Hoe lank kan jy lewe?

DIE meeste van ons sal geredelik erken dat die lewenspad nie sonder sy probleme is nie. Tog is ons bly dat ons lewe. Ons is nie tevrede met net ons kinderjare of ’n kort lewensduur nie; ons wil graag baie jare lank lewe. Dit lyk nietemin of die dood onafwendbaar is. Maar is dit so?

Is dit moontlik om die dood uit te stel? Kan ons lewensduur verleng word?

’n Langer lewe?

In 1990 het ’n nuusberig aangekondig dat daar ’n moontlikheid bestaan dat die lewensduur van die mens tot “honderd-en-tien” jaar verleng kan word. Dit is opmerkenswaardig in die lig van die Bybelpsalmis Moses se woorde: “Die dae van ons jare—daarin is sewentig jaar, of as ons baie sterk is, tagtig jaar; en die uitnemendste daarvan is moeite en verdriet; want gou gaan dit verby, en ons vlieg daarheen” (Psalm 90:10). Die Bybel sê dus dat die gemiddelde lewensduur van die mens 70 of 80 jaar is. Maar hoe lank kan ’n mens verwag om vandag te lewe?

’n Verslag wat in 1992 deur die WGO (Wêreldgesondheidsorganisasie) gepubliseer is, het die algemene lewensverwagting op gemiddeld 65 jaar gestel. Volgens die WGO sal dit “na verwagting, hoofsaaklik vanweë al hoe minder kindersterftes, die volgende vyf jaar met vier maande per jaar toeneem”. Maar die tydskrif Time sê al sou ’n mediese wonderwerk die dood van enigiemand voor die ouderdom van 50 voorkom “die gemiddelde lewensverwagting” in die Verenigde State “met net 3 1/2 jaar sal toeneem”.

Waarom is die lewe so kort?

Dr. Jan Vijg van die Nederlandse Instituut vir Eksperimentele Gerontologie redeneer dat, net soos sekere siektes met afwykings in die struktuur van die mens se liggaamselle verband hou, die verouderingsproses blykbaar deur genetiese faktore beïnvloed word. Party navorsers glo dat ons langer kan lewe indien ’n “handjievol hoofgene” vervang kan word namate ons ouer word. Ander sê dat so ’n voorstel “simplisties” is.

Hoe dit ook al sy, wetenskaplikes erken dat “daar blykbaar ’n soort inherente biologiese perk in die selle van die menseliggaam geprogrammeer is”, berig die tydskrif Time. Selfs diegene wat aanvoer dat ons “geprogrammeer is om te bly lewe”, erken dat “iets skeef loop”. Dit is inderdaad so dat ons lewe op 65, 70, 80 of ’n bietjie later ‘gou verbygaan’ en ons sterf, soos die Bybel sê.

Tog het die Christenapostel Paulus van die eerste eeu G.J. met vertroue voorspel: “Die laaste vyand wat vernietig word, is die dood” (1 Korinthiërs 15:26). Hoe kan daar ’n einde aan die dood gemaak word? En selfs al word dit vernietig, hoe kan jy die dood van geliefdes vandag verwerk?