Bevorder vrede deur teen afguns te stry

1. Watter uitwerking het afguns op Josef se familie gehad?

JAKOB was lief vir al sy seuns, maar hy het ’n spesiale plek in sy hart vir die 17-jarige Josef gehad. Hoe het Josef se broers hieroor gevoel? Hulle het jaloers geword en hom begin haat. Josef het niks gedoen om dit te verdien nie. Maar hulle het Josef nog steeds as ’n slaaf verkoop en vir hulle pa gelieg deur te sê dat ’n wilde dier sy gunstelingseun doodgemaak het. Afguns het veroorsaak dat hulle die vrede in die familie versteur het en dat hulle hulle pa se hart gebreek het. – Gen. 37:3, 4, 27-34.

2. Hoekom is afguns volgens Galasiërs 5:19-21 so gevaarlik?

² Volgens die Bybel is afgunsb deel van die dodelike “werke van die vlees” wat kan veroorsaak dat ’n persoon nie God se Koninkryk erf nie. (Lees Galasiërs 5:19-21.) Afguns is dikwels die hoofoorsaak van giftige vrugte soos vyandigheid, stryery en woede-uitbarstings.

3. Wat sal ons in hierdie artikel bespreek?

³ Die voorbeeld van Josef se broers wys hoe afguns verhoudings kan beskadig en die vrede in ’n gesin kan versteur. Alhoewel ons nooit sal doen wat Josef se broers gedoen het nie, het ons almal ’n onvolmaakte en bedrieglike hart (Jer. 17:9). Geen wonder dat ons soms sukkel met gevoelens van afguns nie. Kom ons kyk na ’n paar waarskuwende voorbeelde in die Bybel wat ons kan help om te sien wat die redes is hoekom afguns dalk in ons hart kan wortelskiet. Ons sal dan na ’n paar praktiese maniere kyk hoe ons teen afguns kan stry en vrede kan bevorder.

WAT KAN DIE OORSAAK VAN AFGUNS WEES?

4. Hoekom was die Filistyne afgunstig op Isak?

⁴ Wanneer iemand ryk is. Isak was ’n ryk man, en die Filistyne was jaloers op Isak se rykdom (Gen. 26:12-14). Hulle het selfs die putte wat Isak gebruik het om vir sy diere water te gee, met grond toegegooi (Gen. 26:15, 16, 27). Net soos die Filistyne, is party mense vandag jaloers op persone wat meer materiële besittings as hulle het. Hulle begeer nie net die dinge wat ander het nie, maar hulle wil dit ook van hulle af wegvat.

5. Hoekom was die godsdiensleiers afgunstig op Jesus?

⁵ Wanneer baie mense van iemand hou. Die Joodse godsdiensleiers was afgunstig op Jesus omdat baie mense van hom gehou het (Matt. 7:28, 29). Jesus was God se verteenwoordiger en hy het mense die waarheid geleer. Maar dit het die godsdiensleiers nie gekeer om valse stories oor Jesus te versprei en om sy goeie naam deur die modder te sleep nie (Mark. 15:10; Joh. 11:47, 48; 12:12, 13, 19). Watter waarskuwende les kan ons uit hierdie voorbeeld leer? As daar iemand in die gemeente is waarvan die broers en susters baie hou omdat hulle goeie eienskappe het, moet ons hard probeer om nie jaloers te word nie. Ons moet eerder probeer om hulle goeie eienskappe na te volg. – 1 Kor. 11:1; 3 Joh. 11.

6. Hoe het Diotrefes gewys dat hy afgunstig is?

⁶ Wanneer iemand voorregte in die gemeente kry. In die eerste-eeu was Diotrefes jaloers op persone wat die leiding in die Christengemeente geneem het. Hy wou “die belangrikste in die gemeente . . . wees,” en daarom het hy slegte dinge van die apostel Johannes en ander broers gesê sodat persone in die gemeente nie respek vir hulle sou hê nie (3 Joh. 9, 10). Alhoewel ons nie sal doen wat Diotrefes gedoen het nie, kan ons ook afgunstig begin word op ’n mede-Christen wat ’n toewysing ontvang het wat ons graag wou hê – veral as ons voel dat ons die toewysing net so goed of selfs beter kon gedoen het.

7. Watter uitwerking kan afguns op ons hê?

⁷ Afguns is soos ’n giftige onkruid. As die saad van afguns eers in ons hart wortelgeskiet het, kan dit moeilik wees om dit uit te roei. Slegte gevoelens soos jaloesie, trots en selfsug kan veroorsaak dat afguns erger word. Afguns kan keer dat goeie eienskappe soos liefde, meegevoel en goedhartigheid ontwikkel. Sodra ons sien dat afguns in ons hart begin groei, moet ons dit uitroei. Hoe kan ons teen afguns stry?

KWEEK NEDERIGHEID EN TEVREDENHEID AAN

8. Watter eienskappe kan ons help om teen afguns te stry?

⁸ Ons kan teen afguns stry deur nederigheid en tevredenheid aan te kweek. Wanneer ons hart vol van hierdie goeie eienskappe is, sal daar nie plek wees vir afguns om te groei nie. Nederigheid sal ons help om nie te veel van onsself te dink nie. ’n Nederige persoon dink nie dat hy meer as ander verdien nie (Gal. 6:3, 4). Iemand wat tevrede is, is gelukkig met wat hy het en vergelyk nie homself met ander nie (1 Tim. 6:7, 8). Wanneer ’n persoon wat nederig en tevrede is, sien dat iemand iets goeds ontvang, is hy bly vir hom.

9. Wat sal heilige gees ons help om te doen volgens Galasiërs 5:16 en Filippense 2:3, 4?

⁹ Ons het die hulp van God se heilige gees nodig om die vleeslike eienskap van afguns te vermy en om eerder nederigheid en tevredenheid aan te kweek. (Lees Galasiërs 5:16; Filippense 2:3, 4.) Jehovah se heilige gees kan ons help om ons diepste gedagtes en beweegredes te ondersoek. Met God se hulp kan ons slegte gedagtes en gevoelens met goeie gedagtes en gevoelens vervang (Ps. 26:2; 51:10). Kom ons kyk na die voorbeelde van Moses en Paulus, manne wat suksesvol teen afguns gestry het.

10. Watter situasie kon ’n toets vir Moses gewees het? (Sien prent op voorblad.)

¹⁰ Moses het baie gesag oor God se volk gehad, maar hy het nie uit jaloesie gekeer dat ander ook gesag ontvang nie. By een geleentheid het Jehovah byvoorbeeld van sy heilige gees wat op Moses was, weggeneem en dit vir ’n groep Israelitiese ouermanne gegee wat naby die tent van samekoms gestaan het. Kort daarna het Moses uitgevind dat twee ouermanne wat nie by die tent van samekoms was nie, ook heilige gees ontvang het en soos profete begin optree het. Wat het hy gedoen toe Josua hom gevra het om die twee ouermanne te keer? Moses was nie afgunstig op die aandag wat Jehovah hierdie twee manne gegee het nie. Hy was eerder nederig en saam met hulle bly omdat hulle hierdie voorreg ontvang het (Num. 11:24-29). Watter les kan ons uit Moses se voorbeeld leer?

11. Hoe kan ouermanne Moses navolg?

¹¹ As jy ’n ouerman is, is jy al ooit gevra om iemand op te lei om ’n toewysing in die gemeente uit te voer waarvoor jy baie lief is? Byvoorbeeld, jy hou dalk baie daarvan om elke week die Wagtoring-studie te hou. Maar as jy nederig soos Moses is, sal jy nie bedreig voel as jy gevra word om ’n ander broer op te lei sodat hy later hierdie toewysing kan uitvoer nie. Jy sal eerder bly wees om jou broer te help.

12. Hoe wys baie Christene vandag dat hulle tevrede en nederig is?

¹² Kyk na nog ’n situasie waardeur baie ouer broers gaan. Vir baie jare het hulle as koördineerders van liggame van ouermanne gedien. Maar wanneer hulle 80 word, is hulle bereid om hierdie toewysing op te gee. Kringopsieners wat 70 jaar oud word, gee nederig hierdie toewysing op en aanvaar hulle nuwe toewysing in ’n ander vorm van diens. En in onlangse jare het baie lede van die Bethelgesin regoor die wêreld met hulle nuwe toewysings in die veld begin. Hierdie getroue broers en susters is nie kwaad vir die persone wat nou die toewysings uitvoer wat hulle voorheen gehad het nie.

13. Hoekom kon Paulus dalk afgunstig geraak het op die 12 apostels?

¹³ Die apostel Paulus is nog ’n goeie voorbeeld van iemand wat nederigheid en tevredenheid aangekweek het. Paulus het nie toegelaat dat afguns in sy hart ontwikkel nie. Hy het hard in die bediening gewerk, maar hy het nederig gesê: “Ek is die minste van die apostels, en ek is dit nie waardig om ’n apostel genoem te word nie” (1 Kor. 15:9, 10). Die 12 apostels het Jesus gedurende sy aardse bediening gevolg, maar Paulus het eers ná Jesus se dood en opstanding ’n Christen geword. Alhoewel Paulus later as “’n apostel vir die nasies” aangestel is, het hy nie die spesiale voorreg gehad om een van die 12 apostels te wees nie (Rom. 11:13; Hand. 1:21-26). Paulus was nie afgunstig op daardie 12 manne en die feit dat hulle so na aan Jesus was en saam met hom kon werk nie, hy was eerder tevrede met wat hy gehad het.

14. Wat sal ons doen as ons tevrede en nederig is?

¹⁴ As ons tevrede en nederig is, sal ons soos Paulus wys dat ons respek het vir die gesag wat Jehovah vir ander gegee het (Hand. 21:20-26). Hy het gereël dat manne aangestel word om die leiding in die Christengemeente te neem. Alhoewel hulle onvolmaak is, sien Jehovah hulle as “gawes in die vorm van mense” (Ef. 4:8, 11). Wanneer ons hierdie aangestelde manne respekteer en nederig hulle leiding volg, bly ons na aan Jehovah en geniet ons vrede met ons broers en susters.

‘LAAT ONS ALLES MOONTLIK DOEN OM VREDE TE BEVORDER’

15. Wat moet ons doen?

¹⁵ Vrede vergaan waar afguns bestaan. Ons moet die onkruid van afguns uit ons eie hart uitroei en nie gevoelens van afguns in ander se harte plant nie. Ons moet hierdie belangrike dinge doen as ons Jehovah se gebod wil gehoorsaam om “alles moontlik [te] doen om vrede te bevorder en mekaar op te bou” (Rom. 14:19). Watter spesifieke dinge kan ons doen om ander te help om teen afguns te stry en hoe kan ons vrede bevorder?

16. Hoe kan ons ander help om teen afguns te stry?

¹⁶ Ons gesindheid en dade kan ’n groot invloed op ander hê. Die wêreld wil hê dat ons moet ‘spog’ met die dinge wat ons het (1 Joh. 2:16). Maar hierdie gesindheid bevorder afguns. Ons kan ander help om nie afgunstig te word nie as ons dit vermy om die hele tyd te praat oor die dinge wat ons het of wat ons wil koop. Nog ’n manier hoe ons ander kan help om nie afgunstig te word nie, is deur nie te spog oor die voorregte wat ons in die gemeente het nie. As ons die hele tyd praat oor die voorregte wat ons het, skep ons vrugbare grond waarin afguns kan groei. Maar wanneer ons wys dat ons regtig in ander belangstel en die goeie dinge erken wat hulle doen, help ons hulle om tevrede te wees en bevorder ons die eenheid en vrede in die gemeente.

17. Wat kon Josef se broers doen, en hoekom?

¹⁷ Ons kan die stryd teen afguns wen! Kom ons kyk weer na die voorbeeld van Josef se broers. Jare nadat hulle Josef sleg behandel het, het hulle hom in Egipte ontmoet. Voordat Josef vir hulle gewys het wie hy is, het hy hulle eers getoets om te kyk of hulle verander het. Hy het ’n ete gereël waar hy die jongste broer, Benjamin, baie meer aandag gegee het as wat hy die ander gegee het (Gen. 43:33, 34). Maar daar is niks wat wys dat sy broers afgunstig op Benjamin geword het nie. Hulle het eerder gewys dat hulle regtig besorg was oor hulle broer en oor hulle pa, Jakob (Gen. 44:30-34). Omdat Josef se broers nie meer afgunstig was nie, kon daar weer vrede in hulle gesin wees (Gen. 45:4, 15). Net so sal dit ons help om die vrede in ons gesin en gemeente te behou as ons enige gevoelens van afguns uit ons hart uitroei.

18. Wat sal volgens Jakobus 3:17, 18 gebeur as ons help om ’n vreedsame omgewing te skep?

¹⁸ Jehovah wil hê dat ons teen afguns moet stry en vrede moet bevorder. Ons moet hard werk om hierdie twee dinge te doen. Soos ons in hierdie artikel bespreek het, sukkel ons almal soms met gevoelens van afguns (Jak. 4:5). En ons is omring deur ’n wêreld wat afguns bevorder. Maar as ons nederigheid, tevredenheid en waardering aankweek, sal daar nie plek wees vir afguns nie. Ons sal eerder ’n vreedsame omgewing skep waarin regverdige vrugte kan groei. – Lees Jakobus 3:17, 18.