Werk korrupsie teë met die swaard van die gees

‘Beklee julle met die nuwe persoonlikheid, wat na God se wil in ware regverdigheid en lojaliteit geskep is.’—Efesiërs 4:24.

DIE Romeinse Ryk was die beste menslike administrasie wat die wêreld nog gesien het toe hy op die kruin van sy sukses was. Romeinse wetgewing was so doeltreffend dat dit nog steeds die grondslag is van die regskode van baie lande. Maar ondanks Rome se suksesse, was daar een sluipende vyand wat nie deur sy legioene oorwin kon word nie: korrupsie. Uiteindelik het korrupsie Rome se ondergang bespoedig.

Die apostel Paulus was iemand wat onder korrupte Romeinse amptenare gely het. Feliks, die Romeinse goewerneur wat hom ondervra het, het klaarblyklik besef dat Paulus onskuldig was. Maar Feliks, een van die korrupste goewerneurs van sy dag, het Paulus se verhoor uitgestel, in die hoop dat Paulus hom geld sou gee om sy vrystelling te verseker.—Handelinge 24:22-26.

Paulus het Feliks nie omgekoop nie, maar eerder reguit met hom gepraat oor “regverdigheid en selfbeheersing”. Feliks het nie tot inkeer gekom nie, en Paulus het eerder in die tronk gebly as om die regsproses met ’n omkoopgeskenk te probeer ontduik. Hy het ’n boodskap van waarheid en eerlikheid verkondig, en hy het daarvolgens gelewe. “Ons vertrou dat ons ’n eerlike gewete het,” het hy aan Joodse Christene geskryf, “aangesien ons ons in alles eerlik wil gedra.”—Hebreërs 13:18.

So ’n standpunt was in skrille teenstelling met die sedes van daardie tyd. Feliks se broer Pallas was een van die rykste manne van die antieke wêreld, en sy rykdom—na raming R275 miljoen—is byna heeltemal deur middel van omkopery en afpersing verkry. Maar sy fortuin is niks in vergelyking met die miljarde rande wat party korrupte leiers van die 20ste eeu in geheime bankrekeninge het nie. Dit is duidelik dat net naïewe mense sal glo dat hedendaagse regerings die stryd teen korrupsie gewen het.

Moet ons aanneem dat korrupsie net deel van die menslike natuur is, aangesien dit so lank ingewortel gebly het? Of kan iets gedoen word om korrupsie te beveg?

Hoe kan korrupsie beveg word?

Die eerste stap om korrupsie te beveg, is vanselfsprekend om te erken dat korrupsie verwoestend en verkeerd is, aangesien dit die gewetenlose mense bevoordeel tot nadeel van ander. ’n Mate van vooruitgang is ongetwyfeld in daardie verband gemaak. James Foley, die Amerikaanse adjunkminister van buitelandse sake, het gesê: “Ons almal besef dat die koste van omkopery hoog is. Omkoopgeskenke ondermyn goeie staatsbestuur, benadeel ekonomiese doeltreffendheid en ontwikkeling, ontwrig die handel en benadeel burgers regoor die wêreld.” Baie mense sou met hom saamstem. Op 17 Desember 1997 het 34 groot lande ’n “konvensie oor omkopery” onderteken wat bedoel is om “’n groot impak op die wêreldwye stryd teen korrupsie te hê”. Die konvensie “verklaar dit ’n misdaad om ’n omkoopgeskenk vir ’n buitelandse openbare amptenaar aan te bied, te beloof of te gee ten einde internasionale saketransaksies te verkry of te behou”.

Omkoopgeskenke om sakekontrakte in ander lande te verkry, is egter net die puntjie van die ysberg van korrupsie. Om korrupsie geheel en al uit die weg te ruim, vereis ’n tweede, baie moeiliker stap: dat baie mense hulle gesindheid verander. Mense regoor die wêreld moet leer om omkopery en korrupsie te haat. Dan eers sal omkopery verdwyn. Met dié doel het die tydskrif Newsweek gesê dat party meen dat regerings “’n algemene sin vir burgerdeug moet aanmoedig”. Transparency International, ’n groep wat hulle beywer vir wetgewing teen korrupsie, beveel eweneens aan dat sy ondersteuners by die werk “’n ‘saadjie van integriteit’ saai”.

Die stryd teen korrupsie is ’n sedelike stryd wat nie deur wetgewing alleen of deur “die swaard” van straf oorwin kan word nie (Romeine 13:4, 5). Saadjies van deug en integriteit moet in mense se harte gesaai word. Die beste manier waarop dit gedoen kan word, is deur gebruik te maak van wat die apostel Paulus beskryf het as “die swaard van die gees”, God se Woord, die Bybel.—Efesiërs 6:17.

Die Bybel veroordeel korrupsie

Waarom het Paulus nie korrupsie vergoelik nie? Omdat hy die wil wou doen van God, “wat niemand partydig behandel en ook nie ’n omkoopgeskenk aanvaar nie” (Deuteronomium 10:17, NW). Daarbenewens het Paulus ongetwyfeld die spesifieke opdrag onthou wat in die Wet van Moses gevind word: “Jy mag nie partydig wees nie; ook mag jy geen omkoopgeskenk aanneem nie, want die geskenk verblind die oë van die wyse en verdraai die sake van die wat reg het” (Deuteronomium 16:19). Koning Dawid het eweneens verstaan dat Jehovah korrupsie haat, en hy het gevra dat God hom nie onder die sondaars tel “wie se regterhand vol is van omkopery” nie.—Psalm 26:10.

Diegene wat God opreg aanbid, het nog ander redes waarom hulle korrupsie verwerp. “Deur geregtigheid gee ’n koning stabiliteit aan ’n land”, het Salomo geskryf, “maar een wat begerig is na omkoopgeskenke breek dit af” (Spreuke 29:4, New International Version). Geregtigheid werk stabiliteit in die hand—veral wanneer dit deur die belangrikste amptenaar tot die geringste toegepas word—maar korrupsie verarm ’n land. Newsweek het interessant genoeg gesê: “In ’n stelsel waarin almal voordeel uit korrupsie wil trek en weet hoe om dit te doen, kan ekonomieë eenvoudig ineenstort.”

Selfs wanneer ekonomieë nie heeltemal ineenstort nie, voel liefhebbers van geregtigheid gefrustreerd wanneer korrupsie ongehinderd floreer (Psalm 73:3, 13). Ons Skepper, die een wat ons ons aangebore begeerte na geregtigheid gegee het, word ook veronreg. Jehovah het in die verlede ingegryp om ’n einde te maak aan blatante korrupsie. Hy het byvoorbeeld ronduit vir die inwoners van Jerusalem gesê waarom hy hulle aan hulle vyande sou oorgee.

Deur sy profeet Miga het God gesê: “Hoor tog dit, hoofde van die huis van Jakob en owerstes van die huis van Israel! Julle wat van die reg ’n afsku het en al wat reg is, verdraai. Sy hoofde spreek vonnisse uit vir ’n geskenk, en sy priesters gee onderrig vir loon, en sy profete is waarsêers vir geld. . . . Daarom sal Sion om julle ontwil soos ’n land omgeploeg en Jerusalem puinhope word.” Korrupsie het die samelewing in Israel verwoes, net soos dit Rome eeue later agteruit laat gaan het. Net soos God gewaarsku het, is Jerusalem ongeveer ’n eeu nadat Miga daardie woorde geskryf het, vernietig en woes gelaat.—Miga 3:9, 11, 12.

Maar geen mens of nasie hoef korrup te wees nie. God moedig die goddeloses aan om hulle weg te verlaat en om hulle denkwyse te verander (Jesaja 55:7). Hy wil hê dat elkeen van ons hebsug met onselfsugtigheid en korrupsie met regverdigheid moet vervang. “Wie die geringe verdruk [“verkul”, NW], versmaad sy Maker, maar hy wat hom oor die behoeftige ontferm, eer Hom”, herinner Jehovah ons.—Spreuke 14:31.

Hoe om korrupsie met Bybelwaarheid te oorwin

Wat kan ’n persoon beweeg om so ’n verandering aan te bring? Dieselfde krag wat Paulus beweeg het om die lewe van ’n Fariseër te laat vaar en ’n standvastige volgeling van Jesus Christus te word. “Die woord van God is lewend en oefen krag uit”, het hy geskryf (Hebreërs 4:12). Vandag bevorder skriftuurlike waarheid nog steeds eerlikheid, selfs onder diegene wat diep betrokke was by korrupsie. Kyk na ’n voorbeeld.

Nie lank nadat Alexander, wat in Oos-Europa woon, sy diensplig voltooi het nie, het hy by ’n bende aangesluit wat mense afgepers, afgedreig en omgekoop het.a “My werk was om geld vir beskerming van ryk sakemanne af te dwing”, verduidelik hy. “Sodra ek die vertroue van ’n sakeman gewen het, het ander lede van ons span hom met geweld gedreig. Ek het dan aangebied om die saak te hanteer—teen ’n groot fooi natuurlik. My ‘kliënte’ het my bedank omdat ek hulle gehelp het om hulle probleme die hoof te bied, terwyl ek eintlik die oorsaak daarvan was. Snaaks genoeg, dit was ’n aspek van die werk waarvan ek gehou het.

“Ek het ook gehou van die geld en die opwinding wat ek uit hierdie lewenswyse gekry het. Ek het ’n duur motor gery, in ’n mooi woonstel gewoon, en ek het die geld gehad om enigiets te koop wat ek wou hê. Mense was bang vir my, en dit het my ’n gevoel van mag gegee. Ek het op ’n manier gevoel dat niemand enigiets aan my kon doen nie en dat ek bo die wet gestaan het. Enige probleme met die polisie kon opgelos word deur ’n bedrewe prokureur, wat maniere gehad het om die regstelsel te omseil, of deur die regte persoon om te koop.

“Maar lojaliteit bestaan selde onder diegene wie se bestaan van korrupsie afhang. Een van die bendelede het nie meer van my gehou nie, en ek het toe almal se guns verloor. Skielik het ek my spoggerige motor, my geld en my meisie met haar duur smaak verloor. Ek is selfs erg aangerand. Hierdie omwenteling het my ernstig laat nadink oor die doel van die lewe.

“’n Paar maande tevore het my ma een van Jehovah se Getuies geword, en ek het hulle lektuur begin lees. Die teks in Spreuke 4:14, 15 het my werklik laat dink: ‘Kom nie op die pad van die goddelose en betree die weg van die slegtes nie. Vermy dit, gaan nie daarop nie, wyk daarvan af en gaan verby.’ Sulke tekste het my daarvan oortuig dat diegene wat ’n kriminele lewe wil lei nie werklik ’n toekoms het nie. Ek het tot Jehovah begin bid en hom gevra om my op die regte weg te lei. Ek het die Bybel saam met Jehovah se Getuies gestudeer en uiteindelik my lewe aan God toegewy. Ek lei sedertdien ’n eerlike lewe.

“Om volgens eerlike standaarde te lewe, het natuurlik beteken dat ek baie minder geld verdien. Maar nou voel ek dat ek ’n toekoms het, dat my lewe werklik sin het. Ek besef dat my vorige lewenswyse met al die duur byvoordele daarvan net soos ’n kaartehuis was wat enige oomblik inmekaar kon tuimel. Voorheen was my gewete ongevoelig. Nou, danksy my studie van die Bybel, pla dit my wanneer ek ook al in die versoeking kom om oneerlik te wees—selfs in klein dingetjies. Ek probeer om in ooreenstemming met Psalm 37:3 te lewe, wat sê: ‘Vertrou op die HERE, en doen wat goed is; bewoon die aarde en beoefen getrouheid.’”

“Hy wat omkoopgeskenke haat, sal lewe”

Soos Alexander ontdek het, kan Bybelwaarheid ’n mens help om korrupsie te oorwin. Hy het veranderinge in sy lewe aangebring in ooreenstemming met wat die apostel Paulus in sy brief aan die Efesiërs gesê het: ‘Julle moet die ou persoonlikheid aflê, wat met julle vroeëre lewenswandel ooreenkom en wat volgens sy bedrieglike begeertes verderf word; julle moet vernuwe word in die krag wat julle verstand aandryf en julle met die nuwe persoonlikheid beklee, wat na God se wil in ware regverdigheid en lojaliteit geskep is. Noudat julle onwaarheid afgelê het, moet julle derhalwe die waarheid spreek, elkeen van julle met sy naaste, want ons is lede wat aan mekaar behoort. Laat die steler nie meer steel nie, maar laat hom liewer harde werk doen deur met sy hande werk te doen wat goed is, sodat hy iets kan hê om uit te deel aan iemand wat gebrek het’ (Efesiërs 4:22-25, 28). Die toekoms van die mensdom hang van sulke veranderinge af.

As hebsug en korrupsie nie beveg word nie, kan dit die aarde verderf, net soos dit tot die verderf van die Romeinse Ryk bygedra het. Maar gelukkig is die Skepper van die mensdom nie van plan om sulke sake aan die toeval oor te laat nie. Hy het besluit om “die verderwers van die aarde te verderf” (Openbaring 11:18). En Jehovah belowe diegene wat na ’n wêreld vry van korrupsie smag dat daar binnekort “nuwe hemele en ’n nuwe aarde” sal wees, “en in hulle sal regverdigheid woon”.—2 Petrus 3:13.

Dit is weliswaar nie maklik om vandag volgens eerlike standaarde te lewe nie. Maar Jehovah verseker ons dat ‘’n hebsugtige man sy gesin moeilikhede besorg, maar hy wat omkoopgeskenke haat, sal lewe’ (Spreuke 15:27, NIV).b As ons korrupsie nou verwerp, toon ons dat ons opreg is wanneer ons tot God bid: “Laat u koninkryk kom. Laat u wil geskied, soos in die hemel, so ook op die aarde.”—Matteus 6:10.

Terwyl ons wag dat daardie Koninkryk moet optree, kan elkeen van ons ‘in geregtigheid saai’ deur te weier om korrupsie te vergoelik of ons daaraan skuldig te maak (Hosea 10:12). As ons dit doen, sal ons lewe ook getuig van die krag van die geïnspireerde Woord van God. Die swaard van die gees kan korrupsie oorwin.

[Voetnote]

[Prent op bladsy 7]

Met behulp van die Bybel kan ons “die nuwe persoonlikheid” aankweek en korrupsie vermy