Koninkryksverkondigers berig
Mense vlug na Jehovah se teokratiese organisasie
DIE profeet Jesaja is lank gelede beweeg om te sê: ‘Hulle moet Jehovah op die eilande van die see verheerlik’ (Jesaja 24:15, NW). Jehovah se Getuies beskou die eilande van die see as ’n deel van ‘die bewoonde aarde’ waarin Jesus gesê het ‘die goeie nuus verkondig moet word’.—Matteus 24:14; Markus 13:10.
Die Marquesas-eilande is ongeveer 1400 kilometer noordoos van Tahiti geleë. Dit is deel van ’n afgeleë eilandgroep in die Stille Suidsee wat Frans-Polinesië genoem word. Weens die ryk vulkaangrond en ’n warm, vogtige klimaat is die plantegroei welig op hierdie eilande. Maar die Marquesas bring ook vrugte van ’n ander aard voort. Beskou die geval van een gesin op die eiland Hiva Oa wat gunstig op die Koninkryksboodskap gereageer het.
Jean en sy vrou, Nadine, was ongelukkig met die sogenaamd beskaafde gemeenskap van Wes-Europa waarin hulle gewoon het. Hulle het dus besluit om daardie gejaagde lewenswyse agter te laat en met hulle kind na die Marquesas-eilande te verhuis. Hulle nuwe huis, wat van bamboes gemaak was, was in ’n afgeleë vallei geleë. Om by hulle naaste bure uit te kom, moes hulle twee uur lank oor ’n hobbelrige bergpaadjie loop. Die naaste dorpie met ’n dokter, ’n skool en ’n winkel was drie uur ver met ’n jeep.
Jean en Nadine het nie in godsdiens belanggestel nie. Maar hulle het wel gesprekke oor die oorsprong van die lewe gehad. Hulle het dikwels uitgewei oor ingewikkelde evolusieteorieë. Maar nie een van hierdie teorieë het hulle tevrede gestel nie.
Nadat hulle ses jaar lank in afsondering gewoon het, is hulle deur ’n besoek van twee Getuies van Jehovah verras. Die Getuies het by die dorpenaars in die omgewing verneem waar Jean en Nadine woon. Die gesprek het natuurlik tot ’n bespreking van die evolusieteorie gelei. Tot die egpaar se vreugde het die Getuies ’n eksemplaar gehad van die boek Lewe—Hoe het dit hier gekom? Deur evolusie of deur die skepping?, wat deur Jehovah se Getuies uitgegee word. Jean en Nadine was verheug om ’n boek te kry wat ’n deeglike ondersoek bevat het van hoe lewe hier gekom het.
’n Rukkie later is ’n Bybelstudie begin. Oor ’n tydperk van omtrent drie jaar het Jean en Nadine geleidelik vordering gemaak. Hulle het oortuig geword van die feit dat die hele aarde binnekort in ’n paradys omskep gaan word. Nadat hulle gesin tot drie kinders vermeerder het, het dit ’n groot uitdaging geword om vier uur te reis om Christelike vergaderinge by die Koninkryksaal by te woon. Maar dit het nie verhinder dat hulle dit bywoon nie. Jean en Nadine het eindelik hulle toewyding aan Jehovah deur waterdoop gesimboliseer. Hulle het dit by ’n streekbyeenkoms gedoen wat in die hoofdorpie gehou is en waar die opkomshoogtepunt 38 mense was!
Ten einde die groepie Koninkryksverkondigers te help, het die gesin besluit om hulle afgeleë tuiste te verlaat. Hulle het na ’n dorpie met omtrent duisend inwoners getrek, waar Jean nou as bedieningskneg in die plaaslike gemeente van Jehovah se Getuies dien. Hierdie gesin, wat voorheen na die eilande gevlug het om weg van die beskawing te kom, ag dit ’n voorreg dat hulle die enigste ware toevlug, Jehovah se teokratiese organisasie, gevind het.