te beoefen, het die eertydse nasie van Babilon eweneens hulle vertroue in die beskerming van mistieke magte gestel. Maar rampspoed het Babilon nietemin getref. “Hou aan met jou towery en jou afskuwelike duiwelskunste”, het die profeet Jesaja hulle uitgedaag. “Miskien kan jy by hulle hulp kry . . . Maar nee! ten spyte van al jou listigheid is jy magteloos” (Jesaja 47:12, 13, The New English Bible). Mettertyd het daardie nasie glad nie meer bestaan nie. Vertroue in die okkulte het hulle niks in die sak gebring nie. Net so kan geen toweramulet, gelukbringer of talisman enigiets doen om jou te help of te beskerm nie.

’n Vorm van afgodediens

Sommige dink nogtans dat daar niks mee verkeerd is om ’n kristal, ’n haaspootjie of ’n godsdiensmedalje by hulle te dra nie. Is hulle nie maar net onskadelike snuisterye nie? Nie volgens die Bybel nie. Dit sê dat okkulte voorwerpe alles behalwe onskadelik is.

Die gebruik van amulette is ’n vorm van afgodediens—iets wat onomwonde in God se Woord veroordeel word (Exodus 20:4, 5). ’n Persoon voel dalk dat hy nie ’n amulet of ’n talisman regstreeks aanbid nie. Maar is die blote besit van een nie bewys van ’n eerbiedige gesindheid van aanbidding teenoor onsigbare okkulte magte nie? En is dit nie waar dat mense dikwels dade van aanbidding (soos om ’n voorwerp te soen) teenoor die gelukbringers self verrig nie? Maar die Bybel vermaan Christene in 1 Johannes 5:21: “Bewaar julleself van die afgode.” Sluit dit nie voorwerpe in wat as gelukbringers of amulette beskou word nie?

Die strik van die okkulte

Baie raak ook deur die okkulte verstrik omdat hulle van amulette gebruik maak. Dit is waar dat baie mense dikwels ’n kristal of ’n towermiddel by hulle dra omdat dit ’n gebruik is en nie omdat hulle daarin glo nie. Maar net soos ’n mens vigs kan opdoen as jy met ’n prostituut deurmekaarraak, kan dit rampspoedige gevolge hê as jy met die okkulte deurmekaarraak. God het die Israeliete met goeie rede verbied om towery, die verklaring van voortekens en waarsêery te beoefen. “Elkeen wat hierdie dinge doen, is vir die HERE ’n gruwel”, waarsku die Bybel.—Deuteronomium 18:10-14.

Waarom is hierdie streng verbod gegee? Omdat die onsigbare magte wat agter sulke gebruike sit nie die geeste van die dooies of die mag van geluk is nie maar Satan die Duiwel en sy demone.a En die gebruik van amulette hou direk met demoonaanbidding verband. Vine’s Expository Dictionary of Old and New Testament Words sê: “In die duiwelskunste het die gebruik van dwelmmiddels, hetsy dit eenvoudige of kragtige dwelmmiddels was, gewoonlik gepaardgegaan met towerspreuke en beroepe op die okkulte magte, tesame met die gebruik van verskillende gelukbringers, amulette, ens.”

Iemand wat ’n okkulte gelukbringer besit, stel hom dus aan spiritisme bloot. Hy loop die gevaar om onder die bose invloed en beheer van “die god van hierdie wêreld”—Satan die Duiwel—te kom (2 Korinthiërs 4:4). Die Bybel beveel ons derhalwe met goeie rede om alle vorme van spiritisme te vermy.—Galasiërs 5:19-21.

Hoe om die kettings van bygelowigheid te verbreek

The World Book Encyclopedia sê egter: “Bygelowigheid sal waarskynlik ’n deel van die lewe bly solank mense mekaar vrees en onseker oor die toekoms is.” Maar Jehovah se Getuies help baie mense om hulle van skadelike bygelowigheid te bevry. ’n Suid-Afrikaanse vrou sê: “Bose geeste het my lastig geval, en ek het muti oral in my huis gehad om my teen hulle te beskerm.” Jehovah se Getuies het haar gehelp om te besef watter gevare dit inhou om met die okkulte deurmekaar te raak. Hoe het sy gereageer? “Ek het alles in my besit begin weggooi wat met demonisme verband gehou het”, sê sy. “My gesondheid het verbeter. Ek het my lewe aan Jehovah se diens toegewy en is gedoop.” Sy is nou vry van bygelowigheid en spiritisme.

Beskou ook die geval van ’n Nigeriese kruiedokter wat spiritisme saam met sy geneesmetodes beoefen het. Hy het Jehovah se Getuies altyd by sy huis weggejaag wanneer hulle hom besoek het en hulle dikwels gedreig en vervloek. Hy het eenkeer selfs ’n spesiale mengsel aangemaak, ’n paar towerspreuke daaroor geuiter en dit in ’n Getuie se gesig geblaas! “Binne sewe dae sal jy dood wees!” het hy geskreeu. Die Getuie het sewe dae later teruggekeer, en die kruiedokter het buitentoe gehardloop, want hy het gedink hy sien ’n spook! Omdat dit nou duidelik was dat sy toorkrag niks kon vermag nie, het hy tot ’n Bybelstudie ingestem en self later ’n Getuie geword.

Jy kan ook van die kettings van vrees en bygelowigheid bevry word. Dit sal weliswaar nie maklik wees nie. Dalk het jy in ’n kultuur grootgeword waar die gebruik van amulette en gelukbringers iets alledaags is. Die Christene in eertydse Efese het met so ’n probleem te kampe gehad. Hulle het in ’n kultuur gelewe wat sterk onder die invloed van spiritisme was. Wat het hulle gedoen nadat hulle die waarheid van God se Woord geleer het? Die Bybel sê: “Verskeie van die wat met towery omgegaan het, het die boeke bymekaargebring en voor almal verbrand; en hulle het die waarde daarvan bereken en gevind dat dit vyftigduisend silwerstukke was.”—Handelinge 19:19.

Hoe om God se beskerming te verkry

Sal jy nie sonder beskerming wees as jy alle spore van die okkulte uit jou lewe verwyder nie? Inteendeel, “God is vir ons ’n toevlug en sterkte; as hulp in benoudhede is Hy in hoë mate beproef” (Psalm 46:2). God se beskerming sal veral duidelik wees wanneer hy hierdie goddelose stelsel van dinge vernietig. “[Jehovah] weet om die godsaliges uit versoeking te verlos en die onregverdiges te bewaar vir die dag van oordeel om gestraf te word.”—2 Petrus 2:9; vergelyk Psalm 37:40.

Intussen ‘tref tyd en lotgeval ons almal’ (Prediker 9:11). God belowe nie dat sy knegte “onkwesbaar” sal wees of dat hy hulle in so ’n mate sal beskerm dat hulle nooit iets sal oorkom nie. Hy belowe nietemin dat hy ons geestelikheid en ons verhouding met hom sal beskerm (Psalm 91:1-9). Hoe? Om maar een ding te noem, hy gee ons wette en beginsels wat ons tot voordeel kan strek en ons teen Satan se verderflike invloed kan beskerm (Jesaja 48:17). As ons kennis van Jehovah se weë opdoen, ‘sal oorleg oor ons wag hou, sal verstand ons bewaak’—byvoorbeeld teen nuttelose of skadelike bedrywighede.—Spreuke 2:11.

Nog ’n manier waarop God ons beskerm, is deur ons ten tye van beproewinge te voorsien van “die krag wat die normale te bowe gaan” (2 Korinthiërs 4:7, NW). En wanneer omstandighede dreig om vir ’n Christen te veel te word, voorsien Hy “die vrede van God, wat alle verstand te bowe gaan” om die hart en die sinne te bewaar (Filippense 4:7). Ja, die Christen is toegerus om ‘staande te bly teen die liste van die duiwel’.—Efesiërs 6:11-13.

Hoe kan jy sulke beskerming verkry? Begin deur kennis van Jehovah en van sy Seun, Jesus Christus, in te neem (Johannes 17:3). Jehovah se Getuies kan baie doen om jou in hierdie verband te help. Namate jy ’n hegte verhouding met Jehovah aankweek, sal jy sy liefdevolle beskerming begin ervaar. In Psalm 91:14 lees ons: “Omdat hy My liefhet, sê God, daarom sal Ek hom red; Ek sal hom beskerm, omdat hy my Naam ken.”

Ja, as jy aan God getrou is, sal hy jou uiteindelik seën met ewige lewe in die komende nuwe wêreld. Jehovah gee dié versekering aangaande diegene wat dan sal lewe: ‘Niemand sal hulle verskrik nie; want die mond van die HERE van die leërskare het dit gespreek’ (Miga 4:4). Siekte en die dood sal tot die verlede behoort (Openbaring 21:4). Maar jy kan selfs nou reeds ’n mate van veiligheid ervaar—as jy ’n hegte verhouding met Jehovah aankweek. Jy sal soos die psalmis kan sê: “My hulp is van [Jehovah] wat hemel en aarde gemaak het.”—Psalm 121:2.

[Voetnoot]

[Prent op bladsy 6]

Christene in Efese het van alles ontslae geraak wat met okkultisme te doen gehad het

[Prent op bladsy 7]

Onder God se Koninkryk sal vrees tot die verlede behoort