Koninkryksverkondigers berig
Die Woord van God is kragtig
“DIE woord van God is lewend en kragtig” (Hebreërs 4:12). Hierdie woorde is al dikwels waar bewys wanneer mense wat deur valse godsdiens bedrieg is met Bybelwaarhede in aanraking kom. Die volgende ondervinding uit die Dominikaanse Republiek toon dat die krag van die Bybel mense se lewens kan verander en hulle hoop kan gee.
Jehovah se Getuies het ’n prominente Katolieke vrou besoek wat kort tevore twee kindertjies aan die dood afgestaan het. Sy was bedroef en het elke dag oor haar tragedie gehuil. Die Getuies het haar gewys wat die Bybel in Johannes 5:28, 29 oor die opstandingshoop sê. Ná verdere besprekings met die Getuies het sy nie net vertroosting uit die opstandingshoop geput nie, maar sy het ook besef dat haar Katolieke godsdiensleiers haar bedrieg.
Sy het sonder versuim uit die Katolieke Kerk bedank en tot ’n gereelde Bybelstudie met Jehovah se Getuies ingestem. Haar man het egter nie met haar beskouing saamgestem nie. Aangesien hy ook ’n baie prominente Katoliek was, het hy gereël dat bekende politieke en godsdiensvriende sy vrou besoek in ’n poging om haar van mening te laat verander en haar na Katolisisme terug te bring. Later het hy gedreig om van haar te skei en op een stadium het hy selfs vir sy familie en medekerklidmate laat weet dat hulle gaan skei.
Maar sy strategie het nie geslaag nie. Inteendeel, dit het haar net meer vasbeslote gemaak om met haar Bybelstudie voort te gaan. Vanweë haar geestelike groei en die feit dat sy goeie Christelike eienskappe aangekweek het, het haar man besluit om eerder by haar te bly en nie van haar te skei nie. Op ’n dag het hy selfs ingestem om na die Bybellektuur te kyk wat sy bestudeer het—maar op een voorwaarde. Hy wou sy eie Katolieke Bybel gebruik.
Tot sy verbasing het hy, met behulp van die lektuur van Jehovah se Getuies, nuwe dinge regstreeks uit sy eie Bybel begin leer. Hy het besef dat sy vrou die regte weg gekies het, en kort voor lank was hy gereed om haar voorbeeld te volg. Trouens, hy het besef dat hy veranderinge in sy lewe moet aanbring. Een moeilike uitdaging was om sy rookgewoonte op te gee. Nadat hy die Ontwaak! van 8 Julie 1989, met die voorbladtitel “Dood te koop—Tien maniere om op te hou rook”, gelees het, was hy vasbeslote om hierdie onskriftuurlike gewoonte op te gee. Pleks van die gebruiklike pakkie sigarette wat dikwels in sy sak was, het hy hierdie nommer van die Ontwaak! saam met hom gedra. Elke keer wanneer hy lus gekry het om te rook, het hy die artikels oor rook gelees. Dit het gewerk! Nadat hy die artikels ’n klomp keer gelees het, het hy daarin geslaag om op te hou rook.
Vandag dien hierdie man en sy vrou Jehovah as gedoopte bedienaars. Wanneer omstandighede dit toelaat, dien hy as ’n voltydse bedienaar deur baie van sy tyd aan die verkondiging van die goeie nuus van God se Koninkryk te wy, en hy dien as ’n bedieningskneg in die plaaslike gemeente van Jehovah se Getuies. Hy en sy vrou sien uit na die opstanding wanneer hulle hulle kinders in ’n nuwe wêreld sal terugverwelkom. Ja, God se Woord, die Bybel, is lewend en kragtig!