Die Groot Pottebakker en sy werk
“[Word] ’n houer vir ’n eervolle doel . . . , toeberei vir elke goeie werk.”—2 TIMOTEUS 2:21.
1, 2. (a) Hoe was God se skepping van die man en vrou ’n uitsonderlike werk? (b) Met watter doel het die Groot Pottebakker Adam en Eva geskep?
JEHOVAH is die Groot Pottebakker. Ons eerste ouer, Adam, was ’n meesterstuk van sy skepping. Die Bybel sê vir ons: “Die HERE God het die mens geformeer uit die stof van die aarde en in sy neus die asem van die lewe geblaas. So het dan die mens ’n lewende siel geword”, dit wil sê ’n “skepsel wat asemhaal” (Genesis 2:7, voetnoot in NW). Die eerste menseskepping was volmaak, geskep na die beeld van God, wat ’n blyk is van Sy Goddelike wysheid en liefde vir ware regverdigheid en geregtigheid.
2 God het uit Adam se rib ’n komplement en helper vir die man gemaak—die vrou. Die volmaakte skoonheid van Eva het selfs die prag van die aantreklikste vrou van ons dag in die skadu gestel (Genesis 2:21-23). Daarbenewens is die eerste mensepaar ’n liggaam en vermoëns gegee wat volmaak ontwerp is sodat hulle hulle toegewese werk kon doen om hierdie aarde ’n paradys te maak. Hulle is ook die vermoë gegee om God se bevel in Genesis 1:28 uit te voer: “Wees vrugbaar en vermeerder en vul die aarde, onderwerp dit en heers oor die visse van die see en die voëls van die hemel en oor al die diere wat op die aarde kruip.” Uiteindelik sou hierdie wêreldwye tuin deur miljarde gelukkige mense bewoon gewees het, verenig in die soort liefde wat “’n volmaakte band van eenheid” is.—Kolossense 3:14.
3. Hoe het ons eerste ouers houers vir ’n oneervolle doel geword, en met watter gevolg?
3 Ongelukkig het ons eerste ouers moedswillig besluit om teen die gesag van hulle Soewereine Skepper, die Groot Pottebakker, in opstand te kom. Hulle weg het ooreengekom met wat in Jesaja 29:15, 16 beskryf word: “Wee hulle wat planne diep verberg vir die HERE, wie se werk in duisternis plaasvind; en hulle sê: Wie sien ons en wie ken ons? . . . Moet die pottebakker beskou word as klei, dat die maaksel van sy maker kan sê: Hy het my nie gemaak nie, en die vormsel van sy vormer kan sê: Hy het geen verstand nie?” Hulle ongehoorsaamheid het rampspoedige gevolge gehad—hulle is tot ewige dood veroordeel. Wat meer is, die hele mensdom wat hulle voortgebring het, het sonde en die dood geërf (Romeine 5:12, 18). Die prag van die Groot Pottebakker se skepping is erg geskend.
4. Vir watter eervolle doel kan ons gebruik word?
4 Ons kan egter selfs in ons huidige onvolmaakte toestand as nakomelinge van die sondige Adam Jehovah met die woorde van Psalm 139:14 loof: “Ek loof U, omdat ek so vreeslik wonderbaar is; wonderbaar is u werke! En my siel weet dit alte goed.” Maar hoe jammer is dit tog dat die Groot Pottebakker se oorspronklike handewerk so ernstig geskend is!
Die Pottebakker brei sy werk uit
5. Hoe sou die Groot Pottebakker se vaardigheid gebruik word?
5 Gelukkig sou ons Skepper sy vaardigheid as ’n Pottebakker vir baie meer as net die aanvanklike skepping van die mensdom gebruik. Die apostel Paulus sê vir ons: “O mens, wie is jy dan tog om God terug te antwoord? Sal dit wat gevorm is vir hom wat dit gevorm het, sê: ‘Waarom het jy my so gemaak?’ Wat? Het die pottebakker nie die gesag oor die klei om uit dieselfde klomp een voorwerp vir ’n eervolle gebruik en ’n ander vir ’n oneervolle gebruik te maak nie?”—Romeine 9:20, 21.
6, 7. (a) Hoe kies baie vandag om vir oneer gevorm te word? (b) Hoe word die regverdiges vir ’n eervolle gebruik gevorm?
6 Ja, van die Groot Pottebakker se werk sal vir ’n eervolle gebruik gevorm word en ander vir ’n oneervolle gebruik. Diegene wat kies om met die wêreld saam te gaan terwyl dit al hoe dieper in die moeras van goddeloosheid wegsink, word op ’n wyse gevorm wat hulle vir vernietiging sal merk. Wanneer die glorieryke Koning, Christus Jesus, kom om oordeel te voltrek, sal sulke oneervolle voorwerpe alle hardnekkige bokagtige mense insluit wat, soos Matteus 25:46 sê, “sal weggaan, die ewige afsnyding in”. Maar skaapgeaarde “regverdiges”, diegene wat gevorm is vir ’n “eervolle” gebruik, sal “die ewige lewe” beërf.
7 Hierdie regverdiges het hulle nederig aan God se vorming onderwerp. Hulle het God se weg van die lewe betree. Hulle het die raad in 1 Timoteus 6:17-19 aanvaar: ‘Moenie julle hoop op onsekere rykdom vestig nie, maar op God, wat ons alles ryklik vir ons genot verskaf’. Hulle het hulle daarop toegelê “om goed te doen, om ryk te wees in voortreflike werke, om vrygewig te wees, mededeelsaam, en vir hulleself ’n voortreflike fondament vir die toekoms as ’n skat veilig weg te lê, sodat hulle ’n stewige houvas op die werklike lewe kan kry”. Hulle word deur Goddelike waarheid gevorm en beoefen onwrikbare geloof in Jehovah se voorsiening deur Christus Jesus, wat “homself as ’n ooreenstemmende losprys . . . gegee het”, sodat alles wat deur Adam se sonde verloor is, herstel kon word (1 Timoteus 2:6). Hoe gewillig moet ons dus tog nie wees nie om gehoor te gee aan Paulus se raad om ons “met die nuwe persoonlikheid [te beklee], wat deur juiste kennis nuut gemaak [gevorm] word na die beeld van die Een wat dit geskep het”!—Kolossense 3:10.
Watter soort houer sal jy wees?
8. (a) Wat bepaal watter soort houer ’n mens word? (b) Watter twee faktore bepaal hoe ’n mens gevorm word?
8 Wat bepaal watter soort houer ’n mens word? Sy gesindheid en gedrag. Dit word eerstens deur die begeertes en neigings van die hart gevorm. Wyse koning Salomo het gesê: “Die hart van die mens dink sy weg uit, maar die HERE rig sy voetstappe” (Spreuke 16:9). Tweedens word dit gevorm deur die dinge wat ons hoor en sien, ons omgang en ondervindinge. Hoe belangrik is dit derhalwe dat ons ag slaan op die raad: “Gaan met die wyse om, dan word jy wys; maar hy wat met dwase verkeer, versleg” (Spreuke 13:20). Soos 2 Petrus 1:16 ons waarsku, moet ons nie “kunstig versinde valse stories”, of volgens Knox se Rooms-Katolieke vertaling, “fabels wat deur mense verdig is”, volg nie. Dit sluit baie van die afvallige Christendom se leringe en feeste in.
9. Hoe kan ons gunstig reageer op die manier waarop die Groot Pottebakker ons vorm?
9 Na aanleiding van hoe ons reageer, kan God ons dan vorm. Ons kan Dawid se gebed nederig voor Jehovah herhaal: “Deurgrond my, o God, en ken my hart; toets my en ken my gedagtes; en kyk of daar by my ’n weg is van smart, en lei my op die ewige weg!” (Psalm 139:23, 24). Jehovah sien toe dat die Koninkryksboodskap verkondig word. Ons hart het met waardering gereageer op die goeie nuus en op die verdere leiding wat hy voorsien. Deur sy organisasie gee hy ons verskeie voorregte in verband met die verkondiging van die goeie nuus; laat ons hierdie voorregte aangryp en koester.—Filippense 1:9-11.
10. Hoe moet ons ons inspan om geestelike programme te volg?
10 Dit is van die allergrootste belang dat ons voortdurend aan God se Woord aandag skenk deur ’n daaglikse program van Bybellees te volg en om gereeld oor die Skrif asook Jehovah se diens in ons gesinne en onder ons vriende te gesels. Die program van oggendaanbidding by die ontbyttafel in elke Bethelgesin en sendinghuis van Jehovah se Getuies sluit gewoonlik al om die week ’n kort leesgedeelte uit die Bybel of die huidige jaarboek in. Kan julle gesin ’n soortgelyke reëling hê? Watter voordele put ons tog ook uit ons omgang in die Christengemeente, uit ons vergaderinge en veral uit ons deelname aan die weeklikse Wagtoring-studie!
Gevorm om beproewinge die hoof te bied
11, 12. (a) Hoe kan ons Jakobus se raad oor beproewinge in ons daaglikse lewe toepas? (b) Hoe spoor Job se ondervinding ons aan om ons onkreukbaarheid te handhaaf?
11 God laat toe dat daar in ons daaglikse lewe sekere situasies ontstaan, waarvan party dalk vir ons moeilik is. Hoe moet ons dit beskou? Laat ons, volgens die raad in Jakobus 4:8, nooit verbitterd raak nie, maar nader aan God kom en met ons hele hart op hom vertrou, met die vaste oortuiging dat ‘hy nader aan ons sal kom namate ons nader aan hom kom’. Ons sal weliswaar ontberinge en beproewinge moet verduur, maar dit word toegelaat omdat dit tot ons vorming bydra en die uiteindelike resultaat vreugde sal meebring. Jakobus 1:2, 3 gee ons die versekering: “Ag dit louter vreugde, my broers, wanneer julle verskillende beproewinge teëkom, aangesien julle weet dat hierdie beproefde hoedanigheid van julle geloof volharding bewerk.”
12 Jakobus sê ook: “Laat niemand, wanneer hy beproef word, sê: ‘Ek word deur God beproef’ nie. Want met bose dinge kan God nie beproef word nie en beproef hy self ook niemand nie. Maar elkeen word beproef deurdat hy deur sy eie begeerte meegesleep en verlok word” (Jakobus 1:13, 14). Ons sal dalk verskeie beproewinge moet verduur, maar soos in die geval van Job speel hulle almal ’n rol in ons vorming. Watter wonderlike versekering gee die Skrif ons in Jakobus 5:11: “Kyk! Ons noem dié wat volhard het gelukkig. Julle het gehoor van die volharding van Job en het gesien hoe Jehovah dit laat afloop het, dat Jehovah baie teer in geneentheid en barmhartig is.” Mag ons as houers in die hande van die Groot Pottebakker ons onkreukbaarheid ten alle tye handhaaf, met vertroue soos dié van Job in hoe sake sal afloop!—Job 2:3, 9, 10; 27:5; 31:1-6; 42:12-15.
Hoe ons ons kinders kan vorm
13, 14. (a) Wanneer moet ouers hulle kinders begin vorm, en met watter doelwit in gedagte? (b) Watter goeie voorbeelde kan jy meld?
13 Ouers kan ook ’n aandeel daaraan hê om hulle kinders al van kleintyd af te help vorm, en watter uitstekende handhawers van onkreukbaarheid kan ons jongmense tog word! (2 Timoteus 3:14, 15). Dit was al die geval selfs wanneer hulle voor ernstige toetse te staan gekom het. ’n Paar jaar gelede, toe die vervolging in een Afrikaland op sy ergste was, het ’n betroubare gesin in die geheim Die Wagtoring in ’n buitegebou op hulle werf gedruk. Eendag het soldate in die straat afgekom en van huis tot huis gegaan op soek na jong manne wat hulle vir die leër kon werf. Daar was nog tyd vir die twee jong seuns in hierdie gesin om weg te kruip, maar dan sou die soldate beslis die drukpers vind wanneer hulle die huis deursoek het. Die hele gesin kon as gevolg hiervan gemartel of moontlik selfs doodgemaak word. Wat kon hulle doen? Die twee seuns het Johannes 15:13 moedig aangehaal: “Niemand het groter liefde as dít nie, dat iemand ten behoewe van sy vriende van sy siel afstand doen.” Hulle het daarop aangedring om in die voorhuis te bly. Die soldate sou hulle vind en hulle ongetwyfeld wreed martel of selfs doodmaak wanneer hulle geweier het om by die leër aan te sluit. Maar dan sou hulle nie verder soek nie. Die drukpers en die ander gesinslede sou gespaar word. Iets merkwaardigs het egter toe gebeur. Die soldate het hierdie een huis oorgeslaan en na die ander gegaan! Daardie menslike houers wat vir ’n eervolle doel gevorm is, sowel as die drukpers, het behoue gebly en kon voortgaan om tydige geestelike voedsel te druk. Een van die twee seuns en sy suster dien nou by Bethel; hy doen nog steeds drukwerk op die ou pers.
14 Kinders kan geleer word hoe om te bid, en God verhoor hulle gebede. ’n Uitsonderlike voorbeeld hiervan is in die slagting in Rwanda gesien. Toe rebelle gereed was om ’n sesjarige dogtertjie en haar ouers met ’n handgranaat tereg te stel, het sy hardop en vurig gebid dat hulle gespaar moet word sodat hulle kan voortgaan om Jehovah te dien. Die voornemende moordenaars is beweeg om hulle lewens te spaar en het gesê: “Ons kan julle weens hierdie dogtertjie nie doodmaak nie.”—1 Petrus 3:12.
15. Teen watter verderflike invloede het Paulus gewaarsku?
15 Die meeste van ons jongmense hoef nie situasies te bowe te kom wat so moeilik is soos dié wat hierbo beskryf word nie, maar daar is baie toetse waarvoor hulle vandag by die skool en in verdorwe gemeenskappe te staan kom: vuil taal, pornografie, verdorwe vermaak en druk van portuurs om verkeerd te doen, is in talle plekke aan die orde van die dag. Die apostel Paulus het herhaaldelik teen hierdie invloede gewaarsku.—1 Korintiërs 5:6; 15:33, 34; Efesiërs 5:3-7.
16. Hoe kan ’n mens ’n houer vir eervolle gebruik word?
16 Nadat Paulus verwys het na houers wat “vir ’n eervolle doel, maar ander vir ’n oneervolle doel” gehou word, sê hy: “As iemand dus van laasgenoemdes wegbly, sal hy ’n houer vir ’n eervolle doel wees, geheilig, nuttig vir sy eienaar, toeberei vir elke goeie werk.” Laat ons ons jongmense dus aanmoedig om op hulle omgang te let. Laat hulle ‘vlug vir die begeertes wat eie is aan die jeug, maar regverdigheid, geloof, liefde, vrede nastreef, saam met dié wat die Here uit ’n rein hart aanroep’ (2 Timoteus 2:20-22). ’n Gesinsprogram om “mekaar op te bou”, kan van onskatbare waarde wees om ons jongmense te vorm (1 Tessalonisense 5:11; Spreuke 22:6). Daaglikse Bybellees en -studie met behulp van gepaste publikasies van die Genootskap kan ’n uitstekende hulpmiddel wees.
Ons almal word gevorm
17. Hoe sal dissipline ons vorm, en wat sal die vreugdevolle uiteinde daarvan wees?
17 Jehovah gee ons in sy Woord en deur sy organisasie raad om ons te vorm. Moet jou nooit teen sulke raad van God af verset nie! Reageer verstandig daarop, en laat dit jou vir eervolle gebruik deur Jehovah vorm. Spreuke 3:11, 12 spoor ons aan: “My seun, verag die tug van die HERE nie, en laat sy kastyding nie jou weersin wek nie, want die HERE tugtig hom wat Hy liefhet, ja, soos ’n vader die seun in wie hy behae het.” Nog vaderlike raad word in Hebreërs 12:6-11 gegee: “Jehovah dissiplineer hom wat hy liefhet . . . Geen dissipline lyk weliswaar op die oomblik vreugdevol nie, maar bedroewend; tog lewer dit later vir dié wat daardeur geoefen is vreedsame vrug op, naamlik regverdigheid.” Die hoofkanaal vir sulke dissipline moet God se geïnspireerde Woord wees.—2 Timoteus 3:16, 17.
18. Wat leer ons in Lukas hoofstuk 15 oor berou?
18 Jehovah is ook barmhartig (Exodus 34:6). Wanneer iemand opregte berou toon oor selfs die ernstigste sonde, vergewe hy daardie persoon. Selfs hedendaagse ‘verlore seuns’ kan in houers vir ’n eervolle gebruik gevorm word (Lukas 15:22-24, 32). Ons sondes is miskien nie so ernstig soos dié van die verlore seun nie. Maar as ons skriftuurlike raad nederig aanvaar, sal dit altyd daartoe lei dat ons gevorm word om houers vir eervolle gebruik te wees.
19. Hoe kan ons voortgaan om as eervolle houers in Jehovah se hande te dien?
19 Toe ons aanvanklik die waarheid geleer het, was ons gewillig om deur Jehovah gevorm te word. Ons het wêreldse weë laat vaar, ons met die nuwe persoonlikheid begin beklee en toegewyde en gedoopte Christene geword. Ons was gehoorsaam aan die raad in Efesiërs 4:20-24 en het ‘die ou persoonlikheid afgelê, wat met ons vroeëre lewenswandel ooreengekom het, met sy bedrieglike begeertes, en het ons met die nuwe persoonlikheid beklee wat na God se wil in ware regverdigheid en lojaliteit geskep is’. Mag ons persoonlik voortgaan om vormbaar te wees in die hande van Jehovah, die Groot Pottebakker, en altyd as houers vir sy eervolle gebruik te dien!
Ter hersiening
◻ Wat is die Groot Pottebakker se voorneme met ons aarde?
◻ Hoe kan jy vir ’n eervolle gebruik gevorm word?
◻ Hoe kan ons kinders gevorm word?
◻ Hoe moet ons dissipline beskou?
[Prent op bladsy 10]
Sal jy vir ’n eervolle gebruik gevorm word of verwerp word?
[Prent op bladsy 12]
Kinders kan van kleintyd af gevorm word