Onthou jy?

Het jy goed nagedink oor onlangse nommers van Die Wagtoring? Indien wel, sal jy dit interessant vind om jou weer aan die volgende te herinner:

◻ Hoe het baie egpare van vandag die uitstekende voorbeeld gevolg wat Aquila en Priscilla gestel het?

Aquila en Priscilla het in verskeie gemeentes gedien. Soos hulle, het talle hedendaagse Christene hulle beskikbaar gestel om te verhuis na waar daar hulp nodig is. Hulle ervaar ook die vreugde en bevrediging wat daaruit spruit om Koninkryksbelange te sien groei en om kosbare Christenvriendskappe te kan opbou.—12/15, bladsy 24.

◻ Wat Is die Bybel se beskouing van sterk drank?

Die Bybel se beskouing van sterk drank is gebalanseerd. Aan die een kant sê die Bybel dat wyn ’n gawe van God is (Psalm 104:1, 15). Aan die ander kant veroordeel dit die oormatige gebruik daarvan (Lukas 21:34; 1 Timoteus 3:8; Titus 2:3; 1 Petrus 4:3).—12/15, bladsy 27.

◻ Wat is ’n uitstaande kenmerk van die Bybelboek Haggai?

Hoewel die boek Haggai uit slegs 38 verse bestaan, word God se naam 35 keer gebruik. Sulke profesieë klink leweloos wanneer die naam Jehovah met die titel “HERE” vervang word.—1/1, bladsy 6.

◻ Watter les kan uit Dawid en Manasse se sondes geleer word?

Al het Jehovah Dawid en Manasse vergewe, moes hierdie manne—en Israel saam met hulle—die gevolge van hulle sondige dade dra (2 Samuel 12:11, 12; Jeremia 15:3-5). Hoewel Jehovah vandag berouvolle sondaars vergewe, is daar dalk insgelyks gevolge van hulle dade wat nie vermy kan word nie.—1/1, bladsy 27.

◻ Hoe is ‘die voete van dié wat die goeie nuus’ van God se Koninkryk verkondig “lieflik”? (Jesaja 52:7).

Dit is die voete wat ’n persoon gewoonlik van plek tot plek neem wanneer hy uitgaan om vir ander te getuig. Hierdie voete verteenwoordig in werklikheid die persoon. Vir die baie wat die goeie nuus van die Koninkryk hoor en gunstig daarop reageer, is hierdie boodskappers se voete inderdaad mooi.—1/15, bladsy 13.

◻ Watter tweevoudige werk is daarby betrokke om “die goeie nuus bekend [te] maak”? (1 Korintiërs 9:16).

Eerstens moet ons die goeie nuus van die Koninkryk verkondig. Die tweede aspek van hierdie werk behels dat ons diegene leer wat gunstig op die Koninkryksverkondiging reageer.—1/15, bladsy 23.

◻ Hoe kan ons persoonlik baat vind deur koninkryksliedere by gemeentelike vergaderinge te sing?

Sang gee ons die geleentheid om ons gevoelens vir ons Skepper uit te druk (Psalm 149:1, 3, NW). Wanneer ons van harte in die gemeente sing, kan dit ons verstand en hart in die regte stemming bring vir die program wat volg. Dit kan ons beweeg om ’n groter deelname aan Jehovah se aanbidding te hê.—2/1, bladsy 28.

◻ Wanneer is die sterfdag beter as die geboortedag? (Prediker 7:1).

Die sterfdag kan beter wees as ’n mens se geboortedag as jy teen daardie tyd ’n goeie naam opgebou het by Jehovah, wat getroues wat sterf, kan opwek (Johannes 11:25).—2/15, bladsy 12.

◻ Waarom behoort die boek prediker ons persoonlik te help?

Dit kan elkeen van ons help om ons lewensbeskouing en dit waarop ons ons toelê reg te stel (Prediker 7:2; 2 Timoteus 3:16, 17).—2/15, bladsy 16.

◻ Is Jehovah se Getuies fundamentaliste?

Nee. Hoewel hulle sterk godsdiensoortuigings het, is hulle nie fundamentaliste in die sin waarin die woord gewoonlik gebruik word nie. Hulle gebruik nie betogings en geweld teen diegene met wie hulle verskil nie. Hulle volg hulle Leier, Jesus Christus, na.—3/1, bladsy 6.

◻ Aangesien Christene nie presies weet wanneer Jesus gaan kom om God se wraak uit te oefen nie, watter uitwerking het dit op hulle?

Dit help Christene om waaksaam te bly en gee hulle daagliks die geleentheid om te bewys dat hulle Jehovah uit onselfsugtige beweegredes dien.—3/1, bladsy 13.

◻ Wat moet ons in ag neem voordat ons regsaksie instel teen ’n broer wat ons dalk bedrieg het?

Ons moet dink aan die moontlike uitwerking wat dit op ons, op ander betrokkenes, op die gemeente en op buitestanders kan hê (1 Korintiërs 6:7).—3/15, bladsy 22.

◻ Hoe kan ware geluk verkry word?

Ware geluk is ’n hartstoestand wat gegrond is op ware geloof en ’n goeie verhouding met Jehovah (Matteus 5:3).—3/15, bladsy 23.

◻ Wat moet ’n Christen doen wanneer hy gevra word om juriediens te doen?

Elke Christen wat voor juriediens te staan kom, moet op grond van sy begrip van die Bybel en sy eie gewete besluit watter weg om te volg (Galasiërs 6:5).—4/1, bladsy 29.