Die Bybel se beskouing

Is dit verkeerd om alkohol te drink?

“WYN is ’n spotter, sterk drank is luidrugtig, en elkeen wat daardeur afdwaal, is nie wys nie.” Dui hierdie teks, wat in Spreuke 20:1 in die Bybel gevind word, aan dat dit verkeerd is om alkohol te drink? Party dink so. Om dit verder te staaf, wys hulle dalk op Bybelverslae waar die misbruik van alkohol slegte dade tot gevolg gehad het.—Genesis 9:20-25.

Dan is daar die rampspoedige gevolge van drankmisbruik—siektes soos sirrose van die lewer, tragiese ongelukke, finansiële ondergang, mishandeling van gesinslede en leed aan ongebore babas. Moontlik weens sulke verskriklike gevolge “het baie kerkgenootskappe geleer dat die gebruik van alkohol strydig is met die sedeleer”, sê The World Book Encyclopedia. Maar is dit in stryd met goeie sedes om alkohol te drink? Verbied die Bybel dat ons hoegenaamd enige alkohol drink?

Wat sê die Bybel?

Die Bybel waarsku wel teen die slegte gevolge van die oormatige gebruik van alkohol. Efesiërs 5:18 waarsku: “Moenie dronk word van wyn, waarin daar losbandigheid is nie.” Eweneens maan Spreuke 23:20, 21: “Moenie onder die wynsuipers wees, onder die vraatsugtige vleiseters nie. Want ’n dronkaard en ’n vraat sal in armoede verval.” En Jesaja 5:11 sê: “Wee dié wat vroeg in die oggend opstaan sodat hulle net sterk drank kan soek, wat tot laat in die aandskemering draal sodat die wyn hulle verhit!”

Die Bybel praat ook van die genot en voordele wat die matige gebruik van alkohol meebring. Psalm 104:15 sê byvoorbeeld dat “wyn wat die hart van die sterflike mens vrolik maak”, een van God se gawes is. En die beloning vir goeie werke, sê Prediker 9:7, is om ‘jou voedsel met blydskap te eet en jou wyn met ’n goeie hart te drink’. Paulus, wat bekend was met die mediese voordele van wyn, het vir Timoteus gesê: “Moenie langer water drink nie, maar gebruik ’n bietjie wyn ter wille van jou maag en jou herhaalde gevalle van siekte” (1 Timoteus 5:23). Die feit dat alkohol ’n mens kan help om benoudheid te verduur, word in die Bybel genoem.—Spreuke 31:6, 7.

Dit is duidelik dat die Bybel nie die gebruik van alkohol verbied nie. Maar dit veroordeel wel die oormatige gebruik daarvan sowel as dronkenskap. Daarom het Paulus Christenopsieners, bedieningsknegte en bejaarde vroue vermaan om hulle nie “aan baie wyn” oor te gee nie, en hy het Timoteus aangeraai om slegs “’n bietjie wyn” te gebruik (1 Timoteus 3:2, 3, 8; Titus 2:2, 3). Alle Christene word herinner dat “dronkaards” nie “God se koninkryk [sal] beërf nie”.—1 Korintiërs 6:9, 10.

Dit is opmerkenswaardig dat die Bybel dronkenskap met vraatsug verbind en beveel dat albei vermy moet word (Deuteronomium 21:20). As dit beteken dat ons glad nie alkohol moet drink nie, sal dit dan nie ook aandui dat dit verkeerd is om voedsel te eet nie? Dit is eerder die oormatige gebruik van voedsel of drank wat tot dronkenskap of vraatsug lei, wat die Bybel veroordeel—nie die matige gebruik daarvan nie.

Wat het Jesus gedoen?

Christus het vir ons “’n voorbeeld gelaat sodat [ons] sy voetstappe noukeurig kan volg”, sê die apostel Petrus. “Hy het geen sonde begaan nie” (1 Petrus 2:21, 22). Wat was dus Jesus se beskouing van alkohol? Wel, sy eerste wonderwerk was om water in wyn te verander. In watter soort wyn het Jesus die water verander? “Die feesleier” het die bruidegom gekomplimenteer met die wyn, wat wonderdadig voorsien is. Hy het gesê: “Elke ander mens sit eers die goeie wyn voor, en wanneer mense dronk is, die minderwaardige. Jy het die goeie wyn tot nou toe teruggehou.”—Johannes 2:9, 10.

Wyn is tydens die Pasgaviering gedrink, en Jesus het wyn gebruik toe hy die Here se Aandmaal ingestel het. Hy het ’n beker wyn aan sy dissipels gegee en vir hulle gesê: “Drink almal daaruit.” Wetende dat hy binnekort sou sterf, het hy bygevoeg: “Ek sal van nou af hoegenaamd nie van hierdie vrug van die wingerdstok drink tot op daardie dag wanneer ek dit nuut saam met julle in die koninkryk van my Vader drink nie” (Matteus 26:27, 29). Ja, mense het geweet dat Jesus wyn gedrink het.—Lukas 7:34.

Wat moet ons doen?

Hoewel die Bybel ons nie verbied om alkohol te drink nie, beteken dit nie dat ons dit moet drink nie. Daar is baie redes om ons daarvan te onthou. Byvoorbeeld, ’n voormalige alkoholis weet hoe gevaarlik dit is om selfs net een drankie te drink. ’n Verwagtende vrou sal haar dalk daarvan onthou omdat sy bang is dat dit skadelik sal wees vir haar fetus. En omdat ’n bestuurder weet hoe alkohol sy oordeel en reflekse belemmer, sal hy niks doen wat sy lewe of dié van ander in gevaar kan stel nie.

’n Christen sal nie ’n struikelblok wil wees vir enigiemand wie se gewete drank veroordeel nie (Romeine 14:21). Dit sal verstandig wees as hy of sy geen alkohol gebruik wanneer daar aan die bediening deelgeneem word nie. Dit is opmerkenswaardig dat die priesters, onder God se Wet aan eertydse Israel, verbied was om “wyn of sterk drank [te] drink” terwyl hulle amptelike diens gedoen het (Levitikus 10:9). In lande waar daar ’n verbod of beperkings op die inname van alkohol is, sal ’n Christen ook die wet gehoorsaam.—Romeine 13:1.

Hoewel ’n persoon self moet besluit of hy sal drink of nie, of hoeveel hy sal drink, staan die Bybel matigheid voor. Dit sê: “Hetsy julle eet of drink of enigiets anders doen, doen alles tot heerlikheid van God.”—1 Korintiërs 10:31.

HET JY AL GEWONDER?

◼ Watter waarskuwing aangaande die gebruik van alkohol word in die Skrif gegee?—1 Korintiërs 6:9, 10.

◼ Het Jesus Christus alkohol gedrink?—Lukas 7:34.

◼ Watter riglyne volg ware Christene met betrekking tot die gebruik van voedsel en drank?—1 Korintiërs 10:31.