Koninkryksverkondigers berig
“Weerstaan die duiwel, en hy sal van julle wegvlug”
IN DIE eerste eeu het ’n groep aanhangers van “towery” in Efese op die Christelike boodskap gereageer deur hulle boeke oor die toorkuns in die openbaar te verbrand (Handelinge 19:19). Die berekende waarde van hierdie boeke was 50 000 silwerstukke. As die Bybelverslag die denarius, ’n Romeinse silwermuntstuk, bedoel, sou dit ten minste R127 600 beloop het!
Vandag is daar baie mense wat eenmaal okkulte lektuur besit het, maar wat dieselfde besluit as die eertydse Efesiërs geneem het. Beskou die volgende ondervinding uit Kanada.
Ongeveer vyf jaar gelede het een van Jehovah se Getuies van huis tot huis gepreek toe ’n vrou met die naam Nora haar by een deur letterlik in die huis ingetrek het. Nora het honderde godsdiens- en spiritistiese boeke gedurende haar jarelange geestelike soektog versamel, maar sy wou weet wat die Bybel oor die hoop vir die dooies sê. Die Getuie het haar die traktaat Watter hoop vir afgestorwe dierbares? aangebied. Nora se vrae is beantwoord, en sy het op Die Wagtoring en die Ontwaak! ingeteken.
Later het sy verhuis en kontak met Jehovah se Getuies verloor. Maar sy het steeds die tydskrifte deur die pos by haar nuwe adres ontvang. Sy het ook van die Bybelse publikasies bestel waarvan daar in die tydskrifte melding gemaak is. Ná ’n ruk het een van Jehovah se Getuies aan haar deur geklop. Omdat sy beïndruk was dat die Getuie dadelik die Bybel gebruik het wanneer sy vrae beantwoord het, het Nora haar verwelkom en haar genooi om terug te kom vir verdere besprekings.
Maar die Getuie het gesukkel om weer met Nora in aanraking te kom. Sy het sonder welslae herhaalde besoeke op verskillende tye van die dag en verskillende tye van die week gedoen. Maar mettertyd is haar volharding beloon, en sy het goeie resultate behaal. ’n Gereelde Bybelstudie is begin, wat op Nora se aandrang dikwels drie keer per week gehou is. Die dinge wat sy geleer het, het haar beweeg om met vriende en familie te praat, met die gevolg dat drie van hulle Bybelstudies met Jehovah se Getuies aangevra het.
Nora het deur haar studie tot die besef gekom dat daar baie valse godsdienste en valse profete is, maar dat slegs een pad na die lewe lei. Sy het baie jare lank in valse godsdienste na antwoorde op haar vrae gesoek, maar nadat sy geleer het wat die Bybel oor demone sê, het sy opgetree soos die eertydse Efesiërs wat in Handelinge 19:19 gemeld word. Sy het alle slegte boeke uit haar biblioteek verwyder en in die loop van verskeie dae meer as duisend boeke oor die okkulte en valse godsdiensleerstellings vernietig. Onder die publikasies wat sy vernietig het, was daar ’n stel van vier boeke ter waarde van meer as R2 100!
Die demone was klaarblyklik ontevrede met Nora se optrede, en hulle het haar omtrent twee weke lank geteister. Maar hierdie bose geeste kon haar nie van haar Bybelstudie en haar omgang met Jehovah se hedendaagse organisasie afskrik nie.
Sulke ondervindinge lig die waarheid toe van die Bybel se woorde: “Onderwerp julle dan aan God; weerstaan die duiwel, en hy sal van julle wegvlug.”—Jakobus 4:7.