Koninkryksverkondigers berig
“Elke dag op die markplein”
DIE apostel Paulus het van elke geleentheid gebruik gemaak om die Koninkryksboodskap te verkondig. Hy het “in die sinagoge met die Jode . . . en elke dag op die markplein met dié wat daar was” geredeneer om verdienstelikes te vind.—Handelinge 17:17.
Sulke ywer is al sedert die eerste eeu G.J. ’n kenmerk van ware aanbidders van Jehovah (Matteus 28:19, 20). Vandag gebruik Jehovah se Getuies ook ’n verskeidenheid metodes terwyl hulle opregtes van hart ywerig help om tot juiste kennis van die waarheid te kom (1 Timoteus 2:3, 4). Die volgende ondervinding uit Australië lig dit toe.
Sid en Harold maak beurte om vyf dae van die week na ’n klein stalletjie met Bybellektuur by ’n spoorwegstasie in Sydney om te sien. Hulle verkondig die goeie nuus van God se Koninkryk nou al sowat vyf jaar op hierdie manier. Sid, wat 95 jaar oud is, verduidelik: “Toe ek 87 geword het, kon ek nie meer ’n motor bestuur nie. Dit was vir my ’n teleurstelling, want ek het die openbare getuieniswerk geniet. Eendag, terwyl ek naby ’n gewilde toeristeplek met die naam Echo Point in Katoomba was, het ek gesien hoe ’n kunstenaar landskapskilderye verkoop. Ek het lank na die skilderye gekyk en by myself gedink: ‘Ek het mooier prente as dit in my velddienssak—en vir ’n breukdeel van die koste!’ Ek het gevolglik besluit om ’n klein stalletjie by ’n gewilde plek op te rig en vir verbygangers die pragtig geïllustreerde Bybellektuur aan te bied wat deur Jehovah se Getuies versprei word.
“Vier jaar gelede het ek die stalletjie na Sydney verskuif, en Harold het by my aangesluit. Ons maak beurte om na die stalletjie om te sien en saam met ons plaaslike gemeentes te werk.” Harold, wat nou 83 is, sê: “Tussen Maandag en Vrydag is baie min mense by die huis. Deur die Koninkryksboodskap dus op hierdie manier te verkondig, bring dit ons na waar die mense is. Ons kry natuurlik beter resultate. Vir hierdie land versprei ons nogal baie lektuur.”
“Hoewel ons ons stalletjies oor die jare al op vier of vyf verskillende plekke gehad het”, sê Sid, “is dit nie lank voor mense ons ken nie. Party mense kom na ons toe vir lektuur. Ander het vrae wat hulle beantwoord wil hê. En ander wil net vir ’n paar minute gesels. Dit is die enigste tyd wanneer my herbesoeke na my toe kom”, sê hy laggend.
“Baie mense stel werklik in die Bybel belang”, voeg Harold by. “In een maand het vier mense die Bybel saam met die Getuies begin studeer as gevolg van lektuur wat hulle by ons gekry het en die vrae wat ons uit die Bybel kon beantwoord. Sulke ondervindinge moedig ons baie aan.”
Soos Sid en Harold—en soos die apostel Paulus—gebruik Jehovah se Getuies waar hulle ook al is elke moontlike manier om hulle lewensbelangrike boodskap bekend te maak. Gevolglik word die “goeie nuus” steeds “in die hele bewoonde aarde” verkondig.—Matteus 24:14.