’n Heuglike geleentheid. die graduering van die 104de Gileadklas

“DIT is ’n heuglike dag, en ons almal is vreugdevol.” Met hierdie woorde het Carey Barber, ’n lid van die Bestuursliggaam van Jehovah se Getuies, die gradueringsverrigtinge van die 104de klas van die Wagtoring-Bybelskool Gilead op 14 Maart 1998 geopen. Die gehoor van 4945 is genooi om die geleentheid te begin deur Koninkrykslied nommer 208 te sing met die titel “’n Vreugdelied.”

Praktiese raad om gelukkig te bly

Die eerste deel van die program, ’n reeks van vyf kort Bybeltoesprake, het praktiese raad voorsien oor hoe om die vreugdevolle gees te behou wat die gradueringsdag gekenmerk het.

Die eerste toespraak is deur Joseph Eames van die Skryfafdeling gehou. Hy het oor die tema “Volg die gees van lojales na” gepraat, wat op die Bybelverslag in 2 Samuel hoofstukke 15 en 17 gebaseer is, waar Absalom, Dawid se seun, ’n komplot gesmee het om sy vader se godgegewe koninkryk van hom weg te neem deur ’n opstand aan te stig. Maar daar was diegene wat lojaal aan Jehovah se gesalfde, koning Dawid, gebly het. Watter les kon die nuwe sendelinge hieruit leer? “Waar julle ook al in julle sendingtoewysing gaan, moet julle lojaal die gees van samewerking en respek vir teokratiese gesag bevorder. Help ander om dieselfde te doen”, het broer Eames afgesluit.

Volgende op die program was David Sinclair, wat tien vereistes bespreek het, wat in Psalm 15 genoem word, om as gaste in ‘Jehovah se tent’ te vertoef. Sy toespraak, met die titel “Hou aan om as gaste in julle sendingtent te vertoef”, het die graduerende studente aangemoedig om hierdie psalm toe te pas in hulle sendingtoewysings, waar hulle gaste sou wees. Broer Sinclair het die belangrikheid daarvan beklemtoon om ten alle tye volgens Goddelike standaarde te lewe. Wat sal die resultaat wees? Psalm 15:5 sê: “Hy wat hierdie dinge doen, sal nie wankel in ewigheid nie.”

John Barr, ’n lid van die Bestuursliggaam, was volgende aan die beurt en het die aandag gevestig op die besielende uitwerking wat die sing van liedere by Christelike vergaderinge het. Maar wat is die allermooiste vreugdelied wat vandag regoor die aarde gesing word? Dit is die goeie nuus van God se Messiaanse Koninkryk. Wat is die resultaat van al hierdie gesing, of verkondiging van die Koninkryk? Die tweede vers van lied 208 stel dit bondig: “Die Christenlering oor Gods regering trek baie mense na God se kant. Hul sing met vreugde oor God se deugde. Hul bring die nuus aan die ganse land.” Ja, elke dag word ongeveer 1000 nuwe dissipels gedoop. Broer Barr het afgesluit: “Is dit nie wonderlik om te dink nie, broers, dat julle na gebiede gestuur word om die soort mense te ontmoet wat gretig wag om julle loflied te hoor?”

“Luister na diegene met ondervinding” was die titel van die toespraak wat James Mantz van die Skryfafdeling hierna gehou het. Hy het daarop gewys dat party dinge net deur persoonlike ondervinding geleer kan word (Hebreërs 5:8). Spreuke 22:17 spoor ons nietemin aan om ‘gehoor te gee en te luister na die woorde van wyse manne’, of diegene wat ondervinding opgedoen het. Die graduerende studente kan baie leer by diegene wat voor hulle daar was. “Hulle weet hoe om met die plaaslike winkeliers te onderhandel. Hulle weet watter gebiede van die stad om te vermy weens fisiese of sedelike gevare. Hulle weet waaroor die plaaslike mense sensitief is. Diegene wat al jare lank sendelinge is, weet wat julle nodig het om gelukkig en suksesvol in julle toewysing te wees”, het broer Mantz gesê.

Wallace Liverance, registrateur van die Gileadskool, het oor die tema “Waardeer jou teokratiese toewysing” gepraat en verduidelik dat sekere sendelinge, soos die apostel Paulus, Timoteus en Barnabas hulle toewysing van God ontvang het deur die heilige gees of die een of ander wonderdadige openbaring, maar dat Gileadopgeleide sendelinge deur “die getroue en verstandige slaaf” na ’n plek in die wêreldwye veld gestuur word (Matteus 24:45-47). Hy het die sendelinge se toewysings vergelyk met die plekke waar Gideon gesê het sy manne moes staan wat teen die Midianiete sou veg (Rigters 7:16-21). “Waardeer jou teokratiese sendingtoewysing. Net soos Gideon se soldate ‘elkeen op sy plek bly staan het’, moet julle julle toewysing beskou as die plek waar julle moet wees. Stel geloof in die feit dat Jehovah julle kan gebruik net soos hy Gideon se driehonderd manne gebruik het”, het broer Liverance hulle aangespoor.

Dit verskaf geluk om mensgeoriënteerd te wees

Die Wagtoring het eenkeer gesê: “Hoeveel beter en wyser is dit dus as ons mense ons werklike belangstelling maak en leer om ware genot daaruit te put om dinge vir ander te doen, eerder as om ons belange en lewens om vervaardigde artikels en toestelle, waarvan die voortbestaan nie seker is nie, heen te bou.” In ooreenstemming hiermee het broer Mark Noumair, een van die Gileadskoolinstrukteurs, met ’n groep studente hulle velddiensondervindinge bespreek en gesê: “Om persoonlike belangstelling in ander te toon, is wat julle goeie sendelinge gaan maak.”

Sleutels tot geluk in die buitelandse veld

Wat is van die sleutels tot sukses en geluk in die sendingwerk? Broers Charles Woody van die Diensafdeling en Harold Jackson, ’n voormalige sendeling in Latyns-Amerika en ’n assistent van die Onderrigtingskomitee, het onderhoude gevoer met lede van verskillende Takkomitees wat die negende klas van die skool vir takkantoorpersoneel bygewoon het. Hier volg ’n uittreksel van die raad wat hulle gehad het:

Albert Musonda van Zambië het gesê: “Wanneer die sendelinge die inisiatief neem om die broers te gaan groet, wek dit ’n baie goeie gees omdat die broers aangetrokke tot die sendeling sal voel, en die sendeling sal aangetrokke tot hulle voel.”

Rolando Morales van Guatemala stel voor dat nuwe sendelinge, wanneer hulle iets te drinke aangebied word deur vriendelike mense, vriendelik en taktvol kan antwoord: “Ek is nuut in die land. Ek wens ek kon dit neem, maar my liggaam het nie die natuurlike weerstand wat jou liggaam het nie. Ek hoop dat ek dit eendag kan neem, en ek sal dit graag doen.” Wat is die voordele van daardie soort antwoord? “Mense sal nie aanstoot neem nie, en dit sal vriendelik van die sendelinge wees.”

Wat kan sendelinge help om in hulle toewysings te volhard? Broer Paul Crudass, ’n gegradueerde van die 79ste Gileadklas, wat die afgelope 12 jaar in Liberië dien, het hierdie opmerking gemaak: “Ek weet dit is waar dat ouers na hulle kinders verlang. Maar daar is tye wanneer die sendeling aan die land, die omgewing, die kultuur, die mense probeer gewoond raak. Hy voel dalk dat hy die plek wil verlaat. As hy ’n brief van die huis af kry wat sê: ‘Ons verlang so baie na jou; ons weet nie wat ons sonder jou gaan doen nie’, is dit dalk al wat hy nodig het om sy koffers te pak en huis toe te gaan. Dit is baie belangrik dat die familielede wat vandag hier is dit onthou.”

Ná die onderhoude is die laaste toespraak op die program deur Theodore Jaracz, ’n lid van die Bestuursliggaam, gehou. Sy tema: “Stel die Koninkryk eerste in jou lewe.” Hoe kan die sendelinge doelgerig bly en voorkom dat hulle aandag van hulle werk afgelei word? Hy het hulle aangemoedig om ’n rooster vir persoonlike Bybelstudie te hê, wat hulle sal help om Koninkryksbelange eerste in hulle lewe te stel. En daar was hierdie tydige herinnering: “Party sendelinge het persoonlike studie verwaarloos omdat hulle baie aandag aan elektroniese toestelle, E-pos en die rekenaar begin wy het. Ons moet verstandig wees en gebalanseerd bly in die gebruik van enige instrument en nie ’n buitensporige hoeveelheid tyd bestee aan iets wat inbreuk kan maak op ons persoonlike studie van God se Woord nie.”

Ná broer Jaracz se toespraak is die diplomas aan die studente gegee en is ’n brief van waardering van die klas gelees. Die verteenwoordiger van die klas het die gevoelens van almal só uitgedruk: “Ons het tasbare bewyse gesien van die liefde wat Jesus gesê het sy dissipels sou kenmerk, en dit het ons weer verseker dat daar ’n hartlike, liefdevolle moederorganisasie is wat ons ondersteun ongeag waar ons is. Met sulke ondersteuning is ons gereed om na die eindes van die aarde te gaan.” Dit was ’n roerende einde tot ’n vreugdevolle gradueringsdag vir die 104de Gileadklas.

[Venster op bladsy 24]

Klasstatistiek

Aantal lande verteenwoordig: 9

Aantal lande waarheen gestuur: 16

Aantal studente: 48

Aantal egpare: 24

Gemiddelde ouderdom: 33

Gemiddelde jare in waarheid: 16

Gemiddelde jare in voltydse bediening: 12

[Prent op bladsy 25]

104de Gradueringsklas van die Wagtoring-Bybelskool Gilead

In die lys hieronder word rye van voor na agter genommer, en name word van links na regs in elke ry aangegee

(1) Romero, M.; Howarth, J.; Blackburne-Kane, D.; Hohengasser, E.; West, S.; Thom, S. (2) Colon, W.; Glancy, J.; Kono, Y.; Drews, P.; Tam, S.; Kono, T. (3) Tam, D.; Zechmeister, S.; Gerdel, S.; Elwell, J.; Dunec, P.; Tibaudo, H. (4) Taylor, E.; Hildred, L.; Sanches, M.; Anderson, C.; Bucknor, T.; Hohengasser, E. (5) Howarth, D.; Ward, C.; Hinch, P.; McDonald, Y.; Sanches, T.; Thom, O. (6) Drews, T.; Tibaudo, E.; Elwell, D.; Dunec, W.; Blackburne-Kane, D.; Ward, W. (7) Anderson, M.; Zechmeister, R.; McDonald, R.; Bucknor, R.; Glancy, S.; Gerdel, G. (8) Romero, D.; Hinch, R.; Hildred, S.; Taylor, J.; Colon, A.; West, W.

[Prent op bladsy 26]

Broers wat die 104de klas opgelei het: (van links af) W. Liverance, U. Glass, K. Adams, M. Noumair