Deel twee—Flitse van lig—groot en klein

“In u lig sien ons die lig.”—PSALM 36:10.

1. Watter vroeë pogings is aangewend om die simboliek van die boek Openbaring te verstaan?

CHRISTENE stel al sedert vroeë tye in die Bybelboek Openbaring belang. Dit is ’n goeie voorbeeld van hoe die lig van waarheid al hoe helderder word. In 1917 het Jehovah se volk ’n verduideliking van Openbaring in die boek The Finished Mystery gepubliseer. Dit het die Christendom se godsdiens- en politieke leiers onbevrees aan die kaak gestel, maar baie van die verduidelikings daarin het uit verskillende bronne gekom. The Finished Mystery het nietemin die Bybelstudente se lojaliteit teenoor die sigbare kanaal wat Jehovah gebruik het op die proef gestel.

2. Watter lig het die artikel “Geboorte van die nasie” op die boek Openbaring gewerp?

² ’n Merkwaardige flits van lig het op die boek Openbaring geskyn toe die artikel “Geboorte van die nasie” in The Watch Tower van 1 Maart 1925 verskyn het. Daar is altyd gemeen dat Openbaring hoofstuk 12 ’n oorlog tussen heidense Rome en pouslike Rome beskryf en dat die manlike kind die pousdom voorstel. Maar daardie artikel het getoon dat Openbaring 11:15-18 die betekenis van hoofstuk 12 beïnvloed en het daarop gewys dat dit met die geboorte van God se Koninkryk verband hou.

3. Watter publikasies het helderder lig op Openbaring gewerp?

³ Al hierdie dinge het ’n baie beter begrip van Openbaring tot gevolg gehad toe Lig, in twee bundels, in 1930 gepubliseer is. Nog meer verfynings het in “Babylon the Great Has Fallen!” God’s Kingdom Rules! (1963) en “Then Is Finished the Mystery of God” (1969) verskyn. Maar daar was nog meer te leer omtrent die profetiese boek Openbaring. Ja, in 1988 het helderder lig daarop geskyn toe Openbaring—Sy groot klimaks is ophande! gepubliseer is. ’n Mens kan sê dat die sleutel tot hierdie progressiewe verligting die feit is dat die profesie van Openbaring van toepassing is op “die dag van die Here”, wat in 1914 begin het (Openbaring 1:10). Die boek Openbaring sou dus beter verstaan word namate daardie dag vorder.

Duidelikheid oor “die hoër magte”

4, 5. (a) Hoe het die Bybelstudente Romeine 13:1 beskou? (b) Wat het hulle later besef is die skriftuurlike standpunt ten opsigte van “die hoër magte”?

⁴ ’n Helder flits van lig is in 1962 gesien met betrekking tot Romeine 13:1, wat sê: “Laat elke siel hom onderwerp aan die hoër magte [hoër owerhede, NW]” (King James Version). Die vroeë Bybelstudente het verstaan dat “die hoër magte” wat daar gemeld word wêreldse owerhede is. Hulle het gedink hierdie teks beteken dat ’n Christen verplig sou wees om ’n uniform aan te trek, ’n geweer te dra en na die front, na die loopgrawe, toe te gaan, indien hy in oorlogstyd opgeroep sou word. Hulle het gemeen dat ’n Christen, aangesien hy nie sy medemens mag doodmaak nie, in die ergste geval noodgedwonge sy geweer in die lug sou moes afvuur.a

⁵ Die Wagtoring van 1 Februarie en van 15 Februarie 1963 het helder lig op die onderwerp gewerp deur ’n bespreking van Jesus se woorde in Matteus 22:21: “Betaal . . . aan Caesar terug wat aan Caesar behoort, maar aan God wat aan God behoort.” Die apostels se woorde in Handelinge 5:29 was hier van toepassing: “Ons moet eerder aan God as heerser gehoorsaam wees as aan mense.” Christene onderwerp hulle aan Caesar—“die hoër magte”—net as dit nie vereis dat die Christen in stryd met God se wet optree nie. Hulle het besef dat onderworpenheid aan Caesar relatief is, nie absoluut nie. Christene betaal net dít wat nie in stryd met God se vereistes is nie aan Caesar terug. Hoe bevredigend was dit tog om helder lig omtrent daardie onderwerp te kry!

Flitse van lig in verband met organisatoriese sake

6. (a) Watter besluit is geneem om nie die hiërargiese struktuur te volg wat algemeen in die Christendom voorkom nie? (b) Wat het hulle uiteindelik besef is die regte manier waarop diegene gekies moet word wat opsieners in die gemeente is?

⁶ Daar was die kwessie van wie as ouer manne en diakens in die gemeentes moet dien. Om nie die hiërargiese struktuur te volg wat algemeen in die Christendom voorkom nie, is daar besluit dat hulle demokraties verkies moet word deurdat die lede van elke gemeente daaroor stem. Maar toenemende lig wat in The Watchtower van 1 September en van 15 Oktober 1932 verskyn het, het getoon dat die Skrif nie daarvoor voorsiening maak dat ouer manne ingestem word nie. Hulle is dus deur ’n dienskomitee vervang, en ’n diensleier is deur die Genootskap gekies.

7. Watter verbeteringe het flitse van lig teweeggebring ten opsigte van die manier waarop knegte in die gemeente aangestel word?

⁷ The Watchtower van 1 Junie en van 15 Junie 1938 het flitse van lig bevat wat getoon het dat die knegte in die gemeente nie ingestem nie, maar aangestel, dit wil sê teokraties aangestel, moes word. In 1971 het nog ’n flits van lig getoon dat elke gemeente nie net een gemeentekneg moet hê wat die leiding neem nie. Elkeen moet eerder ’n liggaam van ouer manne, of opsieners, hê wat deur die Bestuursliggaam van Jehovah se Getuies aangestel word. Weens die toenemende lig oor sowat 40 jaar het dit derhalwe duidelik geword dat ouer manne en diakens, wat nou bedieningsknegte genoem word, deur “die getroue en verstandige slaaf”, deur middel van sy Bestuursliggaam, aangestel moet word (Matteus 24:45-47). Dit het gestrook met wat in apostoliese tye plaasgevind het. Manne soos Timoteus en Titus is deur die eerste-eeuse bestuursliggaam as opsieners aangestel (1 Timoteus 3:1-7; 5:22; Titus 1:5-9). Dit is ’n merkwaardige vervulling van Jesaja 60:17: “Vir koper bring Ek goud en vir yster bring Ek silwer, en vir hout koper en vir klippe yster; en Ek sal Vrede as jou owerheid aanstel en Geregtigheid as jou bestuurders.”

8. (a) Watter verbeteringe het toenemende waarheid teweeggebring ten opsigte van die manier waarop die Genootskap funksioneer? (b) Wat is die Bestuursliggaam se komitees, en wat is hulle onderskeie gebiede van werksaamhede of toesig?

⁸ Daar was ook die kwessie van die werking van die Wagtoringgenootskap. Die Bestuursliggaam van Jehovah se Getuies was baie jare lank sinoniem met die raad van direkteure van die Watch Tower Bible and Tract Society of Pennsylvania, en sake is grotendeels aan die president daarvan oorgelaat. Soos die 1977 Yearbook of Jehovah’s Witnesses (bladsye 258-9) toon, het die Bestuursliggaam in 1976 met ses komitees begin funksioneer, wat elkeen aangestel is om na sekere aspekte van die wêreldwye werk om te sien. Die Personeelkomitee sien om na sake wat die personeel raak, onder andere die belange van almal wat in die wêreldwye Bethelgesin dien. Die Uitgewerskomitee behartig alle sekulêre en regsake, soos eiendomme en drukwerk. Die Dienskomitee sorg vir die getuieniswerk en hou toesig oor reisende opsieners, pioniers en die bedrywighede van gemeentelike verkondigers. Die Onderrigtingskomitee is verantwoordelik vir gemeentelike vergaderinge, spesiale byeenkomsdae, kring-, streek- en internasionale byeenkomste sowel as die verskeie skole vir die geestelike onderrigting van God se volk. Die Skryfkomitee hou toesig oor die voorbereiding en vertaling van publikasies in alle vorme en maak seker dat alles met die Skrif ooreenkom. Die Voorsitterskomitee behartig noodgevalle en ander dringende sake.b In die sewentigerjare is daar ook begin om takkantore van die Wagtoringgenootskap deur ’n komitee pleks van ’n opsiener te bestuur.

Lig in verband met Christelike gedrag

9. Hoe het die lig van waarheid Christene se verhouding tot die regerings van die wêreld beïnvloed?

⁹ Baie flitse van lig het op Christelike gedrag betrekking gehad. Beskou byvoorbeeld die neutraliteitskwessie. ’n Besonder helder flits van lig het op hierdie onderwerp geskyn in die artikel “Neutraliteit” wat in The Watchtower van 1 November 1939 verskyn het. Hoe tydig was dit tog nie, aangesien dit net ná die begin van die Tweede Wêreldoorlog verskyn het! Die artikel het neutraliteit omskryf en getoon dat Christene nie by politieke aangeleenthede of konfrontasies tussen nasies betrokke moet raak nie (Miga 4:3, 5; Johannes 17:14, 16). Dit dra daartoe by dat hulle deur al die nasies gehaat word (Matteus 24:9). Die oorloë van eertydse Israel skep nie vir Christene ’n presedent nie, soos Jesus duidelik toon in Matteus 26:52. Bowendien is nie een politieke nasie vandag ’n teokrasie, ’n regering deur God, soos eertydse Israel nie.

10. Wat het flitse van lig geopenbaar omtrent die beskouing wat Christene van bloed moet hê?

¹⁰ Lig het ook met betrekking tot die heiligheid van bloed geskyn. Die Bybelstudente het gedink dat die verbod op die eet van bloed in Handelinge 15:28, 29 net op Joodse Christene van toepassing was. Handelinge 21:25 toon egter dat hierdie bevel in apostoliese tye ook gegeld het vir mense van die nasies wat gelowiges geword het. Die heiligheid van bloed geld dus vir alle Christene, soos daar in Die Wagtoring van 1 Desember 1945 getoon is. Dit beteken nie net dat ’n mens weier om dierebloed te eet, soos in die geval van bloedwors nie, maar ook dat jy jou van mensebloed onthou, soos in die geval van bloedoortappings.

11. Wat is omtrent die Christen se beskouing van die gebruik van tabak begryp?

¹¹ Gewoontes wat eers bloot afgekeur is, is later as gevolg van helderder lig met gepaste erns hanteer. ’n Voorbeeld hiervan het met die gebruik van tabak te doen. In Zion’s Watch Tower van 1 Augustus 1895 het broer Russell die aandag op 1 Korintiërs 10:31 en 2 Korintiërs 7:1 gevestig en geskryf: “Ek kan nie sien hoe dit God tot eer sal strek of enige Christen sal bevoordeel as hy tabak in enige vorm gebruik nie.” Sedert 1973 word daar goed verstaan dat geen tabakgebruiker ’n Getuie van Jehovah kan wees nie. In 1976 is daar verduidelik dat geen Getuie by ’n dobbelplek kan werk en steeds ’n deel van die gemeente kan wees nie.

Ander verfynings

12. (a) Wat het ’n flits van lig geopenbaar omtrent die aantal sleutels van die Koninkryk wat aan Petrus toevertrou is? (b) Onder watter omstandighede het Petrus elke sleutel gebruik?

¹² Daar was ook helderder lig in verband met die aantal simboliese sleutels wat Jesus vir Petrus gegee het. Die Bybelstudente het gemeen dat Petrus twee sleutels ontvang het wat vir mense die weg gebaan het om Koninkrykserfgename te word—een vir die Jode wat op Pinkster 33 G.J. gebruik is, en die ander vir die nie-Jode wat die eerste keer in 36 G.J. gebruik is toe Petrus vir Kornelius gepreek het (Handelinge 2:14-41; 10:34-48). Mettertyd het hulle besef dat daar ’n derde groep was—die Samaritane. Petrus het die tweede sleutel gebruik toe hy hulle die geleentheid gebied het om in die Koninkryk in te gaan (Handelinge 8:14-17). Die derde sleutel is dus gebruik toe Petrus vir Kornelius gepreek het.—Die Wagtoring, 15 Desember 1979, bladsye 9-16, 19.

13. Wat het flitse van lig geopenbaar omtrent die skaapstalle wat in Johannes hoofstuk 10 gemeld is?

¹³ Uit nog ’n straal van lig is verstaan dat Jesus nie net twee nie, maar drie skaapstalle gemeld het (Johannes, hoofstuk 10). Dit was (1) die Joodse skaapstal waarvan Johannes die Doper die deurwagter was, (2) die stal van gesalfde Koninkrykserfgename en (3) die stal van die “ander skape” wat ’n aardse hoop het.—Johannes 10:2, 3, 15, 16; Die Wagtoring, 1 April 1984, bladsye 18-27.

14. Hoe het helderder lig duidelik gemaak wanneer die antitipiese Jubeljaar begin het?

¹⁴ Daar is ook meer duidelikheid oor die antitipiese Jubeljaar verkry. Onder die Wet was elke 50ste jaar ’n groot Jubeljaar, waartydens dinge aan die oorspronklike eienaars teruggegee is (Levitikus 25:10). Daar is lank gemeen dat dit die Duisendjarige Heerskappy van Christus afbeeld. In meer onlangse jare is egter verstaan dat die antitipiese Jubeljaar in werklikheid op Pinkster 33 G.J. begin het, toe diegene op wie die heilige gees uitgestort is van slawerny aan die Mosaïese Wetsverbond bevry is.—Die Wagtoring, 1 Januarie 1987, bladsye 18-28.

Helderder lig in verband met terminologie

15. Watter lig is op die gebruik van die woord “plan” gewerp?

¹⁵ “Die Prediker het gesoek om welgevallige woorde te vind en wat reg geskrywe is—woorde van waarheid” (Prediker 12:10). Hierdie woorde kan tereg op ons onderwerp onder bespreking toegepas word, aangesien lig nie net op belangrike sake soos leerstellings en gedrag geskyn het nie, maar ook op Christelike terminologie en die juiste betekenis daarvan. Onder die Bybelstudente was een van die geliefkoosde publikasies byvoorbeeld deel een van Studies in the Scriptures, met die titel The Divine Plan of the Ages. Mettertyd het hulle egter besef dat God se Woord net van mense praat wat planne maak (Spreuke 19:21). Die Skrif sê nooit dat Jehovah planne maak nie. Hy hoef nie planne te maak nie. Wat hy hom ook al voorneem, sal vanweë sy oneindige wysheid en krag beslis slaag, soos ons in Efesiërs 1:9, 10 lees: “Dit is volgens sy welbehae wat hy in homself voorgeneem het om aan die voleinding van die vasgestelde tye ’n administrasie te hê.” Daar is dus mettertyd besef dat die woord “voorneme” meer gepas is wanneer ’n mens van Jehovah praat.

16. Wat het hulle mettertyd besef is die regte begrip van Lukas 2:14?

¹⁶ Dan is daar ook ’n beter begrip van Lukas 2:14 verkry. Volgens die King James Version lees dit: “Eer aan God in die hoogste, en vrede op aarde, in mense ’n welbehae.” Daar is besef dat dit nie die regte gedagte oordra nie, aangesien God nie ’n welbehae in die goddelose het nie. Daarom het die Getuies dit as ’n kwessie van vrede vir mense van welwillendheid teenoor God beskou. Hulle het diegene wat in die Bybel belangstel dus mense van welwillendheid bly noem. Maar toe is daar besef dat dit hier nie om die welwillendheid van mense gaan nie, maar van God. Daarom praat die New World Translation se voetnoot by Lukas 2:14 van “mense wat hy [God] goedkeur”. Alle Christene wat hulle toewydingsgelofte nakom, het God se welwillendheid.

17, 18. Wat gaan Jehovah regverdig, en wat gaan hy heilig?

¹⁷ Getuies het eweneens lank van die regverdiging van Jehovah se naam gepraat. Maar het Satan Jehovah se naam in twyfel getrek? Trouens, het enige van Satan se trawante dit gedoen, asof Jehovah nie ’n reg op daardie naam het nie? Nee, glad nie. Dit is nie Jehovah se naam wat betwis is en wat geregverdig moet word nie. Dit is waarom die Wagtoringgenootskap se jongste publikasies nie van die regverdiging van Jehovah se naam praat nie. Dit praat van die regverdiging van Jehovah se soewereiniteit en van die heiliging van sy naam. Dit strook met wat Jesus gesê het ons moet bid: “Laat u naam geheilig word” (Matteus 6:9). Jehovah het keer op keer gesê dat hy sy naam gaan heilig, wat nie deur die Israeliete betwis is nie, maar wat deur hulle ontheilig is.—Esegiël 20:9, 14, 22; 36:23.

¹⁸ Dit is interessant dat die boek “Die nasies sal weet dat ek Jehovah is”—Hoe? in 1971 hierdie onderskeid getref het: “Jesus Christus veg . . . vir die regverdiging van Jehovah se universele Soewereiniteit en vir die verheerliking van Jehovah se naam” (Bladsy 355). In 1973 het God’s Kingdom of a Thousand Years Has Approached gesê: “Die komende ‘groot verdrukking’ is die tyd vir die almagtige God Jehovah om sy universele soewereiniteit te regverdig en om sy lofwaardige naam te heilig” (Bladsy 409). Toe, in 1975, het Man’s Salvation Out Of World Distress at Hand! gesê: “Die grootste gebeurtenis in die universele geskiedenis sal dan volbring wees, die regverdiging van Jehovah se universele soewereiniteit en die verheerliking van sy heilige naam.”—Bladsy 281.

19, 20. Hoe kan ons ons waardering vir flitse van geestelike lig toon?

¹⁹ Hoe geseënd is Jehovah se volk tog nie om al hierdie geestelike lig te geniet nie! In skerp teenstelling hiermee gee die volgende woorde van ’n leraar uitdrukking aan die geestelike duisternis waarin die leiers van die Christendom hulle bevind: “Waarom sonde? Waarom lyding? Waarom die duiwel? Hierdie is vrae wat ek die Here wil vra wanneer ek in die hemel kom.” Maar Jehovah se Getuies kan vir hom sê waarom: Vanweë die geskil oor die regmatigheid van Jehovah se soewereiniteit en die vraag of menseskepsele, ondanks die Duiwel se teëstand, hulle onkreukbaarheid teenoor God kan handhaaf.

²⁰ Deur die jare heen het groot sowel as klein flitse van lig die pad van Jehovah se toegewyde knegte verlig. Dit is ter vervulling van tekste soos Psalm 97:11 en Spreuke 4:18. Maar ons moet altyd onthou dat om in die lig te wandel, beteken dat ons die helderder lig moet waardeer en in ooreenstemming daarmee moet lewe. Soos ons gesien het, hou hierdie helderder lig met ons gedrag sowel as ons predikingsopdrag verband.

[Voetnote]

Onthou jy?

◻ Watter lig is op onderworpenheid aan “die hoër magte” gewerp?

◻ Watter organisatoriese ontwikkelinge is deur flitse van lig meegebring?

◻ Hoe het helderder lig Christelike gedrag beïnvloed?

◻ Watter verfynings met betrekking tot ons begrip van sekere skriftuurlike punte is deur geestelike lig meegebring?

[Foto-erkenning op bladsy 25]

Keys on page 24: Drawing based on photo taken in Cooper-Hewitt, National Design Museum, Smithsonian Institution