Koninkryksverkondigers berig

Hoe daar van demooninvloed weggebreek is

DIE beoefening van spiritisme oorheers lank reeds die lewens van miljoene mense. Maar dit is moontlik om daarvan weg te breek! Dit is wat baie mense in die eertydse stad Efese gedoen het. Volgens die Bybelverslag het ‘heelparty van dié wat toorkunste beoefen het, hulle boeke bymekaargebring en verbrand. So het die woord van Jehovah op ’n magtige wyse bly groei en seëvier.’—Handelinge 19:19, 20.

Vandag ondervind die Christengemeente eweneens ’n toename. Soos dit die geval in Efese was, is daar onder dié wat gelowiges word mense wat voorheen demonisme beoefen het. Die volgende ondervinding uit Zimbabwe lig dit toe.

Gogo (Ouma) Mthupha was welbekend vir haar spiritistiese kragte. Mense het tot van Zambië, Botswana en Suid-Afrika gekom sodat sy hulle met haar toorgoed kon behandel. Gogo Mthupha het ook ander mense geleer hoe om ’n n’anga, oftewel toordokter, te word. En sy het soms deur towery ’n vloek oor ander gebring!

Een Sondagoggend het Jehovah se Getuies, wat aan die huis-tot-huis-bediening deelgeneem het, Gogo Mthupha besoek. Sy het die bespreking met hulle oor die Bybel se belofte van ’n nuwe wêreld van regverdigheid, ’n wêreld vry van alle goddelose invloede, terdeë geniet. Sy het die boek Jy kan vir ewig in die Paradys op aarde lewe geneem en tot ’n tuisbybelstudie ingestem.a Ná slegs drie studies het sy vergaderinge begin bywoon.

Deur haar studie van die Bybel het Gogo Mthupha uitgevind dat haar spesiale kragte afkomstig was van bose geesskepsele wat teen Jehovah se soewereiniteit in opstand gekom het (2 Petrus 2:4; Judas 6). Sy het ook uitgevind dat hierdie demone vasbeslote is om almal wat hulle kan, teen Jehovah en teen rein aanbidding te laat draai. Wat sou sy doen, aangesien sy haar brood verdien het deur hierdie bose geesskepsele op te roep?

Gogo Mthupha het die begeerte uitgespreek om van al haar toorgoed en spiritistiese toebehore ontslae te raak. Dit het haar spesiale hooftooisel en “pratende bulhorings” ingesluit, wat sy in haar genesings as n’anga gebruik het. Gogo Mthupha wou van al hierdie voorwerpe ontslae raak sodat sy die enigste ware en lewende God, Jehovah, kon dien.

Party van haar familielede het egter beswaar gemaak omdat sy hulle geldelik onderhou het. Hulle het haar gesmeek om die voorwerpe, asook haar geheimsinnige kragte, aan hulle oor te dra sodat hulle kon voortgaan om wins daaruit te maak. Gogo Mthupha het geweier.

Met behulp van die plaaslike gemeente van Jehovah se Getuies het sy drie groot sakke vol spiritistiese toerusting bymekaargemaak en dit alles verbrand. Terwyl haar middele van demoonaanbidding in vlamme opgegaan het, het Gogo Mthupha uitgeroep: “Kyk! Daardie horing kan homself nie red nie.”

Ná verloop van tyd het Gogo Mthupha haar toewyding aan Jehovah met vreugde deur waterdoop gesimboliseer. Hoe maak sy nou ’n bestaan? Deur groente te verkoop. Ja, deur die krag van God se Woord kán ’n mens van demoonaanbidding wegbreek. Gogo Mthupha sê: “Ek het nog nooit so vry gevoel nie.”

[Voetnoot]