Is geld die bron van ware geluk?

SONIA is in Spanje gebore. As kind het sy die vergaderinge van Jehovah se Getuies saam met haar ma bygewoon. Maar toe sy groot was, het sy na Londen, Engeland, getrek en later as ’n effektemakelaar in die finansiële wêreld begin werk.

Sonia het haar werk terdeë geniet. Sy het baie geld verdien en het namens haar kliënte met groot somme geld gewerk. Dit was opwindend, en sy was suksesvol. Sonia het gereeld 18 uur per dag gewerk, en sommige aande het sy net twee of drie uur slaap gekry. Haar werk was haar lewe. Toe het alles skielik in duie gestort. Sonia het ’n ernstige beroerte gehad—moontlik die gevolg van haar stresvolle lewenswyse. Sy was maar 30 jaar oud.

Die een kant van Sonia se liggaam was verlam, en die dokters was nie seker of sy ooit weer sou kon praat nie. Haar ma het onmiddellik na Engeland toe gereis om haar te versorg. Toe Sonia weer begin loop het, het haar ma vir haar gesê: “Ek gaan na die gemeentelike vergaderinge toe, en jy sal maar moet saamkom, want ek kan jou nie alleen los nie.” Sonia het ingestem om saam te gaan. Wat was die gevolg?

“Alles wat ek gehoor het, het waar geklink. Dit was wonderlik”, vertel Sonia. “Ek het met graagte ’n Bybelstudie aanvaar met een van die talle persone wat my kom groet het toe ek die eerste keer by die Koninkryksaal was. My gewese kennisse het opgehou om my te besoek, maar my nuwe vriende was liefdevol en besorgd.”

Sonia het haar spraak geleidelik teruggekry, en sy het ook vinnig geestelike vooruitgang gemaak. Sy is binne ’n jaar gedoop. Baie van haar nuwe vriende was in die voltydse Christelike bediening, en sy kon sien hoe gelukkig hulle is. ‘Ek wil ook so wees’, het Sonia gedink. ‘Ek wil Jehovah God my heel beste gee!’ Sonia dien nou as ’n voltydse bedienaar.

Wat het Sonia uit haar ondervinding geleer? “Al het ek baie geld verdien, het die spanning en onsekerheid van die werk my bekommerd en ongelukkig gemaak. Ek het tot die besef gekom dat die belangrikste ding in die lewe ’n goeie verhouding met my hemelse Vader, Jehovah, is. Nou is ek waarlik gelukkig.”

“Die liefde vir geld is ’n wortel van allerhande skadelike dinge”, het die apostel Paulus geskryf. “Deur hierdie liefde na te streef, is party van die geloof af op ’n dwaalspoor gebring en het hulle hulleself oral met baie pyne deurboor” (1 Timoteus 6:10). Sonia kan getuig dat hierdie woorde waar is.