Wanneer vrygewigheid geen perke ken nie
AS JY die geleentheid gehad het om ’n geskenk vir ’n koning te gee, wat sou jy vir hom gee? Gestel hy is die rykste en wysste heerser ter wêreld. Kan jy aan enige geskenk dink wat hom sou behaag? Ongeveer drieduisend jaar gelede moes die koningin van Skeba oor hierdie vrae nadink terwyl sy gereedgemaak het om so ’n heerser te besoek—koning Salomo van Israel.
Haar geskenk, sê die Bybel vir ons, het 120 talente goud “en ’n baie groot hoeveelheid balsemolie en kosbare stene” ingesluit. Volgens vandag se waarde was die goud alleen omtrent R242 000 000 werd. Balsemolie, ’n aromatiese olie wat ook as medisyne gebruik is, is gelykgestel met goud wat kosbaarheid betref. Hoewel die Bybel nie sê hoeveel olie die koningin aan Salomo gegee het nie, sê dit wel dat haar geskenk nooit oortref is nie.—1 Konings 10:10, NW.
Die koningin van Skeba was ongetwyfeld ’n ryk en vrygewige vrou. Wat meer is, haar vrygewigheid is vergoed. “Koning Salomo”, sê die Bybel, “het aan die koningin van Skeba al haar begeerte gegee, wat sy maar gevra het, bo wat sý na die koning gebring het” (2 Kronieke 9:12, ons kursiveer). Dit was dalk wel die gebruik vir koninklikes om geskenke vir mekaar te gee; maar die Bybel praat spesifiek van Salomo se “vrygewigheid” (1 Konings 10:13, NW). Salomo self het geskryf: “Die vrygewige siel sal self vet gemaak word, en wie ander ryklik laaf, sal self ook ryklik gelaaf word.”—Spreuke 11:25, NW.
Die koningin van Skeba het natuurlik ook baie tyd opgeoffer en moeite gedoen om Salomo te besoek. Skeba was blykbaar in die gebied van die hedendaagse Republiek van Jemen; die koningin en haar karavaan kamele het byna 2 000 kilometer na Jerusalem gereis. Dit is soos Jesus gesê het: “Sy het van die uithoeke van die aarde af gekom.” Waarom het die koningin van Skeba soveel moeite gedoen? Sy het hoofsaaklik gekom “om die wysheid van Salomo te hoor”.—Lukas 11:31.
Eerste Konings 10:1, 2 sê dat die koningin van Skeba ‘gekom het om Salomo met raaisels op die proef te stel. Sy het met hom gespreek oor alles wat in haar hart was.’ Hoe het Salomo gereageer? “Salomo het haar al haar woorde verklaar; geen woord was vir die koning te diepsinnig om haar dit te verklaar nie.”—1 Konings 10:3.
Verstom oor wat sy gehoor en gesien het, het die koningin nederig geantwoord: “Gelukkig [is] hierdie dienaars van u wat gedurig voor u staan, wat u wysheid hoor”! (1 Konings 10:4-8). Sy het nie Salomo se knegte gelukkig verklaar omdat hulle deur rykdom omring was nie—al was hulle. Salomo se knegte was eerder geseënd omdat hulle gedurig na Salomo se godgegewe wysheid kon luister. Wat ’n uitstekende voorbeeld is die koningin van Skeba tog vir Jehovah se hedendaagse volk, wat hulle kan verlustig in die wysheid van die Skepper self en dié van sy Seun, Jesus Christus!
Wat ook opmerkenswaardig is, is die koningin se volgende kommentaar aan Salomo: “Mag Jehovah u God geseënd wees” (1 Konings 10:9, NW). Sy het klaarblyklik besef dat dit Jehovah is wat aan Salomo wysheid en voorspoed gegee het. Dit stem ooreen met wat Jehovah vroeër aan Israel beloof het. ‘Onderhou my insettinge’, het hy gesê, “want dit is julle wysheid en julle verstand voor die oë van die volke wat al hierdie insettinge sal hoor en sê: Waarlik, hierdie groot nasie is ’n wyse en verstandige volk.”—Deuteronomium 4:5-7.
Kom na die Gewer van wysheid
In hedendaagse tye is miljoene al tot Jehovah se organisasie aangetrek omdat hulle gesien het dat “die Israel van God” “’n wyse en verstandige volk” is, nie weens hulle eie vermoëns nie, maar omdat hulle deur God se volmaakte wette en beginsels gelei word (Galasiërs 6:16). Doopsyfers toon dat daar in onlangse jare elke jaar honderdduisende nuwe dissipels is wat as ’t ware aan geestelike Israel sê: “Ons wil met julle saamgaan, want ons het gehoor dat God met julle is” (Sagaria 8:23). Hoe verwonderd staan hierdie nuwelinge tog wanneer hulle die maaltyd van geestelike voedsel sien wat Jehovah vir sy knegte voorsien het! Hulle het nooit so iets in hulle vorige godsdienste gesien nie.—Jesaja 25:6.
Gee aan die Grootste Gewer
Waarderende persone wat soveel ontvang het, wonder natuurlik wat hulle op hulle beurt aan die grootste Koning en Gewer, Jehovah God, kan gee. Die Bybel toon dat “’n lofofferande” die beste geskenk is wat ons aan Jehovah kan gee (Hebreërs 13:15). Waarom? Omdat hierdie offerande direk verband hou met die redding van lewens, iets wat vir Jehovah van groot belang is in hierdie tyd van die einde (Esegiël 18:23). Om van ’n mens se energie en tyd te gee om die siekes, die terneergedruktes en ander te help, is ook ’n aanneemlike offerande.—1 Tessalonisense 5:14; Hebreërs 13:16; Jakobus 1:27.
Geldelike bydraes speel ’n belangrike rol. Dit word gebruik om Bybels en Bybellektuur te druk en om geboue te bekom waar Christene kan vergader (Hebreërs 10:24, 25). Bydraes word ook gebruik om noodleniging te verskaf aan slagoffers van oorloë en natuurrampe.
God se Woord bevat goeie beginsels om ons te help waar dit kom by die kwessie van gee. Dit leer byvoorbeeld dat Christene nie ’n vasgestelde bedrag gee nie, maar wat hulle redelikerwys kan gee en dat hulle dit gewillig, uit ’n blymoedige hart, gee (2 Korintiërs 9:7). Party kan baie gee; ander is soos die behoeftige weduwee in Jesus se tyd wat dalk nie veel kan gee nie (Lukas 21:2-4). Is dit nie merkwaardig dat Jehovah—die Eienaar van die ganse heelal—elke geskenk en offerande wat in sy naam en met die regte beweegrede gegee word, waardeer nie?—Hebreërs 6:10.
Om Jehovah se volk te help om blymoedig te gee, word hulle op hoogte gehou van die verskillende behoeftes asook doeltreffende maniere waarop daardie behoeftes bevredig kan word. Jehovah se heilige gees beweeg gewillige harte dan om daarop te reageer. In eertydse Israel is hierdie metode gevolg toe hulle die tabernakel, en later die tempel, gebou het (Exodus 25:2; 35:5, 21, 29; 36:5-7; 39:32; 1 Kronieke 29:1-19). In die eerste eeu G.J. het daardie selfde metode Christene in staat gestel om die nodige middele te hê om die goeie nuus van die Koninkryk aan die nasies te verkondig en om die broers in Israel gedurende ’n hongersnood te help.—1 Korintiërs 16:2-4; 2 Korintiërs 8:4, 15; Kolossense 1:23.
Jehovah het vandag eweneens sy volk geseën, en hy sal voortgaan om hulle te seën, deur aan hulle te gee wat hulle nodig het om die grootste predikings- en onderrigtingskampanje ter wêreld te voltooi.—Matteus 24:14; 28:19, 20.
Wat is die huidige behoeftes?
In onlangse jare is Jehovah se Getuies geregistreer in baie lande waar hulle werk voorheen beperk was. Gevolglik het baie van hierdie lande ’n geweldige vermeerdering in die aantal verkondigers gehad. Dit is te verstane dat daar ’n groot aanvraag na Bybels en Bybellektuur is.
Dieselfde geld vir Koninkryksale. Op die oomblik is daar nog ongeveer 9 000 Koninkryksale regoor die wêreld nodig. As een Koninkryksaal elke dag gebou word, sal dit meer as 24 jaar neem om in die huidige behoefte te voorsien! Intussen word omtrent sewe nuwe gemeentes daagliks gevorm, waarvan baie in wêrelddele is waar geld skaars is. Aan die ander kant is dit in baie van hierdie gebiede nie nodig om duur geboue op te rig nie. Op party plekke kan ’n Koninkryksaal wat in die behoefte voorsien en as ’n goeie getuienis in die gemeenskap dien vir selfs net R36 000 gebou word.
In die eerste eeu was sekere Christene finansieel beter daaraan toe as ander, en die apostel Paulus het dus geskryf: “Dat julle oorvloed nou deur middel van ’n gelykmaking hulle tekort kan aanvul, sodat hulle oorvloed ook julle tekort sal kan aanvul, sodat ’n gelykmaking kan plaasvind” (2 Korintiërs 8:14). Vandag vind ’n soortgelyke “gelykmaking” plaas wat die nodige fondse verskaf om Bybels, Bybellektuur, Koninkryksale, noodleniging en ander dinge in baie wêrelddele te voorsien. Wat ’n seën bring dit tog mee om so te gee—vir die gewer sowel as die ontvanger!—Handelinge 20:35.
Die briewe wat die Genootskap van vrygewige mense ontvang, toon dat baie lesers van hierdie tydskrif graag wil help, maar nie seker is op watter maniere bydraes gegee kan word nie. Die bygaande venster sal ongetwyfeld help om hulle vrae te beantwoord.
Gedurende Salomo se glorieryke heerskappy het “al die konings van die aarde” wat van hom gehoor het hom kom besoek. En tog maak die Bybel net melding van een heerser—die koningin van Skeba (2 Kronieke 9:23). Wat ’n opoffering het sy tog gemaak! Maar sy is ryklik beloon—soseer dat sy aan die einde van haar besoek “sprakeloos en verstom” was.—2 Kronieke 9:4, Today’s English Version.
In die toekoms sal Jehovah, die grootste Koning en Gewer, baie meer doen as wat Salomo ooit kon gedoen het vir diegene wat opofferings ter wille van Hom maak. In reaksie sal hierdie persone “sprakeloos en verstom” staan, want Jehovah sal hulle nie net deur sy vreesinboesemende oordeelsdag bewaar nie, maar hy sal daarna ‘sy hand oopmaak en alles wat lewe met welbehae versadig’.—Psalm 145:16.
[Venster op bladsy 22]
Maniere waarop party verkies om te gee
BYDRAES VIR DIE WÊRELDWYE WERK
BAIE sit ’n bedrag opsy wat hulle in die bydraebussies plaas wat gemerk is “Bydraes vir die Genootskap se wêreldwye werk—Matteus 24:14.” Gemeentes stuur elke maand hierdie bydraes na die wêreldhoofkwartier in Brooklyn, New York, of na die plaaslike takkantoor.
Vrywillige geldelike bydraes kan ook regstreeks na die Rekeningafdeling, Watch Tower Bible and Tract Society of Pennsylvania, Privaatsak X2067, Krugersdorp, 1740, Suid-Afrika, of na die Genootskap se takkantoor in die land waar jy woon, gestuur word. Juwele of ander kosbare artikels kan ook geskenk word. ’n Kort brief wat meld dat dit ’n regstreekse skenking is, moet hierdie bydraes vergesel.
REËLING VIR VOORWAARDELIKE SKENKINGS
Geld kan onder ’n spesiale reëling aan die Wagtoringgenootskap gegee word op voorwaarde dat dit aan die skenker teruggegee sal word indien hy dit self nodig sou kry. Tree asseblief in verbinding met die Rekeningafdeling van die plaaslike takkantoor vir verdere inligting.
BEPLANDE SKENKINGS
Benewens regstreekse en voorwaardelike skenkings van geld is daar ander maniere om tot voordeel van die Koninkryksdiens in alle wêrelddele te gee. Dit sluit in:
Versekering: Die Wagtoringgenootskap kan as die begunstigde van ’n lewensversekeringspolis of in ’n aftree-/pensioenskema benoem word.
Aandele en obligasies: Aandele en obligasies kan aan die Wagtoringgenootskap geskenk word, hetsy as ’n regstreekse skenking of ooreenkomstig ’n reëling waarvolgens die inkomste steeds aan die skenker betaal word.
Vaste eiendom: Verkoopbare vaste eiendom kan regstreeks aan die Wagtoringgenootskap geskenk word of dit kan geskenk word op voorwaarde dat die skenker gedurende sy of haar leeftyd daar kan bly woon. Voordat enige vaste eiendom aan die Genootdkap oorgedra word, moet ’n mens eers met die Genootskap in aanraking kom.
Testamente: Eiendom of geld kan deur ’n wettige testament aan die Wagtoringgenootskap bemaak word of die Genootskap kan as ’n begunstigde in ’n trustooreenkoms benoem word.
REKENINGAFDELING
Watch Tower Bible and Tract Society of Pennsylvania
Privaatsak X2067, Krugersdorp, 1740
Telefoon: (011) 761-1000
[Prente op bladsy 23]
Die werk van Jehovah se Getuies word deur vrywillige bydraes ondersteun