Die Bybel beantwoord die belangrike vrae van ons dag

IS DIE Bybel vandag toepaslik? Om ja te kan antwoord, moet hierdie eeue oue boek sekerlik sy lesers leiding kan bied oor onderwerpe waarin mense op die oomblik belangstel en wat toepaslik is. Gee die Bybel nuttige raad oor onderwerpe wat werklik van belang is in die wêreld van vandag?

Kom ons kyk na twee kwessies waarin mense op die oomblik belangstel. Terwyl ons dit doen, sal ons ondersoek wat die Bybel omtrent hierdie kwessies sê.

Waarom laat God lyding toe?

Met die oog op die toestande in die wêreld van vandag is een van die vrae wat die meeste gevra word: Waarom laat God toe dat onskuldige mense ly? Hierdie vraag is geregverdig, aangesien al hoe meer mense geraak word deur geweld, korrupsie, volksmoord, persoonlike tragedies, ensovoorts.

In Junie 1998 het ’n sneltrein byvoorbeeld teen ’n brug in noordelike Duitsland gebots, en meer as honderd passasiers is dood. Selfs ervare medici en brandweermanne wat die beseerdes gehelp en die dooies weggeneem het, is deur die grusame ongeluk ontstel. ’n Biskop van die Evangeliese Kerk het gevra: “Liewe Heer, waarom moes dit gebeur?” Die biskop self het geen antwoord gegee nie.

Ondervinding toon dat onskuldige mense wat ly sonder dat hulle weet wat die oorsaak van hulle lyding is soms verbitterd raak. Hier kan die Bybel help, want dit verduidelik waarom onskuldige mense aan goddeloosheid en lyding onderwerp word.

Toe Jehovah God die aarde en alles daarop geskep het, het hy nie in gedagte gehad dat goddeloosheid en lyding die mensdom moet teister nie. Hoe kan ons seker wees? Want toe hy sy skepping voltooi het, het “God alles [gesien] wat Hy gemaak het, en—dit was baie goed” (Genesis 1:31). Vra jou af: ‘As ek iets goddeloos sien, sou ek dan verklaar dat dit “baie goed” is?’ Natuurlik nie! Net so was daar geen spoor van goddeloosheid op die aarde toe God verklaar het dat alles “baie goed” is nie. Wanneer en hoe het goddeloosheid dus begin?

Kort ná die skepping van ons eerste ouers, Adam en Eva, het ’n magtige geesskepsel die vrou genader en Jehovah se waaragtigheid en die regmatigheid van sy soewereiniteit betwis (Genesis 3:1-5). Hierdie skepsel, Satan die Duiwel, het later beweer dat mense nie tydens teëspoed aan God lojaal sou bly nie (Job 2:1-5). Hoe het Jehovah op hierdie situasie gereageer? Hy het toegelaat dat tyd verloop sodat dit duidelik kon word dat mense nie onafhanklik van hom hulle voetstappe met welslae kan rig nie (Jeremia 10:23). Wanneer mense in stryd met God se wette en beginsels optree, lei dit tot sonde, met skadelike gevolge vir hulle (Prediker 8:9; 1 Johannes 3:4). Maar ondanks hierdie ongunstige omstandighede het Jehovah geweet dat party mense hulle onkreukbaarheid teenoor hom sou handhaaf.

Sedert daardie opstand in Eden wat soveel droefheid tot gevolg gehad het, het sowat 6 000 jaar verloop. Is dit te lank? Jehovah kon Satan en sy ondersteuners eeue gelede al vernietig het. Maar was dit nie beter om te wag totdat elke greintjie twyfel oor die regmatigheid van Jehovah se soewereiniteit en die onkreukbaarheid van mense teenoor hom uit die weg geruim is nie? Is dit nie die geval met huidige regstelsels dat ’n hofsaak waarin bewys moet word wie reg en wie verkeerd is dalk jare kan duur nie?

Met die oog op die belangrikheid van die geskille waarvoor Jehovah en die mensdom te staan gekom het—universele soewereiniteit en die onkreukbaarheid van mense—hoe wys was dit tog van God om toe te laat dat tyd verbygaan! Nou sien ons duidelik wat gebeur wanneer mense God se wette ignoreer en self hulle sake probeer rig. Die gevolg is wydverspreide boosheid. En dit is waarom soveel onskuldige mense vandag ly.

Maar gelukkig toon God se Woord dat goddeloosheid nie vir ewig sal voortduur nie. Trouens, Jehovah sal binnekort ’n einde maak aan boosheid en aan diegene wat dit veroorsaak. “Wat die goddeloses betref,” sê Spreuke 2:22 (NW), “hulle sal van die aarde af uitgeroei word; en wat die verraderlikes betref, hulle sal daarvan weggeruk word.” Aan die ander kant kan diegene wat aan God getrou is, uitsien na ’n tyd, wat nou op hande is, wanneer ‘die dood nie meer daar sal wees nie, en ook verdriet en geskreeu en pyn nie meer daar sal wees nie’.—Openbaring 21:4.

Die Bybel toon dus duidelik waarom die onskuldiges ly. Dit verseker ons ook dat daar binnekort ’n einde gemaak gaan word aan boosheid en lyding. Maar terwyl ons die huidige ellendes van die lewe ondervind, het ons die antwoord op ’n ander belangrike vraag nodig.

Wat is die doel van die lewe?

Mense probeer dalk nou meer as op enige ander tyd in die mensdom se geskiedenis uitvind wat die doel van die lewe is. Baie vra hulle af: ‘Waarom lewe ek? Hoe kan ek sin in my lewe vind?’ Verskillende omstandighede beweeg hulle om hierdie vrae te opper.

Iemand se lewe kan dalk verwoes word deur ’n persoonlike tragedie. Vroeg in 1998 is ’n 12-jarige meisie wat in Beiere, Duitsland, gewoon het byvoorbeeld ontvoer en vermoor. ’n Jaar later het haar moeder erken dat sy elke dag na ’n doel in die lewe soek—maar tevergeefs. Party jongmense wonder oor die sin van die lewe. Hulle soek na sekuriteit, vervulling en ’n gevoel dat hulle iewers hoort, maar word net met wanhoop vervul weens die wydverspreide huigelary en korrupsie. Ander bou hulle lewe om ’n loopbaan, maar hulle vind uit dat mag, aansien en besittings nie die innerlike hunkering bevredig om ’n rede vir hulle bestaan te vind nie.

Ongeag wat die rede is dat ’n mens begin wonder oor die doel van die lewe, hierdie vraag verdien ’n ernstige en bevredigende antwoord. Weer eens kan die Bybel baie nuttig wees. Dit identifiseer Jehovah as ’n God met voornemens, iemand wat goeie redes het vir alles wat hy doen. Ons vra: Sou jy sonder rede ’n huis bou? Waarskynlik nie, aangesien dit hope geld kan kos en maande of jare kan duur om ’n huis te bou. ’n Mens bou ’n huis sodat jy of iemand anders daarin kan woon. Dieselfde logika geld vir Jehovah. Hy het nie sonder ’n rede, of ’n voorneme, al die moeite gedoen om die aarde en die lewende dinge daarop te skep nie. (Vergelyk Hebreërs 3:4.) Wat is sy voorneme met die aarde?

Die profesie van Jesaja identifiseer Jehovah as “die ware God, die Formeerder van die aarde en die Maker daarvan”. Hy is waarlik die een “wat [die aarde] stewig gevestig het, wat dit nie verniet geskep het nie, wat dit geformeer het om bewoon te word” (Jesaja 45:18, NW). Ja, vandat die aarde geskep is, was dit nog altyd Jehovah se voorneme dat dit bewoon moet word. Psalm 115:16 sê: “Die hemele is hemele vir die HERE, maar die aarde het Hy aan die mensekinders gegee.” Met hierdie woorde toon die Bybel dat Jehovah die aarde geskep het om bewoon te word deur gehoorsame mense wat daarvoor sou sorg.—Genesis 1:27, 28.

Het die opstand van Adam en Eva veroorsaak dat Jehovah sy voorneme verander het? Nee. Hoe kan ons so seker wees? Wel, dink aan hierdie gedagte: Die Bybel is duisende jare ná die opstand in Eden geskryf. As God sy oorspronklike voorneme laat vaar het, waarom word dit nie in die Bybel gemeld nie? Die duidelike gevolgtrekking is dat sy voorneme met die aarde en die mensdom onveranderd gebly het.

Daarbenewens faal Jehovah se voorneme nooit nie. Deur Jesaja gee God hierdie versekering: “Soos die reën en die sneeu van die hemel neerdaal en daarheen nie terugkeer nie, maar die aarde deurvogtig en maak dat dit voortbring en uitspruit en saad gee aan die saaier en brood aan die eter; so sal my woord wees wat uit my mond uitgaan: dit sal nie leeg na My terugkeer nie, maar doen wat My behaag en voorspoedig wees in alles waartoe Ek dit stuur.”—Jesaja 55:10, 11.

Wat God van ons verwag

Dit is dus duidelik dat ons volle vertroue kan hê in die vervulling van God se voorneme om gehoorsame mense vir ewig die aarde te laat bewoon. As ons onder diegene wil wees wat die voorreg gaan hê om vir altyd op die aarde te woon, moet ons doen wat wyse koning Salomo gesê het: “Vrees God en hou sy gebooie; want dit geld vir alle mense.”—Prediker 12:13; Johannes 17:3.

As ons in ooreenstemming met Jehovah se voorneme vir die mensdom wil lewe, beteken dit dat ons die ware God moet leer ken en volgens sy vereistes moet lewe, soos dit in die Heilige Skrif uiteengesit word. As ons dit nou doen, kan ons die hoop hê om vir ewig op ’n paradysaarde te lewe, waarin ons nooit sal ophou om nuwe dinge omtrent God en sy wonderlike skepping te leer nie (Lukas 23:43). Wat ’n opwindende vooruitsig!

Baie wat na ’n doel in die lewe soek, wend hulle na die Bybel en vind nou reeds groot vreugde. ’n Jong man met die naam Alfred kon byvoorbeeld geen sin in die lewe vind nie. Die betrokkenheid van godsdiens by oorlog het hom gewalg, en hy was ontsteld oor die huigelary en korrupsie in die politiek. Alfred het Indiane van Noord-Amerika besoek in die hoop dat hy sou verstaan wat die doel van die lewe is, maar het net teleurgesteld na Europa teruggekeer. Uit wanhoop het hy dwelms begin gebruik en na wilde musiek begin luister. Maar nadat Alfred die Bybel later gereeld en sorgvuldig ondersoek het, is hy gehelp om te besef wat die ware doel van die lewe is en om tevredenheid te verkry.

’n Betroubare lig vir ons pad

Tot watter gevolgtrekking kan ons dan oor die Bybel kom? Is dit vandag toepaslik? Dit is beslis, want dit bied leiding oor aktuele kwessies. Die Bybel verduidelik dat goddeloosheid nie weens God se toedoen bestaan nie en help ons om ’n bevredigende doel in die lewe te vind. Daarbenewens het die Bybel baie te sê oor ander sake wat vandag van groot belang is. Onderwerpe soos die huwelik, die grootmaak van kinders, menseverhoudings en ’n hoop vir die dooies word in God se Woord bespreek.

As jy dit nie nou alreeds doen nie, kan jy gerus die Bybel noukeurig ondersoek. As jy eers die werklike waarde van die riglyne vir die lewe daarin ontdek het, sal jy dalk voel soos die psalmis wat op Jehovah God staatgemaak het vir leiding en gesing het: “U woord is ’n lamp vir my voet en ’n lig vir my pad.”—Psalm 119:105.

[Prent op bladsy 6]

Weet jy waarom God toelaat dat die onskuldiges ly?

[Prent op bladsy 7]

Jy kan ’n doelgerigte lewe geniet