’n Permanente einde aan geweld—Hoe?
OM DIE vlaag van geweld te keer, het ’n aantal stede in die Verenigde State met ’n ongewone idee geëksperimenteer—kontant of goedere vir vuurwapens wat ingegee word, en geen vrae word gevra nie. Die gevolg? Teen ’n koste van $341 000 (R1 238 000) het die stad St. Louis byvoorbeeld 8 500 vuurwapens ingesamel. In ’n soortgelyke program in die stad New York is meer as duisend wapens ingesamel.
Het dit ’n uitwerking op misdaad gehad? Nie juis nie. Die aantal vuurwapenverwante moorde in St. Louis was die volgende jaar hoër as ooit. In die stad New York is daar na raming steeds tweemiljoen vuurwapens op straat. In die Verenigde State is daar ongeveer 200 miljoen vuurwapens in privaat besit, byna een vir elke man, vrou en kind. In ander lande neem vuurwapenverwante geweld teen ’n onrusbarende tempo toe. In Brittanje “het die aantal misdrywe wat tussen 1983 en 1993 deur die polisie aangeteken is en waarby vuurwapens betrokke was bykans verdubbel, tot 14 000”, sê The Economist. Hoewel die moordsyfer relatief laag is, is daar ongeveer eenmiljoen onwettige wapens in daardie land.
Enige afname in hierdie skrikwekkende syfers is voorwaar ’n stap vorentoe. Maar maatreëls soos wat hier beskryf word, dring nouliks tot die oorsake van geweld deur. Wat is daardie oorsake? Baie faktore is al genoem, maar min is werklik deurslaggewend. ’n Gebrek aan gesinstabiliteit en sedelike opvoeding het baie jongmense daartoe gedryf om by bendes aan te sluit sodat hulle kan voel dat hulle iewers behoort. Die aantrekkingskrag van groot winste het daartoe gelei dat baie hulle tot geweld gewend het. Onregverdigheid dwing ander om sake met geweld reg te stel. Landstrots, rassetrots of trots op ’n posisie in die lewe veroorsaak dat mense die leiding van ander ignoreer. Hierdie dinge is diepgewortelde faktore waarvoor daar geen kitsoplossings is nie.
Wat kan gedoen word?
Meer polisiemanne, swaarder tronkstraf, wapenbeheer, die doodstraf—al hierdie dinge is al voorgestel en op die proef gestel as middele teen misdaad en geweld. Daarmee is verskillende grade van sukses behaal, maar ongelukkig kom geweld nog algemeen voor. Waarom? Omdat hierdie maatreëls bloot die simptome behandel.
Aan die ander kant meen baie kenners dat opvoeding die sleutel is tot die beëindiging van geweld. Hoewel dit ’n goeie idee is, moet ons onthou dat geweld nie beperk is tot nasies waar daar beperkte onderwysgeleenthede is nie. Trouens, dit wil voorkom of van die gewelddadigste nasies ook dié is met die hoogste geletterdheid. Dit is nie moeilik om te sien dat nie net opvoeding nie, maar die regte soort opvoeding, nodig is. Watter soort sal dit wees? Is daar iemand wat mense kan leer om vredeliewende en regskape individue te wees?
“Ek is die HERE jou God, wat jou leer wat heilsaam is, wat jou lei op die weg wat jy moet gaan. Ag, as jy maar na my gebooie geluister het, dan sou jou vrede gewees het soos ’n rivier en jou geregtigheid soos die golwe van die see” (Jesaja 48:17, 18, ons kursiveer). Hoe leer Jehovah God mense om vredeliewend en regverdig te wees? Hoofsaaklik deur sy Woord, die Bybel.
Die krag van God se Woord
Die Bybel is beslis nie net ’n versameling ou fabels en gesegdes wat verouderd en ontoepaslik is nie. Dit bevat beginsels en gedagtes van die mensdom se Skepper, wat, vanuit sy verhewe uitkykpunt, die menslike natuur beter as enigiemand anders ken. “Soos die hemel hoër is as die aarde, so is my weë hoër as julle weë en my gedagtes as julle gedagtes”, sê Jehovah God.—Jesaja 55:9.
Om hierdie rede verklaar die apostel Paulus dat ‘die woord van God lewend is en krag uitoefen en skerper is as enige tweesnydende swaard en selfs deurdring tot die skeiding van siel en gees, en van gewrigte en hulle murg, en gedagtes en bedoelinge van die hart kan onderskei’ (Hebreërs 4:12). Ja, God se Woord het die krag om ’n mens se hart te raak en jou denke en gedrag te verander. Is dit nie wat vandag nodig is om die gewelddadige weë van mense te verander nie?
Jehovah se Getuies, wat nou ongeveer vyfmiljoen in meer as 230 lande tel, is lewende bewys dat God se Woord inderdaad krag het om lewens ten goede te verander. Onder hulle is daar mense van elke nasionaliteit, taal en ras. Hulle kom ook uit alle lewensterreine en sosiale agtergronde. Party van hulle het voorheen gewelddadige en veelbewoë lewens gelei. Hulle het nie toegelaat dat sulke faktore vyandigheid, wedywering, diskriminasie en haat in hulle midde stook nie, maar hulle het eerder geleer om hierdie hindernisse te oorkom en het wêreldwyd ’n vredeliewende en verenigde volk geword. Hoe is dit moontlik gemaak?
’n Kampanje wat geweld tot ’n einde laat kom
Jehovah se Getuies is daartoe verbind om ander te help om juiste kennis in te neem van God se voorneme soos dit in sy Woord, die Bybel, geopenbaar word. In elke hoekie van die aarde soek hulle na diegene wat Jehovah se weë wil leer en deur hom geleer wil word. Hulle pogings dra vrug. Die gevolg van hierdie opvoedkundige kampanje is dat ’n wonderlike profesie in vervulling gaan.
Ongeveer 2 700 jaar gelede is die profeet Jesaja geïnspireer om te skryf: “Aan die einde van die dae sal . . . baie volke . . . heengaan en sê: Kom laat ons optrek na die berg van die HERE, na die huis van die God van Jakob, dat Hy ons sy weë kan leer en ons in sy paaie kan wandel.”—Jesaja 2:2, 3.
Om deur Jehovah geleer te word en in sy weë te wandel, kan wonderlike veranderinge in mense se lewe teweegbring. Een van die veranderinge is in dieselfde profesie voorspel: “Hulle sal van hul swaarde pikke smee en van hul spiese snoeimesse; nie meer sal nasie teen nasie die swaard ophef nie, en hulle sal nie meer leer om oorlog te voer nie” (Jesaja 2:4). Baie mense het al hierdie teks gelees. Trouens, hierdie teks verskyn op ’n muur by die Verenigde Nasies-plaza in die stad New York. Dit is ’n herinnering aan wat die Verenigde Nasies graag wil doen, maar nie kan verwesenlik nie. Geen mensgemaakte politieke organisasie sal oorlog en geweld uit die weg kan ruim nie. Dit is iets wat slegs Jehovah God in staat is om te doen. Hoe sal hy dit bewerkstellig?
Almal sal natuurlik nie op die uitnodiging reageer om ‘na die berg van die HERE op te trek’ en ‘sy weë te leer’ en ‘in sy paaie te wandel’ nie; almal sal ook nie bereid wees om ‘van hul swaarde pikke te smee en van hul spiese snoeimesse’ nie. Wat sal Jehovah met sulke mense doen? Hy sal nie vir ewig vir hulle die geleentheid bied of wag dat hulle moet verander nie. Om ’n einde aan geweld te maak, sal Jehovah ook ’n einde aan diegene maak wat met hulle gewelddadige weë voortgaan.
’n Belangrike les
Wat God in Noag se dag gedoen het, is vir ons vandag ’n waarskuwende les. Die Bybelverslag toon watter soort wêreld destyds bestaan het: “Die aarde was verdorwe voor die aangesig van God, en die aarde was vol geweld.” Daarom het God vir Noag gesê: “Die einde van alle vlees het volgens my besluit gekom; want die aarde is deur hulle vervul met geweld. En kyk, Ek gaan hulle saam met die aarde verdelg.”—Genesis 6:11, 13.
Ons moet een belangrike punt onthou. Toe God die Vloed oor daardie geslag gebring het, het hy Noag en sy gesin behoue laat bly. Waarom? Die Bybel antwoord: “Noag was ’n regverdige, opregte man onder sy tydgenote. Noag het met God gewandel” (Genesis 6:9; 7:1). Hoewel nie almal wat in daardie tyd gelewe het noodwendig gewelddadig was nie, het slegs Noag en sy gesin “met God gewandel”. Daarom het hulle behoue gebly toe daardie gewelddadige wêreld tot ’n einde gekom het.
Namate ons sien hoe die aarde weer eens ‘vol geweld’ word, kan ons seker wees dat God daarvan bewus is. Net soos in Noag se dag sal hy binnekort optree en ’n einde aan geweld maak—permanent. Maar hy sal ook ’n weg na veiligheid voorsien vir diegene wat nou leer om ‘met God te wandel’, diegene wat aan sy groot opvoedkundige kampanje vir vrede gehoor gee.
Deur middel van die psalmis gee Jehovah hierdie versekering: “Nog ’n klein rukkie en die goddelose sal daar nie wees nie; ja, jy sal ag gee op sy plek, maar hy sal daar nie wees nie. Die ootmoediges daarenteen sal die aarde besit en hulle verlustig oor groot vrede.”—Psalm 37:10, 11.
Jehovah se Getuies sal met graagte die Bybel met jou studeer sodat jy by diegene kan aansluit wat sê: “Laat ons optrek na die berg van die HERE, na die huis van die God van Jakob, dat Hy ons sy weë kan leer en ons in sy paaie kan wandel” (Jesaja 2:3). Deur dit te doen, kan jy onder diegene wees wat die einde van alle goddeloosheid en geweld sal sien. Jy kan jou ‘oor groot vrede verlustig’.
[Foto-erkenning op bladsy 5]
Reuters/Bettmann