Sal dié wat beproewing verduur ooit vrede hê?

SOU jy graag die einde van beproewing wil sien, nie net vir jouself nie maar vir die hele mensdom? Kyk na hierdie voorbeelde:

Sonia het al meer as genoeg beproewing vir een mens verduur.a Eers het sy uitgevind dat haar man al tien jaar lank ’n owerspelige verhouding het. Toe het haar jongste seun met HIV besmet geraak en aan vigs gesterf. Twee jaar later het haar ander seun siek geword, en kort daarna het hy ook aan vigs gesterf. “Die laaste fase van sy siekte het so lank geduur”, sê Sonia. “Hy het aan ernstige depressie gely, sy hare het uitgeval en hy kon nie goed sien nie. Dit was ’n baie droewige situasie.”

Fabiana, ’n universiteitstudent van Brasilië, was besorg oor die maatskaplike ongeregtighede in die wêreld. Toe het ’n ramp haar getref. Haar broer, wat aan depressie gely het, het selfmoord gepleeg. Toe Fabiana haar werk verloor, het ’n vriendin voorgestel dat sy die hulp van ’n pai-de-santo (toordokter) inroep, omdat sy geredeneer het dat iemand Fabiana seker vervloek het as sy soveel teenspoed gehad het! Maar die pai-de-santo het geen verligting gebring nie. Inteendeel, Fabiana het gevoel dat iets haar teister en kon weens haar probleme nie slaap nie.

Ana se beproewing het heelwat vroeër in haar lewe begin. “Toe ek ’n jaar oud was”, vertel sy, “het my ma my verwerp en het ek by my ouma gaan bly.” Later, toe Ana net drie jaar oud was, het haar ouma gesterf. Ana is na ’n weeshuis in Rio de Janeiro gestuur, waar sy gebly het tot sy 13 was. “Ons is daar baie sleg behandel, en ek het opstandig geword”, sê sy. “Terwyl ek grootgeword het, het ek my teen omtrent alles verset.”

Dit lyk of die lewe van elke mens op die een of ander manier deur beproewing geraak word. Trouens, verhale van mensebeproewing kom daagliks onder ons aandag—wanneer ons ook al na die nuus kyk, luister of dit lees. “Eers in ons . . . era van massakommunikasie het dit feitlik onmoontlik geword om die konstante stortvloed van slegte nuus te vermy”, skryf dr. Mary Sykes Wylie. “Oorloë, natuurrampe, nywerheidskatastrofes, padsterftes, misdaad, terrorisme, seksuele molestering, verkragting, gesinsgeweld—dit alles maak trauma ’n aaklige en daaglikse tema van die 20ste eeu.” Die Christenapostel Paulus het die menslike ondervinding realisties opgesom: ‘Die hele skepping kreun tot nou toe voortdurend saam en ly saam pyn.’—Romeine 8:22.

Wat van jou? Verduur jy beproewing? Watter verligting kan jy verwag? Sal jy ooit ware vrede vind? Sonia, Fabiana en Ana het ware vertroosting en vrede gevind! Jy kan in die volgende artikel daarvan lees.

[Voetnoot]