Moet jy ondersoek instel na ander godsdienste?

“EK HET byna ’n jaar lank Christelike vergaderinge bygewoon, en ek het dit geniet om ander van God se Koninkryk te vertel”, sê Miguel, wat nou een van Jehovah se Getuies is in Suid-Amerika. “Toe het ek na godsdiensprogramme op die radio begin luister en na programme met godsdienspredikers op die televisie begin kyk. Ek het gedink dat sulke programme my kon help om mense van ander godsdienste beter te verstaan. Ek het besef dat hulle leerstellings nie met die Bybel ooreenstem nie, maar ek was nuuskierig.”

In dieselfde land het Jorge ander ywerig omtrent ware aanbidding geleer. Maar hy het ook op een stadium na godsdienstige radio- en televisieprogramme begin luister. “’n Mens moet weet wat ander dink”, het hy altyd gesê. Wanneer ander hom gevra het oor die moontlike gevare van sulke blootstelling aan valse leerstellings, het hy geantwoord: “Niks kan die geloof ondermyn van iemand wat Bybelwaarheid ken nie.” Hierdie ondervindinge laat ’n belangrike vraag ontstaan: Is dit verstandig om te luister na wat ander glo?

Identifiseer die ware Christelike godsdiens

Ná die dood van die apostels is ware aanbidding deur die progressiewe ontwikkeling van baie soorte nagemaakte Christelike godsdienste besoedel. Jesus het dit vooruitgesien en een manier geopenbaar waarop ’n mens tussen hierdie nagemaakte Christelike godsdienste en die ware Christelike godsdiens kan onderskei. Eerstens het hy gewaarsku: “Pas op vir die valse profete wat in skaapsklere na julle toe kom, maar van binne roofsugtige wolwe is.” Toe het hy bygevoeg: “Aan hulle vrugte sal julle hulle herken” (Matteus 7:15-23). Jesus se ware volgelinge pas toe wat hy hulle geleer het, en hulle word maklik herken aan hulle goeie vrugte. Net soos Jesus self gedoen het, besoek hulle mense om God se Koninkryk uit die Skrif te verduidelik. Hulle volg Jesus se voorbeeld na deur hulle afgeskeie te hou van die wêreld se politiek en sy maatskaplike geskille. Hulle aanvaar die Bybel as God se Woord en respekteer dit as die waarheid. Hulle maak God se naam bekend. En aangesien hulle die liefde aan die dag probeer lê wat God ons leer om te hê, neem hulle nie aan oorloë deel nie. Hulle behandel mekaar eerder soos broers.—Lukas 4:43; 10:1-9; Johannes 13:34, 35; 17:16, 17, 26.

Volgens die Skrif is dit moontlik om “die onderskeid [te] sien tussen die regverdige en die goddelose, tussen die wat God dien en die wat Hom nie dien nie” (Maleagi 3:18). Ware aanbidders van vandag is in denke en dade verenig, net soos die eerste-eeuse Christene was (Efesiërs 4:4-6). As jy eers so ’n groep ware Christene geïdentifiseer het, waarom moet jy nuuskierig wees oor die opvattings van ander?

Pas op vir valse leraars

Die Bybel erken dat daar selfs nadat ’n mens Bybelwaarheid geleer het, ’n gevaar bestaan om geestelik besoedel te word deur valse leerstellings. Die apostel Paulus het gewaarsku: “Pas op: miskien is daar iemand wat julle as sy prooi sal wegvoer deur die filosofie en leë bedrog volgens die oorlewering van mense, volgens die elementêre dinge van die wêreld en nie volgens Christus nie” (Kolossense 2:8). Wat ’n treffende beeld skilder hierdie teks tog nie! Soos wilde diere wat jou wil wegdra en verslind, kan valse leraars ’n wesenlike gevaar inhou.

Paulus het weliswaar gelet op wat ander glo. Hy het eenkeer ’n toespraak begin deur te sê: “Manne van Atene, ek sien dat julle blykbaar in alles meer tot die vrees vir die godhede geneig is as ander. Terwyl ek rondgegaan en julle voorwerpe van verering sorgvuldig waargeneem het, het ek byvoorbeeld ook ’n altaar gevind waarop gegraveer is: ‘Aan ’n Onbekende God’” (Handelinge 17:22, 23). Maar Paulus het nie gereeld sy verstand gevul met die filosofieë van Griekse redenaars nie.

Dit is een ding om jouself op hoogte te bring van die oorsprong en opvattings van valse godsdienste, maar iets heeltemal anders om gereeld kennis daarvan in te neem.a Jehovah het “die getroue en verstandige slaaf” aangestel om ons op grond van sy Woord te onderrig (Matteus 4:4; 24:45). Paulus self het geskryf: “Julle kan nie deel hê aan ‘die tafel van Jehovah’ en die tafel van demone nie. Of ‘wek ons Jehovah tot jaloesie op’?”—1 Korintiërs 10:20-22.

Party valse leraars was dalk voorheen ware Christene, maar het op die een of ander stadium van die waarheid afgewyk en hulle na dwaling gekeer (Judas 4, 11). Dit behoort ons nie te verbaas nie. Nadat Jesus van “die getroue en verstandige slaaf” gepraat het wat die liggaam van gesalfde Christene afbeeld, het hy van die “bose slaaf” gepraat, ’n klas wat kla: “My heer talm om te kom”, en sy medeslawe begin slaan (Matteus 24:48, 49). Hierdie individue en hulle volgelinge het dikwels self geen duidelike leringe nie; hulle stel net daarin belang om die geloof van ander te vernietig. Die apostel Johannes het aangaande hulle geskryf: “As iemand na julle toe kom en nie hierdie leer bring nie, moet julle hom nooit in julle huise ontvang of hom groet nie.”—2 Johannes 10; 2 Korintiërs 11:3, 4, 13-15.

Dit sal vir opregte mense wat na die waarheid soek goed wees om versigtig na te dink oor wat hulle van verskillende godsdienste hoor. God sal opregtes van hart wat na die waarheid soek met verloop van tyd seën. Die Bybel sê van Goddelike wysheid: “As jy daarna soek soos na silwer en dit naspeur soos verborge skatte, dan sal jy . . . die kennis van God vind” (Spreuke 2:4, 5). As ware Christene eers hierdie kennis van God deur middel van die Bybel en die Christengemeente gevind het en gesien het hoe Jehovah diegene seën wat deur daardie kennis gelei word, gaan hulle nie voort om na valse godsdiensleerstellings te luister nie.—2 Timoteus 3:14.

[Voetnoot]