Ons skat in erdehouers
“Ons het . . . hierdie skat in erdehouers, sodat die krag wat bo die normale is God s’n kan wees en nie dié uit onsself nie.”—2 KORINTIËRS 4:7.
1. Hoe moet Jesus se voorbeeld ons aanmoedig?
TERWYL Jesus hier op die aarde deur Jehovah gevorm is, het hy self ondervind hoe broos die mens is. Hoe moet sy voorbeeld van onkreukbaarheid ons tog nie bemoedig nie! Die apostel sê vir ons: “Trouens, tot hierdie weg is julle geroep, omdat ook Christus vir julle gely het en vir julle ’n voorbeeld gelaat het sodat julle sy voetstappe noukeurig kan volg” (1 Petrus 2:21). Jesus het die wêreld oorwin omdat hy hom aan sulke vorming onderwerp het. Hy het ook sy apostels aangemoedig om oorwinnaars te word (Handelinge 4:13, 31; 9:27, 28; 14:3; 19:8). En watter kragtige aanmoediging het hy hulle tog aan die einde van sy laaste gesprek met hulle gegee! Hy het gesê: “Ek het hierdie dinge vir julle gesê sodat julle deur middel van my vrede kan hê. In die wêreld het julle verdrukking, maar skep moed! Ek het die wêreld oorwin.”—Johannes 16:33.
2. Watter verligting geniet ons in teenstelling met die wêreld se blindheid?
2 Nadat die apostel Paulus die blindheid wat “die god van hierdie stelsel van dinge” veroorsaak het teenoor “die verligting van die heerlike goeie nuus” gestel het, het hy eweneens aangaande ons kosbare bediening gesê: “Ons het . . . hierdie skat in erdehouers, sodat die krag wat bo die normale is God s’n kan wees en nie dié uit onsself nie. Ons word in elke opsig geknel, maar nie só vasgekeer dat ons nie kan beweeg nie; ons is raadop, maar nie heeltemal sonder uitweg nie; ons word vervolg, maar nie in die steek gelaat nie; ons word neergewerp, maar nie vernietig nie” (2 Korintiërs 4:4, 7-9). Hoewel ons brose “erdehouers” is, het God ons op so ’n wyse deur sy gees gevorm dat ons heeltemal seëvierend oor Satan se wêreld kan wees.—Romeine 8:35-39; 1 Korintiërs 15:57.
Die vorming van eertydse Israel
3. Hoe het Jesaja die vorming van die Joodse nasie beskryf?
3 Jehovah vorm nie net individue nie, maar ook hele nasies. Toe eertydse Israel hulle byvoorbeeld aan Jehovah se vorming onderwerp het, het hulle gefloreer. Maar uiteindelik het hulle in ’n weg van ongehoorsaamheid verstok geraak. As gevolg hiervan het Israel se Formeerder “wee” oor hulle gebring (Jesaja 45:9). In die agtste eeu v.G.J. het Jesaja oor Israel se growwe sondigheid met Jehovah gepraat en gesê: “HERE, U is ons Vader; ons is die klei, en U is ons Formeerder, en ons almal is die werk van u hand. . . . Al wat vir ons dierbaar was, het ’n puinhoop geword” (Jesaja 64:8-11). Israel is in ’n houer gevorm wat slegs vir vernietiging geskik was.
4. Watter illustrasie het Jeremia deur sy dade uitgebeeld?
4 ’n Eeu later, terwyl die dag van afrekening nader gekom het, het Jehovah vir Jeremia gesê om ’n erdekruik te neem en saam met sommige van Jerusalem se oudstes na die dal van Hinnom te gaan, en hom beveel: “Jy [moet] die kruik breek voor die oë van die manne wat saam met jou gegaan het, en vir hulle sê: So spreek die HERE van die leërskare: Net so sal Ek hierdie volk en hierdie stad verbreek, soos ’n mens ’n erdepot breek, wat nie meer heelgemaak kan word nie.”—Jeremia 19:10, 11.
5. Hoe verreikend was Jehovah se oordeel teen Israel?
5 In 607 v.G.J. het Nebukadnesar Jerusalem en sy tempel vernietig en die oorlewende Jode in ballingskap na Babilon weggevoer. Maar ná 70 jaar in ballingskap kon berouvolle Jode terugkeer om Jerusalem en sy tempel te herbou (Jeremia 25:11). Maar teen die eerste eeu G.J. het die nasie die Groot Pottebakker weer verlaat, en uiteindelik het hulle die laakbaarste misdaad denkbaar gepleeg toe hulle God se eie Seun vermoor het. In 70 G.J. het God die Romeinse Wêreldmoondheid as sy skerpregter gebruik om die Joodse stelsel van dinge uit te wis en Jerusalem en sy tempel te vernietig. Die nasie Israel sou nooit weer deur Jehovah se hand as iets ‘heiligs en heerliks’ gevorm word nie.a
Die vorming van ’n geestelike nasie
6, 7. (a) Hoe beskryf Paulus die vorming van geestelike Israel? (b) Wat is die volle getal waaruit die “voorwerpe van barmhartigheid” bestaan, en hoe is dit saamgestel?
6 Jode wat Jesus aanvaar het, is as die eerste lede van ’n nuwe nasie, die geestelike “Israel van God”, gevorm (Galasiërs 6:16). Paulus se woorde is dus gepas: ‘Wat? Het die pottebakker nie die gesag oor die klei om uit dieselfde klomp een voorwerp vir ’n eervolle gebruik en ’n ander vir ’n oneervolle gebruik te maak nie? God, hoewel hy sy gramskap wil toon en sy krag bekend wil maak, het voorwerpe van gramskap, wat vir vernietiging geskik gemaak is, met groot lankmoedigheid geduld, sodat hy die rykdom van sy heerlikheid oor voorwerpe van barmhartigheid bekend kon maak, wat hy vooraf berei het vir heerlikheid.’—Romeine 9:21-23.
7 Die verrese Jesus het later bekend gemaak dat hierdie “voorwerpe van barmhartigheid” 144 000 sou wees (Openbaring 7:4; 14:1). Aangesien natuurlike Israel nie daardie volle getal voorsien het nie, het Jehovah ook sy barmhartigheid aan mense van die nasies bewys (Romeine 11:25, 26). Die jong Christengemeente het vinnig gegroei. Binne 30 jaar is die goeie nuus “verkondig . . . in die hele skepping wat onder die hemel is” (Kolossense 1:23). Dit het vereis dat daar behoorlik toesig gehou moes word oor talle gemeentes wat wyd en syd versprei was.
8. Wie het die eerste bestuursliggaam uitgemaak, en hoe het hierdie liggaam ontwikkel?
8 Jesus het 12 apostels voorberei om die eerste bestuursliggaam te word en hulle sowel as ander vir die bediening opgelei (Lukas 8:1; 9:1, 2; 10:1, 2). Op Pinkster 33 G.J. is die Christengemeente gestig, en met verloop van tyd is die bestuursliggaam vergroot sodat dit “die apostels en ouer manne in Jerusalem” ingesluit het. Jesus se halfbroer Jakobus het blykbaar lank as voorsitter gedien, al was hy nie ’n apostel nie (Handelinge 12:17; 15:2, 6, 13; 21:18). Volgens die geskiedskrywer Eusebius het die apostels spesiale teikens van vervolging geword en is hulle na ander gebiede verstrooi. Die samestelling van die bestuursliggaam is dienooreenkomstig aangepas.
9. Watter ongelukkige verloop van gebeure het Jesus voorspel?
9 Teen die einde van die eerste eeu het ‘die vyand, die Duiwel’, “onkruid” tussen die koringagtige erfgename van “die koninkryk van die hemele” begin saai. Jesus het voorspel dat hierdie ongelukkige verloop van gebeure tot die oestyd in “die voleinding van die stelsel van dinge” toegelaat sou word. Dan sou “die regverdiges [weer] so helder soos die son skyn in die koninkryk van hulle Vader” (Matteus 13:24, 25, 37-43). Wanneer sou dit gebeur?
Die vorming van die Israel van God in ons dag
10, 11. (a) Hoe het die hedendaagse vorming van die Israel van God begin? (b) Hoe het die leringe van die Christendom en dié van die ernstige Bybelstudente verskil?
10 In 1870 het Charles Taze Russell ’n Bybelstudiegroep in Pittsburgh, Pennsilvanië, VSA, gevorm. In 1879 het hy die tydskrif wat vandag as Die Wagtoring bekend staan maandeliks begin publiseer. Hierdie Bybelstudente, soos hulle mettertyd genoem is, het gou besef dat die Christendom onskriftuurlike, heidense leringe, soos die onsterflikheid van die siel, die helse vuur, die vaevuur, ’n Drie-enige god en kinderdoop, aangeneem het.
11 Maar van groter belang is die feit dat hierdie liefhebbers van Bybelwaarheid teruggekeer het na die grondleringe van die Bybel, soos verlossing deur Jesus se losprysofferande en die opstanding tot ewige lewe in ’n vreedsame paradysaarde onder God se Koninkryk. Daar is bowenal klem gelê op die naderende regverdiging van Jehovah God as die Soewereine Heer van die heelal. Die Bybelstudente het geglo dat die tyd ophande was vir die Gebed van die Here om verhoor te word: “Ons Vader in die hemele, laat u naam geheilig word. Laat u koninkryk kom. Laat u wil geskied, soos in die hemel, so ook op die aarde” (Matteus 6:9, 10). Hulle is deur God se heilige gees in ’n wêreldwye gemeenskap van vredeliewende Christene gevorm.
12. Hoe het die Bybelstudente ’n belangrike jaartal onderskei?
12 ’n Deeglike studie van Daniël hoofstuk 4 en ander profesieë het die Bybelstudente daarvan oortuig dat Jesus se teenwoordigheid as die Messiaanse Koning op hande moes wees. Hulle het onderskei dat 1914 die jaar sou wees wanneer “die vasgestelde tye van die nasies” sou eindig (Lukas 21:24; Esegiël 21:26, 27). Die Bybelstudente het hulle bedrywighede vinnig uitgebrei en dwarsoor die Verenigde State Bybelklasse gevorm (wat later gemeentes genoem is). Teen die begin van die eeu het hulle Bybelonderrigtingswerk tot in Europa en Australasië uitgebrei. Goeie organisasie het nodig geword.
13. Watter wetlike status het die Bybelstudente verkry, en watter voortreflike diens het die Genootskap se eerste president gelewer?
13 Om die Bybelstudente wetlike status te gee, is Zion’s Watch Tower Tract Society in 1884 in die Verenigde State geregistreer, met die hoofkwartier in Pittsburgh, Pennsilvanië. Die direkteurs daarvan het as ’n sentrale Bestuursliggaam gedien en oor die wêreldwye verkondiging van God se Koninkryk toesig gehou. Die Genootskap se eerste president, Charles T. Russell, het ses dele van Studies in the Scriptures geskryf en lang predikingsreise onderneem. Hy het ook die fortuin wat hy gemaak het voordat hy met sy Bybelstudies begin het aan die wêreldwye Koninkrykswerk geskenk. In 1916, terwyl die Groot Oorlog in Europa gewoed het, het ’n uitgeputte broer Russell gedurende ’n predikingsreis gesterf. Hy het alles opgeoffer ten behoewe van die uitbreiding van die verkondiging van God se Koninkryk.
14. Hoe het J. F. Rutherford “die voortreflike stryd gestry”? (2 Timoteus 4:7).
14 Joseph F. Rutherford, wat vir ’n tydjie ’n regter in Missouri was, het die volgende president geword. Omdat hy ’n onbevreesde voorstander van Bybelwaarheid was, het die Christendom se geestelikes en politici saamgespan om ‘moeilikheid deur verordening te beraam’. Op 21 Junie 1918 is broer Rutherford en sewe ander vername Bybelstudente met veelvuldige samelopende vonnisse van 10 of 20 jaar in die tronk gesit. Die Bybelstudente het hulleself verdedig (Psalm 94:20, NW; Filippense 1:7). Nadat hulle appèl aangeteken het, is hulle op 26 Maart 1919 vrygelaat en later heeltemal van die valse aanklag van sedisie vrygespreek.b Hierdie ondervinding het hulle onwrikbare voorstanders van die waarheid gemaak. Met Jehovah se hulp het hulle alles in hulle vermoë gedoen om oorwinnaars te wees in die geestelike stryd om die goeie nuus ondanks die teenstand van Babilon die Grote te verkondig. Daardie stryd word nog steeds tot in hierdie jaar, 1999, gevoer.—Vergelyk Matteus hoofstuk 23; Johannes 8:38-47.
15. Waarom was die jaar 1931 van geskiedkundige belang?
15 Gedurende die twintiger- en dertigerjare is die gesalfde Israel van God nog steeds onder leiding van die Groot Pottebakker gevorm. Profetiese lig uit die Skrif het opgegaan, wat Jehovah verheerlik en die aandag op Jesus se Messiaanse Koninkryk gevestig het. In 1931 het die Bybelstudente hulle verheug om die nuwe naam, Jehovah se Getuies, aan te neem.—Jesaja 43:10-12; Matteus 6:9, 10; 24:14.
16. Wanneer is die volle getal van die 144 000 gevul, en watter bewyse is daar hiervan? Sien ook venster op bladsy 19.
16 In die dertigerjare het dit gelyk of die getal “geroepenes en uitverkorenes en getroues”, die 144 000, gevul was. (Openbaring 17:14; sien venster op bladsy 19.) Ons weet nie hoeveel gesalfdes in die eerste eeu en tussen die “onkruid” gedurende die donker eeue van die Christendom se groot afvalligheid ingesamel is nie. Maar in 1935 was daar wêreldwyd altesaam 52 465, uit ’n verkondigerhoogtepunt van 56 153, wat getoon het dat hulle ’n hemelse hoop het deur van die Gedenkmaalembleme te gebruik. Wat sou die vooruitsig wees van die talle wat nog ingesamel moes word?
“Kyk! ’n groot skare”
17. Watter geskiedkundige gebeurtenis het in 1935 plaasgevind?
17 By ’n byeenkoms wat van 30 Mei tot 3 Junie 1935, in Washington, DC, VSA, gehou is, het broer Rutherford ’n epogmakende toespraak “Die groot menigte” gehou.c Hierdie groep, “wat geen mens kon tel nie”, sou verskyn wanneer die verseëling van die 144 000 lede van geestelike Israel ten einde loop. Hulle sou ook geloof in die loskoopkrag van “die bloed van die Lam”, Jesus, beoefen en heilige diens in Jehovah se tempelreëling vir aanbidding verrig. As ’n groep sal hulle lewend “uit die groot verdrukking kom” en die aardse Paradys beërf waar ‘die dood nie meer sal wees nie’. Etlike jare voor daardie byeenkoms is daar na hierdie groep as die Jonadabs verwys.—Openbaring 7:9-17; 21:4; Jeremia 35:10.
18. In watter opsigte was die jaar 1938 deurslaggewend?
18 Die jaar 1938 was deurslaggewend vir die duidelike identifisering van die twee klasse. The Watchtower van 15 Maart en 1 April 1938 het die tweeledige studie “Sy kudde” bevat en het die relatiewe posisies van die gesalfde oorblyfsel en hulle metgeselle, die groot skare, uiteengesit. Daarna het die nommers van 1 en 15 Junie die studieartikels “Organisasie” bevat, wat op Jesaja 60:17 gebaseer is. Alle gemeentes is gevra om die Bestuursliggaam te versoek om plaaslike knegte aan te stel, en sodoende is ’n verbeterde, teokratiese reëling wat deur God ingestel is tot stand gebring. Dit is toe ook wat die gemeentes gedoen het.
19. Watter feite bevestig dat die algemene insameling van die “ander skape” nou al meer as 60 jaar aan die gang is? Sluit voetnoot in.
19 Die verslag in die 1939 Yearbook of Jehovah’s Witnesses het gesê: “Die gesalfde volgelinge van Christus Jesus wat nou op die aarde is, is klein in getal, en hulle getal sal nooit groter wees nie. In die Skrif word hulle “die oorblywendes” van die nageslag van Sion, God se organisasie, genoem (Op. 12:17). Die Here samel nou vir homself sy ‘ander skape’ in, wat die ‘groot menigte’ sal uitmaak (Joh. 10:16). Diegene wat nou ingesamel word, is metgeselle van die oorblyfsel en werk saam met die oorblyfsel. Van nou af sal diegene wat die ‘ander skape’ uitmaak in getal toeneem totdat die ‘groot menigte’ ingesamel is.” Die gesalfde oorblyfsel is verfyn, oftewel gevorm, sodat hulle na die insameling van die groot skare kon omsien. Húlle moet ook nou op ’n soortgelyke wyse gevorm word.d
20. Watter organisatoriese veranderinge het sedert 1942 plaasgevind?
20 In Januarie 1942, toe die Tweede Wêreldoorlog op sy ergste was, is Joseph Rutherford oorlede en is hy deur Nathan Knorr as president opgevolg. Die Genootskap se derde president word met liefde onthou omdat hy die teokratiese skole in die gemeentes en die Gileadskool om sendelinge op te lei tot stand gebring het. Tydens die Genootskap se jaarvergadering in 1944 het hy aangekondig dat die Genootskap se handves hersien word sodat lidmaatskap nie op materiële bydraes nie, maar op geestelikheid gebaseer sou word. Gedurende die volgende 30 jaar het die verkondigertal wêreldwyd van 156 299 tot 2 179 256 toegeneem. Gedurende 1971-75 was verdere organisatoriese veranderinge nodig. Een man wat as president dien, kon nie meer behoorlik oor die wêreldwye Koninkrykswerk toesig hou nie. Die Bestuursliggaam, met ’n roterende voorsitter, is tot 18 gesalfde lede vergroot, waarvan byna die helfte vandag reeds hulle aardse loopbaan voltooi het.
21. Wat het lede van die klein kuddetjie geskik gemaak vir die Koninkryk?
21 Die oorblywende lede van die klein kuddetjie is deur baie dekades van beproewinge gevorm. Hulle hou goeie moed, aangesien hulle onmiskenbare ‘getuienis van die gees’ ontvang het. Jesus het vir hulle gesê: “Julle is . . . dié wat in my beproewinge altyddeur by my gebly het; en ek sluit ’n verbond met julle, net soos my Vader ’n verbond met my gesluit het, vir ’n koninkryk, sodat julle aan my tafel in my koninkryk kan eet en drink en op trone kan sit om die twaalf stamme van Israel te oordeel.”—Romeine 8:16, 17; Lukas 12:32; 22:28-30.
22, 23. Hoe word die klein kuddetjie en die ander skape gevorm?
22 Namate die geesgesalfde oorblyfsel op aarde in getal afgeneem het, is geestelike ryp broers van die groot skare geestelike toesig oor byna al die gemeentes regoor die wêreld gegee. En terwyl die laaste bejaarde gesalfde Getuies hulle aardse loopbaan voltooi, is daar vorstelike sa·rimʹ van die ander skape wat goed opgelei word om administratiewe pligte as die vorsteklas op die aarde na te kom.—Esegiël 44:3; Jesaja 32:1.
23 Die klein kuddetjie sowel as die ander skape word nog steeds in voorwerpe vir eervolle gebruik gevorm (Johannes 10:14-16). Hetsy ons op die “nuwe hemele” of op “’n nuwe aarde” hoop, mag ons heelhartig op Jehovah se uitnodiging reageer: “Wees julle bly en juig vir ewig oor wat Ek skep; want kyk, Ek skep [hemelse] Jerusalem om te juig, en sy mense om bly te wees” (Jesaja 65:17, 18). Mag ons as brose mense altyd in nederigheid dien en deur “die krag wat bo die normale is”—God se krag van heilige gees—gevorm word!—2 Korintiërs 4:7; Johannes 16:13.
[Voetnote]
a Laat dit ’n waarskuwing wees vir die afvallige Christendom, wat deur eertydse Israel voorafgeskadu is, dat Jehovah ’n soortgelyke oordeel oor hulle gaan vel.—1 Petrus 4:17, 18.
b Regter Manton, ’n Rooms-Katoliek wat geweier het om die Bybelstudente op borgtog vry te laat, is later self in die tronk gesit nadat daar bevind is dat hy omkoopgeld aanvaar het.
c Die New World Translation of the Christian Greek Scriptures, wat in 1950 vrygestel is, gebruik “groot skare”, aangesien dit ’n beter vertaling van die geïnspireerde Griekse uitdrukking is.
d In 1938 was die wêreldwye Gedenkmaalopkoms 73 420, waarvan 39 225 mense—53 persent van dié wat teenwoordig was—van die embleme gebruik het. Teen 1998 het die bywoningsyfer tot 13 896 312 gestyg, waarvan slegs 8 756 van die embleme gebruik het, ’n gemiddelde van minder as 1 persoon wat van die embleme gebruik het vir elke 10 gemeentes.
Onthou jy?
◻ Hoe was Jesus ons Voorbeeld deurdat hy hom aan sy Vader se vorming onderwerp het?
◻ Watter vorming het in eertydse Israel plaasgevind?
◻ Hoe is “die Israel van God” tot nou toe gevorm?
◻ Met watter doel is die “ander skape” gevorm?
[Venster op bladsy 18]
Verdere vorming in die Christendom
’n Berig van die Associated Press van Atene, Griekeland, het die volgende gesê oor die nuut aangestelde hoof van die Grieks-Ortodokse Kerk: “Hy is veronderstel om ’n boodskapper van vrede te wees. Maar die leier van die Grieks-Ortodokse Kerk klink meer soos ’n generaal wat vir oorlog voorberei.
“‘Ons is bereid om bloed te vergiet en opofferings te maak indien nodig. As ’n kerk bid ons vir vrede . . . Maar ons seën die heilige wapens wanneer die geleentheid dit vereis’, het aartsbiskop Christodoulos onlangs gesê tydens die Maria-Hemelvaartdag, wat ook gevier word as Griekeland se weermagdag.”
[Venster op bladsy 19]
“Geen toevoegings meer nie!”
Tydens ’n Gileadgraduering in 1970 het Frederick Franz, wat destyds die visepresident van die Wagtoringgenootskap was, die studente vertel van die moontlikheid dat hulle, wat almal van die ander skape met ’n aardse hoop was, dalk iemand sal doop wat sê dat hy een van die gesalfde oorblyfsel is. Kan dit gebeur? Wel, hy het verduidelik dat Johannes die Doper een van die ander skape was en dat hy Jesus en van die ander apostels gedoop het. Toe het hy gevra of meer lede van die oorblyfsel nog ingesamel word. “Nee, geen toevoegings meer nie!” het hy gesê. “Daardie oproep het destyds in 1931-35 geëindig! Daar is geen toevoegings meer nie. Wie is dan die paar nuwelinge wat van die Gedenkmaalembleme gebruik? As hulle lede van die oorblyfsel is, is hulle plaasvervangers! Hulle is nie toevoegings tot die geledere van die gesalfdes nie, maar plaasvervangers vir diegene wat moontlik afvallig geword het.”
[Prent op bladsy 15]
Hoe koester ons tog ons diensvoorreg!
[Prent op bladsy 16]
Eertydse Israel het ’n voorwerp geword wat slegs geskik was vir vernietiging