Hou aan om ‘veel vrug te dra’
1 Jesus het simboliese taal gebruik en homself as die ware wingerdstok, sy Vader as die Landbouer en sy geesgesalfde volgelinge as vrugbare lote van die wingerdstok uitgebeeld. Toe Jesus die werk van die simboliese Landbouer beskryf het, het hy beklemtoon hoe belangrik dit is om ’n onafskeidbare deel van die wingerdstok te bly (Joh. 15:1-4). Die les is dat almal wat ’n hegte persoonlike verhouding met Jehovah het, soos ’n vrugbare loot van die “ware wingerdstok”, Jesus Christus, moet wees. Ons moet aanhou om “die vrugte van die gees” sowel as Koninkryksvrug oorvloedig voort te bring.—Gal. 5:22, 23; Matt. 24:14; 28:19, 20.
2 Die vrug van die gees: Ons geestelike vooruitgang kan grotendeels gemeet word aan die mate waarin ons die vrug van die gees aan die dag lê. Werk jy daaraan om die vrug van God se gees aan te kweek deur God se Woord gereeld te bestudeer en daaroor te peins? (Fil. 1:9-11). Moenie huiwer om te bid vir heilige gees nie, wat eienskappe kan voortbring wat Jehovah verheerlik en volgehoue geestelike vooruitgang bevorder.—Luk. 11:13; Joh. 13:35.
3 As ons die vrug van die gees aankweek, sal dit ons ook help om yweriger bedienaars te wees. Byvoorbeeld, liefde en geloof beweeg ons om tyd in ons besige rooster in te ruim om gereeld aan die bediening deel te neem. Eienskappe soos vrede, lankmoedigheid, goedhartigheid, sagmoedigheid en selfbeheersing help ons om reg op te tree teenoor teenstanders. Vreugde help ons om bevrediging uit die bediening te put, al is mense onontvanklik.
4 Koninkryksvrug: Ons wil ook Koninkryksvrug voortbring. Dit sluit in dat ons “’n lofoffer bring, dit wil sê die vrug van die lippe wat [Jehovah se] naam in die openbaar bekend maak” (Heb. 13:15). Ons doen dit deur die goeie nuus ywerig en sonder ophou te verkondig. Streef jy daarna om meer Koninkryksvrug voort te bring deur jou persoonlike bediening te verbeter?
5 Jesus het getoon dat sy getroue volgelinge nie ewe veel vrug sou dra nie (Matt. 13:23). Ons moet ons dus nie met ander vergelyk nie, maar moet ons beste aan Jehovah gee (Gal. 6:4). ’n Eerlike selfondersoek van ons persoonlike omstandighede aan die hand van God se Woord sal ons help om aan te hou om Jehovah te verheerlik deur “veel vrug [te] dra”.—Joh. 15:8.