Die afgunstige mens
DIE Hebreeuse taal het slegs een grondwoord vir “jaloesie”. Wanneer daar na sondige mense verwys word, kan die Hebreeus met “afguns” of “wedywer” vertaal word (Genesis 26:14, NAV; Prediker 4:4, NW). Grieks het egter meer as een woord vir “jaloesie”. Die woord zeʹlos, soos sy Hebreeuse ekwivalent, kan na regverdige sowel as sondige jaloesie verwys. ’n Ander Griekse woord, fthoʹnos, het slegs ’n negatiewe betekenis. In die Nuwe Wêreld-vertaling van die Christelike Griekse Geskrifte word dit altyd met “afguns” weergegee.
Hoe is die woord fthoʹnos in die ou Grieks gebruik? The Anchor Bible Dictionary sê: “Anders as die hebsugtige mens wil die persoon wat deur fthonos geteister word nie noodwendig die dinge hê wat iemand anders besit en waaroor hy gegrief voel nie; hy wil eenvoudig nie hê dat die ander persoon dit moet hê nie. Hy verskil van die mededinger daarin dat sy oogmerk, anders as dié van die mededinger, nie is om te wen nie, maar om ander te verhinder om te wen.”
Die afgunstige mens is dikwels onbewus van die feit dat sy eie gesindheid die hoofoorsaak van sy probleme is. “Een van die eienaardighede van fthonos”, verduidelik dieselfde woordeboek, “is die gebrek aan selfbewussyn. Wanneer die fthoneros mens versoek word om sy optrede te regverdig, sal hy homself en ander altyd daarvan oortuig dat diegene wat hy aanval dit verdien en dat dit die onregverdigheid van die situasie is wat hom beweeg om te kritiseer. As hy gevra word hoe hy só van ’n vriend kan praat, sal hy sê dat sy kritiek vir sy vriend se eie beswil is.”
Die Evangelieskrywers Matteus en Markus gebruik die Griekse woord fthoʹnos om die beweegrede te beskryf van diegene wat vir die moord op Jesus verantwoordelik was (Matteus 27:18; Markus 15:10). Ja, hulle is deur afguns daartoe gedryf. Dieselfde skadelike emosie het afvalliges in venynige haters van hulle voormalige broers verander (1 Timoteus 6:3-5). Dit is geen wonder nie dat afgunstige mense belet word om in God se Koninkryk in te gaan! Jehovah God het bepaal dat almal wat aanhou om “vol afguns” te wees “die dood verdien”.—Romeine 1:29, 32; Galasiërs 5:21.
[Prente op bladsy 7]
Moenie toelaat dat afguns jou lewe verwoes nie