Op soek na betroubare voorspellings

KORT nadat die Masedoniese koning wat as Aleksander die Grote bekend geword het die troon in 336 v.G.J. bestyg het, het hy die orakel van Delphi in die sentrale deel van Griekeland besoek. Sy ambisieuse planne vir die toekoms was om die grootste deel van die wêreld van daardie tyd te verower. Maar hy wou goddelike versekering hê dat sy reusagtige onderneming suksesvol sou wees. Volgens legende was dit op die dag toe hy Delphi besoek het nie toelaatbaar om die orakel te raadpleeg nie. Aangesien Aleksander nie sonder ’n antwoord wou vertrek nie, het hy daarop aangedring dat die priesteres ’n voorspelling maak. Sy het in frustrasie uitgeroep: “O, kind, jy is onoorwinlik!” Die jong koning het dit beskou as ’n gunstige voorteken, wat ’n seëvierende krygstog beloof het.

Maar Aleksander sou baie beter ingelig gewees het oor die uitslag van sy krygstog as hy die profesieë ondersoek het wat in die Bybelboek Daniël gevind word. Met merkwaardige akkuraatheid het dit sy spoedige oorwinnings voorspel. Volgens tradisie het Aleksander wel later die geleentheid gehad om te sien wat Daniël oor hom opgeteken het. Toe die Masedoniese koning Jerusalem binnegegaan het, is hy, volgens die Joodse geskiedskrywer Josefus, Daniël se profesie gewys—heel moontlik hoofstuk 8 van daardie boek (Daniël 8:5-8, 20, 21). Na bewering is die stad as gevolg hiervan deur Aleksander se vernietigende leërs gespaar.

’n Inherente menslike behoefte

Hetsy konings of gewone burgers, in die verlede of in die hede—die mens het nog altyd gevoel dat hy betroubare voorspellings van die toekoms nodig het. As intelligente wesens bestudeer ons as mense die verlede, is ons bewus van die hede en stel ons veral belang in die toekoms. ’n Chinese spreekwoord sê gepas: “Hy wat sake drie dae vooruit kan sien, sal duisende jare lank ryk wees.”

Deur die eeue heen het miljoene probeer uitvind wat die toekoms inhou deur wat hulle as goddelik beskou te raadpleeg. Neem die eertydse Grieke as voorbeeld. Hulle het talle heilige orakels gehad, soos dié van Delphi, Delos en Dodona, waar hulle hulle gode gaan raadpleeg het in verband met politieke of militêre gebeure sowel as private aangeleenthede soos reise, die huwelik en kinders. Nie net konings en militêre leiers nie, maar hele stamme en stadstate het deur middel van hierdie orakels leiding van die geesteryk probeer verkry.

Volgens een professor is daar nou “skielik ’n geweldige toename in organisasies wat hulle op die bestudering van die toekoms toespits”. En tog verkies baie om die enigste akkurate bron van profesieë—die Bybel—te ignoreer. Hulle weier beslis om die moontlikheid te aanvaar dat Bybelprofesieë juis die inligting bevat wat hulle soek. Party geleerdes gaan selfs so ver as om Bybelprofesieë met die voorspellings van eertydse orakels gelyk te stel. En hedendaagse skeptici is gewoonlik bevooroordeeld teen Bybelprofesieë.

Ons nooi jou om self die rekord na te gaan. Wat openbaar ’n sorgvuldige vergelyking van Bybelvoorspellings en menslike orakels? Kan jy Bybelprofesieë meer vertrou as eertydse orakels? En kan jy met sekerheid jou lewe om Bybelprofesieë bou?

[Prent op bladsy 3]

Die Bybel het Aleksander se spoedige oorwinnings voorspel

[Erkenning]

Cortesía del Museo del Prado, Madrid, Spanje

[Prent op bladsy 4]

Aleksander die Grote

[Erkenning]

Musei Capitolini, Roma

[Foto-erkenning op bladsy 2]

VOORBLAD: Generaal Titus en Aleksander die Grote: Musei Capitolini, Roma