Die belofte van ’n wêreld sonder korrupsie
KORRUPSIE kom nou in elke vlak van die samelewing voor. Dit lyk of korrupsie, of dit nou in die regering, die wetenskap, sport, godsdiens of die sakewêreld is, buite beheer geraak het.
In een land ná die ander maak ontstellende nuus oor korrupsieskandale groot opslae in die nuus. Baie wat hulle daartoe verbind het om die belange van die mense te dien, word ontmasker as mense wat hulle eie belange dien deur omkoopgeld en gunslone te ontvang. Misdaad onder kantoorwerkers is aan die orde van die dag. Al hoe meer mense van hoë sosiale of ekonomiese status maak hulle by hulle daaglikse werk aan ernstige etiese en kriminele oortredings skuldig.
Daar is toenemende besorgdheid oor wat een Europese tydskrif beskryf as “‘korrupsie onder hooggeplaastes’—die gebruik waar senior amptenare, ministers en, alte dikwels, staatshoofde betaling vereis voordat hulle belangrike aankope en uitbreidings goedkeur”. In een land het ’n “twee jaar lange polisie-ondersoek en byna daaglikse inhegtenisnames steeds nie die verharde korruptes afgeskrik nie”, sê die Britse tydskrif The Economist.
Omdat korrupsie so algemeen voorkom, meen baie mense vandag dat niemand vertrou kan word nie. Hulle is dit eens met die Bybelskrywer Dawid wat gesê het: “Hulle het almal afgewyk, tesame het hulle ontaard; daar is niemand wat goed doen, ook nie een nie.”—Psalm 14:3.
Hoe hanteer jy die harde werklikheid van wydverspreide korrupsie? Vandag ignoreer die meeste mense dit eenvoudig. Maar selfs al ignoreer jy korrupsie sal dit jou steeds benadeel. Hoe?
Korrupsie raak jou
Korrupsie op hoë vlak sowel as op klein skaal verhoog die lewenskoste, laat die kwaliteit van produkte afneem en het minder werksgeleenthede en laer lone tot gevolg. Daar word geraam dat die koste van misdade soos verduistering en bedrog byvoorbeeld ten minste tien keer soveel beloop as die gesamentlike koste van inbraak, roof en diefstal. The New Encyclopædia Britannica (1992) sê dat “die koste van bedryfsmisdaad in die Verenigde State gestel word op $200 000 000 000 [R526 000 000 000] ’n jaar—drie keer die koste van georganiseerde misdaad”. Hierdie bron verduidelik dat hoewel die gevolge dalk nie maklik bespeur word nie, “sulke misdaad ’n groot uitwerking op die veiligheid van werkers, verbruikers en die omgewing het”.
Die wrange vrugte van korrupsie laat ons aan koning Salomo se woorde dink: “Weer het ek gesien al die verdrukkinge wat onder die son plaasvind, en kyk, daar was trane van verdruktes, en vir hulle was daar geen trooster nie; en aan die kant van hulle verdrukkers was mag, maar daar was vir hulle geen trooster nie.”—Prediker 4:1.
Moet ons ons dan maar in korrupsie berus? Is dit onafwendbaar? Is ’n wêreld sonder korrupsie ’n onmoontlike droom? Gelukkig nie! Die Bybel leer ons dat ongeregtigheid en wetteloosheid binnekort verwyder gaan word.
Wat die Bybel vir ons sê
Die Bybel sê vir ons dat korrupsie begin het toe ’n magtige engel teen God gerebelleer het en die eerste mensepaar sover gekry het om by hom aan te sluit (Genesis 3:1-6). Hulle sondige weg het niks goeds tot gevolg gehad nie. Adam en Eva het eerder van die dag dat hulle teen Jehovah God gesondig het die slegte gevolge van korrupsie begin dra. Hulle liggame het met die stadige proses van agteruitgang begin wat tot hulle onafwendbare dood gelei het (Genesis 3:16-19). Sedertdien wemel die geskiedenis van voorbeelde van omkopery, bedrog en swendelary. Tog lyk dit of die meeste skuldiges ongestraf bly.
Anders as gewone misdadigers gaan korrupte bestuursamptenare en politici selde tronk toe of vergoed hulle selde vir die wins wat hulle op onregverdige wyse verkry het. As gevolg van die geheime aard van omkopery en gunslone is dit dikwels moeilik om korrupsie op hoë vlak aan die kaak stel. Maar dit beteken nie dat ’n wêreld sonder korrupsie ’n onmoontlike droom is nie.
Bevryding van korrupsie sal van die mens se Skepper, Jehovah God, kom. Goddelike ingryping is die enigste oplossing. Waarom? Omdat die mensdom se onsigbare vyand, Satan die Duiwel, aanhou om die mensdom te mislei. Soos ons in 1 Johannes 5:19 lees, ‘lê die hele wêreld in die mag van die bose’. Wat anders kan die toename in korrupsie verduidelik—waarvan soveel ongestraf bly?
Geen mensepogings kan die oorhand oor Satan en sy demone kry nie. Slegs Goddelike ingryping kan die gehoorsame mensdom van “die glorieryke vryheid van die kinders van God” verseker (Romeine 8:21). Jehovah belowe dat Satan binnekort ingeperk sal word sodat hy nie meer die mensdom kan mislei nie (Openbaring 20:3). Intussen moet ons, as ons in God se nuwe wêreld vry van korrupsie wil lewe, hierdie wêreld se korrupte weë verwerp.
Mense kan verander
In Jesus Christus se dag was daar diegene wat hulle mag misbruik het en hulle medemens onderdruk het. Belastinggaarders was byvoorbeeld berug vir hulle korrupte gebruike. Dit was ondanks God se uitdruklike wet: “Ook mag jy geen omkoopgeskenk aanneem nie; want die geskenk maak die siendes blind en verdraai die sake van die regverdiges” (Exodus 23:8). Saggeus, ’n hoofbelastinggaarder, het erken dat hy deur valse aantygings mense afgepers het. Jesus het nie grootskaalse sosiale hervorming bevorder nie, maar het eerder ’n beroep op individue gedoen om hulle te bekeer en hulle korrupte weë te verlaat. Belastinggaarders soos Matteus en Saggeus wat die reputasie gehad het dat hulle korrup was, het gevolglik hulle vorige lewenswyse laat vaar.—Matteus 4:17; 9:9-13; Lukas 19:1-10.
Diegene wat vandag by oneerlike gebruike betrokke is, kan insgelyks korrupsie verwerp deur hulle met “die nuwe persoonlikheid [te] beklee, wat na God se wil in ware regverdigheid en lojaliteit geskep is” (Efesiërs 4:24). Dit is dalk nie maklik om jou belasting eerlik te betaal of jou deelname aan twyfelagtige skemas te staak nie. Die voordele is nogtans enige inspanning werd.
Omdat hulle nie meer deur hierdie korrupte wêreld gevorm word nie, geniet diegene wat oor ander se welsyn bekommerd is ’n innerlike vrede. Daar is geen vrees om op heter daad betrap te word omdat hulle oortree nie. Hulle geniet eerder ’n goeie gewete. Hulle volg die Bybelse voorbeeld van die profeet Daniël na. Die Bybelverslag sê dat hoë amptenare voortdurend die een of ander rede vir ’n aanklag teen Daniël gesoek het. “Maar hulle kon geen enkele grond vir ’n aanklag of verkeerde handeling vind nie, omdat hy getrou was en geen nalatigheid of verkeerde handeling by hom te vinde was nie.”—Daniël 6:5.
Jehovah se belofte
Jehovah belowe dat ‘hoewel ’n sondaar honderd maal kwaad doen en hy lank lewe—weet ek dat dit goed sal gaan met die wat God vrees, omdat hulle voor sy aangesig vrees, en dit nie goed sal gaan met die goddelose, en hy die dae nie sal verleng soos ’n skaduwee nie, omdat hy voor die aangesig van God nie vrees nie’.—Prediker 8:12, 13.
Hoe verlig sal ons tog wees wanneer korrupsie nie meer ongelukkigheid veroorsaak nie! Wat ’n seën sal dit tog wees om vir ewig in ’n wêreld sonder korrupsie te lewe! Dit is nie onmoontlik nie. Die Bybel praat van die “hoop op die ewige lewe wat God, wat nie kan lieg nie, voor langdurige tye beloof het” (Titus 1:2). As jy korrupsie haat en regverdigheid liefhet, sal jy heel waarskynlik die vervulling van God se belofte van ’n wêreld sonder korrupsie sien.
[Prent op bladsy 4]
Korrupsie is algemeen in regerings- en sakekringe
[Prent op bladsy 5]
Korrupsie is dikwels ter sprake wanneer ’n mens met openbare amptenare te doen kry