God verhoor wel gebede

Kornelius was ’n man wat God se guns gesoek het deur middel van gereelde, hartgrondige gebede. Daarbenewens het hy goed gebruik gemaak van sy posisie as ’n leëroffisier. Volgens die Bybel “het [hy] baie barmhartigheidsgawes” aan behoeftige mense gegee.—Handelinge 10:1, 2.

OP DAARDIE tydstip het die Christengemeente uit gelowige Jode, proseliete en Samaritane bestaan. Kornelius was ’n onbesnede nie-Jood en nie deel van die Christengemeente nie. Beteken dit dat sy gebede tevergeefs was? Nee. Jehovah God het ag gegee op Kornelius en sy opregte dade.—Handelinge 10:4.

Kornelius het deur middel van engeleleiding met die Christengemeente in aanraking gekom (Handelinge 10:30-33). Gevolglik het hy en sy huisgesin die voorreg geniet om die eerste onbesnede nie-Jode te wees wat in die Christengemeente aanvaar is. Jehovah God het dit goedgedink om Kornelius se persoonlike ondervinding in die Bybelverslag te laat insluit. Hy het ongetwyfeld baie veranderinge aangebring om sy lewe heeltemal in ooreenstemming met God se standaarde te bring (Jesaja 2:2-4; Johannes 17:16). Kornelius se ondervinding behoort ’n groot aanmoediging te wees vir mense van alle nasies wat vandag God se guns soek. Kyk na ’n paar voorbeelde.

Hedendaagse voorbeelde

’n Jong vrou in Indië het vertroosting dringend nodig gehad. Sy is getroud toe sy 21 was en het twee kinders gehad. Maar kort nadat haar tweede kind gebore is, is haar man oorlede. Skielik, op die ouderdom van 24, was sy ’n weduwee met ’n 2 maande oue babadogtertjie en ’n 22 maande oue seuntjie. Dit is geen wonder dat sy vertroosting nodig gehad het nie! Waarheen kon sy haar wend? Een nag, toe sy baie neerslagtig was, het sy gebid en gesê: “Hemelse Vader, vertroos my asseblief deur u Woord.”

Die volgende oggend het sy ’n besoeker gehad. Hy was een van Jehovah se Getuies. Dit was vir hom ’n baie moeilike dag in die huis-tot-huis-bediening omdat min mense vir hom die deur wou oopmaak. Hy was moeg en ietwat mismoedig en van plan om huis toe te gaan, maar om die een of ander rede het hy gevoel dat hy net nog een huis moet besoek. Dit is waar hy die jong weduwee ontmoet het. Sy het hom ingenooi en ’n publikasie geneem wat die Bybel verduidelik het. Die vrou is grootliks vertroos deur wat sy in die publikasie gelees en met die Getuie bespreek het. Sy het geleer van God se belofte om die dooies op te wek en van God se Koninkryk, wat die aarde binnekort in ’n paradys gaan omskep. Nog belangriker, sy het die enigste ware God, Jehovah, wat haar gebed verhoor het, leer ken en liefgekry.

Nora, wat in George, Suid-Afrika, woon, het ’n maand opsy gesit om aan die voltydse evangelisasiewerk deel te neem. Voordat sy begin het, het sy ernstig tot Jehovah gebid om haar te help om iemand te vind wat werklik daarin belangstel om die Bybel te bestudeer. In die gebied wat sy gekry het om te werk, het iemand gebly wat met vorige besoeke baie ongeskik was teenoor Nora. Nora het moedig weer aan daardie deur geklop. Tot haar verbasing het sy gevind dat ’n nuwe huurder, met die naam Noleen, ingetrek het. Wat meer is, Noleen en haar moeder het God gevra om hulle te help om die Bybel te verstaan. “Toe ek hulle ’n Bybelstudie aanbied”, verduidelik Nora, “was hulle verheug.” Noleen en haar moeder het vinnig gevorder. Mettertyd het hulle albei saam met Nora aan die geestelike genesingswerk begin deelneem.

Nog ’n voorbeeld wat die krag van gebed toon, is dié van ’n egpaar wat in Johannesburg woon. Een Saterdagaand in 1996 het Dennis en Carol se huwelik breekpunt bereik. As ’n laaste uitweg het hulle besluit om vir hulp te bid, wat hulle dan ook herhaaldelik tot laat in die nag gedoen het. Die volgende oggend, om 11 uur, het twee van Jehovah se Getuies aan hulle deur geklop. Dennis het die deur oopgemaak en vir hulle gesê om te wag totdat hy sy vrou geroep het. Dennis het toe vir Carol gewaarsku dat dit dalk moeilik sou wees om van die Getuies ontslae te raak as sy hulle innooi. Carol het Dennis daaraan herinner dat hulle vir hulp gebid het en gesê dat dit dalk God se antwoord op hulle gebede is. Die Getuies is dus ingenooi, en ’n Bybelstudie is in die boek Kennis wat tot die ewige lewe lei begin. Dennis en Carol was baie opgewonde oor wat hulle geleer het. Daardie selfde middag het hulle hulle eerste vergadering by die plaaslike Koninkryksaal van Jehovah se Getuies bygewoon. Deur die kennis toe te pas wat hulle uit die Bybel geleer het, het Dennis en Carol oplossings vir hulle huweliksprobleme gevind. Hulle is nou gelukkige, gedoopte lowers van Jehovah en vertel hulle medemens gereeld van hulle Bybelse oortuiging.

Gestel jy voel onwaardig om te bid

Party opregte mense voel miskien onwaardig om te bid as gevolg van hulle slegte lewenswyse. Jesus Christus het die verhaal vertel van so ’n man, ’n veragte belastinggaarder. Hierdie man het die tempelvoorhof binnegegaan, maar onwaardig gevoel om na die gebruiklike bidplek te gaan. Hy het “op ’n afstand gestaan . . . , op sy bors bly slaan en gesê: ‘O God, wees my, ’n sondaar, genadig’” (Lukas 18:13). Volgens Jesus is hierdie man gunstig verhoor. Dit bewys dat Jehovah God inderdaad genadig is en sondaars wat opreg berou toon, wil help.

Kyk na die voorbeeld van ’n jong Suid-Afrikaanse man met die naam Paul. As kind het Paul die Christelike vergaderinge saam met sy moeder bygewoon. Maar gedurende sy hoërskooljare het hy met jongmense begin omgaan wat nie God se weë gevolg het nie. Nadat hy sy skoolopleiding voltooi het, het hy in die weermag van Suid-Afrika se voormalige regering gedien. Toe het sy meisie onverwags hulle verhouding verbreek. Paul het neerslagtig geword omdat sy lewe so onbevredigend was. “Een aand”, sê hy, “het ek gebid en Jehovah gevra om my te help, al het ek jare laas opreg tot God gebid.”

’n Kort rukkie ná hierdie gebed het Paul se moeder hom genooi om die jaarlikse herdenking van Christus se dood by te woon (Lukas 22:19). Paul was verbaas dat sy moeder dit gedoen het, aangesien hy sy eie pad gevolg het en baie min in die Bybel belanggestel het. “Ek het hierdie uitnodiging as Jehovah se antwoord op my gebed beskou en gevoel dat ek iets op my beurt moes doen.” Van toe af het Paul al die Christelike vergaderinge bygewoon. Nadat hy vier maande lank die Bybel bestudeer het, het hy aan die vereistes vir doop voldoen. Hy het ook sy studie in die ingenieurswese gestaak en die voltydse evangelisasiewerk sy loopbaan gemaak. Vandag is Paul ’n gelukkige man, wat nie meer neerslagtig is oor sy vorige lewe nie. Hy dien al die afgelope 11 jaar by die takkantoor van die Wagtoringgenootskap in Suid-Afrika.

Ja, Jehovah God verhoor gebede uit genade en word “die beloner . . . van dié wat hom ernstig soek” (Hebreërs 11:6). Die groot dag van Jehovah gaan binnekort aanbreek en ’n einde maak aan alle goddeloosheid. Intussen verhoor Jehovah die gebede van sy volk vir krag en leiding terwyl hulle ywerig aan die noodsaaklike getuieniswerk deelneem. Miljoene mense uit alle nasies kom dus met die Christengemeente in aanraking en word geseën met Bybelkennis wat tot die ewige lewe lei.—Johannes 17:3.

[Prent op bladsy 5]

Kornelius se hartgrondige gebed het daartoe gelei dat hy ’n besoek van die apostel Petrus ontvang het

[Prent op bladsy 6]

Gebed het baie mense deur moeilike tye onderskraag

[Prente op bladsy 7]

Dit is goed om te bid vir hulp om die Bybel te verstaan

Egpare kan bid vir hulp om hulle huweliksband te versterk