Die aarde Waarom is dit hier?

Daar is ’n vraag waaroor jy behoort na te dink: Is ons pragtige planeet deur ’n intelligente Skepper gemaak wat ’n voorneme met die aarde en met die mense daarop het? ’n Bevredigende antwoord op hierdie vraag kan jou help om te sien wat die toekoms vir ons planeet inhou.

BAIE wetenskaplikes wat ’n deeglike studie van die heelal en ons aarde gemaak het, het bewyse gesien wat dui op die bestaan van ’n Skepper, dat God dit geskep het. Let op die kommentare van net een wetenskaplike:

Professor Paul Davies skryf in The Mind of God: “Die bestaan van ’n ordelike, samehangende heelal wat stabiele, georganiseerde, komplekse strukture bevat, vereis wette en toestande wat baie spesiaal moet wees.”

Nadat professor Davies ’n aantal “toevallighede” bespreek wat astrofisikusse en ander waargeneem het, voeg hy by: “Saam voorsien hulle indrukwekkende getuienis dat die lewe soos ons dit ken op ’n baie sensitiewe manier afhanklik is van die aard van die fisikawette en op party skynbare toevallighede in die werklike waardes wat die natuur gekies het vir verskeie deeltjiemassas, kragsterktes, ensovoorts. . . . Dit is voldoende om te sê dat, as ons God kon speel en ’n stel knoppe kon draai om na willekeur waardes te kies vir hierdie hoeveelhede, sou ons vind dat byna al die knopverstellings die heelal onbewoonbaar sou maak. In party gevalle lyk dit of die verskillende knoppe baie fyn en absoluut presies ingestel moet word vir die heelal om so te wees dat lewe sal floreer. . . . Die feit dat selfs geringe veranderinge aan bestaande waardes die heelal onwaarneembaar kan maak, is beslis baie betekenisvol.”

Wat baie hieruit aflei, is dat ons aarde, saam met die res van die heelal, deur ’n Skepper met ’n voorneme gemaak is. As dít die geval is, moet ons uitvind waarom hy die aarde in die eerste plek geskep het. Ons moet ook vasstel, as ons kan, wat sy voorneme met die aarde is. In hierdie verband kom daar ’n vreemde onreëlmatigheid na vore. Ondanks die wydverspreide gewildheid van ateïsme glo verbasend baie mense nog steeds aan ’n intelligente Skepper. Die meeste kerke van die Christendom praat in naam van ’n almagtige God en Skepper van ons heelal. Maar dit is selde dat enige van hierdie godsdienste met vertroue en oortuiging praat oor watter toekoms die aarde in God se voorneme het.

Wat sê die Bybel?

Dit is logies om jou tot ’n inligtingsbron te wend wat algemeen aanvaar word as iets wat van die Skepper kom. Daardie bron is die Bybel. Een van die eenvoudigste en duidelikste stellings daarin aangaande die toekoms van ons aarde is in Prediker 1:4. Ons lees: “Die een geslag gaan, en die ander geslag kom, en die aarde bly vir ewig staan.” Die Bybel gee ’n duidelike rede waarom Jehovah God die aarde geskep het. Dit toon ook dat hy dit in net die regte posisie in die heelal en in verhouding tot ons son geplaas het om die lewe daarop te onderhou. God, die Almagtige, het die eertydse profeet Jesaja geïnspireer om te skryf: “So sê die HERE, wat die hemele geskape het—Hy is God!—wat die aarde geformeer en dit gemaak het—Hy het dit bevestig; Hy het dit nie geskape om woes te wees nie, maar dit geformeer om bewoon te word—Ek is die HERE, en daar is geen ander nie.”—Jesaja 45:18.

Maar wat van die feit dat die mens die vermoë ontwikkel het om alle lewe op die aarde uit te wis? In God se weergalose wysheid verklaar hy dat hy sal ingryp voordat die mensdom alle lewe op ons planeet kan vernietig. Let op hierdie gerusstellende belofte in die Bybel se laaste boek, Openbaring: “Die nasies se gramskap het ontvlam, en u eie gramskap het gekom, en die vasgestelde tyd vir die dooies om geoordeel te word en om aan u slawe, die profete, en aan die heiliges en aan dié wat u naam vrees, klein en groot, hulle beloning te gee, en om die verderwers van die aarde te verderf.”—Openbaring 11:18.

Jehovah openbaar aan ons wat sy oorspronklike voorneme met die skepping van die aarde was, hierdie juweel in die ruimte, soos ’n ruimtevaarder dit beskryf het toe hy in ’n wentelbaan om die aarde gereis het. Dit was God se voorneme dat dit ’n aardwye paradys moet wees wat deur mense—manne en vroue—bewoon word wat almal in vrede en harmonie saamwoon. Hy het gereël dat die planeet geleidelik bevolk word deur die eerste mensepaar toe te laat om nakomelinge voort te bring. Vir die plesier en genot van die eerste mensepaar het Jehovah ’n klein deeltjie van die aarde met paradystoestande geskep. Namate mensegesinne oor die jare en eeue sou voortplant, sou die tuin van Eden geleidelik uitbrei totdat Genesis 1:28 vervul sou wees: “God het vir hulle gesê: Wees vrugbaar en vermeerder en vul die aarde, onderwerp dit.”

Beteken die treurige toestand van die aarde en sy bewoners wat ons nou sien dat God se oorspronklike voorneme met die aarde misluk het? Of het hy sy voorneme verander en besluit dat hy weens die mensdom se eiesinnigheid die planeet heeltemal tot niet sal laat gaan en as ’t ware weer van voor af sal begin? Nee, ons kan seker wees dat nie een van hierdie situasies die geval is nie. Die Bybel sê vir ons dat wat Jehovah hom ook al voorneem uiteindelik moet gebeur, dat wat hy ook al besluit nie deur enige individu of selfs deur ’n onverwagse verwikkeling in die wiele gery kan word nie. Hy verseker ons: “So sal my woord wees wat uit my mond uitgaan: dit sal nie leeg na My terugkeer nie, maar doen wat My behaag en voorspoedig wees in alles waartoe Ek dit stuur.”—Jesaja 55:11.

God se voorneme is onderbreek, nie verander nie

Met die ontrouheid van Adam en Eva en hulle uitsetting uit die tuin van Eden was dit duidelik dat God se voorneme vir ’n paradysaarde sonder hulle vervul sou word. Jehovah het egter onmiddellik aangedui dat party van hulle nakomelinge sy oorspronklike opdrag sou uitvoer. Dit sou weliswaar tyd neem, selfs baie eeue, maar daar is geen aanduiding van hoeveel tyd daarby betrokke sou wees om die oorspronklike opdrag uit te voer selfs al het beide Adam en Eva in volmaaktheid bly lewe nie. Feit is dat teen die einde van Christus Jesus se Duisendjarige Heerskappy—’n bietjie meer as ’n duisend jaar van nou af—die paradystoestande van Eden oor die hele aarde sal heers en dat die planeet Aarde vol vredeliewende en gelukkige nakomelinge van die eerste mensepaar sal wees. Jehovah se vermoë as ’n onfeilbare Voornemer sal inderdaad vir ewig geregverdig wees!

Dan sal die opwindende profesieë wat God so lank terug geïnspireer het in vervulling gaan. Tekste soos Jesaja 11:6-9 sal ’n glorieryke vervulling hê: “Dan wei die wolf by die lam, en die luiperd gaan lê by die bokkie, en die kalf en die jong leeu en die vetgemaakte vee bymekaar, en ’n klein seuntjie sal hulle aanja. Die koei en die berin wei, en hulle kleintjies lê bymekaar; en die leeu eet strooi soos die os; en die suigling speel by die gat van ’n adder, en die gespeende kind steek sy hand uit na die kuil van ’n basilisk. Hulle sal geen kwaad doen of verderf aanrig op my hele heilige berg nie; want die aarde sal vol wees van die kennis van die HERE soos die waters die seebodem oordek.”

Swak gesondheid en terminale siektes sal tot die verlede behoort, asook die dood self. Kan enigiets duideliker wees as hierdie eenvoudige woorde wat in die laaste boek van die Bybel gevind word? “Die tent van God is by die mense, en hy sal by hulle woon, en hulle sal sy volke wees. En God self sal by hulle wees. En hy sal elke traan van hulle oë afvee, en die dood sal daar nie meer wees nie, en ook verdriet en geskreeu en pyn sal daar nie meer wees nie. Die vorige dinge het verbygegaan.”—Openbaring 21:3, 4.

Ja, ons kan moed skep—ons pragtige planeet Aarde sal bly voortbestaan. Mag dit jou voorreg wees om die einde van hierdie goddelose stelsel van dinge, met al sy gebruike wat die aarde verderf, te oorleef. Die skoon nuwe wêreld wat God gaan bring, is nou op hande. En baie geliefdes sal wakker word uit die dood deur die wonderwerk van die opstanding (Johannes 5:28, 29). Ja, ons aarde sal inderdaad bly voortbestaan, en ons kan daarop bly lewe en dit geniet.