Die Konferensie van die Wêreld se Godsdienste—Sal dit suksesvol wees?
HONDERDE godsdiensleiers het in die somer van 1993 bymekaargekom tydens die tweede Konferensie van die Wêreld se Godsdienste wat in Chicago, Illinois, VSA, gehou is. Boeddhisme, die Christendom, Hindoeïsme, Judaïsme en Islam is almal verteenwoordig. Daar was ook towenaars en godin-aanbidders. Hulle het hulle rol in die beëindiging van oorlog bespreek. Die voorsitter van die konferensie het erken dat “twee derdes van die grootste konflikte in die wêreld vandag ’n godsdienstige inslag het”.
Honderd jaar gelede
Was die konferensie suksesvol? Kyk wat honderd jaar gelede tydens die eerste Konferensie van die Wêreld se Godsdienste gebeur het. Dit is ook in Chicago gehou, in die somer van 1893, en meer as 40 godsdienste is verteenwoordig. Die Raad van die Konferensie van die Wêreld se Godsdienste erken dat diegene wat dit in 1893 bygewoon het, “geglo het dat dit die eerste in ’n reeks internasionale interkerklike samekomste sou wees wat begrip, vrede en vooruitgang sou bevorder. Maar dit het nie. Godsdiensonverdraagsaamheid en -geweld het deel uitgemaak van die oorloë van die afgelope 100 jaar, en dit is vandag nog die geval.” Waarom het dit misluk? Omdat die hele konsep van geloofsvermenging nie God se goedkeuring wegdra nie. Die Bybel sê: “Moenie in dieselfde juk trek saam met ongelowiges nie.”—2 Korinthiërs 6:14-17.
Dit is gepas dat die Zion’s Watch Tower vir September 1893 die gebrek aan skriftuurlike steun vir die Konferensie van die Wêreld se Godsdienste beklemtoon het toe dit met ’n tikkie ironie gesê het: “Hulle het al talle uitsonderlike, gebakte kleisilinders uit die ruïnes van Babilon en ander ou stede opgegrawe, maar sommige is nog nie gevind nie. . . . Hulle het nog geen [silinders] gevind wat sê dat Moses en Josua ’n sogenoemde ‘Konferensie van Godsdienste’ van Moabiete, Ammoniete en Edomiete gehou het nie . . . Hulle het nog geen [silinders] gevind wat sê dat die stoere, bejaarde Samuel ’n boodskap na Gat en Ekron gestuur het om ’n afvaardiging van die priesters van Dagon na Silo toe te laat kom om met die priesters van Jehovah te beraadslaag nie . . . Hulle het nog geen [silinders] gevind wat sê dat die bejaarde Elia met sy leergordel voorgestel het dat ’n ‘kongres’ met die priesters van Baäl en Molog gehou word vir ’n week lange bespreking van die leerstellings van hulle onderskeie gelowe met die doel om wedersydse respek vir mekaar se godsdiens te bevorder nie.”
God se Koninkryk—die enigste hoop
Die Konferensie van die Wêreld se Godsdienste sal nie suksesvol wees nie. Koerante en afgevaardigdes het woorde soos “chaos”, “beroering” en “deurmekaar spul” met betrekking tot die konferensie gebruik. Volgens een verslag het selfs die polisie ingegryp om die rus te herstel nadat politieke verdeeldheid twee keer oproerigheid veroorsaak het. In ’n dokument wat in 1952 uitgereik is, het die konferensie die volgende as een van sy doelwitte genoem: “Om ’n permanente Wêreldkonferensie van Godsdienste op te rig wat met die VERENIGDE NASIES kan saamwerk om wêreldvrede en begrip onder alle volke tot stand te bring.” In teenstelling hiermee het Jesus gesê dat sy Koninkryk geen deel van hierdie wêreld is nie. Die Bybel toon dat God se Koninkryk die enigste oplossing vir die mens se probleme is.—Daniël 2:44; Johannes 18:36.