Waarom jy bybelprofesieë kan vertrou
KONING PIRROS van Epirus in Noordwes-Griekeland was in ’n langtermynkonflik met die Romeinse Ryk gewikkel. Hy wou baie graag weet wat die afloop daarvan sou wees en het dus die orakel van Delphi geraadpleeg. Maar die antwoord wat hy gekry het, kon op een van die volgende twee maniere verstaan word: (1) “Ek sê dat u, seun van Aiakos, die Romeine kan oorwin. U sal gaan, u sal terugkeer, nooit sal u in die oorlog sneuwel nie.” (2) “Ek sê dat die Romeine u, seun van Aiakos, kan oorwin. U sal gaan, u sal nooit terugkeer nie, u sal in die oorlog sneuwel.” Hy het verkies om die orakel op die eerste manier te verstaan en het derhalwe teen Rome oorlog gevoer. Pirros is totaal verslaan.
Sulke gevalle het eertydse orakels berug gemaak omdat hulle vaag en duister was. Maar wat van Bybelprofesieë? Party kritici beweer dat die profesieë wat in die Bybel gevind word dieselfde as die orakels is. Hierdie kritici voer aan dat Bybelse voorspellings bloot slim voorspellings van toekomstige gebeure deur intelligente en uiters skerpsinnige mense was, gewoonlik van die priesterlike klas. Hierdie manne kon skynbaar, bloot deur ondervinding of danksy hulle invloedryke vriende of familie, die natuurlike ontwikkeling van sekere situasies vooruitsien. Deur die verskillende kenmerke van Bybelprofesieë met dié van orakels te vergelyk, sal ons beter toegerus wees om gepaste gevolgtrekkings te maak.
Die verskille
Die bekendste kenmerk van orakels was hulle dubbelsinnigheid. Die antwoorde wat byvoorbeeld by Delphi voorsien is, is in onverstaanbare geluide uitgespreek. Priesters moes dit dus vertolk en verse skep wat op teenoorgestelde maniere vertolk kon word. ’n Tipiese voorbeeld hiervan is die antwoord wat aan Kroisos, die koning van Lidië, gegee is. Toe hy die orakel geraadpleeg het, is daar vir hom gesê: “As Kroisos die Halis oorsteek, sal hy ’n magtige ryk vernietig.” In werklikheid was die “magtige ryk” wat vernietig is sy eie! Toe Kroisos die Halis oorgesteek het om Kappadosië binne te val, is hy deur Kores die Pers verslaan.
In skerp teenstelling met heidense orakels is Bybelprofesieë bekend vir hulle akkuraatheid en duidelikheid. ’n Goeie voorbeeld is die profesie aangaande die val van Babilon, wat in die Bybelboek Jesaja opgeteken is. Ongeveer 200 jaar voordat hierdie gebeurtenis plaasgevind het, het die profeet Jesaja die omverwerping van Babilon deur Medo-Persië breedvoerig en akkuraat voorspel. Die profesie het geopenbaar dat die veroweraar die naam Kores sou hê, en dit het selfs getoon watter strategie gebruik sou word, naamlik om die gragagtige rivierverdediging te laat opdroog en die versterkte stad deur oop poorte binne te gaan. Dit is alles akkuraat vervul (Jesaja 44:27–45:2). Daar is ook akkuraat voorspel dat Babilon uiteindelik heeltemal onbewoond sou wees.—Jesaja 13:17-22.
Dink ook aan die uitdruklike waarskuwing wat deur die profeet Jona gegee is: “Nog veertig dae, dan word Nineve verwoes” (Jona 3:4). Dit bevat geen dubbelsinnigheid nie! Die boodskap was so treffend en duidelik dat die mense van Nineve onmiddellik ‘in God geglo en ’n vasdag uitgeroep het, en hulle met rougewaad beklee het’. As gevolg van die Nineviete se berou het Jehovah nie op daardie tyd onheil oor hulle gebring nie.—Jona 3:5-10.
Orakels is as ’n middel tot politieke invloed gebruik. Heersers en militêre leiers het dikwels die vertolking aangehaal waarvan hulle gehou het om hulle eie persoonlike belange en ondernemings te bevorder en dit sodoende onder ’n “goddelike mantel” aangebied. Maar God se profetiese boodskappe is sonder inagneming van persoonlike oorwegings gegee.
Ter toeligting: Jehovah se profeet Natan het nie gehuiwer om die sondige koning Dawid tereg te wys nie (2 Samuel 12:1-12). Gedurende die heerskappy van Jerobeam II oor die tienstammeryk van Israel het die profete Hosea en Amos skerp kritiek uitgespreek teen die opstandige koning en sy ondersteuners weens hulle afvalligheid en godonterende gedrag (Hosea 5:1-7; Amos 2:6-8). Jehovah se waarskuwing aan die koning deur die profeet Amos was besonder kragtig: “Teen die huis van Jerobeam sal Ek met die swaard optree” (Amos 7:9). Jerobeam se huis is vernietig.—1 Konings 15:25-30; 2 Kronieke 13:20.
Orakels is gewoonlik teen ’n prys gegee. Die een wat meer betaal het, sou die orakel ontvang waarvan hy gehou het. Diegene wat die orakels by Delphi geraadpleeg het, het duur betaal vir waardelose inligting en sodoende die tempel van Apollo en ander geboue met groot skatte gevul. In teenstelling hiermee is Bybelprofesieë en -waarskuwings verniet en sonder enige partydigheid gegee. Dit was die geval ongeag die posisie of rykdom van die persoon aan wie dit gerig is, want ’n ware profeet kon nie omgekoop word nie. Die profeet en rigter Samuel kon opreg vra: ‘Uit wie se hand het ek omkoopgeld aangeneem om my oë daarmee toe te maak?’—1 Samuel 12:3.
Aangesien orakels net op spesifieke plekke beskikbaar was, moes ’n persoon baie moeite doen om daarheen te reis om dit te ontvang. Vir die gemiddelde mens was die meeste van hierdie plekke uiters moeilik om te bereik omdat hulle op plekke geleë was soos Dodona op die berg Tomarus in Epirus en Delphi in die bergagtige sentrale deel van Griekeland. Gewoonlik kon net die rykes en magtiges die gode by sulke orakels raadpleeg. Daarbenewens is “die wil van die gode” net op ’n paar dae gedurende die jaar geopenbaar. In skerp teenstelling hiermee het Jehovah God sy profetiese boodskappers direk na die mense gestuur om die profesieë te verkondig wat hulle moes hoor. Terwyl die Jode in ballingskap in Babilon was, het God byvoorbeeld ten minste drie profete gehad wat onder sy volk gedien het—Jeremia in Jerusalem, Esegiël saam met die ballinge en Daniël in die hoofstad van die Babiloniese Ryk.—Jeremia 1:1, 2; Esegiël 1:1; Daniël 2:48.
Orakels is oor die algemeen privaat gegee sodat die ontvanger die vertolking daarvan tot sy eie voordeel kon gebruik. In teenstelling daarmee is Bybelprofesieë dikwels in die openbaar gegee sodat almal die boodskap kon hoor en die implikasies daarvan kon verstaan. Die profeet Jeremia het baie keer in die openbaar in Jerusalem gepraat, hoewel hy geweet het dat sy boodskap ongewild was onder die leiers en die bewoners van die stad.—Jeremia 7:1, 2.
Vandag word orakels as deel van ou geskiedenis beskou. Hulle het geen praktiese waarde vir mense wat in ons kritieke tyd lewe nie. Nie een van hierdie orakels het te doen met ons dag of met ons toekoms nie. In skerp teenstelling is Bybelprofesieë deel van ‘die woord van God wat lewend is en krag uitoefen’ (Hebreërs 4:12). Die Bybelprofesieë wat reeds vervul is, voorsien ’n voorbeeld van Jehovah se handelinge met mense en openbaar belangrike kenmerke van sy voornemens en persoonlikheid. Daarbenewens gaan belangrike Bybelprofesieë in die nabye toekoms vervul word. Die apostel Petrus het beskryf wat voorlê en geskryf: “Daar is nuwe hemele [die hemelse Messiaanse Koninkryk] en ’n nuwe aarde [’n regverdige mensegemeenskap] wat ons volgens [God se] belofte verwag, en in hulle sal regverdigheid woon.”—2 Petrus 3:13.
Hierdie kort vergelyking van Bybelprofesieë en valse godsdiens se orakels sal jou heel moontlik tot dieselfde gevolgtrekking laat kom as dié van die boek met die titel The Great Ideas: “Sover dit die voorkennis van sterflike mense betref, is die Hebreeuse profete blykbaar uniek. Anders as heidense voorspellers of waarsêers . . . hoef hulle nie van kunste of middels gebruik te maak om goddelike verborgenhede te verstaan nie. . . . In die meeste gevalle lyk dit of hulle profetiese boodskappe, in teenstelling met dié van die orakels, ondubbelsinnig is. Dit lyk ten minste asof dit die bedoeling is om God se plan te openbaar, nie te verberg nie, waar dit kom by sake waarin Hy wil hê dat die mens die weg van die voorsienigheid moet vooruitsien.”
Sal jy Bybelprofesieë vertrou?
Jy kan Bybelprofesieë vertrou. Trouens, jy kan jou lewe om Jehovah en die vervulling van sy profetiese woord bou. Bybelprofesieë is nie dooie geskiedenis van voorspellings wat reeds vervul is nie. Baie profesieë in die Skrif word nou vervul of sal in die nabye toekoms bewaarheid word. Te oordeel na die verlede kan ons die volste vertroue hê dat hulle ook vervul sal word. Aangesien sulke profesieë betrekking het op ons tyd en ons toekoms daarby betrokke is, sal dit vir ons goed wees om dit ernstig op te neem.
Jy kan beslis die Bybelprofesie vertrou wat in Jesaja 2:2, 3 gevind word: “Aan die einde van die dae sal die berg van die huis van die HERE vasstaan op die top van die berge . . . En baie volke sal heengaan en sê: Kom laat ons optrek na die berg van die HERE, . . . dat Hy ons sy weë kan leer en ons in sy paaie kan wandel.” Vandag neem miljoene mense inderdaad Jehovah se verhewe aanbidding aan en leer hulle om in sy paaie te wandel. Sal jy die geleentheid aangryp om meer aangaande God se weë te leer en juiste kennis oor hom en sy voornemens in te neem sodat jy in sy paaie kan wandel?—Johannes 17:3.
Die vervulling van ’n ander Bybelprofesie vereis dringende optrede van ons. Aangaande die nabye toekoms het die psalmis profeties gesing: “Die kwaaddoeners sal uitgeroei word . . . Nog ’n klein rukkie en die goddelose sal daar nie wees nie” (Psalm 37:9, 10). Wat dink jy is nodig om te ontkom aan die naderende vernietiging van die goddelose, wat diegene insluit wat die Bybel se profesieë minag? Dieselfde psalm antwoord: “Die wat die HERE verwag, hulle sal die aarde besit” (Psalm 37:9). Om Jehovah te verwag, beteken dat ons volle vertroue in sy beloftes stel en ons lewe na sy standaarde skik.—Spreuke 2:21, 22.
Hoe gaan die lewe wees wanneer diegene wat Jehovah verwag die aarde besit? Weer eens toon Bybelprofesieë dat ’n wonderlike toekoms op gehoorsame mense wag. Die profeet Jesaja het geskryf: “Dan sal die oë van die blindes geopen en die ore van die dowes ontsluit word. Dan sal die lamme spring soos ’n takbok, en die tong van die stomme sal jubel; want in die woestyn breek waters uit en strome in die wildernis” (Jesaja 35:5, 6). Die apostel Johannes het hierdie gerusstellende woorde opgeteken: “Hy [Jehovah] sal elke traan van hulle oë afvee, en die dood sal daar nie meer wees nie, en ook verdriet en geskreeu en pyn sal daar nie meer wees nie. Die vorige dinge het verbygegaan. En die Een wat op die troon sit, het gesê: . . . ‘Skryf, want hierdie woorde is betroubaar en waaragtig.’”—Openbaring 21:4, 5.
Jehovah se Getuies weet dat die Bybel ’n boek van betroubare profesieë is. En hulle stem heelhartig saam met die apostel Petrus se vermaning: “Die profetiese woord [is] vir ons vaster gemaak; en julle doen goed deur aandag daaraan te skenk soos aan ’n lamp wat in ’n donker plek skyn, totdat die dag aanbreek en ’n dagster opgaan, in julle harte” (2 Petrus 1:19). Dit is ons opregte hoop dat jy bemoedig sal word deur die wonderlike vooruitsigte wat Bybelprofesieë vir die toekoms bied!
[Venster/Prente op bladsy 6]
DIE ORAKEL VAN DELPHI was die beroemdste orakel in eertydse Griekeland.
Die priesteres het op ’n driepoot gesit en haar orakels uitgespreek
[Prente]
Bedwelmende dampe het die priesteres in vervoering gebring
Daar is geglo dat die geluide wat sy gemaak het openbarings van die god Apollo bevat het
[Prente]
Driepoot: Uit die boek Dictionary of Greek and Roman Antiquities; Apollo: The Complete Encyclopedia of Illustration/J. G. Heck
[Prent op bladsy 7]
Voorspellings wat by die orakel van Delphi gegee is, was heeltemal onbetroubaar
[Erkenning]
Delphi, Griekeland
[Prente op bladsy 8]
Jy kan volle vertroue hê in Bybelprofesieë aangaande die nuwe wêreld